Rusiya paytaxtının Moskvadan çıxarılaraq ölkənin Uzaq Sərq bölgəsinə köçürülməsi təklif edilib.

Bunu Vladivostok qubernatoru İqor Puşkarov təklif edib.

Onun fikrincə, Rusiya paytaxtının ölkənin şərqində hər hansı bir şəhərə köçürülməsi ölkənin inkişafına böyük təkan verəcək. Paytaxtları şərqdə olan ölkələrin daha müvəffəqiyyətli olduqlarına diqqət çəkən Puşkarov mövzu ilə bağlı deyib:

"Paytaxtın şərqdə olduğunu düşünün. Beləcə bölgələrin inkişafı problemi birdəfəlik həll olunacaq. Və qonşu ölkələr də şərqdəki geniş torpaqlarımızı işğal etmək xəyallarından vaz keçəcəklər".

Moskva və Peterburgun müstəqil meqopolis olduğlarına diqqət çəkən Puşkarov bu şəhərlərin inkişaf etmələri üçün paytaxt olmağa ehtiyacları olmadığını ifadə edib.

Təklif barədə fikirlərini açıqlayan ekspertlər isə ölkənin ən mühüm mədəni və tarixi mərkəzi olan Moskvanın paytaxt olaraq qalmağa ən uyğun şəhər olduğunu deyirlər.

Fars körfəzinin ərəb ölkələri Avropada Şengen vizası nümunəsi üzrə xarici turistlər üçün vahid viza sisteminə keçmək niyyətindədirlər. Trend-in məlumatına görə, bu barədə Küveytin "Əl-Ray" qəzeti xəbər yayıb.

Nəşrin məlumatına görə, Fars körfəzi ölkələrindən birindən viza alan xarici turist Fars körfəzi Əməkdaşlıq Ölkələri Təşkilatına (FKƏÖT) daxil olan bu regionun altı ərəb ölkəsinə də səyahət edə bilər.

FKƏÖT ölkələri belə bir viza sistemini yaxın illərdə tətbiq etmək niyyətindədirlər. Belə bir vizanı əldə etmək üçün xarici vətəndaşlar bank hesablarında müəyyən məbləğə malik olmalıdırlar.

Qətər dövlətinin ilk “Suheyl-1” peyki cümə axşamı Fransız Qvianasında (Cənubi Amerikada Fransanın inzibati idarəçiliyində olan ada) yerləşən Kuru kosmodromundan “Ariane-5” raketdaşıyıcısı ilə orbitə çıxarılmışdır.
AzərTAc kosmik aparatın operatoru “Suheyl-sat” şirkətinin rəsmi saytına istinadla xəbər verir ki, peyk maneələrə davamlı müasir texnologiyalardan istifadə edilməklə yaradılmış və Qətərin televiziya kanallarının, o cümlədən “Əl-Cəzirə” xəbərlər kanalının siqnallarının ötürülməsi üçün nəzərdə tutulmuşdur.
Şirkət rəhbəri Əli Əhməd əl-Kuvayrinin sözlərinə görə, Qətərin ilk peyki 3 aylıq sınaq müddətindən sonra cari ilin dekabrında istismara veriləcəkdir.
Yaradılmasına 3 il vaxt sərf olunan “Suheyl-1” peykinin çəkisi 6 tondan çoxdur. Şirkət nümayəndələrinin sözlərinə görə, məhz bu cəhət onun nəhəng peyklərdən biri hesab edilməsinə imkan verir.

Amerikada çıxan “The Jewish Times” qəzetinin 29 avqust tarixli nömrəsində “Dostlar arasında: Azərbaycan və İsrail” sərlövhəli məqalə dərc edilmişdir. Məqalənin müəllifi, jurnalist və Kaliforniya Universitetinin professoru Norma Zager yazır ki, tamdəyərli demokratik dünyəvi müsəlman dövləti olan Azərbaycan həm İsrailin, həm də ABŞ-ın etimadını və etibarını qazanmış müttəfiqdir, lakin Vaşinqton ona lazımınca diqqət yetirmir.
Müəllif yazır: “Avrasiyada və Yaxın Şərqdə İsrailin ən yaxın müttəfiqi olan Azərbaycan bütün dünyaya sübut edir ki, müsəlman mədəniyyəti və siyasi qurumlar barədə onların qərəzli təsəvvürləri yanlışdır. Yaxın Şərqi alov bürüdüyü bir vaxtda, görünür, amerikalı siyasətçilər bu mənzərənin nə qədər dəhşətli olmasını anlaya bilmirlər – təhlükəsiz dünya Amerikanın bombaları və qırıcı hərbi təyyarələri vasitəsilə yaradıla bilməz. Dünyamızın təhlükəsizliyi Qərb mədəniyyətinin, Qərb ticarətinin və Qərb ideallarının yayılması yolu ilə təmin edilməlidir.
N.Zager vurğulayır ki, həm İsrail, həm də Azərbaycan ABŞ tərəfindən nəzərəçarpacaq etinasızlıq səbəbindən əziyyət çəkir. ABŞ prezidenti bircə dəfə Azərbaycana səfər etsəydi, dünyaya bu ölkənin siyasi xəttini, onun İsraili, ABŞ-ı və Avropanı dəstəkləməsini hərtərəfli öyrənmək şansı verərdi. Azərbaycan bütün məsələlərdə və bütün etnik qruplara münasibətdə azadlıq və tolerantlıq siyasətini davam etdirir.
N.Zager sonda ABŞ-ı Azərbaycan, İsrail və Qərb arasında qarşılıqlı münasibətləri daha ətraflı öyrənməyə və Azərbaycan-İsrail münasibətlərindən nümunə kimi istifadə etməklə müsbət nəticə çıxarmağa çağırır.