Oktyabrın 30-da Gürcüstan parlamentinə seçkilərin ikinci turu keçirilir. İkinci tur 50 majoritar dairədə təşkil olunub. Səsvermə ilə əlaqədar 2229 seçki məntəqəsi yaradılıb. Bu məntəqələrdə 2 milyon 478 min 42 seçici səs verir.

Seçki məntəqələri səhər saat 8:00-da açılıb. Səsvermə saat 20:00-da başa çatacaq.

Dairələrdə 100 namizədin mübarizə aparacağı gözlənilir.

Seçkilərin ikinci turunu 7 xarici ölkədən 582 jurnalist, 10 beynəlxalq təşkilatdan 221 müşahidəçi izləyir. Yerli müşahidəçilərin sayı isə 12 min 122 nəfərdir.

Gürcüstan Mərkəzi Seçki Komissiyası bəyan edib ki, səsvermənin ilkin nəticələri barədə məlumatlar səsvermə başa çatandan iki saat sonra veriləcək.

İkinci turda namizədlər adi səs çoxluğu ilə qalib hesab ediləcəklər.

Səsvermənin ikinci turu azərbaycanlıların yığcam yaşadıqları Marneuli rayonundakı 36 saylı dairədə də keçirilir. Bu dairədə azərbaycanlı, “Vahid milli hərəkat” partiyasının namizədi Əhməd İmamquliyev mübarizə aparır. Onun rəqibi “Gürcü arzusu” partiyasının namizədi Tamaz Naverianidir.

Gürcüstan parlamenti deputatlarının 77-si proporsional sistem, 73–ü isə majoritar qaydada seçilir. Oktyabrın 6-da keçirilmiş birinci turda proporsional sistem üzrə 77 deputat seçilsə də, majoritar dairələrin 50-də namizədlərin heç biri səslərin 50+1 faizini toplaya bilməmişdi. Ona görə də həmin 50 dairədə seçkilərin ikinci turu keçirilir.

Tbilisidə səfərdə olan Azərbaycanın iqtisadiyyat naziri Şahin Mustafayev oktyabrın 28-də Gürcüstanın iqtisadiyyat və davamlı inkişaf naziri Dmitri Kumsişvili ilə görüşüb.

“Report”un Gürcüstan bürosu xəbər verir ki, görüşdə regionda həyata keçirilən və hazırlanan yeni layihələr, strateji tərəfdaşlığın inkişaf perspektivləri, eləcə də, qarşılıqlı maraq doğuran digər məsələlər ətrafında geniş fikir mübadiləsi aparılıb.

D.Kumsişvili deyib ki, Gürcüstan dost və qardaş Azərbaycan ilə əlaqələrin inkişafında maraqlıdır: "Bu gün xalqlarımız, dövlət və hökumət rəhbərlərimiz arasındakı dostluq münasibətləri əlaqələrimizin hərtəfəli inkişafı üçün geniş imkanlar yaradır. Bizim bir sıra layihələrimiz var və çalışırıq ki, həmin layihələri tez bir zamanda reallaşdıraq".

Nazir bildirib ki, bu layihələr iki xalqın və dövlətin ümumi rifah halının yaxşılaşmasına və dövlət maraqlarına uyğundur. D.Kumsişvilinin sözlərinə görə, bu layihələr həm də, strateji tərəfdaşlığın daha möhkəmlənməsinə xidmət edir.

Şahin Mustafayev göstərilən qonaqpərvərliyə görə təşəkkür edib. O bildirib ki, Azərbaycanla Gürcüstan strateji tərəfdaşdırlar: "Bizim birgə iştirakımızla həyata keçirilən irimiqyaslı və regional layihələr təkcə bizim xalqlarımızın deyil, ümumilikdə regionun inkişafına, sülhün və təhlükəsizliyin təminatına xidmət edir".

Nazir nümayəndə heyətlərinin beynəlxalq tədbirlərdə də mövqelərinin birgə müdafiə olunmasının vacibliyini qeyd edib. O bildirib ki, hər iki dövlətin əraziləri işğal olunub: "Torpaqlarımız işğaldan azad olunduqdan sonra regional əməkdaşlığımız daha genişlənəcək".

Azərbaycan Respublikası Dövlət Təhlükəsiziliyi Xidmətinin (DTX) bir neçə gün əvvəl terrorçulara qarşı keçirdiyi əməliyyatın bəzi təfərrüatı məlum olub.

“Report”un əldə etdiyi məlumata görə, terrorçulardan “Ömər” ləqəbli A.Quliyev oktyabrın 26-da Bakı şəhəri, Qaradağ rayonu, Ələt qəsəbəsində zərərsizləşdirilib.

Belə ki, DTX əməkdaşları terrorçuluq fəaliyyətində şübhəli bilinən 21 yaşlı A.Quliyevin Bakı-Ələt yolunda hərəkətdə olan Bakı-İstanbul avtobusunda olmasını müəyyənləşdirib.

Əməliyyatçılar A.Quliyevi avtobusdan endirmək istəyərkən o, üzərində olan əl qumbarasını partlatmaq istəyərək müqavimət göstərməyə çalışıb. “Bu zaman DTX əməkdaşları yüksək peşəkarlıq nümayiş etdirərək avtobusda olan şəxslərin və Bakı-Ələt yolunda olan digər nəqliyyat vasitələrinin təhlükəsizliyini təmin etmək məqsədi ilə “Ömər”ə atəş açaraq onu zərərsizləşdirib”, - deyə, hüquq-mühafizə orqanlarındakı mənbə vurğulayıb.

Xatırladaq ki, DTX-nin İctimai əlaqələr şöbəsi keçirilmiş əməliyyatla bağlı məlumat yayıb. Məlumata əsasən, A.Quliyevlə yanaşı daha bir terrorçu məhv edilib, daha biri isə tutulub.

Məlumatda bildirilib ki, Azərbaycan Respublikasında terror aktları və silahlı basqınlar törətməyi planlaşdıran, ölkə hüdudlarından kənardakı silahlı münaqişələrdə iştirak edən terrorçu silahlı birləşmələrin tabeçiliyini qəbul edərək onlarla əlaqəli qanunsuz fəaliyyət göstərən silahlı dəstə yaradıldığı barədə Dövlət Təhlükəsizliyi Xidmətinə daxil olmuş məlumat aparılan araşdırmalarla təsdiqlənib və təxirəsalınmaz əks tədbirlərin görülməsini zəruri edib. Müəyyən olunub ki, Azərbaycan Respublikasının vətəndaşları F.Rüstəmov, A.Quliyev, A.Gülməmmədov və digərləri ölkə hüdudlarından kənarda fəaliyyət göstərən radikal dini terrorçu silahlı birləşmələrin nümayəndələrinin internet vasitəsi ilə göndərdikləri gizli tapşırıqlar əsasında terror təşkilatının Azərbaycanda “Qafqaz camaatı” adlı silahlı qolunun yaradılması, rəhbərinin seçilməsi, təşkilatlanaraq dini ekstremizm zəminində digər şəxslərin cinayətkar fəaliyyətə cəlb edilməsi məqsədi ilə sövdələşmələr aparıb, qanunsuz olaraq odlu silah və partlayıcı vasitələr əldə edib terror aktları və silahlı basqınlar törətməyə hazırlıq hərəkətləri görüblər. Onlar müxtəlif tarixlərdə gizli toplaşaraq ölkədən kənarda fəaliyyət göstərən terror təşkilatının rəhbərinə mütləq tabeçiliklərini və sədaqət andını bəyan etmələrinin videoçəkilişini aparıb, cinayətkar niyyətlərinin həyata keçirilməsi, əlavə silah-sursat əldə edilməsi, vəsait toplanılması üçün tədbirlər görüb, ayrı-ayrı şəxslərə hədə-qorxu altında aylıq ödənişlər tətbiq edib, basqın ediləcək konkret şəxslərin güdülməsini həyata keçirib, ictimai qaydanı pozmaq, əhali arasında vahimə yaratmaq məqsədi ilə planlaşdırılan xüsusilə ağır cinayət əməlinin törədilməsi ilə bağlı dəstə üzvləri arasında vəzifə bölgüsü aparıblar.

Dini ekstremizm zəminində ağır və xüsusilə ağır cinayətlər törətmək məqsədilə yaradılan cinayətkar birlikdə iştirak etmə, odlu silahdan istifadə etməklə terrorçuluğa və quldurluğa hazırlıq əməllərini törətmələrinə əsaslı şübhələr olan A.Quliyev, F.Rüstəmov və A.Gülməmmədovun saxlanılması üzrə 26-27 oktyabr 2016-cı il tarixlərində respublikanın müxtəlif rayonlarında kompleks əməliyyat tədbirləri həyata keçirilib, bu zaman saxlanılmasına müqavimət göstərərək ictimai yerdə "F-1" tipli əl qumbarasını partlatmağa cəhd edən A.Quliyev, habelə "Steçkin" markalı tapançadan istifadə edərək xidməti vəzifələrini yerinə yetirən əməkdaşlara atəş açıb, silahlı müqavimət göstərən F.Rüstəmov ətrafdakıların həyat və sağlamlığının ümumi təhlükəli, real və qəfil cinayətkar qəsddən qorunması və cinayətkar əməllərə qarşı cavab tədbiri olaraq xüsusi əməliyyat qrupu tərəfindən xidməti silahdan istifadə edilməklə məhv edilib, A.Gülməmmədov isə şübhəli şəxs qismində tutulub.

Fakt üzrə Dövlət Təhlükəsizliyi Xidməti İstintaq baş idarəsi tərəfindən Azərbaycan Respublikası Cinayət Məcəlləsinin 218.2, 28,181.2.1, 28,214.2.1, 28,214.2.3 və 228.1-ci maddələri ilə cinayət işi başlanılıb.

Hazırda istintaq-əməliyyat tədbirləri davam etdirilir. 

 Rumıniyanın Gürcüstana yeni təyin olunmuş səfiri azərbaycanlıların kompakt yaşadığı Marneuliyə səfər edib.

APA-nın Gürcüstan bürosunun məlumatına görə, səfir Radu Xorumba səfər çərçivəsində Gürcüstanın müxtəlif ali məktəblərində təhsil alan azərbaycanlı gənclərlə görüşüb.

Görüşdə Gürcüstanda NATO və və Avropaya  inteqrasiya məsələləri müzakirə olunub. Müzakirə çərçivəsində Radu Xorumba, Rondeli Fondunun prezidenti Yekaterina Metreveli və NATO-nun Gürcüstandakı İnformasiya Mərkəzinin direktoru Ketevan Çaçava çıxış edərək NATO və Gürcüstan, eləcə də Avropaya inteqrasiya məsələləri barədə fikirlərini bildiriblər.

Səfir Radu Xorumba Avropaya inteqrasiyanın əsasən gənclərin üzərinə düşdüyünü qeyd edib. “Dövlətin inkişafında milli azlıqlar mühüm rol oynayır. Bu gün milli azlıqların Gürcüstanın Avropaya inteqrasiya məsələlərində rolu böyükdür”, deyə səfir bildirib.

Sonda səfir tələbələrin suallarını cavablandırıb. Tədbirdə NATO-ya aid ədəbiyyat və informasiya bülletenlərinin sərgisi təşkil olunub.

Tədbir başa çatdıqdan sonra Rumıniya səfiri və digər rəsmi şəxslər Marneuli Gənclər Mərkəzinin həyata keçirdiyi layihələrlə tanış olublar. MGM-nin koordinatoru Emin Əhmədov Rumıniya səfirinə gələcək perspektiv planlar haqqında ətraflı məlumat verib. Görüş çərçivəsində səfir və digər görüş iştirakçıları MGM-nin gənc xalçaçılar dərnəyində toxunan xalçalara baxıblar.

Azərbaycanın Ukraynaya yeni təyin olunmuş səfiri Azər Xudayar oğlu Xudiyev etimadnaməsini prezident Pyotr Poroşenkoya təqdim edib.

"Report" xəbər verir ki, bu barədə Ukraynanın Prezident Administrasiyasının mətbuat xidməti məlumat yayıb.

Görüş zamanı tərəflər Ukrayna və Azərbaycanın beynəlxalq səviyyədə tanınmış sərhədlər çərçivəsində hər iki ölkənin suverenlik və ərazi bütövlüyünün dəstəklənməsinə dair mövqeyinin dəyişməz qaldığını bildiriblər.

Tərəflər, həmçinin 2016-c ildə baş tutan Ukrayna və Azərbaycan Prezidentləri Şurasının 5-ci iclası və Ukrayna-Azərbaycan iqtisadi əməkdaşlıq məsələləri üzrə hökumətlərarası komissiyasının 11-ci iclası çərçivəsində əldə olunan razılaşmaların yerinə yetirilməsinin vacib olduğunu qeyd ediblər.

Azərbaycan Respublikasının Prezidenti İlham Əliyevin tapşırığı ilə Türkiyədə səfərdə olan Prezidentin ictimai-siyasi məsələlər üzrə köməkçisi Əli Həsənov oktyabrın 25-də bir sıra görüşlər keçirib.

"Report" AZƏRTAC-a istinadən xəbər verir ki, Türkiyə prezidentinin sözçüsü İbrahim Kalın, baş nazirin müavinləri Toğrul Türkeş və Numan Kurtulmuş ilə görüşlərdə Azərbaycan-Türkiyə strateji münasibətlərində yüksələn xətlə xarakterizə olunan inkişafın əhəmiyyəti, mətbuat və informasiya sahəsində əlaqələrin perspektivləri, həmçinin qarşılıqlı maraq doğuran digər məsələlər barədə müzakirələr aparılıb.

Azərbaycanın Türkiyədəki səfiri Faiq Bağırov görüşlərdə iştirak edib.