Qarabağdakı vəziyyət müzakirə olunacaq.

Rusiya xarici işlər naziri Sergey Lavrov bu gün Bakıya gəlir.

"Dalğa TV" APA-ya istinadən xəbər verir ki, bunu Rusiya Xarici İşlər Nazirliyinin xüsusi nümayəndəsi Mariya Zaxarova bu gün keçirdiyi brifinqdə bildirib.

Onun sözlərinə görə, S.Lavrov aprelin 7-də Bakıda keçiriləcək Azərbaycan, İran və Rusiya XİN başçılarının görüşündə iştirak edəcək.

"Nazirin bu səfəri son hadisələrlə əlaqədar daha vacib əhəmiyyət kəsb edir. Bakıda Sergey Lavrovun azərbaycanlı həmkarı Elmar Məmmədyarovla ikitərəfli görüşü də planlaşdırılır. Görüşdə Dağlıq Qarabağdakı vəziyyət də müzakirə olunacaq", - deyə M.Zaxarova qeyd edib.

Aprelin 5-də Rusiya Federasiyasının paytaxtı Moskva şəhərində Azərbaycan Silahlı Qüvvələrinin Baş Qərargah rəisi general-polkovnik Nəcməddin Sadıkov və Ermənistan silahlı qüvvələrinin Baş Qərargah rəisi general-polkovnik Yuri Xaçaturov arasında Rusiya tərəfinin vasitəçiliyi ilə görüş keçirilib.

Müdafiə Nazirliyinin mətbuat xidmətindən  verilən məlumata görə, Azərbaycan və Ermənistan qoşunların təmas xəttində hərbi əməliyyatların dayandırılmasına dair razılıq əldə edilib.

Gürcüstan prezidenti Giorgi Marqvelaşvili Ermənistan və Azərbaycan rəhbərliyini Dağlıq Qarabağ ətrafında yaranmış gərgin vəziyyətin sülh yolu ilə həll edilməsi üçün maksimum səy göstərməyə çağırıb.

"Dalğa TV"nin TASS agentliyinə istinadən verdiyi xəbərə görə, bu barədə G. Marqvelaşvili Tiflisdə keçirilən NATO Həftəsi çərçivəsindəki Xalq Diplomatiyası Forumunda çıxışı zamanı bildirib.

"Ümid edirik ki, Ermənistan və Azərbaycan rəhbərləri gərginliyin azaldılması və münaqişənin sülh yolu ilə həlli üçün beynəlxalq ictimaiyyətin fəal iştirakı ilə maksimum diplomatik səylər göstərəcəklər", - deyə o əlavə edib.

Gürcüstanın müdafiə naziri Zakir Həsənova zəng etdi

Aprelin 4-də Azərbaycanın müdafiə naziri general-polkovnik Zakir Həsənov Gürcüstanın müdafiə naziri xanım Tinatin Xidaşeli ilə qoşunların təmas xəttində yaranmış vəziyyəti telefon vasitəsilə müzakirə ediblər.

Bu barədə Oxu.Az-a Azərbaycan MN-dən bildiriblər.

Məlumata görə, danışıqlar zamanı xanım T.Xidaşeli Gürcüstanın daim Azərbaycanın ərazi bütövlüyünü təmin olunmasını dəstəklədiyini qeyd edərək Ermənistan-Azərbaycan, Dağlıq Qarabağ münaqişəsinin qısa müddət ərzində beynəlxalq hüququn normaları əsasında həll olunacağına ümid etdiyini bildirib.

General-polkovnik Zakir Həsənov dəstəyə görə Gürcüstan tərəfinə minnətdarlığını ifadə edib.

"Biz hər zaman qardaş Azərbaycanın yanındayıq".

Ermənistan daima Azərbaycana qarşı təxribatlar törədir. Baxmayaraq ki, Azərbaycan beynəlxalq konvensiyalar çərçivəsində fəaliyyət göstərir.

"Dalga TV" Rosbalta istinadən xəbər verir ki, bunu Türkiyənin XİN rəhbəri Mövlud Çavuşoğlu bəyan edib.

"Minsk üçlüyü nə işə yarayır? Bu gün Rusiya, ABŞ və Fransa bu məsələni həll etmək istəsə, bir həftəyə münaqişə həllini tapar. Münaqişəni həll etmədikləri üçün belə hadisələr baş verir”, - Mövlud Çavuşoğlu vurğulayıb.

O, Türkiyənin hər zaman münaqişənin sülh yolu ilə həllinin tərəfdarı olduğunu bildirib.

Antalya aeroportunda suallara cavab verəkən o, Ermənistanı BMT-nin Təhlükəsizlik Şurasının və digər beynəlxalq təşkilatların qətnamələrinə baxmayaraq, Azərbaycan ərazilərini işğal etməkdə ittiham edib. Onun sözlərinə görə, dünya ictimaiyyəti buna göz yumur.

O vurğulayıb ki, Dağlıq Qarabağ münaqişəsi qısa bir zamanda dinc yolla həll edilməli, Azərbaycan ərazi bütövlüyü təmin edilməlidir.

“Türkiyəyə gəldikdə, əlbəttə, hər zaman qardaş Azərbaycanın yanındayıq. Nə zaman, hansı mövzuda bizə ehtiyacı olarsa, Azərbaycanın yanındayıq. Necə deyərlər: Osmanlı türkü özü yıxılanda belə, qardaşını darda qoymur”, - Türkiyə diplomatiyasının rəhbəri bildirib.

"Bütün Azərbaycan xalqını təbrik edirəm".

Bu gün Ermənistan Azərbaycana qarşı növbəti silahlı təxribat törədib.

Oxu.Az-ın APA-ya istinadən məlumatına görə, bunu aprelin 2-də Azərbaycan prezidenti İlham Əliyev Təhlükəsizlik Şurasının iclasında söyləyib.

Dövlət başçısı deyib ki, təmas xəttində yerləşən mövqelərimizə hücum olub, yaxınlıqdakı yaşayış məntəqələri atəşə tutulub:

“Bu silahlı təxribat nəticəsində itkilərimiz olub, hərbçilərimiz və mülki şəxslərimiz həlak olub”.

Prezident həlak olanların qohumlarına səbr arzulayıb, yaralananlara şəfa diləyib:

“Nazirlər Kabinetinə həlak olanların ailələrinə maddi yardımlar göstərmək üçün təkliflər hazırlamağı tapşırıram, Müdafiə Nazirliyi isə döyüş əməliyyatlarında fərqlənmiş, Vətən uğrunda qəhrəmancasına döyüşmüş hərbçiləri təltif etmək üçün mənə təkliflər təqdim etsin”.

Dövlət başçısı qeyd edib ki, Ermənistanın bu cür təxribatlara əl atması ilk dəfə deyil:

“Bir neçə gün əvvəl Azərbaycan-Ermənistan sərhədində Qazax istiqamətində oxşar təxribat törədilib. Mövqelərimizə Ermənistanın təxribatçı qrupları hücum çəkib və bu hücum nəticəsində 2 hərbçimiz həlak olmuşdu. Düşmənə layiqli cavab verilib, düşmən yerinə oturdulub”.

Prezident bildirib ki, bu təxribat da Ermənistanın Azərbaycana qarşı məkrli siyasətinin təzahürüdür:

“Bu təxribat ordumuz tərəfindən layiqincə cavablandırıldı”.

Dövlət başçısı deyib ki, düşmənə böyük zərbələr vurulub, düşmən böyük itkilər verib:

“Deyə bilərəm ki, düşmənə sarsıdıcı zərbə vuruldu. Bununla bərabər, qəhrəman döyüşçülərimiz nəinki təxribatın qarşısını ala bildilər, eyni zamanda daha əlverişli hərbi mövqelərə malik oldular. Bu gün təmas xəttində Azərbaycanın üstünlüyü daha da möhkəmləndi. Təxribata cavab olaraq aparılan hərbi əməliyyat nəticəsində böyük hərbi qələbə qazandıq.

Bu münasibətlə ordumuzu, bütün Azərbaycan xalqını təbrik etmək istəyirəm. Bundan sonra da düşmənin bütün təxribatları cavabsız qalmayacaq, düşmənə layiqli cavab veriləcək. Azərbaycan ordusu buna qadirdir, Azərbaycan övladları öz doğma torpaqlarını müdafiə edirlər, Vətən uğrunda vuruşurlar, şəhid olurlar. Bütün şəhidlərimizin xatirəsi ürəyimizdə əbədi yaşayacaq”.