Tiflisdə “Gürcüstan iqtisadiyyatı: Perspektivlər və çağırışlar” mövzusunda beynəlxalq biznes-forum başlayıb.

APA-nın Gürcüstan bürosunun məlumatına görə, tədbiri Gürcüstanın baş nazirinin birinci müavini, maliyyə naziri Dimitri Kumsişvili açıb.

D. Kumsişvili forumun iqtisadiyyatın və özəl biznesin inkişafı ilə bağlı böyük əhəmiyyət kəsb etdiyini vurğulayıb. Forumda  “Paşa Bank”ın İdarə Heyətinin sədri Şahin Məmmədov, Gürcüstan İqtisadiyyat və Davamlı İnkişaf Nazirinin müavini Giorgi Çerkezişvili, Gürcüstanın Regional İnkişaf və İnfrastruktur Naziri Zurab Alavidze, Avropa Bankının Qafqaz, Moldova və Belarus üzrə Bərpa və İnkişaf direktoru Bruno Balvanera, Dünya Bankının Cənubi Qafqaz üzrə regional direktoru Mersi Tempon çıxış edərək regionda iqtisadi perspektivlər və çağırışlardan bəhs ediblər.

Forumda  Azərbaycan da daxil olmaqla, müxtəlif ölkələrdən 450 nəfərdən çox  iş adamları iştirak edir. D. Kumsişvili jurnalistlərə açıqlamasında Azərbaycanın Gürcüstanın ən əsas strateji tərəfdaş olduğunu bildirib: “Gürcüstan Azərbaycanla bu münasibətlərin inkişafında maraqlıdır. Bu gün Azərbaycan ilə Gürcüstan birgə olaraq regionda bir sıra irimiqyaslı iqtisadi layihələr həyata keçirir. Bir neçə layihə üzərində də işlər gedir. Bu layihələr Gürcüstan və Azərbaycanın, eləcə də regionun və bütövlükdə Avropanın inkişafında mühüm rol oynayacaq. Biz çalışırıq ki, bu layihələrə daha çox ölkələr cəlb edək və bu da bizə daha böyük uğurlar qazanmağa imkan yaradacaq.”

“Paşa Bank”ın İdarə Heyətinin sədri Ş. Məmmədov jurnalistlərə açıqlamasında regional bank olaraq bu tədbirə dəstək verdiklərini nəzərə çatdırıb: “Bu cür tədbirlər Azərbaycan-Gürcüstan biznes və iqtisadi əlaqələrinin genişləndirilməsinə töhfə verir. Azərbaycan-Gürcüstan arasında ticarət əlaqələri, real biznes sektor getdikcə genişlənir. Azərbaycan Gürcüstanda ən böyük investisiya yatıran ölkədir”.

Azərbaycanlıların kompakt yaşadığı Marneulidə Novruz şənlikləri geniş şəkildə qeyd olunub. 

APA-nın Gürcüstan bürosunun məlumatına görə, bu gün Novruz bayramına həsr olunan şənliklərə qatılmaq üçün Gürcüstan prezidenti Giorgi Marqvelaşvili və baş nazir Giorgi Kvirikaşvili Marneuliyə səfər ediblər.

Tədbir çərçivəsində prezident G. Marqvelaşvili Marneulidə müasir standartlara uyğun tikilən yeni kitabxananın açılış lentini kəsib. Novruz bayramına həsr olunan bütün şənlik proqramlarına baxdıqdan sonra Gürcüstan prezident Marneuli Mədəniyyət Evinin qarşısında Novruz tonqalını alovlandırıb. Sonra Marneuli sakinləri qarşısında çıxış edən prezident G. Marqvelaşvili Marneulinin hər il inkişaf etdiyini bildirib: “Mən hər dəfə Marneuliyə gələndə burada inkişaf və irəliləyiş görürəm.  Bu, sizin əməyinizdir. Siz bizim vahid dövlətimizin eyni hüquqlu vətəndaşlarısınız. Mən Bakıdan yenicə qayıtmışam. Orada ən mötəbər bir tədbirdə iştirak etdim. Mən Azərbaycandakı dostlarımın da Novruz bayramını təbrik edir, onlara səadət və xoşbəxtlik arzulayıram”.

G. Kvirikaşvili deyib ki,  dost və qardaş ölkələr olan Gürcüstanla Azərbaycanla bir-birini dəstəkləyir.

Prezident və baş nazir və şənliyə qatılan digər rəsmi dövlət və hökumət adamları, Azərbaycanın Gürcüstandakı səfirliyinin əməkdaşları  Novruz şənliklərinə həsr olunan xüsusi bayram konsertinə baxıblar. Konsert proqramında Azərbaycan və gürcü müğənniləri, aşıqlar, müxtəlif ansambllar xalq mahnıları ifa edib və müxtəlif rəqslər nümayiş etdiriblər. Tədbirdə Azərbaycandan, Rusiyadan, Litvadan və Türkiyədən qonaqlar iştirak edib.

Qeyd edək ki, Marneulidə keçirilən Novruz şənliklərində Azərbaycan xalqının milli mətbəx nümunələri, şirniyyat və çay dəstgahı, rəsm, əl işləri və foto sərgilər nümayiş olunub, kənd təsərrüfatı məhsulları sərgisi və müxtəlif şirkətlərin istehsal etdiyi yerli məhsulların sərgisi təşkil olunub. Tədbir çərçivəsində həmçinin idman yarışları, milli güləş, maqnit adamın şousu, Novruzun gəlişinə aid kiçik teatr səhnəcikləri və Bahar qızının gəlişi və rəqs səhnələri təşkil olunub.

Prezident İlham Əliyev martın 17-də Bosniya və Herseqovinanın Rəyasət Heyətinin sədri Mladen İvaniçi qəbul edib.

APA-nın xəbərinə görə, bu barədə prezidentin mətbuat xidməti məlumat yayıb.

“Azərbaycan Respublikasının prezidenti, Ali Baş Komandan İlham Əliyev tərəfindən Silahlı Qüvvələrə göstərilən diqqət və qayğını, xüsusilə, vurğulamaq istəyərdim. Bu gün ölkənin Silahlı Qüvvələrinin xaricdə və daxildə istehsal olunan müasir silahlarla təchiz edilməsi taktiki hədəflərə çatmaqla yanaşı, strateji vəzifələri də yerinə yetirilməsini təmin edir”.

Dalga tv-nin APA-ya istinadən verdiyi xəbərinə görə, bunu Nazirlər Kabinetinin 2016-cı ildə fəaliyyəti haqqında hesabatı Milli Məclisdə təqdim edən baş nazir Artur Rasizadə deyib.

O bildirib ki, 2016-cı ilin aprelində baş verən döyüşlər ölkənin hərb tarixinə zəfər səhifəsi kimi yazılıb. 

“Təcavüzkar Ermənistanın növbəti təxribatına verilən qəti və tutarlı cavab ordunun yüksək döyüş ruhunu göstərdi. Hərbi əməliyyatlar torpaqların azad edilməsinin uzunmüddətli danışıqlar yolundan başqa, hərb yolunun da mövcud olduğunu və Azərbaycan əsgərinin qələbə əzmini nümayiş etdirdi”, - deyə baş nazir vurğulayıb.   

Azərbaycan Prezidenti İlham Əliyev martın 17-də İran İslam Respublikasının rabitə və informasiya texnologiyaları naziri Mahmud Vaezini qəbul edib.

Dalga tv  xəbər verir ki, məlumatı Azərbaycan Prezidentinin mətbuat xidməti yayıb. 

Azərbaycan Respublikasının Birinci vitse-prezidenti xanım Mehriban Əliyeva martın 16-da V Qlobal Bakı Forumunda iştirak edən UNESCO-nun xoşməramlı səfiri, ELPIDA Assosiasiyasının və Marianna Vardinoyannis Fondunun prezidenti Marianna Vardinoyannis ilə görüşüb.

Dalga tv  xəbər verir ki, qonaq Mehriban Əliyevanı Azərbaycanın Birinci vitse-prezidenti təyin edilməsi münasibətilə təbrik etdi. Azərbaycan ilə Yunanıstan arasında sosial, təhsil, səhiyyə sahələrində əməkdaşlığın inkişaf etdiyini deyən Marianna Vardinoyannis Mehriban Əliyevanın 2014-cü ildə Yunanıstana səfərini məmnunluqla xatırladı. O, onkoloji xəstəliklərdən əziyyət çəkən uşaqlar üçün yaradılan mərkəzin fəaliyyətinə verdiyi dəstəyə görə minnətdarlığını bildirdi. Qonaq bu sahədə təcrübə mübadiləsinin vacibliyini və gələcəkdə əlaqələri daha da genişləndirməyin mümkünlüyünü vurğuladı. O, Azərbaycanın Birinci vitse-prezidentini Azərbaycan ilə Yunanıstan arasında diplomatik əlaqələrin qurulmasının 25-ci ildönümü münasibətilə təşkil olunacaq tədbirlərdə iştirak etmək üçün ölkəsinə səfərə dəvət etdi.

Dəvətə görə təşəkkürünü bildirən Birinci vitse-prezident Mehriban Əliyeva Azərbaycan ilə Yunanıstan arasında əlaqələrin siyasi, iqtisadi, humanitar və mədəni sahələrdə inkişaf etdiyini bildirdi. Mehriban Əliyeva Yunanıstana səfərini məmnunluqla xatırladı, bu ölkədə Heydər Əliyev Fondunun təşkil etdiyi konsert proqramının maraqla qarşılandığını qeyd etdi və bunun Azərbaycan mədəniyyətinin Yunanıstanda təbliği sahəsində mühüm rol oynadığını vurğuladı.