"Azərbaycan və Ermənistan böyük silah potensialına, aviasiya və artilleriyaya malikdir".

APA-nın məlumatına görə, bunu Bakıda "Dağlıq Qarabağ münaqişəsi, özəyi, sülhməramlılıq və vətəndaş cəmiyyətinin rolu" mövzusunda beynəlxalq konfrans çərçivəsində təşkil edilən “Sülhməramlılıq və Dağlıq Qarabağ münaqişəsinin həlli yolları” mövzusunda paneldə Rusiya prezidenti yanında Vətəndaş Cəmiyyətinin İnkişafı və İnsan Hüquqları Birliyinin, prezident yanında İctimai Palatanın üzvü, “Qafqaz siyasəti” portalının baş redaktoru Maksim Şevçenko deyib. 

M. Şevçenko bildirib ki, ATƏT-in Minsk qrupunun üzvü olan dövlətlər Azərbaycan və Ermənistana eyni silahları satırlar və bununla da balansı qoruduqlarını iddia edirlər: “Ermənistan və Azərbaycan arasında müharibə başlasa, münaqişəyə Rusiya, Gürcüstan, o cümlədən Türkiyə cəlb olunacaq. İslam həmrəyliyi, cihad çağırışları, digər tərəfdən, xristian həmrəyliyi çağırışları səslənəcək. Münaqişənin proqnozlaşdırılmayan nəticələri ola bilər. Radikal addım, müharibə terrorizmin inkişafına şərait yaradar. Bu gün biz Suriyada, İraqda bunu görürük”.

A. Şevçenko deyib ki, regionda Qərbin təsirinin artmasında maraqlı olmayan üç dövlətdən ibarət Rusiya-Türkiyə-İran formatı Dağlıq Qarabağ münaqişəsinin həlli üçün ən münasib formatdır: “Bu gün Azərbaycana özünü qardaş sayan Türkiyəyə Avropada təhqiramiz münasibət bəslənir, Rusiya və İran isə “şər oxları” kimi təqdim olunur. Bəs kim yaxşıdır?! Bu gün konyuktura dəyişir. Faciəli müharibə nəticələri görmək istəməyənlər bunu anlamalıdırlar. Biz müharibə ritorikasından sülh ritorikasına keçməliyik. Qərb Qarabağ münaqişəsinin həllində, Qafqazda sülhdə maraqlı deyil”.

"Dağlıq Qarabağ münaqişəsinin pozitiv planda həlli yaxındır".

APA-nın məlumatına görə, bunu "Dağlıq Qarabağ münaqişəsi, özəyi, sülhməramlılıq və vətəndaş cəmiyyətinin rolu" mövzusunda Bakıda keçirilən konfransda iştirak edən Ukraynadan olan tədqiqatçı, erməni əsilli Artur Ağacanov bildirib.

A. Ağacanov deyib ki, əsas məsələ münaqişənin həllinə inanmaqdır: "Mən erməniyəm, Bakıda anadan olmuşam, təmiz qarabağlıyam. Qarabağda indi müxtəlif xalqların nümayəndələri yaşayır. Mənim tanıdığım ermənilər arasında münaqişə ilə bağlı eyni fikirləri bölüşənlər var. Amma onlar bunu açıq şəkildə dilə gətirməyə ehtiyat edirlər. Lakin öz aralarında münaqişənin həllinə pozitiv yanaşırlar. Bizi yalnız din ayırır ki, bu da o qədər önəmli amil deyil. Bu, mənim fikrimdir. Ola bilsin ki, hazırda Ermənistanda türklər də yaşayır. Məsələn, mənim soyadım Ağacanovdur. Bu isə o deməkdir ki, bizim ümumi köklərimiz var. Məsələn, Allahverdiyev, Mirzəbəyov kimi ortaq soyadlarımız var".

Bakıda “Dağlıq Qarabağ münaqişəsi, özəyi, sülhməramlılıq və vətəndaş cəmiyyətinin rolu” mövzusunda beynəlxalq konfrans başlayıb.

APA-nın məlumatına görə, Prezident Administrasiyası İctimai-siyasi şöbəsinin Siyasi araşdırmalar, analitik təhlil sektorunun müdiri Fuad Axundov Azərbaycan ərazisinin 20 faizinin işğal olunduğunu xatırladaraq bildirib ki, torpaqların işğaldan azad edilməsinin vaxtı çatıb: “Erməni xalqı müdrik xalqdır. İnternetdə yayılan informasiyalardan da görürük ki, artıq onlar rasional mövqe ortaya qoymağa başlayıblar. Bu gün bu tədbirdə erməni fəalları iştirak edirlər. Mən onlara xüsusi təşəkkür edirəm”.

Rusiya prezidenti yanında İctimai Palatanın üzvü, “Qafqaz siyasəti” portalının baş redaktoru Maksim Şevçenko Dağlıq Qarabağ münaqişəsinin yalnız Rusiya-Türkiyə-İran formatının fəal inkişafı ilə həll edilə biləcəyini vurğulayıb.

Xocalı soyqırımına toxunan erməni publisist və ictimai xadim Vahe Avetyan qeyd edib ki, soyqırım faktı bir xalq üçün çox rüsvayçı bir faktdır: "Mən 2016-cı ildə Bakıda olarkən Xocalı soyqırımı qurbanlarının xatirəsini yad etdim. Yəqin ki, bu, Ermənistanda birmənalı qarşılanmadı. Bir çox erməni ictimai xadim və sadə insanlar məni dəstəkləyir. Lakin ermənilərin öz fikirlərini açıq ifadə etmələri üçün onları 25 il əvvəl yaşadıqları konslagerlərdən azad etmək lazımdır. Ermənistanda bir sözə görə adamı şikəst edə və öldürə bilərlər. 20 ildən çox davam edən münaqişədən sonra ilk dəfə Xocalı qurbanlarının xatirəsinə həsr olunmuş abidəni ziyarət etdik.  Mənim gəlişimin məqsədi odur ki, Ermənistan prezidenti Serj Sarkisyanın yaratdığı qatil erməni stereotipi yox olsun. Mən tarixçi deyiləm, yazıçıyam. Xalqların düşmənçiliyini bir kənara qoyub, yeni bir səhifə açmaq lazımdır”.

Tədqiqatçı, əslən Dağlıq Qarabağdan olan erməni əsilli Ukrayna vətəndaşı Artur Ağacanov əsrlər boyu Dağlıq Qarabağ torpağının müxtəlif müharibə və münaqişələr meydanı olaraq qaldığını söyləyib: “Qarabağ həm də qədim Qafqaz Albaniyasının bir hissəsi olub. Bu qədim dövlətin özünün xüsusi mədəniyyəti, tarixi, memarlığı, xristian dünyasının ən qədim kilsələrindən biri olan Alban Avtokefal Kilsəsi olub. Lakin hazırda bu qədim irs ya məhv edilir, ya da erməni mədəniyyəti və tarixi kimi qələmə verilir. Artıq iki əsrdir ki, Türkiyə, İran və Yaxın Şərqdən olan erməni köçkünləri (hay xalqının nümayəndələri) qədim Qarabağ torpaqlarını özününküləşdirir. Bu dövrdə Eçmiadzin kilsəsinin dəstəyi ilə qədim Alman Avtokefal Kilsəsi ləğv edilib. Gandzasar, Amaras (Ağ oğlan) və Alban kilsəsinin digər patriarx taxtlarının ləğv edilməsi nəticəsində Qarabağda, eləcə də Cənubi Qafqazda olan çoxsaylı xalqlar, onların mədəniyyəti, məbədləri, kitabları və irsi Eçmiadzin erməni kilsəsinin əlinə keçdi. Bu xalqların bir hissəsi - qıpçaq türkləri, udin, aysor, tat, kürd və digərləri erməni qriqorianlığını qəbul ediblər. Lakin onların erməni xalqına və Eçmiadzinə heç bir aidiyyəti yox idi. Bu xalqlar zor gücünə erməniləşdirilib. Qarabağın Azərbaycanın ayrılmaz hissəsi və qədim Qafqaz Albaniyasının tarixinin, xristian mədəniyyətinin bir hissəsi olduğunu dilə gətirən hər kəs həyatı üçün təhlükə ilə üzləşib. Lakin biz həqiqəti deməkdən çəkinməməli və mübarizə aparmalıyıq. Alban Avtokefal Kilsəsinin bərpa edilməsi yolunda mübarizəyə öz töhfəmizi verməyə hazırıq. Biz Azərbaycanda Alban kilsəsinin və məbədlərdə ibadətin bərpası xəbərini sevinclə qarşıladıq. Yaxın gələcəkdə biz bu məqsədlə Qarabağın taleyi və tarixinə biganə olmayan insanların da qatıla biləcəyi bir təşkilat yaradacağıq”.

Azərbaycan Xarici İşlər Nazirliyi Abxaziyada keçirilmiş qondarma parlament seçkiləri ilə əlaqədar bəyanat yayıb.

XİN-in mətbuat xidmətindən Dalga tv- yə verilən məlumata görə, bəyanatda qeyd olunur ki, Azərbaycan Abxaziyanın müstəqilliyini və nəticə etibarilə, 12 mart 2017-ci ildə Abxaziyada keçirilmiş qondarma parlament seçkilərinin nəticələrini tanımır:

“Azərbaycan Xarici İşlər Nazirliyi inanır ki, Abxaziya məsələsinin beynəlxalq hüququn norma və prinsiplərinə uyğun olaraq həlli üçün danışırların davam etdirilməsi zəruridir”.

“İran Dağlıq Qarabağ münaqişəsinin həlli üçün öz potensialından istifadə edəcək”. 

Bunu APA-nın müxbirinin İranın Dağlıq Qarabağ münaqişəsindəki rolu ilə bağlı sualına cavabında İran parlamentinin sədri Əli Laricani deyib.

Ə. Laricani bildirib ki, bölgədə yeni gərginliyin yaşanması üçün potensial yoxdur: “Münaqişə tərəflərindən istəyirik ki, hazırkı şəraitdə buna imkan verməsinlər. Regionda müharibənin olması hər iki ölkə üçün problemlər yaradacaq”.

Ə. Laricani qeyd edib ki,  İran həm Azərbaycan, həm də Ermənistanla  yaxşı münasibətlərə malikdir: “Ümid edirik ki, hazırkı şəraitdə münaqişə daha da gərginləşməyəcək. İran Dağlıq Qarabağ münaqişəsinin həlli və yaranacaq problemlərin yoluna qoyulması üçün öz potensialından istifadə edəcək”.

İran parlamentinin sədri Suriya məsələsinə toxunaraq ABŞ prezidenti Donald Trampın İŞİD-lə mübarizə üçün bölgəyə hərbi qüvvə göndərməsindən danışıb: “Ümid edirik ki, onlar keçmişdə etdikləri səhvləri təkrarlamayacaqlar. Necə ki, 6 trilyon dollar ziyan görüblər və 5 min əsgərləri həlak olub. Bu baxımdan keçmişdə etdikləri səhvləri  təkrar etməməlidirlər. Trampın rəqiblərindən biri demişdi ki, biz İŞİD-in yaradılması üçün lazım olan xərci çəkdik. İndi də zəhmət çəksin, onu məhv etsin. Ümid edirik ki, ABŞ-ın yeni prezidenti ağıllı davranacaq”.

Azərbaycanın Rusiyadakı səfiri Polad Bülbüloğlunun YUNESKO-nun baş direktoru vəzifəsinə namizədliyi verilib.

APA-nın TASS-a istinadən verdiyi məlumata görə, bu barədə Azərbaycanın təşkilat yanında daimi nümayəndəliyinin rəhbəri Anar Kərimov bildirib.

Namizədlik rəsmi şəkildə baxılması üçün Azərbaycan tərəfindən təşkilatın İcrayyə Komitəsinə təqdim edilib. 

Seçkilər bu ilin payızında keçiriləcək.

Qeyd edək ki, YUNESKO-nun hazırkı baş direktoru İrina Bokovanın səlahiyyət müddəti bu il başa çatır.

O, 2009-cu ildən bu vəzifəni icra edir, 2013-cü ildə ikinci dəfə baş direktor seçilib.