Bu gün yerli saatla 08:00-da başlayan 12-ci prezident seçkiləri 18:00-da başa çatıb.

2007-ci ildə baş tutmuş referendumun nəticələrinə əsasən, əvvəlki prezident seçkiləri ilə müqayisədə Türkiyə Prezidentini 2014-cü ildən parlament deyil, xalq əvvəlki 7 il əvəzinə 5 il müddətinə seçir.

Türkiyədə 53 milyon 17 min 214 seçici var. Seçkilər günü ölkədə istənilən əyləncə proqramı və spirtli içkilərin satışı qadağan olunub.

Dalgatv Trend-ə istinadən xəbər verir ki, Türkiyədə prezident seçkilərinin gedişi haqqında rəsmi informasiya yalnız Mərkəzi Seçki Komissiyasının (MSK) məlumatı hesab oluncaq. Həmin məlumatlar yerli vaxtla 08:00-dən saat 21:00-dək MSK tərəfindən yayılacaq.

Avqustun 11-də seçkilərin ilkin nəticələri elan ediləcək. Türkiyə MSK avqustun 15-də prezident seçkilərinin rəsmi nəticələrini açıqlayacaq.

Prezident seçkilərində seçicilər 3 namizədə səs verirlər: Hakim Ədalət və İnkişaf Partiyası Baş nazir Rəcəb Tayyib Ərdoğanın namizədliyini irəli sürüb. Cümhuriyyət Xalq Partiyası (CHP) İslam Əməkdaşlıq Təşkilatının sabiq baş katibi Ekmələddin İhsanoğlunu prezident postuna namizəd kimi irəli sürüb. Prezidentliyə üçüncü namizəd isə kürdyönümlü sabiq Sülh və Demokratiya Partiyasının (BDP) hazırkı "Xalqların Demokrat Partiyası" (HDP) sədri Səlahəddin Dəmirdaşdır.

I turda namizədlərdən heç biri 51 faiz səs toplamasa, avqustun 24-də prezident seçkilərinin II turu keçiriləcək.

Bu gün Soçi şəhərindəki “Boçarov Ruçey” iqamətgahında Azərbaycan, Rusiya və Ermənistan prezidentləri İlham Əliyev, Vladimir Putin və Serj Sarkisyanın birgə görüşü keçirilib.

Dalgatv-nin  APA-ya istinadən verdiyi xəbərə görə, görüşün detalları barədə geniş məlumat açıqlanmayıb.

Kremlin mətbuat xidmətinin yaydığı məlumatda bildirilir ki, Rusiya prezidenti Vladimir Putin hər iki prezidentə Rusiyada görüşdükləri üçün təşəkkürünü bildirib. O deyib ki, prezidentlərlə təkbətək və daha sonra qeyri-rəsmi görüşlərində ikitərəfli münasibətlərin inkişafı ilə bağlı müzakirələr aparıb.

V. Putin qeyd edib ki, Dağlıq Qarabağ probleminin nizamlanması üzrə beynəlxalq formatı qəbul edirlər və bu format daxilində tərəfdaşlarla əməkdaşlığa davam edəcəklər. Amma o, belə bir formatda da müzakirə aparılmasını faydalı hesab etdiyini bildirib.

Azərbaycan prezidenti İlham Əliyev də görüşə görə təşəkkürünü bildirib və qeyd edib ki, V. Putinlə görüşdə də Dağlıq Qarabağ münaqişəsi ilə bağlı müzakirə aparılıb: “Bu münaqişə həllini tapmalıdır. Dünən də qeyd etdiyimiz kimi, münaqişənin həlli xeyli uzandı. Ümid edirəm ki, Sizin bu prosesdə şəxsən iştirakınız danışıqlar prosesinə təkan verəcək”.

Prezident İlham Əliyev bildirib ki, münaqişənin həlli üçün danışıqlar formatı, hüquqi baza var: “BMT Təhlükəsizlik Şurası Azərbaycan ərazisindən erməni işğalçı qüvvələrinin dərhal və qeyd-şərtsiz çıxarılmasını tələb edən dörd qətnamə qəbul edib. Təəssüf ki, 20 ildən çoxdur bu qətnamələr kağız üzərində qalıb”.

Prezident ATƏT-in Minsk qrupunun bu istiqamətdə işlədiyini, tərəflərin yaxınlaşdırmağa çalışdığını, lakin bunun o qədər də uğurlu alınmadığını qeyd edib: “Ona görə də düşünürəm ki, Rusiyanın yaxın dost, tərəfdaş və qonşu ölkə kimi bu nizamlanma prosesində xüsusi rolu var. Ümid edirik ki, yaxın vaxtlarda danışıqlar, sülh yolu ilə münaqişənin beynəlxalq hüququn norma və prinsipləri çərçivəsində ədalətli nizamlanmasına nail olacağıq”.

Ermənistan prezidenti Serj Sarkisyan da V. Putinə təşəkkür edərək, indiki mürəkkəb vəziyyətdə onun münaqişənin nizamlanmasına diqqət və vaxt ayırmasını yüksək qiymətləndiklərini bildirib.

S. Sarkisyan deyib ki, münaqişənin həlli mümkündür və problem kompromis, ATƏT-in Minsk qrupunun təklif etdiyi prinsiplər əsasında həll olunmalıdır.

Daha sonra çıxış edən V. Putin Azərbaycan və Ermənistan prezidentinin münaqişənin sülh yolu ilə nizamlanmasının vacibliyi barədə dediklərinə diqqət çəkərək, bundan məmnuniyyət duyduğunu dilə gətirib.

“Həqiqətən də əsas məsələ budur. İnsanların ölməsindən böyük faciə ola bilməz. Qeyd etmək lazımdır bu münaqişə bizə Sovet İttifaqından miras qalıb və biz problemin həllini tapmaq üçün səbr, müdriklik və qarşılıqlı hörmət nümayiş etdirməliyik.

Sözsüz ki, xoş niyyət varsa, istənilən mürəkkəb vəziyyətdən çıxış yolu tapmaq mümkündür. Mən belə gəlir ki, həm Azərbaycan, həm də erməni xalqlarının belə niyyəti var”.

Sonra görüş mətbuat işçilərinin iştirakı olmadan davam etdirilib.

Ötən gün Rusiya Nazirlər Kabinetinin iclasında Ermənistanın Avrasiya İttifaqına üzvlüyünü nəzərdə tutan müqavilə təsdiqlənib.

Modern.az rus mətbuatına istinadən xəbər verir ki, bundan sonra qərar imzalnması üçün prezident Vladimir Putinə təqdim olunacaq. Müqavilədə rəsmi Yerevanın iqtisadi birlikdə hansı status və çərçivədə üzv olacağı ilə bağlı əsas baza elementləri yer alıb.

Qeyd edək ki, iylun 17-də jurnalsitlərin suallarını cavablandıran Ermənistan baş naziri Ovik Abramyan “oktyabrın sonlarına qədər Avrasiya İttifaqına üzv olacayıq” –deyə ölkə ictimaiyyətinə vəd vermişdi. 2015-ci il yanvarın birindən Avrasiya İttifaqının vahid qaydalar sistemi faktiki fəaliyyətə başlayır.

Xatırladaq ki, Rusiya, Qazaxıstan və Belarusun daxil olduğu Avrasiya İqtisadi Birliyi bu il mayın 29-da Astana şəhərində imzalanmış müqavilə əsasında rəsmən élan olunub

ABŞ Prezidenti Barak Obama, ABŞ ordusuna "İraq Şam İslam Dövləti (İŞİD) təşkilatının, İraqın şimalındakı Amerikan personalını təhlükəyə qoyması vəziyyətində" hava hücumunun həyata keçirilməsi üçün səlahiyyət verib.

Dalgatv APA-ya istinadən xəbər verir ki, Birləşmiş Millətlər Təşkilatının Təhlükəsizlik Şurası İraq Şam İslam Dövləti (İŞİD) təşkilatının ən son hücumlarını qınayıb. Təhlükəsizlik Şurası, IŞİD-in son hücumlarından sonra keçirdiyi təcili yığıncaqda, İraqdakı son hadisələri qiymətləndirib.

15 ölkədən ibarət olan Təhlükəsizlik Şurasının üzvləri, İraqda xristianların yaşadığı şəhərlərin İŞİD-in nəzarətinə keçməsinin ardından, Fransanın etdiyi təcili çağırış ilə yığıncaq keçirmişdir.

Gürcüstanın sabiq prezidenti Mixail Saakaşvili ölkəsində həbs olunması barədə verilən sanksiyanı “müharibənin ildönümündə Putinə hədiyyə” kimi qiymətləndirib.

Dalgatv  APA-ya istinadən xəbər verir ki, sabiq prezident öz bəyanatında hakimiyyətin bu addımının cəmiyyətdə dərin qütbləşmə yaradacağını bildirib: “Mən fəxr edirəm ki, bu qədər axtarmaqlarına baxmayaraq, mənə qarşı əsaslı faktlar tapa bilməyiblər. Sabiq nazir İrakli Okruaşvilinin mənə qarşı ifadəsi var, onu saxtakarlıq və korrupsiyaya görə işdən qovmuşduq. Nino Burcanadze və Çaxalyanın ifadələri var, onları da başa düşmək olar”.

M. Saakaşvili əlavə edib ki, Tblisiyə gedib, həbsxanaya oturmağa vaxtı yoxdur: “Mənim buna vaxtım yoxdur, onların da bunu etməyə imkanı. Nə üçün biz imkan veririk ki, bütün dünyanın gözü qabağında bizi ələ salsınlar? Yəqin, indi Putin Kremldə rəqs edir, çünki mənim həbsim barədə sanksiyanı ona hədiyyə ediblər”.

Prezident İlham Əliyev Ağdam rayonunun sosial-iqtisadi inkişafının sürətləndirilməsinə dair əlavə tədbirlər haqqında sərəncam imzalayıb.

Sərəncamda qeyd olunur ki, son illərdə Ağdam rayonunun işğal altında olmayan 91 min nəfərə qədər əhalinin məskunlaşdığı 44 yaşayış məntəqəsində müxtəlif Dövlət Proqramları çərçivəsində geniş tikinti-bərpa və abadlıq-quruculuq işləri aparılıb. 6600-dən çox ailə üçün 17 yeni qəsəbə salınmış, 18 ümumtəhsil və 3 musiqi məktəbi, 12 tibb və 10 məktəbəqədər təhsil müəssisəsi, 11 klub icma mərkəzi inşa edilmiş, uzunluğu 260 kilometr olan elektrik, 117 kilometr olan içməli su xətləri, yeni yollar çəkilmiş, yaşayış məntəqələri qazlaşdırılib. Rayon mərkəzinin yerləşdiyi Quzanlı qəsəbəsində, Mərkəzi rayon və uşaq xəstəxanaları, doğum evi, Təcili Tibbi Yardım Stansiyası, Olimpiya İdman Kompleksi və digər sosial yönümlü obyektlər tikilib.

Sərəncama əsasən, Quzanlı qəsəbəsində abadlıq-quruculuq işlərinin davam etdirilməsini, habelə "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nda rayon üzrə müəyyən olunmuş tədbirlərin həyata keçirilməsini təmin etmək məqsədi ilə Ağdam Rayon İcra Hakimiyyətinə Azərbaycan Respublikasının 2014-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan 2,0 (iki) milyon manat ayrılır.

Azərbaycan Respublikasının Maliyyə Nazirliyinə bu sərəncamda nəzərdə tutulan məbləğdə maliyyələşməni müəyyən olunmuş qaydada təmin etmək tapşırılıb.

Prezident digər sərəncamı isə, Ağdam rayonunun Quzanlı-Üçoğlan-Xındırıstan-Səfərli avtomobil yolunun tikintisi ilə bağlı tədbirlər haqqında imzalayıb.

Sənəddə bildirilir ki, iyirmi bir min nəfər əhalinin yaşadığı 10 yaşayış məntəqəsini və 4 köçkün qəsəbəsini birləşdirən Quzanlı-Üçoğlan-Xındırıstan- Səfərli avtomobil yolunun tikintisi məqsədi ilə Azərbaycan Respublikasının 2014-cü il dövlət büdcəsində nəzərdə tutulmuş Azərbaycan Respublikası Prezidentinin ehtiyat fondundan Ağdam Rayon İcra Hakimiyyətinə 3,2 milyon (üç milyon iki yüz min) manat ayrılır.

Azərbaycan Respublikasının Maliyyə Nazirliyinə bu məbləğdə maliyyələşməni müəyyən olunmuş qaydada təmin etmək tapşırılıb.