"Gürcüstanda etnik azlıqların məskunlaşdığı bölgələrdə dövlət dilinin tədrisinə xüsusi diqqət yetiriləcək”.

APA-nın yerli bürosunun məlumatına əsasən, bu barədə Gürcüstan təhsil və elm naziri Mixeil Çxenkeli parlamentdə keçirilən dinləmələrdə deyib. 

Nazir bildirib ki, təhsil sisteminin inkişafının əsas istiqamətləri təhsilin səviyyəsini yüksəltmək, beynəlxalq standartlara yaxınlaşdırmaq və təhsilin hər pilləsində inklüziv təhsili təmin etməkdir. 

M.Çxenkeli qeyd edib ki, kənd məktəblərində mövcud problemləri həll etmək üçün onların bağça, məktəb, peşə təhsili proqramları, kitabxana, idman və yaradıcılıq klublarını özündə birləşdirəcək təhsil mərkəzlərinə transformasiya olunmasına xüsusi diqqət yetiriləcək.

Ermənistanda Dağlıq Qarabağ münaqişəsinin hərbi yolla həllinin gündəmə gəlməsi haqda qorxular yaranıb.
Hazırda İrəvanda hakimiyyət uğrunda prezident Serj Sarkisyanla Rusiyanın adamı olan baş nazir Karen Karapetyan arasında mübarizə gedir. Ekspertlər hesab edir ki, Sarkisyan Rusiyanın dəstəklədiyi Karapetyana məğlub olmamaq üçün klassik üsluba – Dağlıq Qarabağda gərginliyin yaradılmasına əl atacaq.

"Ermənistan milli konqresi" partiyasının sədr müavini Vardan Malxasyan isə İrəvan daxili toqquşmaların Qarabağda böyük gərginliyə səbəb ola biləcəyini düşünür.

"Qarabağda hərbi variantın gündəmə gəlməsi aktualdır. Xüsusilə "aprel müharibəsi" yenidən təkrarlana bilər. Ehtimal ki, toqquşma başlasa Azərbaycan "ildırımsürətli hücum" planı ilə Ermənistana zərbələr endirəcək. Bu baxımdan, biz siyasi ambisiyalara görə buna getməməliyik və daha ayıq olmalıyıq. Çünki "aprel müharibəsi" nəticənin necə olacağını indidən deməyə imkan verir", - deyə o bildirib.

Gürcüstanın Acarıstan Muxtar Respublikasının Batumi şəhərində Ümummili Lider Heydər Əliyevin anım mərasimi keçirilib. Anım mərasimində Ümummilli Liderin çoxşaxəli fəaliyyətindən bəhs edilib.Tədbirdə Azərbaycan Televiziyasının Gürcüstan müxbiri əməkdar jurnalist Şahismayıl Şəmmədoğlunun Gürcü və Azərbaycan dilində işıq üzü görən "Heydər Əliyev və Gürcüstan" kitabının təqdimatı keçirilib.

Azərbaycan Respublikasının Batumi şəhərindəki baş konsulluğu ümummilli lider Heydər Əliyevin xatirəsinə həsr edilmiş anım tədbiri keçirib. Tədbirdə hər iki ölkənin himni səsləndirilib ve Ümummilli liderin xatirəsi bir dəqiqəlik sükutla yad olunub.

Tədbiri baş konsul Rəşad İsmayılov açaraq Heydər Əliyev şəxsiyyətinin miqyasını və unikallığını, Azərbaycanın təşəkkülünə və inkişafına verdiyi böyük töhfəni, onun dünya miqyasındakı nüfuzunu, ölkənin milli mənafelərinin qorunmasında məqsədyönlü mövqeyini, yüksək insani keyfiyyətlərini qeyd edib. Bildirib ki, ulu öndər Heydər Əliyevin Azərbaycan xalqı qarşısında xidmətləri əvəzsizdir. Azərbaycan müstəqilliyini bərpa etdikdən sonra xalqın tələbi ilə hakimiyyətə gələn Heydər Əliyev dövlətimizin parçalanmasının qarşısını alıb, ölkəmizdəki vətəndaş birliyini dünyaya nümayiş etdirib. O, həmçinin qeyd edib ki, Heydər Əliyev Azərbaycan və Gürcüstan dostluğunun memarı hesab olunur. Ulu Öndər Gürcüstan ilə münasibətlərə daim xüsusi diqqət yetirib və Gürcüstanın çətin dövrlərində dost ölkə kimi gürcü xalqına qardaşlıq yardımını əsirgəməyib.

Baş konsul, həmçinin Ümummilli Liderin cismən aramızda olmadığı son 14 ildə onun ən layiqli davamçısı Prezident İlham Əliyevin yürütdüyü qətiyyətli siyasət sayəsində Azərbaycan dövlətçiliyinin daha da gücləndiyini, xalqımızın inanılmaz tərəqqiyə şahid olduğunu və Azərbaycanın malik olduğu geosiyasi qüdrətin real gücə arxalandığını qeyd edib.

Tədbirdə Ümummilli lider Heydər Əliyevin ömür yolundan,   Gürcüstana ilk səfərindən sonra iki ölkə arasında yaranan əlaqələrdən bəhs edən müəllifi Şahismayıl Şəmmədoğluya məxsus olan gürcü və azərbaycan dilində “Heydər Əliyev və Gürcüstan kitabı”nın da tədqimatı olub. Xalqlarımız arasında güclü dostluq əlaqələrinin olduğunu deyən Rəşad İsmayılov “Heydər Əliyev və Gürcüstan” kitabının əhəmiyyətindən danışıb.

Tədbirdə Acarıstan Muxtar Respublikasının Elm, Təhsil, İdman və Gənclər naziri İnka Şamilaşvili  Ulu Öndərin tarixi xidmətlərinin nəticəsi olaraq onun əziz xatirəsinin gürcü və digər dost xalqlar tərəfindən daim yad edildiyini və böyük şəxsiyyət kimi Heydər Əliyev fenomeninin qəlblərdə əbədi olaraq yaşayacağını deyib. O çıxışında təqdim olunan  “Heydər Əliyev və Gürcüstan” kitabının gürcü versiyasının nəşrini yüksək qiymətləndirib və kitabın çoxlu oxucu kütləsinə malik olacağından əminliyini vurğulayıb.

Acarıstan Muxtar Respublikasının Bələdiyyəsinin sədri Suliko Tabidze, Batumi şəhərinin meri Laşa Qomaxidze, digər dövlət və hökumət rəsmiləri, Türkiyənin baş konsulu  Maşliya Qoçaq, Batumi Dövlət Universitetinin professoru Roston Kurdnişvili, “Ajara PS” televiziyasının rəhbəri Jemal Meqrelidze,  Acarıstan Muxtar  Respublikasındakı Azərbaycan diasporasının sədri Vidadi Axundov, “SOCAR-Georgia” şirkətinin əməkdaşları, ziyalılar və Azərbaycan icmasının üzvləri  tədbirdə iştirak ediblər.

Tədbirin sonunda Azərbaycan televiziyasının Heydər Əliyevə həsr olunmuş filmi nümayiş etdirilib.

Bu gün Azərbaycan xalqının ümummilli lideri Heydər Əliyevin vəfatından 14 il ötür.

Dalga tv xəbər verir ki, Heydər Əliyev Fondunun vitse-prezidenti Leyla Əliyeva ilə Sevil Əiyevanın oğlu, Azərbaycan Ağır Atletika Federasiyasının vitse-prezidenti Azər Əliyev Gürcüstanda  Heydər Əliyevin abidəsini ziyarət ediblər.

Bu barədə Leyla Əliyeva "Instagram" səhifəsində məlumat verib: "Tbilisidə Azərbaycan xalqının ümummilli lideri Heydər Əliyevin adını daşıyan parkda Ulu Öndərin abidəsi ziyarət olundu.”

Azərbaycan xalqının ümummilli lideri Heydər Əliyevin vəfatından 14 il keçir.

APA-nın məlumatına görə, Azərbaycanın bütün bölgələrində, o cümlədən paytaxt Bakıda Heydər Əliyevi anım mərasimləri təşkil olunur.

Dövlət qurumları, siyasi partiyalar, QHT, media orqanları və ictimaiyyətin nümayəndələri bu günlərdə Heydər Əliyevin Fəxri xiyabandakı məzarını ziyarət edirlər.

Azərbaycanın xarici ölkələrdəki diplomatik nümayəndəlikləri və diaspor təşkilatları da anım mərasimləri keçirir.

Qeyd edək ki, Heydər Əlirza oğlu Əliyev 1923-cü il mayın 10-da Naxçıvanda anadan olub. 1944-cü ildən təhlükəsizlik orqanları sistemində çalışan Heydər Əliyev 1964-cü ildən Azərbaycan SSR Nazirlər Soveti yanında Dövlət Təhlükəsizliyi Komitəsi sədrinin müavini, 1967-ci ildən isə sədri vəzifəsində işləyib, general-mayor rütbəsinə qədər yüksəlib. Həmin illərdə o, Leninqradda xüsusi ali təhsil alıb, 1957-ci ildə isə Azərbaycan Dövlət Universitetinin tarix fakültəsini bitirib. Azərbaycan SSR Kommunist Partiyası Mərkəzi Komitəsinin 1969-cu il iyul plenumunda Heydər Əliyev Azərbaycan SSR Kommunist Partiyası Mərkəzi Komitəsinin birinci katibi seçilib. 1982-ci ilin dekabrında Sovet İttifaqı Kommunist Partiyası Mərkəzi Komitəsi Siyasi Bürosunun üzvü seçilən Heydər Əliyev SSRİ Nazirlər Soveti sədrinin birinci müavini vəzifəsinə təyin edilib və SSRİ-nin rəhbərlərindən biri olub. Heydər Əliyev 1987-ci ilin oktyabrında Sovet İttifaqı Kommunist Partiyası Mərkəzi Komitəsi Siyasi Bürosunun və baş katib Mixail Qorbaçovun yeritdiyi siyasi xəttə etiraz əlaməti olaraq, tutduğu vəzifələrdən istefa verib.

Heydər Əliyev 1990-cı ilin 20 yanvarında sovet qoşunlarının Bakıda törətdiyi qanlı faciə ilə əlaqədar ertəsi gün Azərbaycanın Moskvadakı nümayəndəliyində bəyanatla çıxış edərək, Azərbaycan xalqına qarşı törədilmiş cinayətin təşkilatçıları və icraçılarının cəzalandırılmasını tələb edib. O, Dağlıq Qarabağda yaranmış kəskin münaqişəli vəziyyətlə bağlı SSRİ rəhbərliyinin ikiüzlü siyasətinə etiraz əlaməti olaraq, 1991-ci ilin iyulunda Sovet İttifaqı Kommunist Partiyasının sıralarını tərk edib. 1990-cı ilin iyulunda Azərbaycana qayıdan Heydər Əliyev ilk əvvəl Bakıda, sonra isə Naxçıvanda yaşayıb, həmin ildə də Azərbaycan Ali Sovetinə deputat seçilib. O, 1991-1993-cü illərdə Naxçıvan Muxtar Respublikası Ali Məclisinin sədri, Azərbaycan Respublikası Ali Soveti sədrinin müavini olub.

Heydər Əliyev 1992-ci ildə Yeni Azərbaycan Partiyasının Naxçıvan şəhərində keçirilmiş təsis qurultayında partiyanın sədri seçilib. 1993-cü il iyunun 15-də Azərbaycan Ali Sovetinin sədri seçilən Heydər Əliyev iyunun 24-də Milli Məclisin qərarı ilə Azərbaycan Respublikası Prezidentinin səlahiyyətlərini həyata keçirməyə başlayıb. 1993-cü il oktyabrın 3-də ümumxalq səsverməsi nəticəsində Heydər Əliyev Azərbaycan Respublikasının Prezidenti seçilib. O, 1998-ci il oktyabrın 10-da keçirilən növbəti prezident seçkilərində yenidən Azərbaycan Respublikasının Prezidenti seçilib. 2003-cü il oktyabrın 15-də keçiriləcək prezident seçkilərində namizədliyinin irəli sürülməsinə razılıq vermiş Heydər Əliyev səhhətində yaranmış problemlərlə əlaqədar seçkilərdə iştirak etməkdən imtina edib.

Uzun müddət ABŞ-ın Klivlend klinikasında müalicə olunan Heydər Əliyev 2003-cü il dekabrın 12-də dünyasını dəyişib.

Gürcüstanın baş nazirinin müavini, xarici işlər naziri Mixeil Canelidze Ermənistanın yeni səfiri Ruben Sadoyanla görüşüb.
 

APA-nın yerli bürosunun Gürcüstan XİN-nin məlumatına istinadən verdiyi xəbərə görə, görüşdə ikitərəfli və çoxtərəfli əməkdaşlıq məsələləri müzakirə olunub. İki ölkə arasında intensiv siyasi, ticari-iqtisadi və mədəni-humanitar əlaqələrdən razılıq ifadə edilib. Görüşdə iqtisadi əməkdaşlığın inkişaf etdirilməsi perspektivlərinə xüsusi diqqət ayırılıb.

Tərəflər həmçinin regionda baş verən vacib prosesləri də nəzərdən keçirib.