Azərbaycan Respublikası Dövlət Neft Şirkətinin (ARDNŞ) ekologiya idarəsində payız-qış mövsümü ilə əlaqədar növbəti iməcilik keçirilmişdir.
AzərTAc xəbər verir ki, iməcilik müddətində idarənin əməkdaşları tərəfindən ərazidə 120 Eldar şamı əkilmiş və ağacların küləkdən mühafizə olunması üçün dayaq dirəkləri basdırılmışdır. Mövcud ağacların dibi yumşaldılmış, suvarılmış, dirəkləri bərkidilmişdir.
Bundan əlavə, iməcilik iştirakçıları ərazidə bir sıra abadlıq işləri apararaq, yaşıllıqlara müvafiq aqrotexniki qulluq göstərmişlər.

Ukraynada “SOCAR” brendi ilə fəaliyyət göstərən yanacaqdoldurma (YDM) məntəqələrindən biri Rusiyanın “Müasir YDM” jurnalı tərəfindən MDB üzrə sentyabr ayının ən yaxşı yanacaqdoldurma kompleksi elan edilmişdir.
Azərbaycan Respublikası Dövlət Neft Şirkətinin (ARDN-SOCAR) mətbuat xidmətindən AzərTAc-a bildirmişlər ki, Kiyevin 11 kilometrliyində, “Borispol” beynəlxalq hava limanına gedən yolun üzərində yerləşən YDM üç əsas xüsusiyyətinə - innovasiya, yanacağın keyfiyyəti və xidmət səviyyəsinə görə fərqlənmişdir. Münsiflər heyəti ənənəvi Azərbaycan motivləri ilə müasir trendlərin, Şərq qonaqpərvərliyi ilə Avropa keyfiyyətinin unikal şəkildə birləşdirilməsini xüsusi vurğulamışdır.
YDM-də müştərilərin bütün arzuları nəzərə alınmış, interyerin tərtibatı, kafenin, “SOCAR FM” radiosunun fəaliyyəti kimi ən kiçik detallara da xüsusi diqqət yetirilmişdir. Avtomobil sahibləri burada yüksək keyfiyyətli yanacaq və xidmətlə təmin olunurlar. Bütün bu keyfiyyətlər sayəsində YDM ekspertlərin, münsiflər heyətinin rəğbətini, müştərilərin etibarını qazanmışdır.

Cari ilin yanvar-sentyabr aylarında pərakəndə ticarət bazarında əhaliyə 13,9 milyard manatlıq və ya keçən ilin doqquz ayı ilə müqayisədə 9,6 faiz çox müxtəlif istehlak malları satılmışdır.
Dövlət Statistika Komitəsindən AzərTAc-a bildirmişlər ki, istehlak mallarının 51,9 faizini ərzaq, 48,1 faizini qeyri-ərzaq malları təşkil etmiş, qeyri-ərzaq məhsullarının xüsusi çəkisi 4,1 faiz bəndi artmışdır.
Hesabat dövründə elektron pərakəndə ticarət dövriyyəsinin həcmi 2012-ci ilin eyni dövrünə nisbətən 1,7 dəfə artaraq 1,8 milyon manat təşkil etmişdir.
Əhali onlayn rejimi vasitəsilə sifariş verdikləri istehlak mallarının 84,7 faizini hüquqi, 15,3 faizini fiziki şəxslərin ticarət şəbəkələrindən almışdır.
Elektron ticarət dövriyyəsinin 91,3 faizini qeyri-ərzaq malları təşkil etmişdir.

Qobustanda yeni regional təlim, tədris və sertifikatlaşdırma Mərkəzinin açılışı olub. APA TV-nin xəbərinə görə, Dövlət Neft Şirkətinin ixtisaslı fəhlə kadrlara olan tələbatını ödəmək üçün Mərkəzdə 48 sinif otağı, 28 inzibati və köməkçi otaq mövcuddur. Burada 12 ixtisas tədris olunacaq, 370 fəhlə kadrının hazırlanması nəzərdə tutulub. ARDNŞ prezidenti Rövnəq Abdullayev hesab edir ki, Təlim Mərkəzində Azərbaycanda fəaliyyət göstərən xarici neft və qaz şirkətlərinin ixtisaslı fəhlə kadrlarına ehtiyacın ödənilməsi üçün də imkanlar yaradılacaq. Artıq BP şirkətinin ilk sifarişi qəbul olunub.

ARDNŞ üçün qeyri-ənənəvi olan 500-dən artıq peşə üzrə fəhlə kadrlarına ehtiyacın təmin olunması məqsədi ilə Təhsil Nazirliyinin nəzdində fəaliyyət göstərən peşə-texniki məktəbin imkanlarından istifadə olunması planlaşdırılır. Təhsil naziri Mikayıl Cabbarov deyir ki, bununla bağlı Təhsil Nazirliyi ilə ARDNŞ arasında danışıqlar aparılır.

Gələcəkdə bu mərkəzdə qaynaqçıların attestasiyası, sertifikatlaşdırılması, audit, simulyasiya aparatında istifadə etməklə hazırlanması və s. peşə sınaqlarının keçirilməsi nəzərdə tutulub.

Sentyabrın 28-də Samur-Abşeron suvarma sisteminin yenidən qurulması layihəsi çərçivəsində Şabran rayonu ərazisində inşa edilən Taxtakörpü su anbarı, 25 meqavatlıq Taxtakörpü Su Elektrik Stansiyası və Taxtakörpü-Ceyranbatan su kanalının açılışı olmuşdur.

Azərbaycan Respublikasının Prezidenti İlham Əliyev və xanımı Mehriban Əliyeva açılış mərasimində iştirak etmişlər.
Azərbaycanın müstəqilliyinin ilk illərində meliorasiya və irriqasiya sistemi bərbad vəziyyətə düşmüşdü. Ulu öndər Heydər Əliyev ilk xarici sərmayəni bu sahəyə yönəltməklə həmin kompleksin beynəlxalq standartlar səviyyəsində yenidən qurulmasına start vermişdir. Samur-Abşeron suvarma sisteminin yenidən qurulmasına da kəskin ehtiyac duyulurdu. Tezliklə bu layihə çərçivəsində Azərbaycan-Rusiya sərhədində yerləşən, Samur çayı üzərindəki Baş Hidroqovşaq, Baş Suqəbuledici və Samur-Abşeron kanalının ilk 50 kilometrlik hissəsi əsaslı təmir edilmiş, həmçinin ən müasir standartlara cavab verən Xanarx kanalı, Baş Sudurulducu Qurğu və 188 kilometr uzunluğunda təsərrüfatlararası beton kanallar inşa olunmuşdur.

Gürcüstan Milli Statistika Xidmətindən verilən məlumata görə, 2013-cü ilin ötən səkkiz ayı ərzində Azərbaycan ilə bu ölkə arasında ticarət dövriyyəsi 840,61 milyon dolları təşkil etmişdir. Bu, Gürcüstanın ümumi xarici ticarət dövriyyəsinin 12,7 faizini təşkil edir. Məlumatda, həmçinin bu göstəricinin 2012-ci ilin eyni dövründəkindən 3,26 faiz çox olduğu qeyd edilir. 
Cari ilin 8 ayında Gürcüstanın ümumi xarici ticarət dövriyyəsinin 6,64 milyard dolları təşkil etdiyi və bunun ötən ilin müvafiq dövrü ilə müqayisədə 0,13 faiz az olduğu bildirilir.

Azərbaycan Türkiyədən sonra Gürcüstanın ikinci ticarət tərəfdaşıdır. Üçüncü yerdə isə Ukraynadır.