Azərbaycan Respublikası Dövlət Neft Şirkətinin (ARDNŞ) Gürcüstan Nümayəndəliyi bu ölkədə 108-ci yanacaqdoldurma stansiyasını istifadəyə vermişdir.
Müasir tələblərə tam cavab verən obyekt Tbilisi şəhərində açılmışdır. İstehlakçılar burada avtomobilləri üçün benzinlə yanaşı, qaz da ala biləcəklər.
Yanacaqdoldurma stansiyasının açılış mərasimində ARDNŞ-nin prezidenti Rövnəq Abdullayev, şirkətin Gürcüstan Nümayəndəliyinin rəhbəri Mahir Məmmədov və digər rəsmi şəxslər iştirak etmişlər.
Stansiyada 25 nəfər işlə təmin olunmuşdur.
ARDNŞ-nin prezidenti Rövnəq Abdullayev Azərbaycan-Gürcüstan əməkdaşlığının getdikcə möhkəmləndiyini, Gürcüstanın yanacaq bazarında şirkətin mövqeyinin gücləndiyini vurğulamış, soydaşlarımızı Novruz bayramı münasibətilə təbrik etmişdir.

Bakı-Tbilisi-Qars (BTQ) dəmir yolunun Gürcüstan sahəsi əsasən yüksək dağlıq bölgədən keçir.
Azərbaycan Respublikası Nəqliyyat Nazirliyinin “Azəryolservis” Açıq Səhmdar Cəmiyyətinin (ASC) Gürcüstan filialının direktoru Qurban Piriyev yolun bu hissəsində işlərin gedişi ilə tanış olmuşdur.
Filialın direktoru AzərTAc-ın xüsusi müxbirinə müsahibəsində demişdir ki, yazın gəlişi dəmir yolunda işlərin yüksək sürətlə aparılmasına şərait yaratmışdır. O, yolun Marabda-Tetrisxaro sahəsində infrastrukturun tam hazır olduğunu bildirmiş və Tetrisxaro-Zalqa hissəsində bütün körpülərin tikintisinin başa çatdırıldığını, yeni relslərin döşəndiyini, elektrik-rabitə işlərinin görüldüyünü qeyd etmişdir.
Qurban Piriyev demişdir ki, Zalqa-Axalkalaki sahəsində 8 kilometr dəmir yolu çəkilmiş, uzunluğu 154, eni 9, hündürlüyü 27 metr olan Qırxbulaq körpüsünün inşası başa çatdırılmışdır. Hazırda yolun 20 kilometrinə relslər döşənir. Həmçinin Gürcüstan-Türkiyə sərhədindəki tuneldə də işlərin vüsət aldığı və artıq 86 metr uzunluğunda tunel qazıldığı, hər gün bunun 2-3 metr artırıldığı qeyd olunmuşdur.
ASC-nin Gürcüstan filialının direktoru BTQ dəmir yolu layihəsinin Gürcüstan sahəsində işlərin nəzərdə tutulduğu vaxtda başa çatdırılacağını vurğulamışdır.

Bu gün Gürcüstan parlamentinin rəsmi veb-saytı (www.parliament.ge) kənardan hücuma məruz qalıb.
APA-nın Gürcüstan bürosunun yerli mətbuata istinadən verdiyi məlumata görə, parlamentin mətbuat xidmətinin nümayəndəsi saytın xakerlər tərəfindən dağıdılmasını istisna etməyib. Məlumata görə, hazırda Gürcüstan ali qanunvericilik orqanının saytının açılmaması səbəbi mütəxəssislər tərəfindən araşdırılır.
Xatırladaq ki, parlamentin saytı 2013-cü il dekabrın 31-də də dağıdılmışdı.

Azərbaycan Dövlət Neft Şirkətinin (ARDNŞ) Marketinq və İqtisadi Əməliyyatlar İdarəsi bu ilin fevral ayında 86 168 ton dizel yanacağı ixrac edib. ARDNŞ-dan «APA-Economics»ə verilən məlumata görə, bu, ötən ilin eyni dövrü ilə müqayisədə 4,6% çoxdur.

Həmçinin, ötən ay 13 088 ton təyyarə yanacağı ixrac edilib ki, bu da keçən ilin analoji dövrü ilə müqayisədə 4,3% çoxdur.

Fevral ayında ARDNŞ tərəfindən avtomobil benzininin ixracı bərpa olunub və bu, 383 ton təşkil edib. Ötən ay 34 448 ton vakuum qazoylu da ixrac edilib.

Ümumilikdə, bu ilin yanvar-fevral ayları ərzində avtomobil benzini ixracının həcmi 383 ton, vakuum qazoylunun ixracı isə 34 448 ton olub.

Bundan başqa, 2 ay ərzində ötən ilin eyni dövrünə nisbətən dizel yanacağının ixracı 2,7% azalaraq 164 275 ton, təyyarə yanacağının ixracı isə 10% artaraq 23 245 ton təşkil edib.

Bu ilin fevral ayında dünya bazarında etilləşdirilmiş benzinin qiyməti (1 ton üçün) 970,15 ABŞ dolları, təyyarə yanacağı - 959,85 dollar, dizel yanacağı - 908,73 dollar, 1%-li kükürdlü mazutun qiyməti isə 632,81 dollar təşkil edib.

Azərbaycan prezidenti İlham Əliyev “Bakı Metropoliteni” Qapalı Səhmdar Cəmiyyətinin yaradılması haqqında sərəncam imzalayıb.

“APA-Economics”in məlumatına görə, Bakı Metropoliteninin və “Azərtunelmetrotikinti” Səhmdar Cəmiyyətinin yenidən təşkili yolu ilə “Bakı Metropoliteni” Qapalı Səhmdar Cəmiyyəti (bundan sonra - Cəmiyyət) yaradılıb.

Cəmiyyət Bakı Metropolitenin və “Azərtunelmetrotikinti” Səhmdar Cəmiyyətinin hüquqi varisidir və onların bütün hüquq və öhdəlikləri, habelə əmlakı Cəmiyyətə keçib.

Cəmiyyətdə səhmdarların ümumi yığıncağının səlahiyyətlərinin həyata keçirilməsi aşağıdakı dövlət orqanlarına həvalə edilib:

Azərbaycan Respublikasının Nazirlər Kabinetinə:

- Cəmiyyətin Nizamnaməsinin və strukturunun təsdiqi, nizamnamə kapitalının miqdarının müəyyən edilməsi;

- Cəmiyyətin inkişaf istiqamətlərinin müəyyən edilməsi;

- Cəmiyyətin törəmə müəssisələrinin, habelə idarə, filial və nümayəndəliklərinin rəhbərlərinin vəzifəyə təyin və vəzifədən azad edilməsinə razılıq verilməsi;

- Cəmiyyətin illik hesabatlarının, mühasibat balanslarının, mənfəət və zərər hesablarının təsdiqi, mənfəətinin və zərərinin bölüşdürülməsi;

- Cəmiyyətin xalis aktivlərinin dəyərinin iyirmi beş faizindən artıq məbləğdə olan əqdin (xüsusi əhəmiyyətli əqdin) bağlanmasına razılıq verilməsi;

- Sərəncamda qeyd edilənlər istisna olmaqla, Azərbaycan Respublikasının Mülki Məcəlləsi ilə ümumi yığıncağın səlahiyyətlərinə aid edilmiş digər məsələlərin həll edilməsi.

Azərbaycan Respublikasının Əmlak Məsələləri Dövlət Komitəsinə:

- Cəmiyyətin törəmə müəssisələrinin, habelə idarə, filial və nümayəndəliklərinin yaradılmasına, yenidən təşkilinə və ya ləğvinə razılıq verilməsi

Müəyyən edilib ki, Cəmiyyətin sədrinin və onun müavinlərinin (İdarə Heyəti) vəzifəyə təyin və vəzifədən azad edilməsi, Cəmiyyətin yenidən təşkili və ləğvi məsələlərinin həll edilməsi Azərbaycan Respublikasının Prezidenti tərəfindən həyata keçirilir.

Nazirlər Kabinetinə tapşırılıb ki, Cəmiyyətin Nizamnaməsini və strukturunu Azərbaycan Respublikasının Prezidenti ilə razılaşdıraraq iki ay müddətində təsdiq etsin.

Vergilər Nazirliyi və Əmlak Məsələləri Dövlət Komitəsinə isə öz fəaliyyət istiqamətlərinə uyğun olaraq Cəmiyyətin dövlət qeydiyyatına alınması üçün tədbirlər həyata keçirmək tapşırılıb.

Prezidentin digər sərəncamı ilə Zaur Hüseynov “Bakı Metropoliteni” Qapalı Səhmdar Cəmiyyətinin sədri təyin edilib.

“Bakı Metropoliteni” QSC-nin sədri təyin olunan Zaur Hüseynov bundan əvvəl “Bakıelektrikşəbəkə” ASC sədrinin 1-ci müavini vəzifəsində çalışıb.

APA-nın məlumatına görə, 1964-cü ildə Bakıda şəhərində anadan olan Z. Hüseynov bir neçə xarici dil bilir.

O, “Bakıelektrikşəbəkə” ASC yaranan vaxtdan bu qurumda çalışmağa başlayıb.

Qeyd edək ki, Bakı Metropoliteninin rəisi Tağı Əhmədov idi.

Gürcüstanın Baş naziri İrakli Qaribaşvili Tbilisidə energetika məsələləri üzrə Avropa komissarı Günter Ottingerlə görüşüb.

Baş nazirin dəftərxanasından Trend-ə bildiriblər ki, görüş zamanı tərəflər ölkənin Avropa İttifaqının "Enerji birliyi" layihəsinə daxil olmasının perspektivlərini müzakirə ediblər.

Görüşdə qeyd olunub ki, Aİ Gürcüstanın "Enerji birliyi"nə daxil olması ideyasını dəstəkləyir. Quruma daxil olmağa hazırlıq prosesinə gəldikdə, bu məsələ üzrə danışıqlar təxminən altı-səkkiz ay davam edəcək və müvafiq saziş bu ilin oktyabrında imzalanacaq.

Görüş zamanı tərəflər bir sıra enerji məsələlərini də müzakirə ediblər və əsas diqqət Azərbaycan qazının Gürcüstan və Türkiyə vasitəsilə Avropaya nəqlinə imkan verəcək "Şahdəniz" qaz-kondensat yatağının işlənməsinin ikinci mərhələsinin reallaşdırılması məsələsinə ayrılıb.

G.Ottingerin qeyd etdiyi kimi, Azərbaycan qazının Gürcüstana tranziti zamanı Gürcüstan nəql edilən həcmdən beş faiz əldə edəcək ki, bu da ölkənin qaz təchizatını yaxşılaşdıracaq.

Görüşdə Gürcüstanın xarici işlər naziri Maya Pancikidze və ölkənin energetika naziri Kaxa Kaladze də iştirak ediblər.