Gürcüstanda keçirilən parlament seçkilərində 4 nəfər azərbaycanlı deputat mandatı qazanıb.
Hakim “Gürcü arzusu-demokratik Gürcüstan” partiyasından proporsional siyahı üzrə namizədliyi irəli sürülmüş Mahir Dərziyev, hakim partiyanın majoritar siyahıdan namizədləri Savalan Mirzəyev seçicilərin 50,02 faizinin, Ruslan Hacıyev isə 56,13 faizinin səslərini toplayaraq deputat mandatı qazanıblar.

Ölkənin əsas ana müxalifəti sayılan “Vahid Milli Hərəkat” partiyasının üzvü Azər Süleymanov isə proporsional siyahı üzrə mandat əldə edib.

Gürcüstan Mərkəzi Seçki Komissiyasından bildiriblər ki, artıq bülletenlərin 99 faizindən çoxu sayılıb və ilkin hesablamalara görə, proporsional siyahı üzrə cəmi 3 partiya parlamentə keçə bilib. “Gürcü arzusu-demokratik Gürcüstan” partiyası 48,65 faiz, “Vahid Milli Hərəkat” Partiyası 27,11 faiz, “Gürcüstan Vətənpərvərlər Alyansı” isə 5 faiz səs toplayıb. Əsas müxalifət partiyalarından olan “İrakli Alasaniya-azad demokratlar” partiyası 4,62 faizlə mandat qazana bilməyib. Parlamentdə təmsil olunmaq üçün hər bir partiya 5 faizlik həddi keçməlidir.

Gürcüstan MSK-nın məlumatına görə, əksər majoritar dairələrdə namizədlər lazım olan səsi toplaya bilməyiblər. Ona görə də həmin dairələrdə ikinci tur keçiriləcək. İkinci turun noyabrın 2-də keçiriləcəyi gözlənilir.

Qeyd edək ki, azərbaycanlıların yığcam yaşadıqları Marneuli rayonu ərazisində təşkil olunmuş 36 saylı dairədə daha bir azərbaycanlı - Əhməd İmamquliyev qələbəyə daha yaxındır. Birinci turda o, seçicilərin 47,91 faizinin səsini qazanmaqla Tamaz Naverianini (43,41 faiz) üstələyib. Həmin dairədən daha az səs toplamış namizədlər ikinci tura buraxılmayacaqlar. Gürcüstan Seçki Məcəlləsinin tələbinə görə, ikinci tura birinci turda ən çox səs toplamış iki namizəd buraxılır.

Beləliklə Ə.İmamquliyev ikinci turda qələbə qazansa, Gürcüstan parlamentində təmsil olunacaq azərbaycanlı deputatların sayı müstəqillik dövründə ilk dəfə 5 nəfər olacaq.

Gürcüstanda seçkinin nəticələrinə əsasən parlamentdə iki partiya olacaq.

“Qafqazinfo” “Novosti-Qruziya”ya istinadən xəbər verir ki, səslərin 99,41% artıq hesablanıb. Məlumatına görə, "Gürcü arzusu" 48,61% və ya 851 min 945 səs, "Vahid milli hərəkat", 27,04% və ya 473 min 896 səs toplayıb.

"Vətənpərvərlər alyansı" partiyasına isə  5%-lik səddi keçmək üçün 0,01 % səs çatmayıb. Digər partiyalar da tələb olunan səsi toplaya bilməyib.

Oktyabrın 8-də səhər yerli vaxtla saat 8:00-da Gürcüstan parlamentinə və Acarıstan Muxtar Respublikasının Ali Sovetinə seçkilər başlayıb.

Gürcüstan Mərkəzi Seçki Komissiyasının (MSK) sədri Tamar Jivaniya bildirib ki, 3,53 milyon seçici bu gün 150 deputatı seçməlidir. Onlardan 77 nəfəri proporsional, 73 nəfəri isə majoritar qaydada seçiləcək.

Səsvermə saat 20:00-da başa çatacaq.

Deputatlığa namizədlər əsas 25 subyekt - 19 siyasi partiya və 6 seçki bloku tərəfindən həm proporsional, həm də bu subyektlərin təşəbbüs qrupları tərəfindən majoritar qaydada irəli sürülüb.

Səsvermənin gedişini yerli müşahidəçilərlə yanaşı, 55 beynəlxalq təşkilatdan 1440 müşahidəçi izləyəcək.

Azərbaycanlı deputatlar Sabir Hacıyev AŞPA, Əli Məsimli GUAM PA, Əflatun Amaşov və Hikmət Məmmədov isə Milli Məclisin xətti ilə səsvermənin gedişini müşahidə edəcəklər.

Səsvermə prosesini 184 KİV-in 5368 əməkdaşı izləyəcək.

Seçkilərlə əlaqədar Gürcüstanda 73 seçki dairəsi üzrə 3636 məntəqə seçki komissiyası yaradılıb.

Bu seçki məntəqələrindən 207-si birbaşa azərbaycanlılar yaşayan ərazilərdə, bir neçəsi isə azərbaycanlıların gürcü və digər millətlərin nümayəndələri ilə birgə yaşadıqları ərazilərdə yaradılıb.

Seçkilərdə 40-a yaxın azərbaycanlının deputatlığa namizədliyi irəli sürülüb.

Gürcüstan Seçki Məcəlləsinin tələbinə əsasən majoritar sistem üzrə mübarizə aparan namizədlər lazım olan səsləri toplaya bilmədikdə seçkilərin ikinci turu təşkil olunacaq.

Tamar Jivaniya bildirib ki, majoritar sistem üzrə deputatlığa namizəd seçicilərin 50 faizindən çoxunun səsini qazanmalıdır. Əgər dairə üzrə namizədlərdən heç biri bu baryeri keçməsə ikinci tur olacaq. İkinci turda ən çox səs toplamış iki namizəd mübarizə aparacaq. Namizədlərin bir neçəsi eyni səs toplayarsa, o zaman, onların hamısı ikinci turda iştirak edirlər.

İkinci turda ən çox səs toplamış namizəd deputat mandatı qazanacaq.

MSK sədri bildirib ki, ikinci tur birinci turdan 25 gün sonra keçiriləcək. Bu da təxminən noyabrın 2-nə təsadüf edəcək.

“Bu il bizim beynəlxalq mövqelərimiz möhkəmlənib. Bir çox beynəlxalq təşkilatda Azərbaycana bir daha dəstək nümayiş etdirilib. Bu təşkilatlar arasında iki təşkilatı xüsusilə qeyd etmək istərdim. Biri İslam Əməkdaşlıq Təşkilatıdır ki, builki Zirvə görüşündə Dağlıq Qarabağ münaqişəsi ilə bağlı kontakt qrupu yaradıb, kontakt qrupu artıq işə başlayır. Zirvə görüşündə Azərbaycanın ərazi bütövlüyünə bir daha dəstək ifadə olundu. Bu yaxınlarda Qoşulmama Hərəkatının - BMT-dən sonra ən çox üzvü olan bu təşkilatın Zirvə görüşündə də növbəti dəfə Ermənistan-Azərbaycan, Dağlıq Qarabağ münaqişəsinin Azərbaycanın suverenliyi, ərazi bütövlüyü çərçivəsində həll edilməsi haqqında qərar qəbul edildi. Bu, bizim böyük diplomatik və siyasi uğurumuzdur”.

APA-nın xəbərinə görə, bunu Azərbaycan prezidenti İlham Əliyev oktyabrın 7-də Nazirlər Kabinetinin 2016-cı ilin doqquz ayının sosial-iqtisadi inkişafının yekunlarına və qarşıda duran vəzifələrə həsr olunmuş iclasında deyib.

Dövlət başçısı bildirib ki, digər təşkilatlarda da bu gözəl meyilləri müşahidə olunmaqdadır: “Avropa Parlamenti. Bu yaxınlarda Avropa Parlamentitərəfindən səslənən rəsmi bəyanat Ermənistan-Azərbaycan, Dağlıq Qarabağ münaqişəsi ilə bağlı çox ədalətli mövqe nümayiş etdirdi. Azərbaycan ictimaiyyəti yaxşı bilir ki, bir il ərzində Azərbaycan Avropa Parlamenti ilə bütün əlaqələri kəsmişdir, Avronest qurumundan çıxıb. Bunun da səbəbi var, ictimaiyyət bunu bilir. Sadəcə olaraq, demək istəyirəm ki, bu, bizim günahımızdan olmayıb. Biz günahkar deyilik. Bizə qarşı ədalətsizlik nümayiş etdirildi. Biz təhqir olunduq. Bizə qarşı diplomatiyada qəbuledilməz sözlər işlədildi. Təbii olaraq, biz də öz sözümüzü dedik. Azərbaycan Milli Məclisi də çox əsaslı, arqumentli, kəskin, yəni, Avropa Parlamentinin o qətnaməsinə uyğun, elə o səviyyədə cavabını verdi. Bir il münasibətlərimiz dondurulmuşdu. Yəni, bunu Azərbaycan xalqı heç hiss etməyib. Mən də o vaxt demişdim, münasibətlər olsa yaxşıdır, olmasa da, hər halda bunun bizim işimizə heç bir təsiri yoxdur. Nəticədə nə oldu? Münasibətləri bərpa etmək üçün özləri gəldilər. Gördülər ki, təhqir, təzyiq yolu ilə keçmir. Halbuki bunu çoxdan bilməli idilər ki, keçmir və keçməyəcək. Gəldilər ki, münasibətləri bərpa etsinlər. Bizim də bəzi təkliflərimiz olub. O təkliflər müsbət qəbul edildi və bu təkliflərin nəticəsində birgə bəyanat da səsləndi. O bəyanatda ifadə olundu ki, Avropa Parlamenti belə hərəkətlərə yol verdiyinə görə təəssüf edir. Orada göstərilir ki, gələcəkdə bu cür hərəkətlərin təkrar olunmaması üçün işlər aparılacaq. Biz də konstruktiv mövqe nümayiş etdirərək qərar qəbul etdik ki, artıq bu, bizi qane edir və münasibətlər indi bərpa olunur”.

Prezident İlham Əliyev deyib ki, Biz 25 ildir ki, müstəqil yaşayan ləyaqətli ölkəyik.

“Mən özümüzü tərifləmək istəmirəm, heç vaxt da tərifləməmişəm, halbuki tərif üçün bir çox məqam var. Heç kimə imkan vermərik ki, bizi təhqir etsin. Qəbuledilməz hər bir hərəkətə cavabımızı veririk, sözümüzü deyirik, heç kimdən çəkinmirik, nəinki bizə aid olan məsələlərdə, bütün məsələlərdə prinsipial mövqe nümayiş etdiririk. Dünyada gedən işlərlə bağlı bizim mövqeyimiz var və biz bu mövqeyi çəkinmədən ifadə edirik” – deyə, o bildirib. 

Gürcüstan parlamentinin hazırkı sədri, Respublikaçılar Partiyasının lideri David Usupaşvili 8 oktyabr parlament seçkilərini ləyaqətlə keçirməyi şərəf işi adlandırıb.

 
APA-nın Gürcüstan bürosunun xəbərinə görə, D. Usupaşvili bildirib ki, seçkilərin yüksək səviyyədə keçirilməsi milli qürur məsələsidir. O qeyd edib ki, bütün partiyalar və siyasi liderlər seçki administrasiyasının elan etdiyi nəticələri tanımalı və öz nəticələrinə istinad etməməlidirlər: “Bu, vacibdir. Gürcüstan siyasi azadlıq və seçki demokratiyası istiqamətində mühüm addımlar atıb və biz inamla Gürcüstan dövlətinə şərtsiz etibar etməliyik”.
 
D. Usupaşvili bir çox majoritar seçki dairələrində ikinci tur ola biləcəyini istisna etməyib: “Sabah axşam seçkilərin nəticələri məlum olmayacaq. Parlamentin gələcək üzvləri, hökumət və ictimaiyyət nümayəndələri mühüm imtahan qarşısındadır. Biz oktyabrın 8-dən başlayan yolu gələcək seçkilərə qədər ləyaqətlə keçməliyik”.
 
Qeyd edək ki, seçkilərdə 19 siyasi partiya, 6 seçki bloku və müstəqil namizədlər mübarizə aparacaq. Hazırkı parlament yeni seçilmiş parlamentin ilk toplantısına qədər öz səlahiyyətlərini icra edəcək.