7 sentyabr günün fotosu Kəşmirdə çəkilib.

“ABŞ Suriyaya hücum edəcəyi təqdirdə prezident Barak Obamanın qızlarından birini qaçırıb təcavüz edəcək və dünyada Amerika vətəndaşlarına qarşı hücumlar təşkil edəcəklər”.

Bu barədə iranlı analitik və ölkənin cənubundakı Kış vilayətinin keçmiş bələdiyyə sədri Əli Rıza Forqani bildirib.

“The daily caller” saytının məlumatına görə, Forqani Obamanın bu xəbərdarlıqdan nəticə çıxarmalı olduğunu söyləyib: “Suriyaya hücum etdikdən sonra sadəcə 21 saat ərzində hər amerikalı nazirin, Amerikanın dünyadakı səfirlərinin, hərbi komandirlərin ailəsinin bir üzvü qaçırılacaq və 18 saat sonra onların amputasiya edilmiş videoları dünyaya yayılacaq”.

Qeyd edək ki, Barak Obamanın Malia (14) və Saşa (12) adlı iki qızı var.

“Böyük 20-lik”in sammitində iştirak edən ABŞ prezidenti Barak Obama Pentaqona Suriyaya endiriləcək zərbələrin hədəflərinin genişləndirilməsi barədə tələb ünvanlayıb. Modern.az “The New York Times” qəzetinə istinadən xəbər verir ki, Amerika kəşfiyyatının müəyyən etdiyi 50 hədəfin sayı artırılacaq. 
Obama administrasiyası ilk dəfə Amerika və Fransa təyyarələrinin Suriyaya zərbə endirəcəklərini açıqlayıb. Bundan öncə Suriyaya yalnız Aralıq dənizində yerləşən hərbi gəmilərdən zərbələrin endirilməsi təklif olunurdu. Əsas hədəflərin Suriyanın hava hücumundan müdafiə sistemlərinin, komanda qərargahlarının və silah anbarlarının olacağı deyilir.

Ağ Evdən mətbuata sızan məlumatlara görə, Barak Obamanın Suriyaya mümkün hərbi əməliyyatlarla bağlı Amerika xalqına müraciəti hazırlanıb. İctimai təşkilatların keçirdiyi sorğu isə Amerika əhalisinin əksəriyyətinin hərbi əməliyyatlara qarşı olduğunu göstərir. Rəyi soruşulan amerikalıların 48%-i Suriyaya raket zərbələrinin endirilməsini dəstəkləmir. 74% respondentin fikrincə, hərbi əməliyyatlar Amerikaya və müttəfiqlərinə regionda neqativ münasibətə səbəb olacaq.

ABŞ Senatı Suriyaya hərbi müdaxiləni nəzərdə tutan qətnamə layihəsinə sentyabrın 11-də səs verəcək. Bu barədə ABŞ-ın “Politico” qəzeti xəbər yayıb.

Xəbərdə qeyd olunur ki, sentyabrın 11-dək Senatda Obama admistrasiyası nümayəndələrinin iştirakı ilə müzakirələr keçiriləcək. Konkret olaraq sentyabrın 9-da qapalı müzakirələr təşkil olunacaq.

“Suriyaya elə indi də silah veririk, iqtisadi sahədə əməkdaşlıq edirik”

“Rusiya indi olduğu kimi, silah göndərməklə və iqtisadi sahədə əməkdaşlıq etməklə Suriya ilə əməkdaşlığı bundan sonra da davam etdirəcək”. Bu sözləri Rusiya prezidenti Vladimir Putin G20 sammitinin yekunları ilə bağlı keçirilən mətbuat konfransında deyib. V. Putin “Suriyaya hərbi zərbə endirilərsə, Rusiya bu ölkəyə yardım edəcəkmi”, sualını belə cavablandırıb: “Bəli, kömək edəcəyik. Elə indi də kömək göstəririk. Suriyaya silah veririk, iqtisadi sahədə əməkdaşlıq edirik. Ümid edirəm ki, humanitar sahədə əməkdaşlıq daha sıx olacaq, o cümlədən hazırda çox ağır durumda qalmış mülki əhaliyə humanitar yardımlar göstəriləcək”.

Britaniyanın SAS elit xüsusi təyinatlı bölməsinin döyüşçüsü məhkəmədə şahzadəni snayperin öldürdüyündən danışıb. Bundan sonra Skotlənd Yard şahzadə Diananın guya SAS elit xüsusi təyinatlılarının əməliyyatı gedişində öldürülməsi ilə bağlı məlumatla əlaqədar rəsmi araşdırmalara başlayıb. Bu barədə Trend bazar ertəsi xarici mətbuata istinadən xəbər verir.

Belə bir bəyanat SAS-ın keçmiş döyüşçüsü, silah və döyüş sursatının qanunsuz saxlanmasında ittiham olunan çavuş Denni Naytinqeylin işi ilə bağlı keçirilən məhkəmə iclasında oxunub.

Britaniyanın "Mirror" qəzeti yazır ki, məktubda söhbət digər çavuş, yəni SAS-ın snayperi haqqında gedir. O, guya arvadı ilə söhbətində Diananın aradan götürülməsi ilə bağlı əməliyyatda iştirak etdiyinə görə lovğalanırmış. Onun adı açıqlanmasa da Naytinqeyl bildirir ki, bu hərbçi onun qonşusu olub, şahzadənin öldürülməsi ilə bağlı əhvalatı isə onun arvadı danışıb.

Skotlənd Yardın nümayəndəsi bəyan edib ki, polis bəyanatdakı faktla bağlı rəsmi yoxlamaya başlayıb. Yoxlamada məqsəd bu danışılan əhvalatın yeni təhqiqata başlamaq üçün əsas olub-olmadığını müəyyən etməkdir. İlkin təhqiqatın aparılması üçün artıq bir sıra ekspertizalar müəyyən edilib.

Qeyd edək ki, Diananın britaniyalı hərbçilər tərəfindən öldürülməsi ilə bağlı versiya ilk dəfə deyil ki, səslənir. Şahzadənin, Dodi əl-Fayedin və onların sürücüsü Anri Polun Parisdəki tuneldə Britaniya hərbçiləri tərəfindən öldürüldüklərini ilk dəfə avtomobil qəzasından az sonra Dodinin atası, sahibkar Məhəmməd əl-Fayed səsləndirib.

Onun sözlərinə görə, şahzadə Diana onun oğluna aşiq olub və islamı qəbul edərək ona ərə getməyə hazırlaşırmış. Əl-Fayed iddia edir ki, beləliklə, London Britaniya taxt-tacının vəliəhdinin anasının müsəlman olmasına yol verməyib.

Xatırladaq ki, Diana və Dodi əl-Fayed 1997-ci il avqustun 31-də avtomobil qəzasında həlak olublar. Onların olduqları "Mersedes" markalı maşın Parisdə tunelin içərisindəki dayaqlardan birinə çırpılıb. Polis belə qənaətə gəlib ki, qəza sürücünün sürəti artırması səbəbindən baş verib. Bundan başqa, analizlər onun hadisədən bir az əvvəl alkoqol və narkotik qəbul etdiyini göstərib.