ARDNŞ-nin Marketinq və İqtisadi Əməliyyatlar İdarəsi 2014-cü ilin yanvar ayında 78 min 106 ton dizel yanacağı, 10 min 157 ton təyyarə yanacağı ixrac edib.
Trend Dövlət Neft Şirkətinin rəsmi saytına istinadən məlumat verir ki, 2014-cü ilin yanvar ayında dünya bazarında avtomobil benzininin qiyməti (1 ton üçün) 938,99 dollar, təyyarə yanacağının - 955,95 dollar, dizel yanacağının - 903,01 dollar, 1 faizli kükürdlü mazutun qiyməti isə 594,81 dollar təşkil edib.
Marketinq və İqtisadi Əməliyyatlar İdarəsi 2014-cü ilin yanvar ayında Novorossiysk limanından 84 min 739 ton, Supsa limanından 322 min 996 ton, Ceyhan limanından isə 1 milyon 592 min 40 ton xam neft ixrac edib.
İdarə tərəfindən ixrac olunmuş xam neftin göstəriciləri həm Azərbaycan dövlətinə, həm də ARDNŞ-ə məxsus xam neft həcmlərini əks etdirir.
2014-cü ilin yanvar ayında dünya bazarında Brent tipli xam neftin 1 bareli 108,26 dollara, Urals nefti - 106,40 dollara,BTC FOB Ceyhan tipli xam neft isə 108,76 dollara satılıb.

Türkiyə Azərbaycandan aldığı təbii qazın hər 1 min kubmetrinə 335 ABŞ dolları ödəyir.

«APA-Economics»in «Zaman» qəzetinə istinadən verdiyi məlumata görə, eyni həcmdə qazı Türkiyə Rusiyadan 425 dollara alır. Türkiyənin İrandan aldığı 1000 kubmetr qaz isə 490 dollara başa gəlir.

Nəşrin yazdığına görə, bu günlərdə Türkiyənin baş naziri Rəcəb Tayyip Ərdoğan İrana səfər edəcək. Səfər çərçivəsində aparılacaq danışıqların əsas mövzusu İran qazının qiymətinin endirilməsi olacaq. Belə ki, Türkiyə tərəfi İranda keçiriləcək görüşdə onlara Azərbaycan və Rusiya ilə müqayisədə İran qazının çox baha olduğunu izah etməyə və qiymətin endirilməsinə çalışacaq.

Qeyd edək ki, daha əvvəl Türkiyə tərəfindən «Botaş» şirkəti qazın baha olması və bu qiymətlərə endirimlərin edilməsi üçün İranla bağlı Beynəlxalq İqtisadi Məhkəməyə müraciət etmişdi. Məhkəmə çəkişməsi hələ də davam edir. Hətta Türkiyənin enerji və təbii sərvətlər naziri Taner Yıldız mətbuata açıqlamasında «İran qazın qiymətini çox şişirdir» deyə bildirmişdi. Rəsmi Tehran isə qazın qiymətində endirimin olacağını vəd edib və buna R.Ərdoğanın İrana gözlənilən səfəri zamanı nail olunacağı ehtimal edilir.

İşçilərin sosial dayanıqlığının təmin olunması üçün tədbirlərin görülməsi barədə əmr imzalanıb

“Azərbaycan Respublikası Dövlət Neft Şirkəti üzrə sərbəstləşən işçilərin sosial dayanıqlığının və məşğulluğunun təmin olunmasına dair Proqram” təsdiq edilib. ARDNŞ-in mətbuat xidmətindən ANS PRESS-ə verilən məlumata görə, Azərbaycan Respublikası Dövlət Neft Şirkətinin prezidenti Rövnəq Abdullayev 2014-cü il yanvarın 17-də şirkətin bəzi müəssisələri üzrə sərbəstləşən işçilərin sosial dayanıqlığının təmin olunması üçün tədbirlərin görülməsi barədə əmr imzalayıb. 

Əmrdə bildirilir ki, Azərbaycan Respubikasının milli neft şirkəti kimi beynəlxalq aləmdə rəqabət qabiliyyətinin artırılması, fəaliyyətinin səmərəliliyinin təmin edilməsi və aparıcı neft şirkətləri sırasına çıxmaq məqsədi ilə ARDNŞ tərəfindən həyata keçirilən ardıcıl islahatlar bir sıra yeni iş yerlərinin açılması, yeni istehsal sahələrinin yaradılması ilə yanaşı, həm də az səmərəli və effekt verməyən biznes proseslərinin aradan qaldırılması zərurəti yaradır. 

Bazar iqtisadiyyatı prinsiplərinə, nüfuzlu beynəlxalq audit şirkətlərinin tövsiyələrinə, habelə ARDNŞ-nin risklərin idarə edilməsi siyasətinə uyğun olaraq müəyyənləşdirilən həmin proseslərin təkmilləşdirilməsi, bir qayda olaraq, idarəetmə strukturunda müəyyən dəyişikliklərin aparılmasını şərtləndirir. Bu dəyişikliklər isə öz növbəsində bəzi müəssisələrdə əmək şəraiti şərtlərinin dəyişməsinə və müəyyən sayda işçi heyətin sərbəstləşməsinə səbəb olur. Əmrdə daha sonra bildirilir ki, ARDNŞ daim işçilərinin həyat səviyyəsinin yüksəldilməsini, sosial dayanıqlığının təmin olunmasını diqqət mərkəzində saxlayır. İnsan resurslarının idarə edilməsində yeni standartların yaradılması, bu standartlar vasitəsilə sərbəstləşən işçilərin Şirkət sistemində iş yerləri ilə təmin olunması, onlara müxtəlif proqramlar üzrə müavinətlərin ödənilməsi kimi tədbirlər bu istiqamətdə atılmış real addımlardandır. 

Qeyd olunur ki, müvafiq situasiyalarda müstəsna hal kimi orta aylıq əmək haqqının 5 misli məbləğində birdəfəlik müavinətin ödənilməsi barədə ARDNŞ-nin və Azərbaycan Neft-Qaz Sənayesi İşçiləri Həmkarlar İttifaqı Respublika Komitəsinin müvafiq Əmr-Qərarları qəbul edilmişdir və bununla da indiyə qədər sərbəstləşmiş çox sayda işçiyə orta aylıq əmək haqqının 5 misli miqdarında müavinət ödənilməsi həyata keçirilmişdir. Həmin proqramdan hal-hazırda da xeyli işçinin yararlandığı bildirilir və ARDNŞ-nin sərbəstləşən işçilərin sosial dayanıqlığının təmin olunması istiqamətində tədbirlərinin davamlı olacağı bir daha vurğulanır. 

17 yanvar 2014-cü il tarixli əmrlə “ARDNŞ-nin bəzi qurumlarının ləğvi nəticəsində sərbəstləşən işçilərin məşğulluğunun və sosial dayanıqlığının təmin olunmasına dair Proqram” təsdiq edilmişdir. Əmrdə sərbəstləşən işçilərin Proqrama qoşulmaq üçün müraciət etmə müddəti, Proqramın qüvvədə olma müddəti müəyyən olunmuşdur. Proqramın icrasının həyata keçirilməsi məqsədi ilə ARDNŞ-nin Hüquq İdarəsinin rəisi Eldar Orucovun sərdliyi ilə daimi fəaliyyət göstərəcək Komissiya yaradılmışdır. Komissiyaya Proqrama qoşulmuş sərbəstləşən işçilərin ARDNŞ-nin strukturuna daxil olan müəssisələrdə yerləşdirilməsi, bu mümkün olmadıqda isə icraçı qurumla birlikdə onların kənar təşkilatlarda, Şirkətin podratçıları, subpodratçıları, eləcə də ARDNŞ ilə müqavilə münasibətlərində olan digər təşkilatlarda yerləşdirilməsi üçün qanunvericiliyə və müvafiq müqavilələrin şərtlərinə uyğun olaraq tədbirlər görülməsi tapşırılmışdır. Əmrdə həmçinin Komissiyanın vəsatəti əsasında Proqram iştirakçılarının ixtisasının artırılması məqsədilə lazımi tədbirlərin həyata keçirilməsi haqqında tapşırıqlar da verilmişdir. 

17 yanvar tarixli əmrlə təsdiq edilən və həmin əmrə əlavə olunan “ARDNŞ-nin bəzi qurumlarının ləğvi nəticəsində sərbəstləşən işçilərin məşğulluğunun və sosial dayanıqlığının təmin olunmasına dair Proqram”da göstərilir ki, bu Proqramın iştirakçısı olan sərbəstləşmiş işçilərə əvvəllər aldıqları orta aylıq əmək haqqının 50%-i həcmində müavinət ödənilməsi və onların ARDNŞ-nin digər müəssisələrində və ya kənar təşkilatlarda yerləşdirilməsi təmin olunacaqdır. Bunun üçün sərbəstləşmiş işçilər müəyyən edilmiş müddət ərzində sonuncu iş yeri üzrə işəgötürənə müraciət etməklə proqrama qoşula bilərlər. Sərbəstləşən işçinin ARDNŞ-nin daxili normativ sənədlərinə uyğun olaraq müəyyən edilmiş qaydada orta aylıq əmək haqqının 5 misli miqdarında müavinət almaq hüququ da saxlanılır. Beləliklə, sərbəstləşən işçiyə seçim imkanı yaradılır: o, orta aylıq əmək haqqının 5 mislinin alınması ilə bağlı müvafiq qaydada müraciət etməkdə, yaxud da bundan imtina edərək ARDNŞ-nin həyata keçirdiyi yeni Proqrama qoşulmaqda sərbəstlik əldə edir. “ARDNŞ üzrə sərbəstləşən işçilərin məşğulluğunun və sosial dayanıqlığının təmin olunmasına dair Proqram”ın daha bir üstün cəhəti bundan ibarətdir ki, sərbəstləşən işçinin sosial təminatı ən azı bir il müddətində təmin olunur, bu müddət ərzində ixtisasartırmaya ehtiyacı olan işçilər üçün müəyyən kurslar təşkil edilir ki, bu da onlar üçün daha əlverişli yeni iş yerlərinin tapılmasına köməklik göstərəcəkdir. Proqram çərçivəsində müvafiq dövlət orqanları, işə düzəltmə agentlikləri və digər təşkilatlarla əlaqələr qurulacaq, sərbəstləşən işçilərin yeni iş yerləri ilə təmin olunması üçün zəruri tədbirlər görüləcək.

“SOCAR Corcia qas” şirkəti Gürcüstan paytaxtı Tbilisidə yeni yanacaqdoldurma stansiyasını istifadəyə verib. Stansiyanın açılış mərasimində Azərbaycan Respublikası Dövlət Neft Şirkətinin Gürcüstan nümayəndəliyinin rəhbəri Mahir Məmmədov və digər rəsmi şəxslər iştirak ediblər.

Məntəqənin açılışını ARDNŞ-ın Gürcüstan nümayəndəliyinin rəhbəri Mahir Məmmədov həyata keçirib.

Mahir Məmmədov qeyd edib ki, bu, Gürcüstanda sayca 106-cı yanacaqdoldurma stansiyasıdır.O əlavə edib ki,bu ilin sonuna kimi daha 50 yanacaqdoldurma məntəqəsi istifadəyə veriləcək. Stansiyanın müasir tələblərə uyğun inşa olunduğunu bildirən şirkət rəsmisi burada 15 nəfərin işlə təmin edildiyini və soydaşlarımızın yığcam yaşadıqları Kvemo Kartli-Borçalı bölgəsinin Marneuli və Bolnisi rayonlarının hər birində yeni qazdoldurma stansiyasının açılacağını vurğulayıb.

Açıqlamada deyilir ki, Azərbaycanda avtomobil yolları şəbəkəsinin yeniləşdirilməsi və inkişafına dair Dövlət Proqramına (2006-2015-ci illər) əsasən Qəndob-Xaçmaz-Yalama-Rusiya sərhədi avtomobil yolunun tikintisi həyata keçirilir. İşçi layihəsinə əsasən, avtomobil yolunun 133,8 kilometrliyində, 135,935 kilometrliyində, 137,278 kilometrliyində, 178,490 kilometrliyində (sol qol ilə 2 kəsişmə), 178,860 kilometrliyində, 178,9 kilometrliyində, ümumilikdə 7 yerdə 1220 millimetrlik Mozdok-Qazıməmməd magistral qaz kəməri ilə kəsişdiyi nəzərə alınaraq, müvafiq normativ sənədlərin tələblərinə və texniki şərtlərə əsasən kəsişmələrin layihə həlləri hazırlanıb.

Tikinti işləri «Azərinşaatservis» MMC tərəfindən aparılır.

«Layihənin dövlət əhəmiyyətli olmasını əsas götürərək kəsişmələrdə tikinti işlərinin aparılmasına təhlükəsiz şərait yaradılması məqsədi ilə Mozdok-Qazıməmməd magistral qaz kəmərində texnoloji rejimlər dəyişdirilib, işçi təzyiq 12 atmosferə salınıb. Bu səbəbdən Rusiyaya qazın nəqli müvəqqəti dayandırılıb. Kəsişmələrdə tikinti işlərinin aparılması ilə əlaqədar olaraq həmçinin Mozdok-Qazıməmməd magistral qaz kəmərində 206-cı və 287-ci kilometrlərdə aşkar edilmiş sızmaların ləğvi edilməsi üçün işlərə başlanılıb. Bu məqsədlə təmir işləri ARDNŞ-in «Qaz İxrac» İdarəsi tərəfindən aparılır», - deyə məlumatda bildirilir.

Azərbaycan yanvarın 13-dən Rusiyaya qaz nəqlini dayandırıb.

Bu barədə “İnterfaks” yanacaq-enerji kompleksinin mərkəzi dispetçer idarəsinə istinadən xəbər yayıb.

Xəbərdə Azərbaycan qazının nəqlinin dayandırılanadək sutkada 3 milyon kubmetr təşkil etdiyi bildirilir. “Qazprom”dan isə deyiblər ki, Azərbaycan bu addımın səbəblərini və qazın verilməsinin bərpa tarixini açıqlamayıb.

Qeyd edək ki, Azərbaycan qazı Dağıstanın qaz təminatının əsas mənbələrindəndir.