PYD/PKK terrorçuları Suriyanın Afrin əyalətindən Türkiyənin Kilis şəhərinə raket atıblar.

Dalga tv Anadolu-ya istinadən xəbər verir ki, raket Şıx Mehmet küçəsində partlayıb.

İlkin məlumatlara görə, xəsarət alan yoxdur. Raketin düşdüyü yeri polis mühasirəyə alıb.

Qeyd edək ki, Türkiyə ordusu yanvarın 20-də Suriyanın Afrin əyalətində  PYD/PKK terrorçularına qarşı əməliyyata başlayıb.

ABŞ-da qrip epidemiyasından artıq 37 uşaq dünyasını dəyişib.

Dalga tv xəbər verir ki, bu barədə Xəstəliklərin Profilaktikası və Nəzarət üzrə Federal Mərkəzlərin rəhbəri Brend Fitsceralda istinadən "The Hill" qəzeti yazıb.

Ekspertlər hesab edirlər ki, epidemiyanın qarşısı alınana qədər ölənlərin sayı arta bilər. Bütövlükdə ölkə üzrə qriplə bağlı xəstəliklər 50 mindən çox insanın həyatı bahasına başa gələ bilər.

Bu il mövsümü ştamm daha çox yayılmış H3N2 olub.

Braziliyanın Fortoleza şəhərində gecə klubunda atışma nəticəsində 18 nəfər ölüb, 6 nəfər isə yaralanıb. APA-nın Gazeta.ru-ya istinadən verdiyi xəbərə görə, insident nəticəsində ölənlərin əksəriyyəti qadındır. Şahidlərin sözlərinə görə, kluba hücum etmiş 15-dək  silahlı şəxs üç avtomobildə hərəkət edib. 

Polis hücumun "Guardianes del Estado"  cinayətkar qrupun üzvləri tərəfindən törədildiyini ehtimal edir. 

Türkiyə Hərbi-Hava Qüvvələri Suriyanın Afrin bölgəsində PKK, YPG və İŞİD terrorçularına qarşı aparılan "Zeytun budağı" əməliyyatı çərçivəsində yanvarın 27-də terror təşkilatlarına məxsus 42 obyekti və 53 terrorçunu  məhv edib.

APA-nın Türkiyənin SH Baş Qərargahının məlumatına istinadən verdiyi xəbərə görə, əməliyyatda iştirak etmiş 22 təyyarənin hamısı bazalara qayıdıb.

Əməliyyat başlayandan (yanvarın 20-dən), ümumilikdə, 394 terrorçunun məhv edildiyi bildirilir. Türkiyə ordusunun 2 hərbçisi şəhid olub, 11 nəfəri yaralanıb

"Avropada bəziləri Türkiyə ordusuna işğal ordusu deyir. Tarixinizə baxın, tarixiniz Afrikanın, digər bölgələrin işğalı, sömürülməsi ilə doludur".

APA-nın Türkiyənin NTV telekanalına istinadən verdiyi məlumata görə, bunu bu gün Türkiyə prezidenti Rəcəb Tayyib Ərdoğan Amasiya şəhərində keçirilən mitinqdə bildirib.

R. T. Ərdoğan Almaniyada polislərin gözü qarşısında PKK terror təşkilatının üzvlərinin məscidlərə hücum çəkdiyini söyləyib: "Ancaq biz bu ölkədə heç bir terrorçuya sığınacaq vermədik. O terrorçuları ya ölkələrinə göndərdik, ya da həbs etdik. Onlara kimin işğalçı, kimin qonaqpərvər olduğunu göstərəcəyik. Biz Afrinə niyə girmişik? Məqsədimiz Afrini işğal etmək deyil. Hazırda 3 milyondan çox suriyalı Türkiyədə qonağımızdır. Bu suriyalıların torpaqlarına qayıtması üçün Afrin əməliyyatını həyata keçirir, o torpaqları PKK terror təşkilatının Suriya qolu PYD/YPG-dən azad edirik. Biz "Fərat qalxanı" əməliyyatı ilə Suriyada 2 min kv.km ərazini İŞİD terrorçularından azad etdik, 100 mindən çox suriyalı o torpaqlara qayıtdı. Qalan suriyalıların da qayıtması üçün ordumuz bu əməliyyatları keçirir".

Qeyd edək ki, yanvarın 20-də Türkiyə ordusu müxalif Azad Suriya Ordusu ilə birlikdə Suriyanın Afrin bölgəsinin PYD/YPG terrorçularından təmizlənməsi üçün "Zeytun budağı" əməliyyatına başlayıb. 

Amsterdam polisi şəhərin mərkəzində baş verən atışmanı kriminal münaqişə kimi qiymətləndirir.

APA-nın xəbərinə görə, bu barədə yerli "AT5" telekanalı polisdəki mənbələrə istinadən məlumat verib.

Məlumata əsasən, hadisənin terrorla əlaqəsi olduğu güman edilmir.

Yanvarın 26-sı, axşam saatlarında Amsterdamda baş verən atışma nəticəsində 1 nəfər ölüb, 2 nəfər yaralanıb. Yaralılar xəstəxanaya yerləşdirilib, onların vəziyyətləri barədə məlumat verilmir.

RTL telekompaniyasının məlumatına görə, insidentlə əlaqədar hələ ki, saxlanılan yoxdur.