ABŞ-da etiraz aksiyaları başlayıb.

Dalga tv xəbər verir ki, Los Anceles, Nyu-York, Çikaqo, Denver də daxil olmaqla, onlarla şəhərdə insanlar Donald Trampın hakimiyyətə gəlməsinin ildönümü ilə əlaqədar etiraz aksiyaları keçirir. Əhali prezidentin yürütdüyü siyasətdən narazılığını ifadə edir. Etirazlar əsasən miqrasiya siyasətinə və abortların maliyyələşməsinin məhdudlaşdırılmasına görədir.

Aksiyalara cinsi azlıqlar və miqrantları müdafiə edən təşkilatlar da qoşulub.

Türkiyə ordusu Suriyanın şimalındaki Afrin bölgəsində “Zeytun budağı” əməliyyatına uğurla başlayıb.

Dalga tv xəbər verir ki, bu barədə Türkiyə Silahlı qüvvələri məlumat yayıb. Verilən məlumata görə, “Fərat qalxanı”ndan sonra ikinci böyük hərbi əməliyyat olan “Zeytun budağı” ötən gündən başlanılıb.

Əməliyyata ilk öncə Türkiyə Hərbi Hava Qüvvələrinin 72 ədəd “ F-16” təyyarəsi cəlb edilib. Türkiyə hərbçiləri “Azad Suriya ordusu” müxalifət birləşmələrilə birgə Suriyada məskunlaşan PKK, PYD və YPG terror təşkilatının silahlılarının məkanlarına zərbələr endiriblər.

Verilən məlumatlara görə, əməliyyatın ilk günü Türkiyə döyüşçüləri Afrinin 3.5 kilometrliyinə qədər irəliləyiblər. Hələlik terrorçular onlara güclü müqavimət göstərə bilməyiblər. Əməliyyatlar zamanı terrorçular çox canlı qüvvə itiriblər.

Türkiyə prezidenti Rəcəb Tayyib Ərdoğan qondarma "erməni soyqırımı" ilə bağlı həqiqətlərin üzə çıxması üçün bir daha Ermənistana arxivlərin açılmasını təklif edib.

APA-nın məlumatına görə, bunu bu gün Türkiyə prezidenti, hakim Ədalət və İnkişaf Partiyasının sədri Rəcəb Tayyib Ərdoğan Bursada partiyanın rayon təşkilatının konfransında bildirib ki, ermənilərin köçürülməsinə səbəb olan hadisələr zamanı ölən türklərin sayı köçürülmə zamanı həyatını itirdiyi iddia olunan ermənilərin sayından dəfələrlə çoxdur.

R. T. Ərdoğan deyib ki, həmin hadisələrlə bağlı Türkiyə Silahlı Qüvvələrin Baş Qərargahının arxivində 1 milyon 700 min sənəd var: "Həmin sənədlərin 1 milyonu indiyə qədər açılıb. Biz qondarma "erməni soyqırımı"nın araşdırılması üçün arxivlərin açılmasını təklif etdik. Bu günə qədər arxivlərin açılması təklifimizi qəbul etməyiblər. Qarşımıza çıxmağa cəsarət etmədilər". 

Bu gün Suriyanın Afrin bölgəsindən Türkiyənin Hatay rayonunun Reyhanlı qəsəbəsinə 3 raket atılıb.

APA-nın Türkiyənin NTV telekanalına istinadən verdiyi məlumata görə, raketlərdən ikisi Reyhanlının Rıfat Bahadırlı prospektindəki bir evə və Cümhuriyyət prospektindəki bir iş yerinə düşüb.

Nəticədə 2-i ağır olmaqla, 32 nəfər yaralanıb. İş yeri yaxınlığında bir avtomobildə olan suriyalı mühacir isə ölüb.

Qeyd edək ki, dünən Türkiyə Baş Qərargahı yerli vaxtla saat 17.00-da Afrin bölgəsində "Zeytun budağı" əməliyyatı başladığını, hərbi əməliyyatda məqsədin bölgənin PKK terror təşkilatının Suriya qolu PYD/YPG, İŞİD və digər terror təşkilatlarından təmizləmək olduğunu bəyan edib. Dünən Türkiyə qırıcı təyyarələri bölgədə terror təşkilatının hədəflərinə hava zərbələri endirib. Bu gün isə Türkiyə ordusu Suriyanın Afrin bölgəsində quru əməliyyatına başlayıb. Suriyada "Fərat" qalxanı əməliyyatı çərçivəsində azad edilmiş bölgədən də Afrinə müxalif Azad Suriya ordusunun hücumu başlayıb. Azad Suriya Ordusunun bölmələri Türkiyə tanklarının müşayiəti ilə irəliləyir. Gün ərzində 3 kənd terrorçulardan təmizlənib.

Əfqanıstanın paytaxtı Kabildə silahlıların “Intercontinental Hotel” mehmanxanasına hücumu nəticəsində 35 nəfər ölüb və yaralanıb. 

Oxu.Az-ın “RİA Novosti”yə istinadən verdiyi xəbərə görə, ölən və yaralananların dəqiq sayı hələlik məlum deyil. Məlumata görə, hücum edənlərdən biri məhv edilib. Otelin ikinci mərtəbəsində güclü yanğın baş verib.   

Məlumata görə, üzərilərində partlayıcı qurğuların olduğu dörd terrorçu otelə hücum edərək bir qrup şəxsi girov götürüblər. Daha sonra silahlılar və binanı mühasirəyə almış polis əməkdaşları arasında atışma olub.   

Yerli sakinlər hadisə yerində bir neçə partlayışın baş verdiyini bildiriblər. 

Türkiyə Suriya sərhədi boyu 30 km genişlikdə təhlükəsizlik zolağı  formalaşdıracaq.

APA-nın Türkiyənin NTV telekanalına istinadən verdiyi məlumata görə, bunu bu gün Türkiyə baş naziri Binəli Yıldırım media təmsilçiləri ilə görüşdə bəyan edib.

B. Yıldırım Türkiyə ordusunun dünən başladığı "Zeytun budağı" əməliyyatında da əsas məqsədin Türkiyə sərhədi boyu Suriya ərazisində 30 km genişlikdə təhlükəsizlik zolağı yaratmaq olduğunu bildirib.

Qeyd edək ki, dünən Türkiyə Baş Qərargahı yerli vaxtla saat 17.00-da Afrin bölgəsində "Zeytun budağı" əməliyyatı başladığını, hərbi əməliyyatda məqsədin bölgənin PKK terror təşkilatının Suriya qolu PYD/YPG, İŞİD və digər terror təşkilatlarından təmizləmək olduğunu bəyan edib. Dünən Türkiyə qırıcı təyyarələri bölgədə terror təşkilatının hədəflərinə hava zərbələri endirib. Bu gün isə Türkiyə ordusu Suriyanın Afrin bölgəsində quru əməliyyatına başlayıb. Suriyada "Fərat" qalxanı əməliyyatı çərçivəsində azad edilmiş bölgədən də Afrinə müxalif Azad Suriya ordusunun hücumu başlayıb. Azad Suriya Ordusunun bölmələri Türkiyə tanklarının müşayiəti ilə irəliləyir.