“ABŞ dövlət başçısı Donald Trampın Qüdsü İsrailin paytaxtı elan etməsi regiondakı vəziyyəti daha da çətinləşdirib”.

APA-nın xəbərinə görə, bunu Kremlin sözçüsü Dmitri Peskov jurnalistlərə açıqlamasında deyib.

O bildirib ki, Trampın qərarı Yaxın Şərqdə münaqişələrin həll prosesinə heç bir fayda verməyəcək, əksinə bölgədəki gərginliyi daha da artırıb.

Peskov bu axşam Putinin Ərdoğanla telefonla danışacağını deyib. O qeyd edib ki, tərəflər Trampın Qüdslə bağlı qərarı üzündən Yaxın Şərqdə yaranmış vəziyyəti müzakirə edəcəklər.

Fələstin torpaqlarında Ağ Evin ABŞ səfirliyinin Təl-Əvivdən Qüdsə keçirilməsi ilə bağlı qərarına etiraz aksiyaları başlayıb.

Dalga tv Oxu.Az-a istinadən xəbər verir ki, ilk olaraq küçələr Qəzza sakinləri çıxıblar.

HƏMAS təşkilatının rəhbərliyi yerli sakinlərə müraciət edərək “üç günlük qəzəb” aksiyası keçirməyə çağırıb.

Etirazlara partiya nümayəndələri də qoşulublar.

Fələstin rəhbərliyi hesab edir ki, ABŞ-ın qərarı Yaxın Şərqdə sülh prosesini dəstəkləməkdən imtinaya bərabərdir.

Pakistanın Əfqanıstanla sərhədində yerləşən hərbi hissəsində partlayış baş verib.

APA-nın “Reuters”-ə istinadən verdiyi xəbərə görə, Pakistanın şimal-qərb hissəsində, Vəziristan əyalətində hərbi hissədə törədilən partlayış nəticəsində 9 nəfər ölüb. Motosikletdə olan terrorçu-kamikadze özünü partladıb.

Pakistan Ordusunun hələlik heç bir açıqlama verilməyib.

Partlayışla əlaqədar heç bir terror qruplaşması məsuliyyəti üzərinə götürməyib.

"Qüds (Yerusəlim) şəhəri bütün müsəlmanların göz bəbəyidir”.

APA-nın xəbərinə görə, bunu Türkiyə prezidenti Rəcəb Tayyib Ərdoğan İordaniya kralı Abdullahla mətbuata birgə bəyanatlarla çıxış edərkən deyib.

Türkiyə prezidenti bildirib ki, Qüds şəhərinin hüquqi statusunu dəyişdirəcək addım atılmamalıdır: “Qüdsün statusu ilə bağlı atılacaq hər hansı yanlış addım islam dünyasında hiddətə səbəb olacaq. Qüdsün müqəddəsliyi və tarixi statusunun mühafizəsi məsələsində İordaniya ilə mövqeyimiz eynidir”.

Ərdoğan Qüds şəhəri ilə bağlı dünya ölkələrinə müraciət edib: “Qüdsün Birləşmiş Millətlər Təşkilatının qərarları ilə müəyyən edilmiş hüquqi statusunu dəyişdirəcək istənilən addımdan uzaq durulmalıdır. Şəxsi istəklərə görə sayı milyarddan çox olan müsəlmanların taleyi ilə oynamağa heç kimin haqqı yoxdur”.

İordaniya kralı isə deyib ki, Qüdslə bağlı narahatlığını ABŞ prezidenti Donald Trampa çatdırıb.

Qeyd edək ki, ABŞ prezidenti D. Tramp bu gün Qüdsün İsrailin paytaxtı kimi tanındığını rəsmi elan edəcək. ABŞ prezidentinin müvafiq bəyanatı bu gün Bakı vaxtı ilə saat 22.00-da səsləndiriləcək.

Xatırladaq ki, ərəb ölkələrinin liderləri ABŞ prezidentinin niyyətini tənqid ediblər. Avropa İttifaqı isə D. Trampın bu qərarının Yaxın Şərq probleminin həlli istiqamətində səylərə xələl gətirə biləcəyi ilə bağlı xəbərdarlıq edib.  Türkiyə prezidenti isə elan edib ki, ABŞ Qüdsü İsrailin paytaxtı kimi tanısa, İsraillə diplomatik əlaqələr kəsiləcək.

ABŞ prezidenti Donald Tramp Qüdsün İsrailin paytaxtı kimi tanındığını rəsmi elan edib. 

APA-nın xəbərinə görə, ABŞ prezidenti bəyanatını mövcud reallığa əsaslanaraq verdiyini bildirib.

“Yerusəlimin  rəsmi olaraq İsrailin paytaxtı kimi tanınmasının vaxtı çatıb”, deyə D.Tramp vurğulayıb.

D.Tramp həmçinin əlavə edib ki, ABŞ regionda sülhün əldə olunması üçün əlindən gələni edəcək.

Bundan əvvəl ərəb ölkələrinin liderləri ABŞ prezidentinin niyyətini tənqid ediblər, İslam Əməkdaşlıq Təşkilatına (İƏT) üzv ölkələr ABŞ prezidenti Trampı Qüdsü İsrailin paytaxtı kimi tanımaqdan və ölkə səfirliyini Qüdsə köçürməkdən çəkinməyə çağırıblar.

Aİ isə D.Trampın bu qərarının Yaxın Şərq probleminin həlli istiqamətində səylərə xələl gətirə biləcəyi ilə bağlı xəbərdarlıq edib.

İranda şimalında 4,8 bal gücündə zəlzələ olub.

Dalga tv Oxu.Az-a istinadən məlumatına görə, təkanlar bir neçə dəqiqə əvvəl Gilan vilayətinin Ləngərut şəhərində qeydə alınıb.

Zəlzələnin dərinliyi 23 km olub. İnsan itkisi və dağıntı barədə hələlik məlumat yoxdur.

Qeyd edək ki, ötən ay İranın Kirmanşah əyalətində, İraqla sərhəd yaxınlığında baş verən 7,2 bal gücündə zəlzələdə son məlumata görə, 569 nəfər həlak olub. Yeraltı təkanlar BƏƏ, Küveyt və İsraildə də hiss olunmuşdu.