Gürcüstan paytaxtında TRACECA nəqliyyat dəhlizi çərçivəsində “LOGMOS” layihəsi - logistik proseslər və II dəniz magistralı” mövzusunda regional konfrans başlayıb.

APA-nın Gürcüstan bürosunun məlumatına görə, konfransda 10 dövlətdən nümayəndə heyəti iştirak edir. Tədbirdə Azərbaycanı Nəqliyyat Nazirliyi, “Azərbaycan Dəmir Yolları” QSC, Dövlət Gömrük Komitəsi və Xəzər Dəniz Gəmiçiliyi idarəsi təmsil edir.

Avropa Birliyinin maliyyə dəstəyi ilə iki gün davam edəcək konfransda Azərbaycan, Ukrayna, Qazaxıstan, Qırğızıstan, Gürcüstan, Tacikistan, Türkmənistan, Türkiyə nümayəndə heyətlərinin üzvləri müxtəlif mövzularda hazırladıqları layihələrin təqdimatını keçirəcəklər.

Yekunda TRACECA-ya üzv ölkələrin işçi qrupunun birgə iclası keçiriləcək və “LOGMOS” layihəsinə aid tövsiyələr müzakirə ediləcək.

Azərbaycan Nəqliyyat Nazirliyinin Nəqliyyat siyasəti və iqtisadiyyat şöbəsinin sektor müdiri Əli Qasımov jurnalistlərə açıqlamasında konfransın məqsədi barədə məlumat verib: “Bu konfransda TRACECA-ya üzv ölkələr arasında yükdaşımalarda qarşıya çıxan problemlər və təkliflər müzakirə edilir. Tədbirdə eyni zamanda konteynerləri daşıyan TRACECA-ya üzv ölkələrin yükdaşıma tariflərinin uyğunlaşdırılması məsələsi və dəniz magistrallarında qarşıya çıxan problemlərin həlli məsələləri müzakirə edilir”.

Ə.Qasımov APA-ya açıqlamasında TRACECA-ya üzv ölkə kimi Azərbaycanda böyük layihələrin həyata keçirildiyini bildirib: “Bu layihələrdən ən böyüyü Bakı-Tiflis-Qars və Bakı Beynəlxalq Dəniz limanının tikintisidir. Bu tikililər TRACECA-ya üzv ölkələr arasında daşımaların daha da inkişaf etdirilməsinə səbəb olacaq.”

Gürcüstan paytaxtında fövqəladə hallara qarşı mübarizədə fəaliyyətin üstün aspektlərinə həsr olunmuş beynəlxalq konfrans keçirilir. Konfransda 10-dək ölkədən 45 nümayəndə iştirak edir.
Azərbaycan Respublikası Fövqəladə Hallar Nazirliyinin böhran vəziyyətlərində idarəetmə mərkəzi “112” çevik reaksiya idarəsinin rəisi Yalçın Xələfov AzərTAc-ın müxbirinə müsahibəsində demişdir ki, ölkəmiz konfransda üç nəfərlik heyəti ilə təmsil olunur. Konfrans iştirakçıları ilə fövqəladə hallarla mübarizədə qazanılmış təcrübə barədə fikir mübadiləsi aparılır, gələcək fəaliyyətin prioritetləri müəyyənləşdirilir.
Y.Xələfov Azərbaycanda bu sahədə qazanılmış müsbət təcrübənin iştirakçıların marağına səbəb olduğunu vurğulamış, onlardan bəzilərinin əməkdaşlığa maraq göstərdiklərini qeyd etmişdir. Onun sözlərinə görə, ölkəmizdə fövqəladə hallar üzrə ayrıca nazirliyin fəaliyyət göstərməsi də diqqəti çəkmiş və nümayəndə heyəti Azərbaycan Prezidentinin bu strukturun daha da inkişaf etdirilməsinə xüsusi diqqət göstərməsi barədə də iştirakçılara geniş məlumat çatdırmışdır.
Vurğulanmışdır ki, həm təcrübə mübadiləsi, həm də böhran vəziyyətində səfərbərlik və başqa məqamlar baxımından konfrans mühüm əhəmiyyət kəsb edir.
Gürcüstan Daxili İşlər Nazirliyi fövqəladə hallar xidməti “112”-nin direktoru Georgi Bicaşvili də AzərTAc-ın müxbiri ilə söhbətində konfransın fövqəladə hallara qarşı mübarizə xidmətləri sistemində həyata keçirilən yeniliklər və təcrübə mübadiləsi baxımından əhəmiyyətini vurğulamışdır. G.Bicaşvili qonşu və dost ölkələr olan Azərbaycan və Gürcüstanın böhran vəziyyətində daim bir-birinə yardım etdiyini, bu sahədə əməkdaşlığa dair rəsmi sənəd imzalandığını qeyd etmişdir. O sözünə davam edərək demişdir: “Ölkələrimizin bu sahədə müsbət təcrübəsi vardır və biz onu öz aramızda paylaşırıq. İndi isə bu təcrübəni beynəlxalq konfransın iştirakçıları ilə də bölüşmək imkanı qazanmışıq”.
Konfrans öz işini noyabrın 26-da başa çatdıracaqdır.

ABŞ-ın qərbində tüğyan edən güclü qar fırtına 8 nəfərin ölümünə səbəb olub. APA-nın “İTAR-TASS”a istinadən verdiyi xəbərə görə, avtomobil qəzaları, elektrik dirəklərin və ağacların aşması insanların ölümünə səbəb olub.

Güclü qar fırtınası gecə saatlarında Kaliforniya, Nevada, Arizona və Nyu-Meksiko ştatlarına müşahidə olunub. Sinoptiklər hava şəraitinin bundan sonra daha da sərtləşəcəyini proqnozlaşdırırlar.

Zaqatala rayonunda silahlı insident baş verib.

APA-nın Şəki-Zaqatala bürosunun məlumatına görə, noyabrın 24-də günorta saatlarında Yevlax-Zaqatala-Gürcüstan sərhədi avtomobil yolunun Zaqatala rayonunun Yuxarı Tala kəndi ərazisində, yolun kənarında 99 FG 128 dövlət nömrə nişanlı, “Hyundai” markalı maşına avtomatdan atəş açılıb.

Naməlum şəxslər atəş açan zaman avtomobildə 4 nəfər olub. Hadisə nəticəsində onların hamısı yaralanıb. İlkin məlumata görə, xəstəxanaya aparılarkən yaralılardan 3-ü yolda ölüb.

Hadisənin motivi, kim və ya kimlər tərəfindən törədildiyi hələlik məlum deyil.

Atəşə tutulan avtomobilin Balakən rayon sakini Əliqayev Vüsal Xəlil oğluna məxsus olduğu açıqlanıb.

Hadisə yerində hüquq-mühafizə orqanlarının əməkdaşları işləyirlər.

Ukraynada azərbaycanlı tələbə ilə yerlilər arasında ölümlə nəticələnən qarşıdurmanın təfərrüatları məlum olub. Odessa Azərbaycanlıları Konqresinin İdarə Heyətinin üzvü, Odessa Milli Rabitə Akademiyasının müəllimi Mətin Hacıyevin APA – ya verdiyi məlumata görə, hadisə bu şəhərdə baş verib və azərbaycanlı tələbə Yevlax şəhər sakini Məhəmməd Arzu oğlu Abdullayevdir.

M. Abdullayevin özünün də dərs dediyi Akademiyanın 2 – ci kurs tələbəsi olduğunu deyən M. Hacıyev hadisənin təfərrüatını danışıb: “Ümumiyyətlə M. Abdullayev də daxil olmaqla onlar mənim dərs dediyim qrupda 8 azərbaycanlıdırlar, amma cəmisi iki nəfər dərslərdə iştirak edir. Mən şəxsən onların müəllimi, bu Akademiyanın 30 illik əməkdaşı kimi çox narazıyam. Bu hadisə də noyabrın 18-i axşam saatlarında azərbaycanlı tələbələrin daha çox qaldığı yataqxananın qarşısında baş verib. M. Abdullayev iki - üç azərbaycanlı tələbə ilə hansısa əyləncə mərkəzində qayıdırmış. Yataqxananın qarşısında taksidən düşdükdən sonra üç nəfər yerli millətdən olan orta yaşlı sərxoş halda onlara nəsə deyib, bunlar da onlara cavab veriblər və nəticədə dava düşüb. Bu zaman M. Abdullayev haradansa əldə etdiyi bıçaqla onlardan birini bıçaqlayıb və bıçaq ürəyə işlədiyi üçün həmin yerli (ukraynalı) millətdən olanın biri yerindəcə ölüb”.

Həmin gecə şəhər milisi tərəfindən M. Abdullayevin saxlanıldığını deyən M. Hacıyev bildirib ki, artıq məhkəmə onun barəsində 3 aylıq həbs qəti imkan tədbiri seçib, istintaq gedir, qəsdən adam öldürmə maddəsi ilə M. Abdullayevə cinayət işi qaldırılıb: “Amma ən təhlükəlisi də odur ki, bu hadisə burada elə rezonans doğurdu ki, buna görə Akademiyada və şəhərdə ciddi narahatlıqlar yaşanır. Akademiya rəhbərliyi azərbaycanlılar da daxil olmaqla bütün xarici tələbələri yığıb dərs buraxdıqları, gecə yataqxanalara gec gəldikləri təqdirdə kütləvi qovulacaqları barədə rəsmi xəbərdarlıq etdi. Bundan başqa əsasən də azərbaycanlı tələbələrin qaldığı yataqxanaların ətrafı olmaqla şəhərin müxtəlif yerlərində yerli millətçi gənclər azərbaycanlılara hücum edir, tez – tez əlbəyaxa dava düşür. Yataqxananın ətrafında bizim millətdən olan tələbələrə hücumlar edirlər. Ona görə də hazırda burada gərgin anlar yaşanır”.

İraqı yeni partlayış dalğası bürüyüb. Tuzhurmatu şəhərində bomba yüklü maşın partladılıb. Nəticədə 10 nəfər ölüb, 45 nəfər isə yaralanıb. Hadisədə yaralananlar Kərkükdəki xəstəxanalara yerləşdirilib.
Telafer şəhərində polis bölməsi yaxınlığında bomba yüklü maşının partladılması nəticəsində isə 2 nəfər ölüb, 12 nəfər isə yaralanıb. Ölənlərdən birinin polis olduğu bildirilir.