Böyük Britaniya Ermənistan və Azərbaycan qoşunlarının təmas xəttində baş verən gərginlikdən narahatdır və bütün tərəfləri bu gərginliyi azaltmağa çağırır.

Dalgatv-nin APA-ya istinadən verdiyi məlumata görə, bu barədə Böyük Britaniyanın Xarici İşlər Nazirliyinin bəyanatında qeyd olunur.

Bəyanatda bildirilir ki, ötən həftə Dağlıq Qarabağ ətrafında vəziyyətin gərginləşməsi barədə məlumatlar yayılıb: “Çoxlu sayda itkilərin olması və ağır hərbi qurğulardan istifadə olunması haqda yayılan məlumatlar ötən 20 il ərzində atəşkəsin ən narahatverici formada pozulduğunu göstərir. Böyük Britaniya həm Ermənistanı, həm də Azərbaycanı gərginliyi azaltmaq üçün təcili tədbirlər görməyə və atəşkəs rejiminə əməl etməyə çağırır”.

Bəyanatda hər iki tərəfdən itkilərin baş verməsindən kədər hissi ifadə olunur və tərəflər sülh razılaşması istiqamətində ATƏT-in Minsk Qrupunun həmsədrləri ilə birgə işləməyə çağırılır.

Uilyam Lahue: “NATO Azərbaycanın ərazi bütövlüyünü dəstəkləyir” NATO son günlər Ermənistan və Azərbaycan qoşunlarının təmas xəttində baş verən gərginlikdən narahatdır.

Bunu NATO-nun Cənubi Qafqazda əlaqələndirici nümayəndəsi Uilyam Lahue açıqlamasında deyib. Dalgatv APA-ya istinadən xəbər verir ki, U. Lahue NATO-nun Azərbaycanın ərazi bütövlüyünü dəstəklədiyini söyləyib və Dağlıq Qarabağ münaqişəsinin sülh yolu ilə həll edilməsinə tərəfdar olduqlarını vurğulayıb. O bildirib ki, münaqişədə gərginliyin yaranması tək Azərbaycan və Ermənistan üçün deyil, bütün regionun sabitliyi üçün təhlükədir və hər iki tərəf bu gərginliyi aradan qaldırmaq üçün tədbirlər görməlidir.

Gürcüstan hökuməti azərbaycanlıların Gürcüstan cəmiyyətinə inteqrasiyasında maraqlıdır. APA-nın Gürcüstan bürosunun məlumatına görə, bu barədə Gürcüstan prezidentinin milli azlıqların məsələləri üzrə müşaviri Sofiya Şamanidi Azərbaycan jurnalistləri ilə görüşündə bildirib. Müşavirin sözlərinə görə, Gürcüstanda yaşayan azərbaycanlılar ölkənin ictimai-siyasi həyatında çox fəal iştirak edirlər: “Biz arzulayırıq ki, azərbaycanlılar yüksək hökumət postlarında təmsil olunsunlar”.

S. Şamanidi bildirib ki, dil baryeri inteqrasiya prosesinə mane olan problemlərdən biridir: “Təəssüf ki, Kvemo-Kartli bölgəsində yaşayan azərbaycanlıların hamısı gürcü dilini bilmir. Hökumət azərbaycanlıların dövlət dilini bilmələri üçün bütün imkanlardan istifadə edir. Bütün Azərbaycandilli məktəblərdə gürcü dili fənni tədris olunur. Ən çətin məqam yaşlı insanların bu dili öyrənməsindədir, çünki yaşlı insanlar üçün dil öyrənmək çətindir”, deyə S.Şamanidi bildirib.

Sofiya Şamanidi qeyd edib ki, hökumət azərbaycanlıların Gürcüstanda təhsil alması üçün maraqlıdır: “Azərbaycanlı abiturientlər 1+4 proqramı üzrə ali məktəblərə qəbul olunur. Onlar ana dilindən imtahan verdikdən sonra bir il gürcü dilini öyrənir və bundan sonra gürcü dilində ali məktəbdə təhsillərini davam etdirirlər. Beləliklə, biz azərbaycanlı gənclərin digər ölkələrə təhsil almaq və qazanc arxasınca getməməsinə çalışır və onlara ali təhsil almaq imkanları yaradırıq”, deyə müşavir qeyd edib.

Gürcüstan prezidentinin müşaviri ölkədə azərbaycanlıların dini hüquqlarına da toxunub: “Hələlik dini abidələrin qeydiyyatında problemlər var. Hökumətin nəzdində dini məsələlər üzrə məşğul olan xüsusi agentlik fəaliyyət göstərir. Dini abidələrin qeydiyyatı zaman məsələsidir və düşünürəm ki, o, həll olunacaq,” deyə Şamanidi bildirib.

Müşavir Tiflisdə yeni məscid tikintisi məsələsinə də münasibət bildirib: “Əgər belə bir arzu və ehtiyac varsa, Gürcüstan müsəlmanları bu məsələni qaldıra bilər. Əgər bir məscid müsəlmanlar üçün azlıq təşkil edirsə, onlar yeni məscid tikintisi məsələsini gündəmə gətirə bilər, lakin bu barədə söhbət getmir. Gürcüstanda çoxlu məscidlər var”, deyə Şamanidi qeyd edib.

Gürcüstan hakimiyyəti əmindir ki, Azərbaycan və Ermənistan ümumi dil taparaq razılığa gələcək.

Dalgatv-nin “Qruziya Online” saytına istinadən verdiyi xəbərə görə, bunu Gürcüstan prezidenti Georgi Marqvelaşvili deyib. “Gürcüstan bizim qardaş dövlətlərimiz arasında yaranmış vəziyyətdən narahatdır”, - deyə o, söyləyib.

G. Marqvelaşvili bölgədə gərginliyin azaldılması istiqamətindəki çağırışlara qoşulduğunu bildirib: “Bu, həm Azərbaycan və Ermənistan, həm də bölgə üçün çox böyük əhəmiyyət daşıyır. Bölgədə sabitlik bizim hamımıza lazımdır. İki ölkə arasında dialoq davam etdirilməlidir və mən əminəm ki, onlar ümumi dil tapacaq”.

"Ümid edirəm ki, Ermənistan və Azərbaycan prezidentləri yaxın gələcəkdə görüşüb, vacib məsələləri müzakirə etməyə razılıq verəcəklər”

ATƏT-in Minsk Qrupunun amerikalı həmsədri Ceyms Uorlik həlak olan hərbçilərin ailələrinə başsağlığı verib və münaqişənin hərbi yolla həllinin mümkün olmadığını bəyan edib.

Dalgatv-nin  APA-ya istinadən verdiyi xəbərə görə, C. Uorlik cəbhə xəttində baş verənlərdən narahatlığını bildirib: “İlk növbədə ötən günlər baş vermiş zorakılıqlar zamanı həlak olanların ailələrinə başsağlığı vermək istərdim. Mən təmas xəttində çoxlu sayda ölümlərin baş verməsi barədə xəbərlərdən çox narahatam. Bu insidentlər münaqişənin sülh yolu ilə həlli səylərinə zərbədir. Mən tərəfləri atəşkəsə əməl etməyə çağırıram”.

C. Uorlik qeyd edib ki, həmsədrlər problemin sülh yolu ilə həllinə nail olmaq üçün tərəflərlə fəal iş aparır: “Minsk Qrupu tərəflər arasında vasitəçilik üçün yeganə format olaraq qalır. Biz münaqişənin uzunmüddətli həlli üçün bölgəyə müntəzəm səfərlərimizi və yüksək səviyyəli təmaslarımızı davam etdirəcəyik. Ümid edirəm ki, Ermənistan və Azərbaycan prezidentləri yaxın gələcəkdə görüşüb, vacib məsələləri müzakirə etməyə razılıq verəcəklər. Sülh razılaşmasına aparacaq danışıqlara başlamağın vaxtı çatıb. Əgər tərəflər doğrudan da münaqişənin həlli istəyindədirlərsə, onlar həmsədrlərlə strukturlaşmış danışıqlar prosesinə daxil olmaq barədə İsveçrənin təklifini qəbul etməlidir”.

 Türkiyənin baş naziri Rəcəb Tayyib Ərdoğan Azərbaycan prezidenti İlham Əliyevə zəng edib.

Dalgatv-nin  APA-ya istinadən verdiyi xəbərə görə, Türkiyənin baş naziri son günlər cəbhənin müxtəlif istiqamətlərində Ermənistan silahlı qüvvələrinin Azərbaycan mövqelərinə hücumlarının qarşısını alarkən Azərbaycan hərbi qulluqçularının həlak olması xəbərindən kədərləndiyini bildirib. Bununla əlaqədar öz adından və Türkiyə xalqı adından Azərbaycan prezidentinə, Azərbaycan xalqına və şəhidlərin ailələrinə başsağlığı verib.

Dövlət başçısı başsağlığına və diqqətə görə öz adından və Azərbaycan xalqı adından Türkiyənin baş nazirinə və xalqına minnətdarlığını bildirib.

Prezident İlham Əliyev Rəcəb Tayyib Ərdoğanı son günlər təmas xəttindəki vəziyyətlə bağlı məlumatlandırıb.