Bu barədə APA-ya Azərbaycan Xarici İşlər Nazirliyinin mətbuat xidmətinin rəhbəri Elman Abdullayev məlumat verib.

Onun sözlərinə görə, İran tərəfi ilə aparılmış danışıqların nəticəsi olaraq bu ölkədə həbsdə olan Kamal Qədirov, Eyvaz Məmmədov və Zamin Həsənov adlı şəxslərin Azərbaycana qaytarılması barədə qərar qəbul edilib. Qərarla bağlı Azərbaycanın Tehrandakı səfirliyinə məlumat verilib. Yaxın günlərdə həmin şəxslər vətənə göndəriləcək.

«Azərbaycan dövləti həmişə olduğu kimi, bundan sonra da Azərbaycan vətəndaşlarının maraqlarını müdafiə etməkdə davam edəcək. Bizim də başlıca vəzifəmiz dövlətimiz tərəfindən qarşımıza qoyulan hədəfləri yerinə yetirməkdir», - deyə E. Abdullayev vurğulayıb.

Rusiya paytaxtında Qurban bayramı qeyd edilib. APA-nın Moskva müxbiri xəbər verir ki, paytaxtın ən böyük məscidində bayram namazı qılınıb.

“Sülh” prospektində yerləşən Mərkəzi Məscidin əhatəsindəki bütün küçələrdə 100 mindən çox müsəlman birlikdə bayram namazı qılıb.

İnşaatı davam edən Mərkəzi Məscidin həyətində bayram çadırı qurulub. Paytaxt meriyası müsəlmanların dini inanclarını yerinə yetirməsi üçün bütün tədbirləri görüb. Məscidə yaxın ərazilərdə nəqliyyatın hərəkəti dayandırılıb. Asayişi və təhlükəsizliyi təmin etmək üçün əraziyə çoxlu sayda polis dəstələri cəlb olunub.

Yerli və xarici mətbuatın böyük marağına səbəb olan Mərkəzi Məsciddəki bayram namazında Moskvada yaşayan tatar, azərbaycanlı, çeçen, inquş, qırğız, özbək və taciklər birlikdə dua ediblər.

Qeyd edək ki, paytaxt polisi oktyabrın 13-də Qərbi Biryulevo rayonunda baş verən iğtişaşlardan ehtiyat edərək, bayram namazının qılındığı yerlərdə təhlükəsizliyi təmin etmək üçün geniş barrikadalar qurub.

Bu gün Bakının Neftçilər prospektində, Hökumət Evinin qarşısındakı ərazidə ikimərtəbəli yeraltı avtomobil dayanacağı istifadəyə verilib.

“APA-Economics”in xəbərinə görə, Azərbaycan prezidenti İlham Əliyev dayanacaqda yaradılan şəraitlə tanış olub.

Bakı Şəhər İcra Hakimiyyətinin başçısı Hacıbala Abutalıbov görülən işlər barədə dövlətimizin başçısına məlumat verərək bildirib ki, yeraltı avtomobil dayanacağı ən müasir avadanlıq və sistemlərlə təchiz olunub. Burada dünyanın ən son texniki nailiyyətlərindən olan havalandırma, yanğın və təhlükəsizlik sistemləri müasir standartlara uyğun şəkildə tətbiq edilib. Təhlükəsizliyin təmin edilməsi məqsədilə hər mərtəbədə təhlükəsizlik kameraları və müşahidə monitorları quraşdırılıb. Dayanacaqda avtomobillər üçün iki giriş və iki çıxış var. Piyadalar üçün 6 keçid inşa olunub. Keçidlərdə bütün iqlim şəraitində işləyən müasir eskalatorlar quraşdırılıb. Dayanacaqda bütün sistemlər avtomatik olaraq fəaliyyət göstərir.

Dövlət başçısı yeraltı avtomobil dayanacağında yaradılan şəraitdən razılığını bildirib.

“Turizm.az” şirkəti müqəddəs Qurban bayramı ilə əlaqədar Azərbaycanın bir neçə turizm potensiallı regionlarına səfərlər təklif edir.
Şirkət tərəfindən oktyabrın 15-də Qəbələ, ayın 16-da Masallı-Yardımlı turları təşkil olunacaqdır. Bayram günlərində şirkət tərəfindən, həmçinin Dubaya da turlar təklif ediləcəkdir.
Oktyabrın 19-20-də isə Şəki şəhərinə tur nəzərdə tutulmuşdur. Tur iştirakçıları üçün Azərbaycanın memarlıq qoruğu adlandırılan Şəki rayonu ərazisindəki bir sıra tarixi-mədəni abidələrə - Şəki xanlarının sarayı, Aşağı və Yuxarı karvansaralar, Kiş kəndindəki qədim alban kilsəsi, Kiş çayının sahilində, Qaratəpə dağının zirvəsində “Gələrsən - görərsən” qalasının xarabalıqlarına ekskursiya təşkil ediləcəkdir.