Bu gün Türkiyə prezidenti Rəcəb Tayyib Ərdoğan və Rusiya prezidenti Vladimir Putin arasında telefon danışığı olub.

APA-nın RİA Novosti agentliyinə istinadən verdiyi xəbərə görə, tərəflər Fələstindəki son hadisələri müzakirə ediblər.

"Tərəflər Qəzza zolağında çox sayda ölüm halları ilə nəticələnən insidentlərlə bağlı dərin narahatlıq ifadə ediblər", məlumatda deyilir.

Söhbət zamanı həmçinin Suriyadakı vəziyyət və iki ölkə arasında energetika sahəsində əməkdaşlıq məsələləri müzakirə edilib.

Bundan əvvəl Türkiyə prezidenti Almaniya kansleri Angela Merkel, İran prezidenti Həsən Ruhani və Roma Papası Fransisk ilə Fələstindəki vəziyyəti müzakirə edib.

Qəzza sektorunda İsrail ordusu ilə toqquşmalar zamanı ölən fələstinlilərin sayı 37-yə çatıb.

APA-nın "RİA Novosti"yə istinadən verdiyi xəbərə görə, bu barədə yerli tibb xidmətinin rəsmi nümayəndəsi Əşrəf əl-Kidra məlumat verib. Yaralıların sayı 900-dən çoxdur. Ölənlər arasında uşaq da var.

Bu gün ABŞ-ın Qüds-Yerusəlim şəhərində səfirlik açmasına etiraz olaraq İsrail və Qəzza zolağı arasındakı sərhədin 12 yerində kütləvi aksiyalar başlayıb. Aksiyalara 35 mindən çox fələstinli qatılıb. İştirakçıların aqressiv hissəsi İsrail əsgərləri tərəfə içərisində yandırıcı maye olan şüşələr, əldəqayırma partlayıcılar atmağa, topladıqları təkərləri yandırmağa başlayıblar, bəziləri isə sərhəd maneələrini aşmağa çalışıb. İsrail əsgərləri onlara odlu silahdan atəş açıb.

İsrail ordusu sərhəd xəttinə 2 əlavə piyada briqadası göndərib. Daha bir briqada İordan çayının qərb sahilinə yeridilib. 

Türkiyə baş naziri Binəli Yıldırım bəyan edib ki, Ermənistan Türkiyəyə qarşı tutduğu mövqedən əl çəksə, ona qarşılıq verəcəklər.

Baş nazir namaz çıxışı jurnalistlərin suallarını cavablandırarkən bu barədə danışıb.

"Təbii ki, görək, Ermənistan öz tutumundan əl çəkəcəkmi?! Türkiyəyə qarşı ərazi iddialarından, yanlış mövqelərindən əl çəksələr, yeni bir səhifə açmaq istəsələr, buna qarşılıq verərik.

Biz heç kimlə, xüsusilə qonşularımızla düşmən olmaq istəmirik. Belə bir qənaət varsa, ölkəmizin mənafeyi çərçivəsində bunu dəyərləndirərik", – Binəli Yıldırım bildirib.

Qeyd edək ki, Ermənistanın yeni baş naziri Nikol Paşinyan bəyan etmişdi ki, Türkiyə ilə heç bir ön şərt olmadan danışıqlara hazırdır.

Ermənistanın paytaxtı Yerevan şəhərində etiraz aksiyaları yenidən start götürüb.

Administrasiya binası qarşısına toplaşanlar şəhər meri Taron Marqaryanın istefasını tələb edirlər.

Aksiya iştirakçıları Taronu vətəndaşlar qarşısında öhdəlikləri yerinə yetirməməkdə ittiham edirlər.

Hazırda aksiya iştirakçıları yolu bağlayıblar.

Əfqanıstanda məsciddə baş verən partlayış nəticəsində ölənlərin sayı 17-yə çatıb, daha 34 nəfər yaralanıb.

Bu barədə isə "TOLO News" agentliyi məlumat yayıb.

Qeyd edək ki, daha öncə 10 nəfərin öldüyü bildirilirdi.

Mayın 4-də Qəzza zolağının sərhədində İsrail hərbçiləri ilə toqquşmalarda 148 fələstinli xəsarət alıb.

APA-nın məlumatına görə, bu barədə  "The Times of Israel" xəbər verib.

Məlumata görə, 42 nəfər güllə yarası alıb, 20 nəfər rezin güllələrdən xəsarət alıb, yaralananların bir qismi gözyaşardıcı qaz və tüstüdən zərər çəkib.

Ümumilikdə Qəzza zolağının sərhədində etiraz aksiyalarına 7 minə yaxın fələstinli qatılıb.