“Krımla Dağlıq Qarabağ münaqişəsi arasında paralellər aparmaq düzgün deyil”.

Dalgatv-nin APA-ya istinadən verdiyi xəbərə görə, bunu Rusiya Federasiya Şurasının Beynəlxalq Əlaqələr Komitəsinin sədr müavini Vladimir Cabbarov deyib.

V. Cabbarov bildirib ki, Dnestryanı, Dağlıq Qarabağ və Krım tam fərqli münaqişə obyektləridir: "Bunları bir-biri ilə müqayisə etmək yanlışdır. Rusiyanın başqa dövlətin ərazisi hesabına öz ərazisini genişləndirmək kimi bir vəzifəsi yoxdur. Ona görə də, hesab edirəm ki, Rusiyanın Dağlıq Qarabağı və Dnestryanı ərazini öz tərkibinə qatacağı tam istisnadır. Rəsmi Moskva həmin ərazilərdə referendum keçirib, onları öz ərazisinə qatmaq fikrində deyil. Rusiya MDB çərçivəsində iqtisadi inteqrasiyanın tərəfdarıdır, ərazi inteqrasiyasının yox”.

Martın 16-da BMT-də Ukraynanın ərazi bütövlüyünü dəstəkləyən qətnaməyə Azərbaycanın səs verməsinin tarixi səbəbləri olduğunu söyləyən V. Cabbarov rəsmi Bakının mövqeyinə Rusiyanın hörmətlə yanaşdığını vurğulayıb: “Rəsmi Bakının bu siyasi addımı Rusiya-Azərbaycan münasibətlərinə təsir etməyib. Ümid edirəm ki, yaxın gələcəkdə Azərbaycan rəhbərliyi Rusiyanın Krımla bağlı mövqeyinə normal yanaşacaq. Çünki Krım tamamilə fərqli bir tarixdir. Krım tarixən Rusiyanın olub. 1954-cü ildə isə heç bir hüquqa əsaslanmadan Ukraynaya verilib. Krımın Ukraynaya verilməsi ilə bağlı qərar SSRİ Ali Soveti tərəfindən təsdiqlənməyib”.

Vladimir Cabbarov Dağlıq Qarabağ probleminin iki ölkə, Azərbaycan və Ermənistan arasında həll olunmalı olduğunu söyləyib: "ATƏT-nin Minsk Qrupunun həmsədr ölkələri isə qarant səviyyəsində çıxış etməlidirlər. Bir daha qeyd etmək istəyirəm ki, Rusiyanın başqa dövlətin ərazisi hesabına öz ərazisini genişləndirmək fikri yoxdur".

“İmkanım olsaydı, Krımda referendumun keçirilməsinin və bu bölgənin Ukraynadan ayrılmasının qarşısını almağa çalışardım”.
Dalgatv-nin APA-ya istinadən verdiyi xəbərə görə, bunu Ukraynanın sabiq prezidenti Viktor Yanukoviç deyib.

“Bu proseslər mənim vaxtımda olsaydı, buna imkan verməməyə çalışardım”, - deyə o vurğulayıb.

Krımda baş verənləri faciə adlandıran Yanukoviç Rusiya prezidenti Vladimir Putindən Ukraynaya qoşun yeritməyi xahiş etdiyini təsdiqləyib.

Slovakiyanın yeni prezidenti partiyasız namizəd Andrey Kiska seçilib. Bu barədə Slovakiyanın Mərkəzi Seçki Komitəsi məlumat verib.

Seçkilərinin ikinci mərhələsində Kiska səslərin 59,4%-ni toplayıb. İkinci namizəd, baş-nazir Robert Fitso isə səslərin 40, 6%-ni toplaya bilib. 7/24news İTAR-TASS-a istinadən xəbər verir ki, Robert Fitso artıq Kiskanı qalibiyyəti münasibəti ilə təbrik edib.

Andrey Kiska 15 iyunda and içəcək və vəzifələrinin icrasına başlayaca.

Qeyd edək ki, seçkilərin birinci mərhələsi 15 martda keçirilib.

Haaqa şəhərində (Niderland) keçirilən III Nüvə Təhlükəsizliyi Sammiti martın 25-də işini davam etdirib. Azərbaycan prezidenti İlham Əliyev sammitdə çıxış edib.

APA-nın məlumatına görə, sammitin ikinci iş günü nüvə təhlükəsizliyi sahəsində milli və beynəlxalq tədbirlərin əhəmiyyətinə həsr olunub. Bu sahədə dünya ölkələri arasında əməkdaşlığın daha da möhkəmləndirilməsinin vacibliyi vurğulanıb. Dünya liderləri bu zirvə görüşündə də nüvə terrorizminin qarşısının alınması üzrə uzunmüddətli və səmərəli beynəlxalq əməkdaşlıq məsələsini gündəmdə saxlayıblar, nüvə terrorizmi təhlükəsinin hələ də mövcud olduğunu bildirərək, bu təhlükənin qarşısının alınması üçün tədbirlərin davam etdirilməsinin vacibliyini önə çəkiblər.

Sammitin plenar iclasında Azərbaycan prezidenti İlham Əliyev çıxış edib. Dövlət başçısı nüvə təhlükəsizliyi tədbirlərinin gücləndirilməsində Beynəlxalq Atom Enerjisi Agentliyinin mühüm rolundan danışıb və Azərbaycanın nüvə təhlükəsizliyinin bir çox aspektləri üzrə Agentliklə fəal əməkdaşlıq etdiyini və iştirakçı dövlət olduğu Nüvə Terrorçuluğuna qarşı Mübarizə üzrə Qlobal Təşəbbüsün nüvə təhlükəsizliyinin möhkəmləndirilməsi istiqamətində BMT-nin göstərdiyi səyləri dəstəklədiyini, bu yaxınlarda Azərbaycanın nüvə, kimyəvi və bioloji silahların və onların çatdırılma vasitələrinin yayılmaması sahəsində gördüyü növbəti tədbirlər haqqında yeni hesabatını BMT-yə təqdim etdiyini diqqətə çatdırıb. İ.Əliyev qeyd edib ki, 2012-ci ildə BMT-nin Təhlükəsizlik Şurasında sədrliyi zamanı Azərbaycan beynəlxalq terrorçuluq, o cümlədən nüvə terrorçuluğu məsələlərinə aid müzakirələr təşkil edib.

Nüvə və radioaktiv təhlükəsizliyin təmin edilməsi üçün əlavə tədbirlər görülməsinin vacibliyinə toxunan prezident Azərbaycanın nüvə materiallarının qeyri-qanuni dövriyyəsində tranzit marşrutu kimi ölkənin ərazisindən istifadənin qarşısını almaq üçün böyük səylər göstərdiyini, bu məqsədlə beynəlxalq tərəfdaşlarla sıx əməkdaşlıq edərək beynəlxalq standartlara uyğun güclü qanunvericiliyə əsaslanan əhatəli milli ixraca nəzarət sistemini formalaşdırdığını vurğulayıb.

Dövlətimizin başçısı bildirib ki, bu yaxınlarda qəbul edilmiş Azərbaycanın ilk «Dəniz Təhlükəsizliyi Strategiyası»nda nüvə və digər kütləvi qırğın silahlarının və onların çatdırılma vasitələrinin, eləcə də aidiyyəti materialların yayılması dəniz təhlükəsizliyinə ən böyük hədələrdən biri kimi müəyyən edilir.

Prezident İ.Əliyev təəssüflə qeyd edib ki, Azərbaycanın beynəlxalq səviyyədə tanınmış ərazisinin 20%-nin Ermənistan tərəfindən davam edən işğalı və azərbaycanlılara qarşı aparılmış etnik təmizləmə siyasəti səbəbindən ölkəmizin öz sərhədlərinin müəyyən hissəsinə lazımi səviyyədə nəzarət etmək imkanı yoxdur. Bu cür vəziyyət transmilli mütəşəkkil cinayətkarlığa, nüvə və radioaktiv materialların qeyri-qanuni daşınmasına, həmçinin radioaktiv tullantı materiallarını basdırmaqla Azərbaycanın işğal olunmuş ərazilərinin Ermənistan tərəfindən zəhərləndirilməsinə şərait yaradır.

Daha sonra Azərbaycan prezidenti Ermənistanın təxminən 40 il əvvəl tikilmiş və köhnəlmiş Atom Elektrik Stansiyasının yaratdığı təhlükədən danışaraq deyib ki, bu elektrostansiya bütün region və yaxın qonşular üçün böyük təhdiddir. Oradakı hər hansı qəzanın nəticələri faciəli olacaq. Lakin beynəlxalq narahatlığı aradan qaldırmaq və bu elektrostansiyanı bağlamaq əvəzinə, Ermənistan həmin Atom Elektrik Stansiyasının fəaliyyətini 2026-cı ilə qədər davam etdirmək qərarına gəlib, baxmayaraq ki, o, yüksək seysmik zonada yerləşir və köhnəlmiş, olduqca təhlükəli texnologiyaya əsaslanır.

Azərbaycanın regionda təhlükəsizliyin və sabitliyin qorunmasında olduqca müsbət rol oynadığını deyən İ.Əliyev bildirib ki, rəsmi Bakı regionda və bütün dünyada nüvə təhlükəsizliyinin gücləndirilməsinə aid məsələlər üzrə beynəlxalq təşkilatlar və tərəfdaşlarla apardığı əməkdaşlığın davam etdirilməsi, nüvə və radioaktiv materialların qeyri-qanuni dövriyyəsindən irəli gələn hədələrin azaldılması işinə sadiqdir.

Çıxışının sonunda Azərbaycan dövlətinin başçısı BMT başda olmaqla beynəlxalq ictimaiyyətin davamlı səyləri ilə bütün çağırışların həll ediləcəyinə və daha təhlükəsiz dünya qurulacağına əminliyini ifadə edib.

Sonra zirvə görüşünün «Nüvə təhlükəsizliyi sammitinin gələcəyi» mövzusunda qeyri-rəsmi iclası keçirilib.

Azərbaycan prezidenti İ.Əliyev sammit çərçivəsində Qazaxıstan prezidenti Nursultan Nazarbayev, Böyük Britaniya və Şimali İrlandiya Birləşmiş Krallığının baş naziri Devid Kemeron və İtaliyanın baş naziri Matteo Rentsi ilə görüşüb. Söhbət zamanı Azərbaycan ilə bu ölkələr arasında ikitərəfli əlaqələrin inkişafına dair fikir mübadiləsi aparılıb.

Prezident İ.Əliyev zirvə görüşü zamanı Türkiyə prezidenti Abdullah Güllə də görüşüb.
Görüşdə Azərbaycan-Türkiyə əlaqələrinin indiki vəziyyəti və perspektivi ilə bağlı müzakirələr aparılıb.

Sammitin sonunda yekun Kommünike qəbul olunub.

Moldovanın müxalif Liberal Partiyası tərəfindən irəli sürülən və ölkənin MDB-dən çıxmasını nəzərdə tutan qanun layihəsi parlamentdə qeydə alınıb.

Bu barədə danışan sənəd müəllifi, partiya sədri Mixay Qimpu bildirib: “MDB-nin bir üzvünün təşkilatın təməl prinsiplərini pozmasından və başqa bir üzv ölkənin ərazisini qəsb eləməsindən sonra Moldova bu qurumu tərk eləməlidir”.

Az öncə rəsmi Kişinyov Avropa Birliyi ilə assosiativ saziş imzalayandan sonra Moldovanın MDB-dən çıxa biləcəyini bəyan eləmişdi.

Ermənistan rəhbəri Serj Sarkisyan Rusiya prezidenti Vladimir Putinlə telefonla danışıb. AzNews.az-ın Ermənistan rəhbərinin rəsmi saytına istinadən verdiyi məlumata görə, prezidentlərin telefon danışığı S. Sarkisyanın təşəbbüsü ilə baş tutub. Telefon söhbəti zamanı iki ölkəni maraqlandıran aktual məsələlər müzakirə olunub, Ermənistanın Gömrük İttifaqına qoşulması istiqamətində narahatlığın olmadığı deyilib.
Söhbətdə Ukraynada baş verənlərə də toxunan prezidentlər Krımın separatçı rəhbərliyinin keçirdiyi “referendum”u xalqların öz müqəddəratını təyin etməsi kimi xarakterizə ediblər.

Telefon bağlantısı zamanı Dağlıq Qarabağ münaqişəsi də müzakirə mövzusu olub. S. Sarkisyan danışıqların ATƏT-in Minsk qrupu çərçivəsində davam etdirilməsinin tərəfdarı olduqlarını söyləyib.