Azərbaycan prezidenti İlham Əliyev Çinin Nancinq şəhərində yeniyetmələr arasında ikinci Yay Olimpiya Oyunlarında iştirak etmiş milli komandamızın üzvlərini qəbul edib.

Dalgatv-nin  APA-ya istinadən verdiyi məlumata görə, yeniyetmələr arasında ikinci Yay Olimpiya Oyunlarında milli komandamızın Azərbaycanı layiqincə təmsil etdiyini vurğulayan dövlət başçısı idmançılarımızın uğurlarını böyük qələbə kimi qiymətləndirib.

İdmançıları təbrik edən prezident İlham Əliyev qeyd edib ki, 200-dən çox komandanın iştirak etdiyi həmin oyunlarda komandamızın 12 medal, o cümlədən 5 qızıl medal qazanmaqla ümumilikdə 10-cu, Avropa ölkələri arasında 6-cı, müsəlman ölkələri arasında isə 1-ci yerə layiq görülməsi tarixi qələbədir.

Dövlət başçısı idmançıların gələcəkdə də böyük uğurlara imza atacaqlarına əminliyini ifadə edib. Azərbaycanda keçirilən dünya və Avropa çempionatlarının ölkəmizdə idmanı təbliğ etdiyini, uşaqlar, yeniyetmələr və gənclərdə idmana olan həvəsi artırdığını vurğulayan Azərbaycan prezidenti bildirib ki, idmançılarımız ölkəmizi bütün yarışlarda layiqincə təmsil ediblər. Bu sahədəki siyasətin hər bir gənc üçün böyük imkanlar açdığını vurğulayan İ. Əliyev London Olimpiadasında əldə etdiyimiz uğurları xatırladıb. O qeyd edib ki, idmanda qazanılan uğurlarla bağlı nəsillər arasındakı əlaqə kəsilməməlidir.

Prezident İlham Əliyev vurğulayıb ki, Azərbaycan müstəqil dövlət olduqdan sonra Azərbaycan idmançıları iştirak etdikləri hər Olimpiadada böyük uğurlara imza atıblar. Dövlət başçısı yeniyetmə-uşaq idmanına da böyük diqqət göstərildiyini, bunun da ümumilikdə ölkə idmanının inkişafı baxımından vacib olduğunu deyib. Azərbaycan prezidenti bildirib ki, ölkəmizdə gənc istedadlı idmançıların, peşəkar məşqçilərin mövcudluğu, Bakı ilə yanaşı, bölgələrdə müasir idman infrastrukturunun yaradılması uğurlarımızı təmin edir.

Prezident İlham Əliyev 2015-ci ildə Azərbaycanda keçiriləcək ilk Avropa Oyunlarının bizim üçün ciddi məsuliyyət olduğunu deyib və bildirib ki, bu, Azərbaycan idmanının böyük nailiyyətidir. O qeyd edib ki, Avropa idman ictimaiyyətinin bu barədə qərarı Azərbaycanda idmanın inkişafı, müasir infrastrukturun yaradılması, ölkəmizin iqtisadi artım templəri və idmançılarınızın uğurlu çıxışları ilə bağlıdır. Avropa Oyunları standartlarının Bakıda müəyyən ediləcəyini deyən dövlət başçısı bildirib ki, bu oyunlar idmançıların və idman növlərinin sayına görə Qış Olimpiyasından böyük, Yay Olimpiadasına isə yaxındır. Prezident İlham Əliyev gənc idmançıların milli komandamızın tərkibinə daxil olacaqlarını və bu yarışlarda uğurlar qazanacaqlarına ümidvar olduğunu söyləyib.

Güləş Federasiyasının baş katibi, oyunlarda hakimlər komissiyasının inspektoru olmuş Əjdər Cəfərov, idmanın atletika növündən bürünc medal qazanmış Nazim Babayev və Milli Olimpiya Komitəsinin vitse-prezidenti Çingiz Hüseynzadə Azərbaycanda idmana göstərilən qayğıya, Bakı ilə yanaşı, bölgələrimizdə də nəhəng idman infrastrukturunun yaradılmasına və idmançılara diqqətə görə prezident İlham Əliyevə minnətdarlıqlarını bildiriblər.

Görüşə yekun vuran prezident İlham Əliyev hələ sovetlər dövründə Azərbaycan idmançılarının mühüm nailiyyətlər qazandığını söyləyib. Lakin müstəqilliyin ilk illərində bütün sahələr kimi, idmanın da tənəzzül dövrü yaşadığını deyib.

Milli Olimpiya Komitəsinin prezidenti seçildikdən sonra idmanın inkişafı naminə gördüyü işlərdən danışan dövlət başçısı o vaxtdan bəri ölkəni tərk etmiş idmançılarımızın Vətənə qayıtması, yeni idman komplekslərinin yaradılması, beynəlxalq idman qurumları ilə əlaqələrin genişləndirilməsi, idmanla bağlı bütün qurumların uğurla birgə fəaliyyət göstərməsi sahəsində həyata keçirilən işləri qeyd edib. Gənc idmançılarımızın uğurlarından çox sevindiyini deyən prezident İlham Əliyev bildirib ki, gənclərin qələbəsi müstəqil Azərbaycanın nəyə qadir olduğunu göstərir.

Dövlət başçısı bir daha idmançıları təbrik edib, onlara daha böyük uğurlar arzulayıb.

Sonda xatirə şəkli çəkdirilib.

Avqustun 28-də Azərbaycanın birinci xanımı, Heydər Əliyev Fondunun prezidenti, ilk Avropa Oyunlarının Təşkilat Komitəsinin sədri Mehriban Əliyeva ölkəmizdə keçiriləcək bu mötəbər tədbirə hazırlıqla inşası davam etdirilən və yenidən qurulan idman obyektlərində görülən işlərlə tanış olub.
Mehriban Əliyeva əvvəlcə Bakı Olimpiya Stadionunda tikinti işlərinin gedişi ilə tanış olub.
Gənclər və idman naziri Azad Rəhimov layihə əsasında görülən işlər barədə ətraflı məlumat verib.
Mehriban Əliyevaya stadionun müxtəlif görüntüləri təqdim edilib. Bildirilib ki, stadionda işlər sürətlə və yüksək keyfiyyətlə davam etdirilir. Tikintidə ən müasir avadanlıq və inşaat materiallarından istifadə olunur. Mükəmməlliyi ilə diqqəti cəlb edən, 70 min tamaşaçı tutumu olacaq, altımərtəbəli stadionda indiyədək layihə çərçivəsində nəzərdə tutulan tikinti işlərinin əsas hissəsi başa çatıb. Beynəlxalq standartlara tam cavab verəcək bu idman obyektində əsas stadion, məşqlər üçün köməkçi stadion və yardımçı bina, müxtəlif funksiyalı tribunalar və digər infrastruktur tikilir. İdman obyektində əlil tamaşaçılar üçün də bölmələr nəzərdə tutulub. Stadionun layihəsi iqtisadi səmərəliliyi, müasirliyi, funksional baxımdan əlverişliliyi, paytaxtın memarlığına və irəli sürülən texniki şərtlərə maksimum uyğunluğu ilə seçilir. Ərazidə avtomobillər üçün 3 min 100 yerlik park da yaradılacaq, stadionun ətrafında əsaslı abadlıq və geniş yaşıllaşdırma işləri aparılacaq.
2012-ci ilin noyabrında tammiqyaslı inşasına başlanılan stadionda işlər layihə üzrə nəzərdə tutulduğu kimi gələn ilin fevralında yekunlaşacaq. Beləliklə, Bakı Olimpiya Stadionu gələn il ölkəmizin ev sahibliyi edəcəyi birinci Avropa Oyunlarınadək istifadəyə veriləcək.

Tikinti işlərinin gedişi ilə tanış olan birinci Avropa Oyunlarının Təşkilat Komitəsinin sədri Mehriban Əliyeva müvafiq tapşırıq və tövsiyələrini verib.

Sonra Azərbaycanın birinci xanımı Mehriban Əliyeva Heydər Əliyev adına İdman-Konsert Kompleksində görülən təmir işləri ilə tanış olub. Məlumat verilib ki, ümumi ərazisi 46 min kvadratmetr olan kompleksin təmir işlərinin gələn ilin yanvarında başa çatdırılması nəzərdə tutulub. Məşq korpusunun birinci və ikinci mərtəbələrinin divar və döşəmələri keramoqranit və metlaxla örtülüb. Əsas korpusun birinci mərtəbəsinin foyesi yeni keramik örtüklə üzlənib, tavanda son tamamlanma işləri gedir. İdman-Konsert Kompleksi yeni internet şəbəkəsi, təhlükəsizlik və xəbərdarlıq sistemləri ilə təchiz ediləcək. Binada yeni yanğınsöndürmə və videomüşahidə sistemləri də quraşdırılacaq.

Paytaxtın mərkəzində, Dənizkənarı Bulvarda yerləşən Bakı İdman Sarayında da əsaslı təmir işləri aparılır. Binanın 1974-cü ildə inşa olunduğu nəzərə alınaraq burada müasir tələblərə uyğun yenidənqurma işləri görülür. Bina yenidənqurmadan sonra Olimpiya və Paralimpiya oyunlarının keçirilməsi üçün ən münasib idman qurğularından biri olacaqdır. Bakı İdman Sarayında aparılan təmir işləri də birinci Avropa Oyunlarına hazırlıq tədbirləri çərçivəsində həyata keçirilir.
Azərbaycanın birinci xanımı Mehriban Əliyeva binada aparılan yenidənqurma işləri ilə tanış olmaq üçün Bakı İdman Sarayına gəlib.
Məlumat verilib ki, artıq sarayın yenidənqurma işləri yekunlaşıb, struktur işləri də tamamlanmaq üzrədir. Bildirildi ki, struktur işləri ilə paralel binanın daxili tamamlanma işləri də yerinə yetirilir. Hazırda otaqlar, arakəsmələr və tavan işləri görülür. Qeyd olunub ki, bu idman sarayında müasir havalandırma sistemi qurulur, su və elektrik təchizatı işləri aparılır. Təmir işləri zamanı binanın seysmik dayanıqlığı da nəzərə alınıb. Bunun üçün sarayda xeyli sayda bərkitmə işləri aparılıb. Əlavə olaraq binaya zirzəmi qatından 5 ədəd yanğın çıxışı pilləkən qəfəsləri də qoyulub. Bununla yanaşı, birinci mərtəbədə yanğın üçün 12 təxliyyə qapısı nəzərdə tutulub. Dördmərtəbəli binada 6 müasir lift də quraşdırılıb. Olimpiya və Paralimpiya oyunlarının keçirilməsi üçün nəzərdə tutulan kompleksdə oturacaqların sayı artırılaraq 1500-dən 1850-yə çatdırılıb.
Avropa Oyunları Təşkilat Komitəsinin sədri Mehriban Əliyevaya Bakı İdman Sarayının fasad işləri barədə də məlumat verilib. Bildirilib ki, layihəyə uyğun olaraq sarayın fasadının yenidən üzlənməsi işləri həyata keçirilir. Binada təmir işləri ilin sonunadək yekunlaşacaq.

Prezident İlham Əliyev Azərbaycanda su idmanı növlərinin inkişaf etdirilməsi, yerli və beynəlxalq səviyyəli yarışların təşkili məqsədilə 2012-ci il avqustun 30-da Bakıda müasir standartlara cavab verən Su İdmanı Sarayının tikilməsi haqqında Sərəncam imzalayıb. Su İdmanı Sarayının layihələndirilməsini Koreya Respublikasının “Securo CO.LTD” şirkəti qısa müddətdə başa çatdırıb və inşaat işlərinə başlanılıb.
Azərbaycanın birinci xanımı Mehriban Əliyeva Su İdmanı Sarayında inşaat işlərinin gedişi ilə tanış olub.
Gənclər və idman naziri Azad Rəhimov Su İdmanı Sarayında layihə əsasında görülən işlərlə bağlı məlumat verib. Bildirib ki, tikintisinə ötən ilin fevral ayında başlanılan Su İdmanı Sarayı üçün 6 hektar torpaq sahəsi ayrılıb. Ümumi sahəsi 66 min kvadratmetr olan saray Beynəlxalq Üzgüçülük Federasiyasının tələblərinə tam cavab verir. Sarayda üç üzgüçülük hovuzu yaradılır. Uzunluğu 50, eni 25 metr olacaq əsas hovuz yarışlar üçün nəzərdə tutulub. İkinci hovuzda isə məşqlər keçiriləcək. Məşq hovuzunun bir hissəsində dərinliyi artırıb-azaltmaq mümkün olacaq. Hündürlükdən suyatullanma hovuzunun uzunluğu 25, eni 20 metrdir. Sarayda keçiriləcək idman yarışlarını 6 min 200 tamaşaçı izləyə biləcək. Burada idmançıların məşq etmələri, respublika və beynəlxalq səviyyəli yarışların təşkili üçün hər cür şərait olacaq. Ən vacib məqamlardan biri isə odur ki, idman sarayının enerji tələbatının 25 faizini burada quraşdırılan günəş batareyaları təmin edəcəkdir. Bundan başqa, sarayda fitnes zalları, SPA mərkəzi, trenajor zalları, restoran, 100 nəfərlik konfrans zalı, ofislər, digər işçi və köməkçi otaqlar fəaliyyət göstərəcək. Su İdmanı Sarayının ərazisində köməkçi bina və qurğular, 500 yerlik yerüstü avtomobil dayanacağı yaradılacaq.
Bildirilib ki, xarici və yerli şirkətlərin icra etdiyi tikinti işləri cədvəl üzrə vaxtında başa çatdırılacaq.

"Real" (Madrid) klubu "Barselona"nın Anxel di Mariyanın transferilə bağlı təklifini rədd edib.

Dalgatv-nin  Qol.Az-a istinadən verdiyi məlumata görə, Kataloniya təmsilçisi argentinalı futbolçu üçün 60 milyon avro təklif etsə də, Madrid klubu futbolçunu əzəli rəqibinə satmayıb.

"Real"ın baş məşqçisi Karlo Ançelotti ötən gün di Mariyanın komandadan getmək istədiyini açıqlamışdı. Lakin futbolçunun yeni mövsümdən karyerasını hansı komandada davam etdirəcəyi məlum deyil. 26 yaşlı futbolçunun "Real"da qalacağı da istisna olunmur.

Qeyd edək ki, di Mariyanın "Mançester Yunayted"ə transfer olunacağı bildirilir.

İngiltərənin "Mançester Yunayted" klubu Anxel Di Mariya üçün rekord büdcə hazırlayıb. 
anspress-in məlumatına görə, bu barədə İngiltərənin nüfuzlu nəşrləri iddia edir. Məlumata görə, İngiltərə Premyer Liqaya "Suonsi Siti" məğlubiyyəti ilə başlayan "Qırmızı şeytanlar"da transfer işləri sürətlənib. 

"Mançester Yunayted"də ilk və ən əhəmiyyətli hədəf "Real Madrid"dən Anxel Di Mariyadır. Yaz mövsümünün əvvəlindən bəri argentinalı oyunçunu düşərgəsinə qatmaq istəyən klub Mariya üçün 100 milyon funt sterlinqlik büdcə ayırıb. 

Toni Kroos və Ceyms Rodriqesi transfer edən "Kral klubu"unun heyətində isə Di Mariyanın forma şansı xeyli azalıb. Bunu görən "Mançester Yunayted" futbolçuya həftəlik 200 min funt sterlinq maaş təklif edib. 

Futbolçunun transferi üçün 50 milyon funt sterlinq ayıran komanda ümumilikdə 100 milyonluq büdcə xərcləməyə hazırdır.

PSJ-nin prezidenti Nasser Əl-Xelayfi “Bastiya”nın oyunçusu Brandaonun futbolçuları Tiaqo Mottanı kəllə ilə vurmasına münasibət bildirib.

Dalgatv-nin Qol.Az-a istinadən verdiyi xəbərə görə, o qeyd edib ki, Fransa Futbol Federasiyası Brandaonun bu hərəkətinə sərt qiymət verməlidir.

“O, futboldan ömürlük uzaqlaşdırılmalıdır” – deyə PSJ prezidenti bildirib.

Hadisəyə “Bastiya”nın baş məşqçisi Klod Makelele də münasibət açıqlayıb. O qeyd edib ki, Brandaonun hərəkəti idman prinsipləri ilə bir araya sığmır: “Biz ona lazım olan cəzanı verəcəyik”.

Xatırladaq ki, insident PSJ – “Bastiya” oyunundan sonra baş verib. Brandao Mottanı kəllə ilə vurub. Nəticədə italiyalı oyunçunun burnu qırılıb.

"Neftçi" Azərbaycan Premyer Liqasında növbəti oyununu keçirib.

Bakı təmsilçisi paytaxtın eyni adlı klubunu "Bakcell Arena"da qəbul edib. Matç "ağ-qara"ların 1-0 hesablı qələbəsi ilə yekunlaşıb.