Ukrayna prezidenti Pyotr Poroşenko və Almaniya kansleri Angela Merkel Donbassdakı vəziyyəti Rusiya prezidenti Vladimir Putin və Fransa prezidenti Fransua Ollandla müzakirə etmək barədə razılığa gəlib.

Dalgatv  APA-ya istinadən xəbər verir ki, bu barədə Ukrayna prezidentinin rəsmi saytında bildirilib.

Qeyd olunub ki, danışıqlar zamanı Ukrayna prezidenti böhranın həlli istiqamətində Almaniya hökumətinin səylərini, xüsusilə də bu günlərdə XİN başçılarının Berlində keçirilmiş dördtərəfli görüşünü yüksək qiymətləndirib.

Tərəflər razılaşıb ki, danışıqlarda növbəti mərhələ yüksək səviyyəli görüşlər formatında olmalıdır. Məhz bu məqsədlə artıq dörd ölkənin (Ukrayna, Rusiya, Almaniya və Fransa) prezidentləri səviyyəsində dördtərəfli görüşün təşkili nəzərdə tutulub.

Qeyd edək ki, Poroşenko və Putinin görüşü barədə avqustun 15-də Avropa Birliyinin Rusiyadakı səfiri Viqaudas Uşatskas da söz açıb. Onun dediyinə görə, prezidentlərin görüşünə Avropa Komissiyasının prezidenti Joze Manuel Barrozu da qatıla bilər.

Sentyabrın 8-9-da Rusiyanın baş naziri Dmitri Medvedev Ermənistana səfər edəcək.

Dalgatv-nin “Regnum”a istinadən xəbərinə görə, bu barədə Ermənistanın baş naziri Ovik Abramyan bildirib.

Onun sözlərinə görə, avqust-sentyabr aylarında Gürcüstan, İran və Rusiyadan olan həmkarları ilə görüşləri gözlənilir: “Avqustun 21-22-də Gürcüstanın baş naziri İrakli Qaribaşvili Ermənistana gələcək. Sentyabrın 15-17-də isə mən İrana səfər edəcəyəm”.

Heydər Əliyev Fondu Leyla Əliyevanın adından yayılan müraciətlə bağlı açıqlama yayıb.

“Məlumatda Leyla Əliyevanın Facebook sosial şəbəkəsindəki hesabı vasitəsi ilə Azərbaycan Respublikası Silahlı Qüvvələrinə müraciət etdiyi bildirilir.

Heydər Əliyev Fondunun İctimaiyyətlə əlaqələr departamentindən verilən məlumata görə, xəbərdə istinad olunan Facebook sosial şəbəkəsindəki hesab, eləcə də Fondun vitse-prezidentinin adından yayılmış müraciət Leyla Əliyevaya məxsus deyil.

Qeyd edək ki, Fondun vitse-prezidenti Leyla Əliyevanın adına Facebook sosial şəbəkəsində ayrı-ayrı şəxslər tərəfindən bir neçə hesab yaradılıb.

Bununla əlaqədar bildiririk ki, Heydər Əliyev Fondunun vitse-prezidenti Leyla Əliyevanın Facebook sosial şəbəkəsindəki rəsmi səhifəsi bu ünvandadır: https://www.facebook.com/aliyevaleylaofficial”, deyə açıqlamada bildirilir. 

Avqustun 19-da Naxçıvan şəhərində Əlahiddə Ümumqoşun Ordusunun Qərargahında Azərbaycanın müdafiə naziri general-polkovnik Zakir Həsənov, Gürcüstanın müdafiə naziri İrakli Alasaniya və Türkiyənin milli müdafiə naziri İsmət Yılmaz arasında üçtərəfli formatda görüş keçirilib.

Müdafiə Nazirliyinin mətbuat xidmətindən APA-ya verilən məlumata görə, görüşdə nazirlər regionda cərəyan edən hərbi-siyasi vəziyyət və təhlükəsizlik məsələləri ətrafında fikir mübadiləsi aparıb və hərbi sahədə əməkdaşlıq üzrə bir sıra qarşılıqlı maraq doğuran məsələləri müzakirə ediblər.
 

Eyni zamanda qərar qəbul edilib ki, müdafiə nazirləri bu formatda hər altı aydan bir görüşsünlər.

Danışıqlardan sonra kütləvi informasiya vasitələri nümayəndələri üçün brifinq keçirilib və Müdafiə nazirləri üçtərəfli görüşün yekunları barədə medianı məlumatlandırıblar.

Müdafiə naziri, general-polkovnik Zakir Həsənovun kütləvi informasiya vasitələri nümayəndələri qarşısında çıxışında bildirib ki, nazirlər üçtərəfli formatda ilk görüşü keçiriblər: “Görüş zamanı regionda cərəyan edən hərbi-siyasi vəziyyət və təhlükəsizlik məsələləri ətrafında fikir mübadiləsi apardıq, bölgədə sabitliyin təmin edilməsi yollarını birgə araşdırdıq.

3 dost-qonşu xalq arasında münasibətlərin və fəaliyyətlərin üçtərəfli formatda inkişaf etdirilməsinin səmərəliliyi vurğulandı, bu formatda münasibətlərimizin gələcək perspektivlərini müzakirə etdik, qarşılıqlı maraq doğuran istiqamətlər barədə geniş fikir mübadiləsi apardıq.
 

Bu formatda danışıqların genişləndirilməsi və müdafiə nazirlərinin üçtərəfli görüşlərinin hər il növbə ilə Azərbaycanda, Gürcüstanda və Türkiyədə keçirilməsi, əməkdaşlığımızın gedişatının müzakirə edilməsi və gələcək perspektivlərin müəyyənləşdirilməsi barədə qərar qəbul etdik.

3 ölkənin Silahlı Qüvvələrinin döyüş qabiliyyətinin artırılması və qarşılıqlı əməliyyat uyarlığının əldə edilməsi məqsədilə üçtərəfli birgə təlimlərin keçirilməsi, birgə seminar və konfransların təşkil edilməsi, hərbi təhsil və hərbi-texniki sahələrdə əməkdaşlığın üçtərəfli formatda təşkil edilməsi, neft və qaz boru kəmərlərinin mühafizəsi üzrə üçtərəfli təlimlərin keçirilməsi, əməkdaşlıq sahələrinin genişləndirilməsi üçün üç ölkə mütəxəssislərinin ekspert görüşlərinin təşkil edilməsi məqsədəuyğun hesab olunub”.

“Donbas” özünümüdafiə batalyonu bir gün davam edən döyüşlərdən sonra Donetsk vilayətinin  İlovaysk şəhərinin bir hissəsini nəzarətə ala bilib.

Dalgatv-nin  APA-ya istinadən verdiyi xəbərə görə, “Donbas” özünümüdafiə batalyonu “Facebook” səhifəsində bildirib.  “Terrorçular şəhərin bir hissəsindən çıxarılıb. Döyüş davam edir”, deyə məlumatda bildirilir.

Antiterror Əməliyyat Qüvvələri ötən gecə Luqanska daxil olub, şəhərin separatçılardan təmizlənməsi istiqamətində əməliyyat keçirilir. “Bizim bir neçə bölmələrimiz artıq Luqanskın mərkəzi hissəsinədək irəliləyib. Şəhərin küçələrində qızğın döyüşlər gedir”, deyə  Ukrayna Milli Təhlükəsizlik və Müdafiə Xidmətinin katibi Andrey Lısenko bildirib.

Müdafiə naziri general-polkovnik Zakir Həsənov ölkəmizə rəsmi səfərə gələn Gürcüstanın müdafiə naziri İrakli Alasaniyanı qəbul edib. 

Nazirliyin mətbuat xidmətindən AzNews.az-a verilən məlumata görə, İ.Alasaniyanın rəhbərlik etdiyi nümayəndə heyətinin Naxçıvanda yerləşən Əlahiddə Ümumqoşun Ordusunun Qərargahı qarşısında rəsmi qarşılanma mərəsimi keçirilib. Hər iki ölkənin dövlət bayrağının dalğalandığı meydanda Gürcüstan Müdafiə nazirinin şərəfinə fəxri qarovul dəstəsi düzülüb. Fəxri qarovulun rəisi raport verdikdən sonra Gürcüstanın və Azərbaycanın dövlət himnləri səsləndirilib.

Nümayəndə heyətlərinin iştirakı ilə keçirilən görüşdə Müdafiə naziri general-polkovnik Zakir Həsənov qonaqları Azərbaycanın qədim diyarı Naxçıvanda salamlayaraq, Gürcüstanla aparılan danışıqların və keçirilən görüşlərin strateji əhəmiyyət daşıdığını vurğulayıb, hərbi əməkdaşlığın yüksək templə inkişaf etdiyini və bu əlaqələrin daimi olacağını qeyd edib.

Öz növbəsində qonaq Naxçıvan şəhərinə ilk dəfə səfər etdiyindən məmnun olduğunu bildirib və yüksək qonaqpərvərliyə görə təşəkkürünü ifadə edib.

Sonra tərəflər regiondakı hərbi-siyasi vəziyyət və qarşılıqlı maraq doğuran digər məsələlər ətrafında fikir mübadiləsi aparıblar.