Bolqarıstanın bir qrup ictimai və mədəniyyət xadimi Xocalı qətliamı ilə bağlı müraciət qəbul edib.

APA-nın məlumatına görə, müraciətdə bildirilir ki, Xocalı faciəsi Ermənistan-Azərbaycan münaqişəsində ən faciəvi epizoddur:

“Bu hadisə 12 dövlət və ABŞ-ın 20 ştatı tərəfindən pislənilib. 1992-ci il fevralın 25-dən 26-na keçən gecə erməni hərbi hissələri qeyri-qanuni silahlı birləşmələr və keçmiş SSRİ-nin 366-cı motoatıcı alayı ilə birgə Xocalı şəhərini işğal ediblər. Əksəriyyəti qadın, uşaq və yaşlılar olmaqla, 600-dən çox mülki əhali qətlə yetirilib. Tarixi yaddaş və mənəvi borc bizdən bu faciəvi hadisələrinin qurbanlarının xatirəsini heç vaxt unutmamağı və hər zaman yad etməyi tələb edir. İnanırıq ki, ədalətin bərqərar olunacağı gün uzaq deyil və Xocalı faciəsi geniş dünya ictimaiyyəti tərəfindən qınanılacaq”.

Sənəddə qeyd olunur ki, keçmişdə olduğu kimi, hazırda da bolqar xalqı Azərbaycan və erməni xalqları ilə səmimi dost münasibətlər və tərəfdaş əlaqələrinə malikdir: “Ermənistan-Azərbaycan münaqişəsinin tənzimlənməsində maraqlı olmayan destruktiv qüvvələrdən fərqli olaraq, biz hesab edirik ki, azərbaycanlılar və ermənilər arasında uzunmüddətli sülh əldə oluna bilər. Səmimi qəlbdən inanırıq ki, Cənubi Qafqaz özünün böyük iqtisadi və mədəni potensialı ilə sülh, əməkdaşlıq və rifah regionuna çevrilə bilər. Çoxdan gözlənilən bu məqsədə nail olmasında bütün cəhdləri qeyd-şərtsiz dəstəkləyirik. Biz Bakıda 2016-cı il noyabr ayında toplaşaraq “Azərbaycan və Ermənistan arasında sülh Platforması”nı yaradan Azərbaycan və Ermənistan hüquq müdafiəçiləri ilə həmrəylik nümayiş etdiririk. Ümid edirik ki, bu vacib təşəbbüs hər iki ölkənin vətəndaş cəmiyyətləri arasında dialoq üçün real əsas olacaq və Ermənistan-Azərbaycan münaqişəsinin tez bir zamanda həllinə və iki qonşu xalq arasında dost münasibətlərinin qurulmasına yardım edəcək”.

Xatırladaq ki, müraciəti imzalayanlar arasında Bolqarıstan Xalq Məclisinin üzvü, Bolqarıstanın Azərbaycandakı sabiq səfiri İvan Palçev, Bolqarıstan Xalq Məclisinin üzvü Rəmzi Osman, Bolqarıstanın İvan Vazov adına Milli Teatrının direktoru Marius Donkin, Bolqarıstan Kinematoqrafçılar Birliyinin sədri İvan Pavlov, İsrail-Bolqarıstan İnstitutunun direktoru Yahov Cerasi, Bolqarıstanın Kitabxanaçılıq və İnformasiya Texnologiyaları Universitetinin rektoru Stoyan Dençev və digərləri var.

ATƏT-in Minsk Qrupunun həmsədrləri Riçard Hoqland (ABŞ), İqorğ Popov (Rusiya) və Stefan Viskonti (Fransa) təmas xəttində baş verən toqquşma ilə bağıl bəyanat yayıb.

APA-nın məlumatına görə, bəyanatda qeyd edilir ki, həmsədrlər Azərbaycan və Ermənistan Müdafiə nazirliklərindən və digər mənbələrdən fevralın 25-də səhər təmas xəttində atəşkəs rejiminin ciddi surətdə pozulduğu və insan tələfatı olduğu barədə məlumat alıblar.

Bəzi cəsədlər neytral zonada qalıb. Həmsədrlər tərəfləri təmas xətti yaxınlığındakı ağır texnikanı əvvəlki mövqelərə çəkməyə və dünən ATƏT-in şəxsi nümayəndəsinin vasitəçiliyi ilə əldə edilən razılaşmaya uyğun olaraq cəsədlərin evakuasiyasının təmin edilməsinə çağırıb. Həmsədrlər tərəfləri güc tətbiq etməmək barədə öhdəliyə əməl etməyə də çağırıb. 

Bu gün Azərbaycanın Tehrandakı səfirliyində Xocalı soyqırımı qurbanları yad edilib.

APA-nın Tehran bürosunun məlumatına görə, Xocalı qurbanlarının xatirəsinə həsr olunmuş mərasimdə xarici ölkələrin Tehrandakı diplomatik nümayəndələri, İran və Azərbaycandan qonaqlar iştirak ediblər.

Tədbirdə Azərbaycanın İrandakı səfiri Bünyad Hüseynov Xocalıda törədilən soyqırım barədə danışıb. Daha sonra Xocalı qətliamına dair sənədli film və klip nümayiş etdirilib. 

Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) Cəbrayıl rayonunun Cocuq Mərcanlı kəndində aparılan təmizləmə əməliyyatları barədə məlumat yayıb.  

ANAMA-dan APA-ya verilən məlumata görə, gün ərzində 8 evə baxış keçirilib, 482 ədəd qəlpə, 1 ədəd partlamamış hərbi sursat (PQ-7 raketinin partlamamış mühərrik hissəsi), 2 ədəd piyada əleyhinə OZM-72 minası, 2 ədəd tank əleyhinə TM-57 minası və 24 ədəd TM -57 tank əleyhinə minanın partladıcısı (MVZ-57) aşkar edilib.

Nəticə etibarilə 36 835 kv.m ərazi (10 335 kv.m əl ilə, 12 500 kv.m mexaniki üsulla və 14 000 kv.m ərazi minaaxtaran itlərin dəstəyi ilə) yoxlanılıb.

Ümumilikdə, 23 gün ərzində Cəbrayıl rayonunun Cocuq Mərcanlı kəndində 89 ev və yeni avtomobil yolunun keçəcəyi əraziyə baxış keçirilib, 7 ədəd partlamamış hərbi sursat (3 ədəd 82 mm-lik minaatan mərmisi (OF-832), 2 ədəd 120 mm-lik minaatan mərmisi (OF-843), 1 ədəd 93 mm-lik tank əleyhinə idarə olunmayan raket (PQ-7VL), 1 ədəd PQ-7 raketinin partlamamış mühərrik hissəsi) və 3 ədəd piyada əleyhinə mina (OZM-72) və 26 ədəd tank əleyhinə mina (2 ədəd tank əleyhinə TM-57 minası və 24 ədəd TM-57 tank əleyhinə minanın partladıcısı (MVZ-57)) aşkar olunaraq zərərsizləşdirilib. 653 059 kv.m ərazi (324 459 kv.m ərazi əl ilə, 149 000 kv.m ərazi mexaniki üsulla, 113 000 kv.m ərazi  SENSYS dərinlik ölçən cihazı  və  66 600 kv.m ərazi minaaxtaran itlərin dəstəyi ilə) yoxlanılıb.

Ərazinin mina və partlamamış hərbi sursatlardan təmizlənməsi əməliyyatı davam etdirilir.

Qətər Dövlətində rəsmi səfərdə olan Azərbaycan prezidenti İlham Əliyev fevralın 26-da Dohada “Qatar Petroleum”un prezidenti və icraçı direktoru Saad Şerida al-Kaabi ilə görüşüb.

APA-nın məlumatına görə,  görüşdə Azərbaycan ilə “Qatar Petroleum” arasında əməkdaşlıq imkanları müzakirə edilib, bir sıra layihələrdə birgə iştirakın mümkünlüyü vurğulanıb.

“Qatar Petroleum”un gələcəkdə Xəzər dənizində və ya SOCAR-ın digər ölkələrdə həyata keçirdiyi layihələrdə Azərbaycan ilə birgə iştirakı məsələləri ətrafında fikir mübadiləsi aparılıb.

Fevralın 25-də Gürcüstan Müsəlmanları İdarəsinin və Azərbaycanlıların Ağsaqqallar Şurasının təşkilatçılığı ilə Xocalı soyqırımı qurbanlarının anım mərasimi keçirilib. APA-nın Gürcüstan bürosunun məlumatına görə, öncə soyqırım qurbanlarının və şəhidlərin ruhuna Qurani-Kərimdən ayələr və dualar oxunub. Sonra Ağsaqqallar Şurasının üzvü Mayak Nemətov 1992-ci ilin 25-dən 26-sına keçən gecə Xocalıda insanlığa qarşı vəhşilik törədən ermənilərin vandalizm hərəkətlərindən söhbət açıb. Tədbirdə çıxış edən GMİ-nin şeyxi Hacı Ramin İgidov, Şərqi Gürcüstanın müftisi Yasin Əliyev Xocalı soyqrımının 25-ci ildönümü  ilə bağlı Azərbaycan xalqına və İslam dünyasına başsağlığı veriblər. Hər iki çıxışçı  XX əsrin sonunda baş verən soyqırımın dəhşətindən, hələ də belə soyqırımların müsəlmanlar yaşayan ölkələrdə davam etdiyini, günahsız insanların qətlə yetirilməsi, hər zaman müsəlmanlara aid məsələlərdə ikili standart sərgiləyən aparıcı dövlətlərin Xocalıya laqeyd yanaşdığı kimi bu gün dünyada baş verən hadisələrə də biganəliyindən, belə hadisələrin qarşısının alınması və təkrarlanmaması üçün tarixdən ibrət dərsi alaraq müsəlmanların ayıq-sayıq, həmrəy olaraq dost və düşmənlərini tanımanın vaxtı çatdığından söhbət açıblar.

Sonra Türkiyənin Gürcüstandakı səfirliyinin dini məsələlər üzrə müşaviri Nəbi Gümüş, Gürcüstan Azərbaycanlıları Ağsaqqallar Şurasının sədri, keçmiş parlament deputatı İsak Novruzov, tanınmış hüquqşünas Teymuraz Lomsadze və Demokratik İnkişaf Fondunun sədri Badri Çerçvadze Xocalı faciəsinin başvermə səbəb və nəticələri barədə tədbir iştirakçılarına ətraflı məlumat verərək soyqırımı törədənlərin həqiqət qarşısında cavab verəcəklərini bildiriblər.

Onlar Qafqazda və dünyada belə faciəvi hadisələrin təkrarlanmaması üçün Xocalı soyqırımın bütün dünyaya çatdırılmasını vacib hesab ediblər. Anım mərasimində Gürcüstan Azərbaycanlı Jurnalistlər Birliyinin sədri Nizami Məmmədzadə “Xocalı harayı” poemasından bir parçanı ilə tədbir iştirakçılarının diqqətinə çatdırıb.

Tədbirin sonunda şəhidlər üçün ehsan süfrəsi təşkil olunub.

Tədbirdə Gürcüstanın müxtəlif bölgələrindən ruhanilər, azərbaycanlı və gürcü elm və ictimaiyyət xadimləri, media nümayəndələri iştirak edib.