Kanada Rusiyadakı səfirini geri çağırıb. "Reuters"in yaydığı məlumata görə, rəsmi Ottava Ukraynadakı böhranla bağlı səfirlə məsləhətləşmələr aparacaq. Kanadanın baş naziri Stiven Harper də "Böyük səkkizli"yin Soçidə keçiriləcək sammitinə hazırlığı dayandırdıqlarını bəyan edib. Daha öncə ABŞ prezidenti Barak Obama Fransa prezidenti Fransua Oland və Kanadanın baş naziri Stiven Harperlə telefonla danışıb və onlar Ukraynadakı hadisələrlə bağlı öz fəaliyyətlərini koordinasiya etməklə bağlı razılığa gəliblər. Bundan sonra Ağ ev Amerikanın Soçidə keçiriləcək sammitinə hazırlığı dayandırdığını bildirib. 

Rusiyanı Federasiya Şurası Ukrayna ərazisinə silahlı qüvvələrin yeridilməsi haqda qərarı qəbul etdikdən sonra Vitali Kliçko orduya səfərbərliklə bağlı Ali Radanı toplantı keçirməyə çağırıb.

DalğaTV-nin «BBC»-yə istinadən məlumatına görə, o, deyib: «Rusiyanın Ukraynaya təcavüzü başlayandan sonra parlament baş komandanın hərbi səfərbərlik elan etməsini istəməlidir».

«UDAR» Partiyasının lideri BMT Təhlükəsizlik Şurasından Ukraynada yaranmış böhran vəziyyətlə bağlı təcili müşavirə keçirməyi də xahiş edib.

 Rusiya prezidenti Vladimir Putin Ukraynanın Krım Muxtar Respublikasına qoşun yeritmək üçün Federasiya Şurasına müraciət edib.

Dalğa TV-nin APA -ya istinadən verdiyi məlumata görə, müraciətdə Ukraynada ictimai-siyasi vəziyyət normallaşanadək qoşunların Krımda qalmasının zəruriliyi əsaslandırılır. 

“Ukraynada yaranmış vəziyyətlə əlaqədar Rusiya vətəndaşlarının, soydaşlarımızın, Qara dəniz donanması şəxsi heyətinin həyatı təhlükədədir. Bu üzdən də Ukraynada ictimai-siyasi vəziyyət normalaşanadək Rusiya Silahlı Qüvvələrindən bu ölkənin ərazisində istifadə üçün Rusiya Federasiya Şurasına müraciət edirəm”, - deyə Rusiya prezidentinin müraciətində vurğulanır.

Bu dəqiqələrdə Federasiya Şurası qoşunların Ukraynaya girməsi barədə Putinin müraciətini yekdilliklə qəbul etdi. 

Vaşinqton Ukraynadakı vəziyyəti Rusiya rəhbərliyi ilə birbaşa müzakirə etməyi davam edəcək. Trend RİA Novosti agentliyinə istinadən bu barədə ABŞ prezidenti Barak Obama bildirib.

ABŞ prezidentinin bildirdiyinə görə, bu yaxınlarda onun Rusiya prezidenti Vladimir Putinlə söhbəti olub.

"Biz Avropa Birliyindəki tərəfdaşlarımızla vəziyyəti müzakirə edəcəyik və Rusiya hakimiyyəti ilə birbaşa əlaqələr saxlayacağıq", - Obama bildirib.

Bu gün Türkiyənin paytaxtı Ankara şəhərinin Keçiörən rayonu ərazisində Xocalı şəhidlərinin xatirəsinə həsr olunmuş abidənin açılış mərasimi keçirilib. APA-nın Türkiyə müxbirinin xəbərinə görə, açılış mərasimində Heydər Əliyev Fondunun vitse-prezidenti Leyla Əliyevanın rəhbərlik etdiyi “Xocalıya ədalət” kampaniyası çərçivəsində göndərdiyi müraciət oxunub.

Tədbirdə çıxış edən Azərbaycanın Türkiyədəki səfiri Faiq Bağırov Xocalı soyqırımı barədə məlumat verdikdən sonra abidəni qoyan Keçiörən bələdiyyəsinə təşəkkürünü bildirib.

Azərbaycan Milli Məclis sədrinin 1-ci müavini Ziyafət Əsgərov son 200 ildə ermənilərin türklərə qarşı törətdikləri soyqırımları xatırladaraq, bundan sonra bu cür faciələrin yaşanmaması üçün Türkiyə ilə Azərbaycanın öz qüvvələrini birləşdirməsinin vacib olduğunu deyib. Dünyada gücün önəminə diqqəti cəlb edən Ziyafət Əsgərov, Azərbaycanın getdikcə güclənməsinin nəticəsi olaraq dünyanın təxminən 20 ölkəsinin parlamentinin Xocalı soyqırımını tanıyan qərarlar qəbul etdiklərini və prosesin davam edəcəyini söyləyib.

Sonra çıxış edən millət vəkili Qənirə Paşayeva Xocalı hadisəsinin bütün türklərə qarşı həyata keçirilən soyqırım olduğunu vurğulayaraq soyqırımı törədən Robert Koçaryan və Serj Sarkisyan kimi adamların Ermənistana rəhbərlik etmək yerinə, beynəlxalq məhkəmələrə çıxarılmalı olduğunu nəzərə çatdırıb.

Abidənin açılışında Azərbaycandan millət vəkilləri Arif Rəhimzadə, Kamilə Əliyeva, Türkiyə millət vəkilləri, iqtidardakı Ədalət və İnkişaf Partiyasının baş katibi Haluk İpək, İstanbul millət vəkili İsmail Safi də çıxış ediblər.

Türkiyə Böyük Millət Məclisinin sədri Cəmil Çiçək mərasimdəki çıxışında bildirib ki, bu abidə Dağlıq Qarabağda yaşananları unutmamaq və unutdurmamaq üçün inşa edilib: “Bu gün burada öz acılarımızı xatırlamaq üçün bir araya gəlmişik. Bilirsiniz ki, Türkiyə-Azərbaycan münasibətlərinin təməlində qardaşlıq dayanır. Qardaşlar bir-birilərinin sevinclərini və kədərlərini paylaşır. Biz Anadolu türkləri, Azərbaycan türklərini özümüzə öz varislərimiz qədər yaxın hiss edirik, bir-birimizi ayrı dövləti olan bir millət kimi görürük. Azərbaycan bizim ikinci dövlətimizdir. 100 il əvvəl Balkanlarda və Anadoluda yaşadığımız acılar kimi, 22 il əvvəl Dağlıq Qarabağda böyük bir acı yaşadıq. Millət olaraq bizə böyük iztirab verən bu acını unutmamalıyıq. Çünki başqalarının acılarına diqqət göstərib öz acılarımızı unutsaq, bir millət kimi öz keyfiyyətlərimizi itirərik”.

C. Çiçək qeyd edib ki, Xocalı qətliamı adi bir kütləvi qətl deyil, Qafqazda erməni işğalçılığının bir təzahürüdür. O bəyan edib ki, bu qətlləri törədən bütün canilər məsuliyyətə cəlb olunmalıdır: “Eynilə Bosniyada soyqırım törədən canilər Miloşeviç və Karaciç kimi, qeyri-rəsmi məlumatlara əsasən Xocalıda 1300 qardaş-bacımızı qətlə yetirmiş canilər də beynəlxalq məhkəmədə mühakimə olunmalıdır”.

TBMM sədri deyib ki, Cənubi Qafqazda sülhə və sabitliyə nail olmaq üçün Ermənistan işğal etdiyi Azərbaycan torpaqlarını geri qaytarmalıdır: “Biz Türkiyə olaraq Azərbaycanın ərazi bütövlüyünün təmin olunması üçün üzərimizə düşən hər işi görməyə hazırıq. Bütün dövlətləri və beynəlxalq təşkilatları ermənilərin haqsız işğalına son qoymağa çağırırıq”.

Mərasimdən sonra TBMM sədri Cəmil Çiçək Azərbaycan Milli Məclisinin Ankarada səfərdə olan nümayəndə heyətini TBMM-də qəbul edib.

Bu fikri Yanukoviç iqtidarı devrilmədən öncə həm yerli, həm də beynəlxalq səviyyəli ekspertlər səsləndirmişdilər. Son günlər Krımda yaşananlar artıq Rusiyanın parçalanma planlarını işə saldığını sübut edir.

Fevralın 24-də Krım tatarlarının Məclisi Krımın yeni konstitusiyasının qəbulunu tələb edib. “Krım xəbərləri” saytının verdiyi xəbərə görə, belə bir qərar Krım tatarlarının Simferopolda keçirilən mitinqində qəbul edilib. Mitinqə 10 mində artıq insan qatılıb.

Mitinqin qətnaməsində deyilir: “Krımın indiki konstitusiyası çoxmillətli Krım xalqının maraqlarına, eyni zamanda Ukrayna daxilində özünütəyinetmə hüququnu tələb edən krım tatar xalqının maraqlarına uyğun deyil. Bu konstitusiya Krımda ictimai-siyasi sabitliyə hər an təhlükə yaradır. Krımın indiki statusu Ukraynanın ərazi bütövlüyünə və suverenliyinə davamlı təhlükədir”.

Məclis parlamentdən yeni ali qanunun hazırlanması üçün komissiya yaradılmasını və Krım Tatar Məclisi üzvlərinin həmin komissiyada təmsil olunmasını tələb edib. Mitinq iştirakçıları Krım Ali Məclisinin səlahiyyətlərinə xitam verilməsini və növbədənkənar seçki keçirilməsini də tələb edir.

Krım Tatar Məclisinin rəhbəri Refat Çubarov mitinqdəki çıxışında bildirib ki, Simferopol rəhbərliyinə bütün Krım yarımadasından Vladimir Leninin heykəllərini ləğv etmək, onun adını meydanlardan götürmək üçün 10 gün möhlət verir: “Əgər tələb yerinə yetirilməsə, biz təcili addımlara başlayacağıq. Bu gün 10 min, sabah 20-30 min olacağıq”.

Fevralın 24-də Sevastopolda 30 minə yaxın insanın qatıldığı daha bir mitinq olub. Mitinqə Rusiya bayrağı ilə çıxan və əsasən ruslardan ibarət olan Krım sakinləri dövlət administrasiyasına etimadsızlıqlarını bildirib, Mixail Çalovu administrasiyaya yeni rəhbər təyin ediblər. Mitinqdə Ukraynada baş verənləri faşizm adlandırıb və “Putin bizim lider”, “Rusiya bizi geri al!”, “Krımda faşizmə keçidə imkan verməyəcəyik” kimi şüarlar səsləndirilib. Mitinqin qətnaməsində bildirilir ki, Sevastopol Ali Radanın heç bir qərarını tanımayacaq, həmin qərarları Krıma tətbiqinin qarşısı alınacaq. Səbəb kimi hakimiyyətin qiyam yolu ilə devrilməsi göstərilir.

Daxili işlər naziri Arsen Avakovla, Təhlükəsizlik Xidmətinin sədri Valentin Nalivayçenko fevralın 23-ü axşam saatlarından Krımdadırlar. Unian.net-ə müsahibə verən Avakov yarımadada durumun nəzarətdə olduğunu deyib: “İndi ən önəmli olan provokasiyalara yol verməməkdir. Bizim Kiyevdə yaşadıqlarımızın təkrarlanmaması üçün provokasiyaların qarşısını birlikdə almalıyıq. Ümid edirəm ki, dinc danışıqlar yolu ilə biz Krımın taleyi ilə bağlı anlaşma əldə edə biləcəyik”.

Onu da vurğulayaq ki, fevralın 19-da Ali Radanın Krımdan olan üzvü “Regionı” partiyasının təmsilçisi Nikolay Kolesniçenko ölkədə siyasi böhran davam edərsə Krımın Rusiyaya verilməsi məsələsini gündəmə gətirməyi təklif etmişdi. Ali Radanın üzvləri arasında təklifə dəstək verənlər vardı. Ertəsi gün isə “Batkivşina” fraksiyasının təmsilçilərinin müraciəti ilə Ukraynanın ərazi bütövlüyünə təhdidlərlə bağlı Ukrayna Prokurorluğunda cinayət işi qaldırılıb. Cinayət işinin istintaqı davam edir.

Əzəli-əbədi türk yurdu olan Krım 60 il öncə - 1954-cü ildə SSRİ Ali Sovetinin qərarı ilə Rusiyadan alınaraq Ukraynaya verilib.

Hazırda oranın əhalisinin 18 faizini Krım türkləri, 58 faizini isə ruslar təşkil edir.