İranda növbəti gizli edam həyata keçirilib.

APA-nın məlumatına görə, məhbuslardan 5-i Əlborz vilayətinin Kərəc şəhərinin Rəcayişəhr, 6-sı isə Qızılhasar həbsxanasında dara çəkilib.

Onların ad və soyadları açıqlanmayıb və nədə ittiham edildikləri məlum deyil. Ancaq dörd gün əvvəl təkadamlıq kameralara köçürüldükləri və avqustun 22-də səhər saatlarında edam edildikləri bildirilir.

Qeyd edək ki, avqustun 22-də Urmiyada 5, Ərdəbildə 3, Məşhəddə 2, Həndicanda 1, avqustun 21-də isə Cəhrom və Təbrizdə 2 nəfər dara çəkilib. Bununla da, iki gün ərzində 24 nəfər edam edilib. Artıq ölkənin digər həbsxanalarında da gizli edamların həyata keçirildiyi və həmin ölüm hökmlərinin ictimaiyyətə açıqlanmasından imtina edildiyi ehtimal olunur.

Dünən gecə Kərkük-Ceyhan boru xəttinə hücum olub.

Hücum Mosul yaxınlarında həyata keçirilib. Boru xəttinin yaxınlığında 3 bomba partladılıb. Partlama nəticəsində İraqdan Türkiyəyə neft idxalı dayandırılıb.

Hazırda boru xəttinin təmir edildiyi bildirilir.

Tailand krallığının məhkəməsi bu gün iki İran vətəndaşını Banqkokda İsrail diplomatlarına qarşı sui-qəsdin hazırlığında günahlandırıb.

Onlardan Səid Moradi ömürlük, Məhəmməd Kərzai isə 15 illik azadlıqdan məhrum edilib.

İttihama görə, 39 yaşlı Moradi və 43 yaşlı Kərzai 2012-ci ilin fevralında Banqkokda İsrail rəsmilərinə qarşı sui-qəsd hazırlığında iştirak ediblər. Bildirilir ki, həmin vaxt Moradi yaxalanarkən polis əməkdaşlarına qarşı da partlayıcı qurğudan istifadə etmişdi.

İttiham olunanlar isə terror fəaliyyətində və sui-qəsd hazırlığında əlaqələrinin olmadığını bildiriblər.

Qeyd edək ki, bu hadisəyə qədər bir neçə İran vətəndaşı İsrail diplomatlarına qarşı sui-qəsddə ittiham ediliblər. Belə ki, Hindistanın Dehli şəhərində İsrail rəsmilərinin maşınına hücum edilmişdi. Gürcüstanda isə İsrail səfirinin avtomobilinə qarşı hücum cəhdinin qarşısı alınmışdı.

Həmin vaxt İran hakimiyyəti isə yayılan informasiyalarda əlinin olması ilə bağlı olan ittihamları təkzib etmişdi.

Suriya hökumətinin kimyəvi silahdan istifadə etməsi ilə bağlı iddiaların nə dərəcədə həqiqət olduğu BMT müşahidəçilərinin apardığı araşdırmalardan sonra meydana çıxacaq”. APA-nın Moskva müxbirinin verdiyi məlumata görə, bu fikirləri Rusiya Xarici İşlər Nazirliyinin xüsusi nümayəndəsi Aleksandr Lukaşeviç bu gün keçirdiyi brifinqdə bildirib. Suriyada olan BMT müşahidəçilərinin fəaliyyətinin ölkədə baş verən böhranın siyasi yolla həllinə dəstək olacağına ümid etdiyini söyləyən Rusiya XİN rəsmisi bildirib ki, Suriya hökuməti mümkün olduqca BMT müşahidəçiləri ilə işbirliyi qurmağa hazırdır: “Hökumət onlara hər cür dəstək göstərir. Kimyəvi silahın hökumət tərəfindən istifadə edilməsi ilə bağlı iddiaların müstəqil BMT müşahidəçiləri tərəfindən araşdırılmasını dəstəkləyirik”.

Aleksandr Lukaşeviç Dəməşq yaxınlığında kimyəvi silahdan hakimiyyətə qarşı vuruşan döyüşçülərin istifadə etdiyini söyləyib: “Dəməşqə kimyəvi başlıqlı raket onlar tərəfindən atılıb. Bu, martın 19-da Xan Əl-Əsalədə terrorçuların istifadə etdiyi silahla eynidir. Bütün bunlar rejim əleyhdarlarının BMT Təhlükəsizlik Şurasının (TŞ) tələblərinə qarşı çıxması üçün bəhanədir və avqustun 28-də keçirilməsi planlaşdırılan “Cenevrə-2” konfransının çağırılması şansını azaldır”.

XİN rəsmisi imkanı olan hər kəsi ekstremistlərin kimyəvi silahların tətbiqinə və təxribatlara son qoymağa çağırıb: “Bir sıra KİV-lər o dəqiqə elə bil haradansa əmr almış kimi bütün məsuliyyəti hökumətin üstünə qoymaqla aqressiv informasiya hücumuna keçib. Bütün bunlar onu deməyə əsas verir ki, bu informasiyanı yayanlar növbəti dəfə qabaqcadan hazırlanmış təxribatla məşğul olur”.

Misirin sabiq prezidenti Hüsnü Mübarək Qahirədəki Tora həbsxanasından azadlığa buraxılıb.

APA-nın məlumatına görə, həbsxananı vertolyotda tərk edən Mübarək ölkənin cənubundakı hərbi hospitala gətirilib. Sabiq prezident məhkəmənin qərarı ilə azadlığa buraxılıb, onun üzərindən korrupsiya faktları və hakimiyyətdən sui-istifadəyə dair ittihamlar götürülüb. Bununla da Mübarəki həbsxanada saxlamaq üçün hüquqi əsas qalmayıb. Misirin hərbi rəhbərliyi Mübarəkin ev dustağı saxlanmasını məqbul sayıb, bu qərar ölkədə fövqəladə vəziyyət olması ilə əsaslandırılıb. Sabiq prezidentin üzərindən heç də bütün ittihamlar götürülməyib. O 2011-ci ildə nümayişçilərin qətli epizoduna dair cinayət işinin əsas fiqurlarından biri olaraq qalmaqdadır.