Gürcüstan Prezidenti Giorgi Marqvelaşvili reinteqrasiya məsələləri üzrə keçmiş dövlət nazirinin müavini David Rakviaşvilini Milli Təhlükəsizlik Şurasının katibi təyin edib.

"Report" "Sputnik-Gürcüstan"a istinadən xəbər verir ki, MTŞ-nin katibi vəzifəsi keçmiş katib İrina İmerlişvilinin Gürcüstan Konstitusiya Məhkəməsinin hakimi olmasından sonra boşalıb.

"Rakviaşvilinin böyük təcrübəsi var, o, reinteqrasiya məsələləri üzrə dövlət nazirinin müavini kimi çalışıb, Cenevrə danışıqlarında, insidentlərin qarşısının alınması mexanizmində (IPRM) iştirak edib. Buradan irəli gələrək demək olar ki, onun həm ABŞ, həm də Rusiya ilə münasibətlərdə ciddi təcrübəsi var" - G.Marqvelaşvili bildirib.

Prezident həmçinin D.Rakviaşvilinin dövrünün ən görkəmli alpinistlərindən biri olduğunu qeyd edib.

Ümumiyyətlə, Gürcüstan Təhlükəsizlik Şurası ölkənin ali baş komandanı olan prezidentin məşvərətçi orqanıdır. Şura Gürcüstanın milli hərbi strategiyası və müdafiə sisteminin təşkili ilə məşğul olur. Təhlükəsizlik Şurası həmçinin ölkədə müharibə və ya fövqəladə vəziyyət elan etmək səlahiyyətinə malikdir.

Gürcüstanın sabiq prezidenti Mixail Saakaşvilinin həyat yoldaşı Sandra Rulovs Zuqdidi şəhərində birmandatlı dairə üzrə parlament seçkilərinin ikinci turunda iştirak etməyəcəyini açıqlayıb.

S. Rulovs bunu bu gün “Odişi Nyus” telekanalına açıqlamasında bildirib.

Vahid Milli Hərəkat Partiyasından deputatlığa namizəd olan S. Rulovs deyib ki, səsvermə prosesinin gedişində ciddi pozuntular olub və seçkilərin ikinci turunda iştirak etməyi məqsədəuyğun saymır.

Qeyd edək ki, MSK-nın məlumatına görə, Zuqdidi dairəsi üzrə seçkilərin ilkin nəticələrinə əsasən S. Rulovs bu dairədə seçicilərin səslərinin 44,48 faizini, hakim Gürcü Arzusunun namizədi Edişer Toloraya isə səslərin 48,63 faizinin səsini toplayıb. Namizədlərdən heç bir 50 faiz+1 səs toplamadığı üçün seçkilərin ikinci turu təşkil olunacaq. S. Rulovs ikinci turda iştirak etmək istəmədiyini açıqlasa da, seçki qanunvericiliyinə əsasən ikinci turda da onun adı seçki bülletenində olacaq.

Xəbər verdiyimiz kimi, oktyabrın 22-də Gürcüstanın 2 seçki dairəsinin 4 məntəqəsində təkrar seçkilər keçirilib. Majoritar sistem üzrə keçirilmiş təkrar seçkilərdə namizədlərin heç biri lazım olan səs çoxluğunu toplaya bilməyib. Ona görə də oktyabrın 30-da həmin dairələr üzrə seçkilərin ikinci turu keçiriləcək.

Xatırladaq ki, Gürcüstanda oktyabrın 8-də keçirilmiş parlament seçkilərində 50 seçki dairəsində majoritar sistem üzrə namizədlər səslərin 50+1 faizini toplaya bilməmişdi. Gürcüstan Mərkəzi Seçki Komissiyası bunu nəzərə alaraq həmin dairələrdə ikinci turun keçirilməsi barədə qərar qəbul edib.

MSK-nın məlumatına görə, ikinci turda namizədlər adi səs çoxluğu ilə seçiləcəklər. Birinci turda hər bir namizəd 50+1 faiz səs qazanmalı idi. İkinci turda isə namizədlər sadə səs çoxluğu qazandıqları halda deputat seçiləcəklər. İkinci turda birinci turda ən çox səs toplamış iki namizəd iştirak edəcək.

İkinci tur majoritar sistem üzrə 50 dairədə keçiriləcək.

Bu gün Gürcüstanda 2 seçki dairəsi üzrə 4 məntəqədə təkrar seçkilər keçirilir.

Gürcüstan parlamentinə seçkilərin və oktyabrın 8-də bəzi bölgələr üzrə keçirilmiş növbədənkənar bələdiyyə seçkilərinin bir sıra məntəqələrdə nəticələri ləğv olunub. Ona görə də MSK həmin dairələrdə təkrar səsvermə keçirir.

Azərbaycanlıların yığcam yaşadıqları Marneuli rayonundakı 36 saylı seçki dairəsindəki 48 saylı məntəqədə majoritar sistem üzrə parlament seçkiləri, Zuqduqi rayonundakı 66 saylı seçki dairəsinin 38, 79 və 108 saylı məntəqələrində isə majoritar sistem üzrə parlament seçkiləri ilə yanaşı, yerli bələdiyyə sədrinin də seçkisi keçirilir.

Seçki məntəqələri səhər saat 7:00-da açılıb və seçicilər saat 8:00-dan başlayaraq səsverməyə başlayıblar. Səsvermə saat 20:00-da başa çatacaq.

Marneulidəki 48 saylı məntəqədə 1436 seçici var.

Zuqduqidəki 38 saylı məntəqədə 1145, 79 saylı məntəqədə 925, 108 saylı məntəqədə isə 774 seçici qeydə alınıb.

Qeyd edək ki, Marenulidəki 36 saylı dairədə azərbaycanlı namizəd Əhməd İmamquliyev də mübarizə aparır. O, oktyabrın 8-də keçirilmiş səsvermədə seçicilərin 47,91 faizinin, onun rəqibi Tamaz Naveriani isə 43,41 faizini toplaya bilib.

Bugünkü səsvermədə namizədlərdən biri ən azı min səs toplamalıdır. Əks halda bu məntəqədə də ikinci tur təşkil olunacaq.

“Con Kerrinin Dağlıq Qarabağ münaqişəsi ilə bağlı son açıqlaması diplomatik insidentdir”.

APA-nın məlumatına görə, bunu Azərbaycan prezidenti İlham Əliyev“Sputnik” agentliyinə müsahibəsində deyib.

“Oktyabrın 7-də Nazirlər Kabinetinin iclasında da bu açıqlama ilə bağlı fikrimi bildirmişəm. Mən dedim ki, münaqişənin həll olunmamasının günahını Azərbaycanın üstünə atmaq ən azı insafsızlıqdır. Bu bəyanat ABŞ-ın mövqeyinə ziddir. Prezident Obama Fransa və Rusiya prezidentləri ilə birlikdə “status-kvo”nun qəbuledilməz olduğunu bəyan ediblər. Birdən-birə dövlət katibi deyir ki, münaqişənin həllini görmür və bunu İsrail-Fələstin münaqişəsinə nisbətən həll etmək daha çətindir. Bu nə siqnaldır və onu kimə göndərir? Bu, Ermənistana mesajdır ki, məsələni İsrail-Fələstin münaqişəsi kimi uzatmalısınız? Bu tamamilə qəbuledilməz bəyanatdır. Bu bəyanat bir daha münaqişənin niyə həll olunmadığını göstərir”, - deyə o vurğulayıb.

Dövlət başçısı qeyd edib ki, münaqişənin həlli ilə bağlı beynəlxalq təşkilatların qərarları və qətnamələri yerinə yetirilmir: “Təcavüzkar ölkəyə təzyiq göstərilmir, əksinə bir qədər təcavüzkarın dəstəklənməsi siyasəti aparılır. Bizim problemimiz budur. Bizə deyirlər ki, münaqişə təkcə sülh yolu ilə həll olunmalıdır və sülh yolundan başqa yol olmamalıdır. Biz də deyirik ki, yaxşı gəlin həll edək. Axı beynəlxalq hüququ pozmaqla yanaşı, başqa ölkənin ərazisini zəbt etmək, əhalini oradan qovmaq və bu əraziləri nəzarətdə saxlamaq ədalətsizlikdir. Bu gün heç kəsə sirr deyil ki, Azərbaycan ordusu bir çox məsələlərin həlli üçün ciddi hərbi potensiala malikdir. Bizə deyirlər, sülh yolu, biz deyirik yaxşı, gözləyək. Lakin təcavüzkara təzyiq göstərmək əvəzinə biz belə bəyanatlar eşidirik”.