"NATO-nun şərqə doğru genişlənməsindən qorxmuram. Bundan heç kim qorxmamalıdır, lakin eyni zamanda durumu soyuqqanlı dəyərləndirmək lazımdır".

Dalgatv-nin APA-ya istinadən verdiyi xəbərə görə, bunu Rusiya prezidenti Vladimir Putin deyib.

O qeyd edib ki, Krımla bağlı qərarın qəbulunun səbəblərindən biri NATO-nun şərqə doğru genişlənməsi olub.

“Mən deyəndə ki, NATO-ya yeni ölkələrin qoşulmasına ehtiyac yoxdur, təhlükəsizliyə dair ikitərəfli saziş əsasında əməkdaşlıq qurula bilər, bizə dedilər ki, bu sizin işiniz deyil. Ona görə də əgər birdən NATO qoşunları Sevastopolda peyda olsa idilər, bu, artıq Rusiya üçün geosiyasi əhəmiyyət kəsb edəcəkdir. Yəni Rusiya Qara dəniz bölgəsindən sıxışdırılıb çıxarılacaqdır. Odur ki, NATO-nun genişlənməsi məsələsində bütün amilləri nəzərə alacağıq və müvafiq addımlar atacağıq. Rusiyanın təhlükəsizliyinin təmin edilməsi üçün əlimizdən gələni edəcəyik”, - deyə o vurğulayıb.

Rusiya prezidenti Vladimir Putin Krımın baş naziri Aksyonova qubernator səlahiyyətlərini icra etməyi təklif edib.

Dalgatv.ge APA-ya istinadən verdiyi məlumata görə, bunu Putin bu gün Aksyonovla görüş zamanı bəyan edib.

“Rusiya Federasiyasının qanunvericiliyinə uyğun olaraq qubernatorun səlahiyyətlərini icra edəni təyin etmək lazımdır. Bu gün bu barədə müvafiq fərman imzalanacaq”, - deyə Putin bildirib.

Putin həmçinin Krım qanunverici orqanlarına seçkilərin sentyabrın 14-də baş tutacağını bəyan edib.

Aksyonov, öz növbəsində, Krımın seçkilərə hazır olduğunu vurğulayıb.

Bundan əvvəl, Krımın Dövlət Şurası Putinə regiona başçılıq etmək üçün Aksyonovun namizədliyini irəli sürüb.

Bu gün Gürcüstanda 1989-cu il aprelin 9-da baş verən faciənin 25-ci ildönümünə həsr olunan anım tədbirləri keçirilir. APA-nın Gürcüstan bürosunun məlumatına görə, gürcü xalqı və Gürcüstanda yaşayan digər millətlərin nümayəndələri Şota Rustaveli prospektində yerləşən Gürcüstan parlamentinin keçmiş binası qarşısındakı “9 Aprel” abidəsi önünə gedərək ora gül-çiçək dəstələri qoyurlar.

Bu gün Gürcüstanın prezidenti Georgi Marqvelaşvili, baş nazir İrakli Qaribaşvili, müdafiə naziri İrakli Alasaniya, digər hökumət üzvləri, keçmiş baş nazir Bidzina İvanişvili, çoxsaylı ictimaiyyət nümayəndələri, ictimai xadimlər, diplomatik korpus nümayəndələri 9 aprel qurbanlarını anıblar. G. Marqvelaşvili jurnalistlərə açıqlamasında faciə qurbanlarının azadlıq uğrunda həlak olduqlarını bildirib: “Azadlıq elə bir yüksək dəyərdir ki, onun yolunda həyatdan keçməyə dəyər”.

Azərbaycanın Gürcüstandakı səfirliyinin əməkdaşları da abidə önünə əklil və gül-çiçək dəstələri qoymaqla faciə qurbanlarını yad ediblər.

Qeyd edək ki, 1989-cu il aprelin 9-da Tiflisdə müstəqillik tələbi ilə keçirilən kütləvi aksiyanın dağıdılması zamanı hadisə yerində 16 nəfər həlak olub, sonra bu rəqəm 21-ə çatıb.

İlham Əliyev Həsən Ruhanini Azərbaycana dəvət edib

Azərbaycan və İran arasında rəsmi sənədlərin imzalanması mərasimi başa çatdıqdan sonra Azərbaycan prezidenti İlham Əliyev və İran İslam Respublikasının prezidenti Həsən Ruhani mətbuata açıqlama veriblər. İ. Əliyev İranın Dağlıq Qarabağ məsələsində Azərbaycana dəstəyinin çox vacib olduğunu söyləyib.

Dalgatv APA-ya istinadən xəbər verir ki, dövlət başçısı bəyan edib ki, bu münaqişə BMT qətnamələri çərçivəsində öz həllini tapmalıdır: “Azərbaycanın ərazi bütövlüyü qorunmalıdır. Bu baxımdan İran İslam Respublikasının Dağlıq Qarabağ münaqişəsi ilə bağlı ortaya qoyduğu mövqe ədalətə daha yaxındır və bu mövqeyə görə sizə minnətdarıq. Azərbaycanın beynəlxalq birlik tərəfindən tanınmış əraziləri işğal altındadır. Bu işğal nəticəsində bir milyondan artıq azərbaycanlı öz doğma torpağında qaçqın, köçkün vəziyyətinə düşüb. İşğal edilmiş torpaqlarda bizim bütün tarixi, dini abidələrimiz ermənilər tərəfindən dağıdılıb”.

Azərbaycan prezidenti vurğulayıb ki, iranlı həmkarı ilə müxtəlif sahələrdə əməkdaşlıq barədə fikir mübadiləsi aparıb: “İki ölkə arasında iqtisadi sahədə, sərmayə qoyuluşu sahəsində gözəl imkanlar var, həmçinin enerji sahəsində əməkdaşlıq uğurludur. Bu gün enerji sahəsində imzalanmış müqavilə iki ölkə arasındakı əməkdaşlığı daha da gücləndirəcək. Eyni zamanda, Azərbaycan və İran hərbi sahədə də əməkdaşlığın dərinləşdirilməsi üçün əlavə yollar axtaracaq. Təbii ki, humanitar və mədəniyyət sahəsində əməkdaşlıq xüsusi məna daşıyır. İki ölkə arasında tarixi bağlılıq insanlar üçün çox vacibdir və xalqlarımız uzun illərdir dinc şəraitdə birgə yaşayırlar. Azərbaycan və İran xalqlarını dərin tarixi və mədəni köklər bağlayır və bu gün iki ölkənin əlaqələri bu möhkəm zəmin üzərində qurulub. Əminəm ki, bütün qarşımıza qoyduğumuz məqsədlərə çatacağıq və birgə səylərlə digər sahələrdə də İran-Azərbaycan əlaqələrini daha yüksək pilləyə qaldıracağıq”.

İ. Əliyev İrana səfərindən məmnun olduğunu qeyd edib: “Mən bu səfəri İran-Azərbaycan əlaqələrinin inkişafı üçün çox böyük addım hesab edirəm. Bu, mənim İrana üçüncü rəsmi səfərimdir. Səfərlərin sayı özlüyündə bir göstəricidir. Biz iki ölkə arasında bütün sahələrdə əlaqələrin yüksək səviyyədə inkişaf etməsini istəyirik və buna nail olmaq üçün indi çox gözəl imkanlar var. Biz ilin əvvəlində Həsən Ruhani ilə Davosda görüşmüşük. Bu gün isə İranda bizim siyasi dialoqumuz davam edir. Biz bu gün ikitərəfli əlaqələrimizin müxtəlif aspektlərini geniş və səmimiyyətlə müzakirə etdik. Biz beynəlxalq təşkilatlarda çox uğurlu fəaliyyət göstəririk. BMT, İslam Əməkdaşlıq Təşkilatı, ECO, Qoşulmama Hərəkatında bizim fəaliyyətimiz çox uğurludur”.

İlham Əliyev İran prezidentini Azərbaycana rəsmi səfərə dəvət edib. H. Ruhani münasib bir zamanda Azərbaycana gələcəyini açıqlayıb.

Azərbaycan Prezidenti İlham Əliyevin İrana səfəri çərçivəsində iki ölkə arasında bir sıra sahələr üzrə sənədlər imzalanıb.

Dalgatv-nin  Trend-ə istinadən verdiyi xəbərə görə, "Azərbaycan Respublikası Gənclər və İdman Nazirliyi və İran İslam Respublikasının Gənclər və İdman Nazirliyi arasında əməkdaşlıq haqqında Anlaşma Memorandumu" imzalanıb. Sənədi Azərbaycanın xarici işlər naziri Elmar Məmmədyarov və İranın gənclər və idman naziri Mahmud Qudərzi imzalayıb.

"Azərbaycan Respublikası Fövqəladə Hallar Nazirliyi və İran İslam Respublikası Daxili İşlər Nazirliyi arasında fövqəladə halların nəticələrinin aradan qaldırılması sahəsində əməkdaşlıq haqqında Anlaşma Memorandumu"nu Azərbaycanın xarici işlər naziri Elmar Məmmədyarov və İran DİN-in rəhbəri Əbdülrza Rəhmani Fəzli imzalayıb.

Bundan əlavə, "Azərbaycan Respublikasının Ekologiya və Təbii Sərvətlər Nazirliyi və İran İslam Respublikasının Yol və Şəhərsalma Nazirliyi arasında hidrometeorologiya məsələləri və onunla əlaqəli işlər üzrə əməkdaşlıq haqqında Anlaşma Memorandumu" imzalanıb. Sənədi Azərbaycan tərəfdən ekologiya və təbii sərvətlər naziri Hüseynqulu Bağırov, İran tərəfdən isə yol və şəhərsalma naziri Abbas Axundi imzalayıb.

"Azərbaycan Respublikası və İran İslam Respublikası hökuməti arasında Ordubad və Marazad su elektrik stansiyalarının tikintisi və istismarı sahəsində əməkdaşlıq haqqında Saziş" də imzalanıb. Sazişi Azərbaycanın iqtisadiyyat və sənaye naziri Şahin Mustafayev və İranın energetika naziri Həmid Çitçiyan imzalayıb.

Ukraynada Xarkov vilayət şurası Xarkov xalq respublikasının yaradılmasını elan edib.

Dalgatv-nin  APA-ya istinadən verdiyi məlumata görə, müvafiq qərar Xarkov vilayət şurasının növbədənkənar toplantısında deputat seçilmiş rusiyameylli fəallar tərəfindən qəbul olunub.

Eyni zamanda, onlar bütün dövlət qurumlarının səlahiyyətlərini öz üzərilərinə götürdüklərini bəyan ediblər.