Avstriya ATƏT məkanındakı münaqişələrin həlli istiqamətində səylərini gücləndirəcək.

APA-nın məlumatına görə, bu barədə Avstriyanın qurumdakı daimi nümayəndəsi Klemens Koya deyib.

“Avstriya sədrlik dövründə ATƏT ərazisindəki münaqişələrin həlli istiqamətində səylərini gücləndirəcək. Bizə dialoq lazımdır. Dialoq olsa, sülh prosesi də mümkün olacaq”, - deyə o, söyləyib. 

Azərbaycan prezidenti İlham Əliyev“Gömrük tarifi haqqında” qanunda dəyişikliklər edilməsi qanun imzalayıb.

APA-nın məlumatına görə, “Gömrük tarifi haqqında” qanunda 6.2-ci, 6.3-cü və 6.4-cü maddələr aşağıdakı redaksiyada verilib:

“6.2. Xüsusi rüsumlar malın gömrük ərazisinə idxalının artmış həcmi və şərtləri yerli istehsal sahəsinə ciddi zərər vurduqda və ya ciddi zərər vurmaq təhlükəsi yaratdıqda tətbiq edilir.

6.3. Antidempinq rüsumları malın normal dəyərindən aşağı qiymətə gömrük ərazisinə idxal edilməsi yerli istehsal sahəsinə maddi zərər vurduqda, yerli istehsal sahəsinə maddi zərər vurmaq təhlükəsi yaratdıqda və ya yerli istehsal sahəsinin yaradılmasının mühüm dərəcədə ləngiməsinə səbəb olduqda tətbiq edilir.

6.4. Kompensasiya rüsumları istehsalı, ixracı və ya daşınması zamanı xarici dövlətin spesifik subsidiyasının istifadə olunduğu malın gömrük ərazisinə idxalı yerli istehsal sahəsinə maddi zərər vurduqda, yerli istehsal sahəsinə maddi zərər vurmaq təhlükəsi yaratdıqda və ya yerli istehsal sahəsinin yaradılmasının mühüm dərəcədə ləngiməsinə səbəb olduqda tətbiq edilir.”.

6.5-ci maddədə isə “müvafiq qanunla” sözləri “Antidempinq, kompensasiya və mühafizə tədbirləri haqqında” Azərbaycan Respublikasının Qanunu ilə” sözləri ilə əvəz edilib.

Fransa Milli Assambleyasında bir neçə ermənipərəst deputatın yaratdığı məlumat missiyasının hesabatı açıqlanıb. İkitərəfli münasibətlərə zərbə vurmaq məqsədi daşıyan hesabat guya Fransa-Azərbaycan siyasi, iqtisadi və mədəni əlaqələrindəki xoşagəlməz məqamları araşdırıb üzə çıxarmalı idi. Qərəzli missiya və ondan qaynaqlanan subyektiv fikirlərlə dolu olan hesabat Fransa Milli Assambleyasının əksər deputatlarının narazılığına səbəb olub. Assambleyanın bir qrup üzvü qərəzli missiya və onun hesabatına qarşı birləşərək kommunike imzalayıblar. Kommunikedə erməni lobbisinin gözləntilərinin əksinə olaraq, Azərbaycanla bağlı obyektiv yanaşma nümayiş etdirilib. Kommunikenin müəllifləri ermənipərəst missiyanın hesabatında 25 ildən çoxdur davam edən Ermənistan-Azərbaycan, Dağlıq Qarabağ münaqişəsinin, həmçinin bu münaqişə nəticəsində öz doğma yurdlarından didərgin düşmüş bir milyondan çox azərbaycanlının fundamental hüquqlarının pozulması faktlarının yer almamasına narazılıqlarını bildiriblər.

Milli Assambleyanın üzvü Jan-Fransua Mansel deyib: “Assambleyanın bəzi üzvlərinin həyata keçirdiyi məlumatlandırma missiyası qərəzli olduğu qədər də qeyri-qanunidir. Bu missiyanın üzvləri subyektiv fikirlərinə əsaslanaraq Azərbaycanda guya insan hüquqlarının pozulması və siyasi həbslərlə bağlı məsələləri qabartmağa çalışırlar. Assambleyada hər kəs bilir ki, bunlar əsassız iddialardır. Bütün regionu təhlükədə saxlayan Dağlıq Qarabağ münaqişəsinə hesabatda yer ayrılmır. Ancaq xırda məsələlər şişirdilir. Bu, qərəzli olmaqla yanaşı, həm də başqa bir dövlətin daxili işlərinə kobud müdaxilə etməkdir. Biz hazırladığımız kommunike ilə məlumat missiyası və onun hesabatına qəti etirazımızı bildirmişik”.

Erməni lobbisi tərəfindən idarə olunan bir neçə deputatın hazırladığı qərəzli hesabat Fransa mediası tərəfindən də rədd edilib. Missiya üzvlərinin hazırladıqları hesabatı ictimaiyyətə çatdırmaq üçün keçirdikləri mətbuat konfransı da iflasa uğrayıb. Mətbuat konfransında ikisi azərbaycanlı olmaqla cəmi dörd jurnalist iştirak edib. Ermənipərəst deputatlar Fransua Roşeblan və qərəzli hesabat üzrə məruzəçi Jan Lui Detan boş zal qarşısında cəmi 14 dəqiqə çıxış ediblər. Azərbaycanlı jurnalistlərin sualları qarşısında aciz qalan hər iki deputat mətbuat konfransını tələsik tərk etmək məcburiyyətinə qalıblar.

Xatırladaq ki, hələ ötən ilin iyununda Fransa Milli Assambleyasının xarici məsələlər üzrə komitəsinin iclasında bu ermənipərəst deputatlar Fransa ilə Azərbaycan arasında ikitərəfli siyasi, iqtisadi və diplomatik münasibətlərə dair xüsusi araşdırma komitəsinin yaradılmasını təklif etmişdilər. Lakin Milli Assambleya rəhbərliyi bu təklifin yolverilməz olduğunu bildirərək qətnamə layihəsini rədd etmişdi.

Ermənilərə məxsus PUA məhv edilib.

Müdafiə Nazirliyinin mətbuat xidmətindən APA-ya verilən məlumata görə, martın 2-si günorta saatlarında cəbhənin Ağdam istiqamətində Silahlı Qüvvələrimizin mövqeləri üzərində uçuşlar həyata keçirməyə cəhd göstərən Ermənistan Silahlı Qüvvələrinə məxsus "X-55" taktiki pilotsuz uçuş aparatı (PUA) Hərbi Hava Qüvvələrinin Hava Hücumundan Müdafiə bölmələri tərəfindən vaxtında aşkar olunaraq atəşlə məhv edilib.

Azərbaycan prezidenti İlham Əliyevbolqarıstanlı həmkarı Rumen Radevi ölkəsinin milli bayramı münasibəti ilə təbrik edib.

APA-nın məlumatına görə, dövlət başçısının məktubunda deyilir:

“Hörmətli cənab Prezident, Bolqarıstan Respublikasının milli bayramı münasibətilə Sizə və bütün xalqınıza öz adımdan və Azərbaycan xalqı adından ən səmimi təbriklərimi yetirirəm. Azərbaycan ilə Bolqarıstanı ənənəvi dostluq və əməkdaşlıq münasibətləri birləşdirir. Daim genişlənən siyasi, iqtisadi və mədəni əlaqələrimiz, qarşılıqlı faydalı əməkdaşlığımız ikitərəfli münasibətlərimizin dinamik inkişafını şərtləndirən amillərdəndir.

İnanıram ki, Azərbaycan-Bolqarıstan dostluğu və əməkdaşlığı xalqlarımızın mənafelərinə uyğun olaraq bundan sonra da hərtərəfli və ardıcıl şəkildə inkişaf edəcək və möhkəmlənəcək.

Bu əlamətdar gündə Sizə möhkəm cansağlığı, işlərinizdə uğurlar, dost Bolqarıstan xalqına daim əmin-amanlıq və firavanlıq arzulayıram”.

Azərbaycan prezidenti İlham ƏliyevIV İslam Həmrəyliyi Oyunlarının təşkili və keçirilməsi ilə əlaqədar bəzi tədbirlər haqqında sərəncam imzalayıb.

APA-nın məlumatına görə, Nazirlər Kabinetinə bir ay müddətində IV İslam Həmrəyliyi Oyunlarının təşkilində və keçirilməsində iştirak edən şəxslərin, habelə Oyunların iştirakçılarının akkreditasiyası sisteminin təşkili üçün müvafiq tədbirlər görmək, akkreditasiya olunacaq şəxslərin dairəsini müəyyən etsin, akkreditasiyadan keçmə qaydasını və akkreditasiya kartının formasını təsdiq etmək, akkreditasiya sisteminin fəaliyyətinin təmin edilməsi üçün zəruri tədbirlər görmək tapşırılıb.

Müəyyən edilib ki, müvafiq qaydada akkreditasiyadan keçmiş əcnəbilər və vətəndaşlığı olmayan şəxslər 2017-ci il aprelin 1-dən iyulun 1-dək pasport və ya digər sərhədkeçmə sənədləri və akkreditasiya kartı əsasında viza almadan Azərbaycan gələ və Azərbaycandan gedə bilərlər. IV İslam Həmrəyliyi Oyunlarının təşkili və keçirilməsi ilə bağlı Azərbaycan ərazisində əmək fəaliyyətinə cəlb edilən və müvafiq qaydada akkreditasiyadan keçmiş əcnəbilər və vətəndaşlığı olmayan şəxslər üçün iş icazəsinin alınması tələb olunmur.

Azərbaycan Xarici İşlər Nazirliyi isə IV İslam Həmrəyliyi Oyunları ilə bağlı əcnəbilərin və vətəndaşlığı olmayan şəxslərin Azərbaycana gəlməsi qaydalarının sadələşdirilməsi barədə xarici ölkələrin müvafiq orqanlarına məlumat verməli, IV İslam Həmrəyliyi Oyunları ilə bağlı əcnəbilərin və vətəndaşlığı olmayan şəxslərin Azərbaycana gəlməsi qaydalarının sadələşdirilməsi barədə məlumatın nazirliyin, habelə Azərbaycanın xarici ölkələrdəki səfirliklərinin və konsulluqlarının internet informasiya ehtiyatlarında yerləşdirilməsini təmin etməlidir. Öz növbəsində Dövlət Miqrasiya Xidməti Azərbaycana uçuşlar həyata keçirən aviasiya şirkətlərinə IV İslam Həmrəyliyi Oyunları ilə bağlı əcnəbilərin və vətəndaşlığı olmayan şəxslərin Azərbaycana gəlməsi qaydalarının sadələşdirilməsi barədə məlumat verməlidir.