Gürcüstanın sabiq prezidenti, Ukraynanın Odessa vilayətinin keçmiş qubernatoru Mixeil Saakaşvili ev dustağı edilib. Bununla da prokurorluğun tələbi təmin olunub. 

Dalga tv xəbər verir ki, bu barədə Ukrayna mətbuatı məlumat yayıb.

Qeyd edilir ki, keçmiş qubernatorun həbsinə Kiyev Apellyasiya Məhkəməsi qərar verib.

Qərara əsasən, M.Saakaşvili hava qaraldıqdan sonra yaşayış yerini tərk edə bilməz.

Xatırladaq ki, ötən ilin dekabrında Kiyevin rayon məhkəməsi Mixeil Saakaşvilinin ev dustağı edilməsi yönündə iddianı rədd etmişdi. 

O, Rusiya Federasiyasına qaçan oliqarx Sergey Kürçenko və cinayətkar qüvvələrlə əlaqədə günahlandırılır. 

İşgəncələr və ölüm hökmü üçün istifadə edilən malların ticarəti qanunsuz və qəbuledilməzdir: təəssüf ki, AŞPA-nın prinsiplərinə və öhdəliklərinə zidd olaraq, Avropa Şurasının bir sıra üzv dövlətlərində bu cür mallar hələ də istehsal edilir, satışa çıxarılır.

Dalga tv xəbər verir ki, bu fikri Azərbaycanın AŞPA-dakı nümayəndə heyətinin üzvü Vüsal Hüseynovun hazırladığı qətnamə layihəsinin müzakirəsi zamanı çıxış edən nümayəndə heyətimizin digər üzvü Qənirə Paşayeva bildirib və üzv ölkələri bu ciddi problemlə mübarizədə fəal olmağa çağırıb. 

O, işgəncə və ölüm cəzası üçün istifadə olunan malların ticarətinə qarşı beynəlxalq qaydaların gücləndirilməsinin vacibliyini qeyd edib:

“Bu cür malların ticarəti ilə bağlı qaydalar daha da sərtləşdirilməlidir. Assambleya və üzv dövlətlər öz ərazilərində işgəncələr və ölüm hökmü üçün istifadə edilən malların ticarəti ilə məşğul olan şirkətlərin fəaliyyətinə imkan verməməlidir. Bununla bağlı hər hansı cəzasızlıq bizim üçün və ümumilikdə, bəşəriyyət üçün faciəvi nəticələrə gətirib çıxara bilər”.

Millət vəkili bildirib ki, Avropa Şurası hüdudları daxilində işgəncə vermək və ölüm hökmü qadağandır. Avropa İnsan Hüquqları Konvensiyası işgəncə vermək, qeyri-insani, təhqiredici rəftar və cəzanı qadağan edir. İşgəncələrin qadağan edilməsi beynəlxalq hüququn məcburi normasıdır. 

“Avropa Şurasının, demək olar ki, bütün üzvləri tərəfindən ratifikasiya edilmiş Konvensiyanın 6 saylı Protokolu ölüm hökmünü ləğv edir. Nəticə etibarilə, Avropada insan haqlarının himayədarı olan Avropa Şurası dünyada model rolunu oynayır və bu sahədə mövqeyini daha da gücləndirməlidir”, - deyə deputat diqqətə çatdırıb.

O, belə hallarla bağlı qanunvericilik aktlarının qəbulunun önəmli olduğunu, amma kifayət etmədiyini deyib, qaydaların icra mexanizmlərinin gücləndirilməsinin vacibliyini vurğulayıb. Deputat üzv dövlətləri bu istiqamətdə daha ciddi olmağa, Assambleyanı isə təkcə tövsiyələr qəbul etməklə kifayətlənməməyə, məsuliyyət daşıdığını unutmamağa çağırıb.

Q.Paşayeva ölüm hökmü və işgəncələr üçün istifadə edilən malların ticarətinə son qoyacaq Qlobal Alyansın yaradılması təşəbbüsünü alqışlayıb. Bildirib ki, belə alyansın yaradılması qanunsuz təcrübələrin bu cür növlərinə son qoymaq üçün həlledici addımdır.

Azərbaycan Müdafiə Nazirliyi ordumuzun itkilər verməsi ilə bağlı Ermənistan tərəfinin iddialarına cavab verib.

Nazirlikdən bildirilir ki, Ermənistanın yaydığı xəbərin heç bir əsası yoxdur:

"Guya cəbhə xəttində gərginliyin yaranması, Azərbaycan tərəfinin itkilər verməsi barədə Ermənistan tərəfinin təxribat məqsədilə yaydığı xəbərin heç bir əsası yoxdur. Ermənilər o dərəcədə qorxurlar ki, hər tərəfdə onların gözlərinə Azərbaycan əsgəri görünür və bundan da xoflanırlar".

"Azərbaycan prezidenti İlham Əliyevlə gələcək layihələr barədə çox maraqlı danışıqlar apardıq".

APA-nın yerli bürosunun məlumatına əsasən, bunu Gürcüstanın baş naziri Giorgi Kvirikaşvili Davosa səfərinin yekunlarına dair açıqlamasında deyib.

Baş nazir səfəri çox uğurlu və məhsuldar adlandırıb: "Biz konkret nəticələrə istiqamətlənmiş xüsusi görüşlər keçirdik. Panel müzakirələrdə bütün iştirakçılar Gürcüstanın əldə etdiyi inkişafı və bu tərəqqinin yalnız ölkə üçün deyil, region üçün də əhəmiyyətli olduğunu vurğuladılar".

Qeyd edək ki, dünən Davosda keçirilən Dünya İqtisadi Forumunun illik toplantısı çərçivəsində Azərbaycan prezidenti İlham Əliyev və Gürcüstanın baş naziri Giorgi Kvirikaşvili arasında görüş keçirilib.

"Biz Rusiya ilə Gürcüstan arasında 2011-ci ildə imzalanan gömrük inzibatçılığı və ticarətin monitorinqi haqqında sazişə böyük ümidlər bəsləyirik. Ümid edirik ki, bu saziş regionda ticarətə güclü impuls verəcək".

APA-nın Moskva müxbirinin verdiyi məlumata görə, bu sözləri Rusiya xarici işlər nazirinin müavini Qriqori Karasin "Kommersant"a müsahibəsində deyib. 2008-ci ildə baş vermiş müharibədən sonra iki ölkə arasında beynəlxalq ticarət sahəsində yaranmış çətinliyi izah edən diplomat xatırladıb ki, Gürcüstan öz keçmiş ərazisində yaranan iki yeni dövləti (Abxaziya və Cənubi Osetiya) tanımadığı üçün onun gömrük sərhədlərinin haradan keçdiyi barədə qeyri-müəyyənlik mövcud idi: "2011-ci ildə imzalanan saziş məhz bu məsələyə aydınlıq gətirdi. Biz tezliklə dövlətdaxili prosedurları bitirməyə çalışacağıq ki, yaxın aylarda vacib sənədləri imzalayaq. Bundan sonra saziş işləyəcək".  
 

Q. Karasin məlum sazişdən əsas faydalanacaq tərəfin Ermənistan olması və Moskvanın bu işi İrəvanın xahişi ilə yerinə yetirməsi barədə suala belə cavab verib: “Həqiqətən də Ermənistanın xahişi var. Lakin bu məsələdə söhbət Rusiya ilə Gürcüstan arasında İsveçrənin vasitəçiliyi ilə imzalanan ikitərəfli sazişdən gedir. Bu saziş Abxaziya və Cənubi Osetiya da daxil olmaqla, üçüncü ölkələr üçün öhdəliklər qoymur”.

Qeyd edək ki, Gürcüstan hökuməti ölkə ərazisi vasitəsilə Rusiyaya yüklərin, ehtiyac olacağı təqdirdə, nəzarətdən kənar Sxinvali regionu vasitəsilə daşınması üçün İsveçrənin SGS şirkəti ilə müqavilə imzalayıb. Baş nazir Giorgi Kvirikavili bildirib ki, əgər Gürcüstan-Rusiya sərhədindəki Kazbegi-Yuxarı Lars gömrük-buraxılış məntəqəsində fövqəladə vəziyyət yaranarsa, yüklər qeyd olunan marşrutla daşına bilər. "Bu müqavilənin heç bir maddəsi Gürcüstanın maraqları əleyhinə yönəlməyib. Söhbət ondan gedir ki, Yuxarı Lars gömrük-buraxılış məntəqəsi istiqamətində fors-major situasiya zamanı, məsələn, güclü qar, yaxud sürüşmə baş verərsə, Sxinvali istiqamətində bu yol açıla bilər. Bu dəhlizdən həm Türkiyə, həm Ermənistan, həm də ölkəmizin tranzit potensialından yaralanan digər ölkələr istifadə edə bilər. Lakin bu, hələ ki birtərəfli imzalanmadır. Biz danışıqları davam etdiririk, çünki Rusiya tərəfindən irəli sürülən müəyyən şərlər var ki, bizim üçün qəbuledilməzdir”, - deyə G. Kvirikaşvili Gürcüstan parlamentdə çıxışında söyləyib.