Yerevanda nümayiş iştirakçıları Rusiyanın Ermənistandakı səfiri İvan Volınkinin persona non grata elan olunmasını tələb edib və rəsmi Moskvanın siyasətinə etiraz bildiriblər.

Bazar günü bir qrup Ermənistan vətəndaşı “Putinizmə Yox!”, “Azad, müstəqil Ermənistan” şüarları ilə Yerevanın Azadlıq meydanından Rusiya səfirliyi qarşısına yürüş təşkil ediblər.

Nümayiş iştirakçıları əllərində Ermənistan, Avropa İttifaqı bayraqlarını, siyasi məhbus hesab etdikləri Volodya Avetisyanın və Şant Harutyunyanın şəkillərini tutub və “Eşq olsun Ukraynaya!” şüarları səsləndiriblər.

Fəallar bu aksiya ilə Rusiyanın bir sıra iri şəhərlərində “demokratik qüvvələrin Putinizmə qarşı” etiraz aksiyalarına qatıldıqlarını bildiriblər.

Aksiyanın təşkilatçıları “Kremlin Ermənistanı Gömrük İttifaqına birləşməyə məcbur etməsinə, işğalçılıq siyasətinə” və Rusiya səfiri Ivan Volınkinin “Ermənistan Respublikasının suverenliyinə hörmətsizlik” göstərməsinə qarşı etiraz ediblər.

Onlar Rusiya diplomatını Ermənistanda persona non grata (arzuolunmaz şəxs) elan etməyi tələb ediblər.

Dalgatv-nin  BBC Azərbaycanca-ya istinadən verdiyi xəbərə görə, səfir Volınkin Rusiyada dərc olunan “Noyev kovçeq” qəzetinə müsahibəsində Rusiyanın Ermənistan informasiya məkanında “daha fəal iştirak etməsinin” labüdlüyünü bildirib və iki ölkə arasında münasibətləri “korlamaq istəyən QHT-lərin neytrallaşdırılması ilə daha fəal məşğul olmağa” çağırıb.

Səfirin bu sözləri bir sıra yerli ictimai təşkilatları tərəfindən Ermənistanın daxili işlərinə müdaxilə və suverenliyinə qəsd kimi qiymətləndirilib.

Aksiyada iştirak edən sovet dissidenti, Milli Müqəddərat Birliyi Partiyasının sədri Paruyr Hayrikyan qeyd edib ki, “aksiyanı anti-Rusiya hesab etmək düzgün deyil”.

“Bura toplaşanlar bu gün Putinizmə qarşi yürüşlər təşkil edən dünya demokratik qüvvələrinin bir hissəsidir... Putin hamı, o cümlədən rus xalqı üçün tiran və bəladır”, - Hayrikyan deyib.

Nümayişçilərlə onları Rusiya səfirliyinin yaxınlığına buraxmayan polis arasında qarşıdurmanın iki daha fəal iştirakçısı tutulub polis şöbəsinə aparılıb, nümayiş başa çatdıqdan sonra buraxılıblar.

“Türkiyənin xarici işlər naziri Əhməd Davudoğlu bu ayın sonunda Azərbaycana gələcək”.

Bunu Türkiyənin Azərbaycandakı səfiri İsmail Alper Coşkun söyləyib.

Dalgatv APA-ya istinadən xəbər verir ki, səfir bildirib ki, bu il Türkiyə parlamentinin sədrinin də Azərbaycana səfəri gözlənilir.

“Bu il Türkiyə-Azərbaycan Strateji Əməkdaşlıq Şurasının da toplantısı keçiriləcək”, - deyə diplomat vurğulayıb.

Azərbaycan Dövlət Sərhəd Xidmətinin rəisi Elçin Quliyev Gürcüstanın daxili işlər naziri Aleksandr Çikaidzeni qəbul edib.

Dalgatv APA-ya istinadən xəbər verir ki, görüşdə Azərbaycan-Gürcüstan dövlət sərhədində və sərhəd keçid məntəqələrində əməliyyat şəraiti və onun inkişaf tendensiyaları müzakirə olunub, Azərbaycan Respublikasının Dövlət Sərhəd Xidməti və Gürcüstan Daxili İşlər Nazirliyinin Sərhəd Polisi arasında qarşılıqlı faydalı əməkdaşlığın hazırkı vəziyyəti və perspektivləri, Avropa İttifaqı, Frontex, GUAM kimi beynəlxalq təşkilatlar çərçivəsində əməkdaşlığın daha da genişləndirilməsi haqqında fikir mübadiləsi aparılıb.

Müzakirələr zamanı beynəlxalq terrorçuluğa, qeyri-qanuni miqrasiyaya, qaçaqmalçılığa və dövlət sərhədindən digər qanunsuz fəaliyyətə qarşı mübarizə sahəsində Azərbaycan və Gürcüstan sərhədçilərinin birgə səyləri yüksək qiymətləndirilib.

Azərbaycan prezidenti İlham Əliyev Gürcüstan daxili işlər naziri Aleksandr Çikaidzeni qəbul edib.

Dalgatv-nin  APA-ya istinadən verdiyi xəbərə görə, görüşdə İlham Əliyevin bu yaxınlarda Gürcüstana səfəri məmnunluqla xatırlanıb, ölkələr arasında strateji əməkdaşlığın bütün sahələrdə möhkəmləndirilməsi ilə bağlı müzakirə olunan məsələlərin önəmi vurğulanıb.

Söhbət zamanı Azərbaycanla Gürcüstan arasında əməkdaşlığın müxtəlif istiqamətlərdə, o cümlədən daxili işlər orqanları arasında daha da inkişaf etdirilməsi ilə bağlı məsələlər ətrafında fikir mübadiləsi aparılıb.

Xalqımızın ümummilli lideri Heydər Əliyevin anadan olmasının 91-ci ildönümü münasibətilə Gürcüstanda keçirilən silsilə tədbirlərə Azərbaycan səfirliyində təşkil olunmuş geniş mərasimlə yekun vurulmuşdur. 
Bu ölkədə akkreditə olunmuş diplomatik korpusun, Gürcüstan parlamentinin, Azərbaycan və gürcü ictimaiyyəti nümayəndələrinin iştirak etdikləri Ulu Öndərin mənalı ömür yolundan danışılmışdır.
Azərbaycanın Gürcüstandakı səfirliyinin birinci katibi İlham Talıbov geniş məruzə ilə çıxış etmişdir. Natiq Ulu Öndərin güclü dövlət, güclü iqtisadiyyat, azərbaycançılıq ideologiyası, milli-mənəvi dəyərlərə əsaslanaraq qüdrətli dövlət qurulması kimi ideyalarının bu gün uğurla davam etdirildiyini, qlobal layihələrin gerçəkləşdirilməsi ilə Azərbaycanın dünya birliyinin diqqət mərkəzində olduğunu, Azərbaycan-Gürcüstan münasibətlərinin daha da dərinləşdirilməsi və s. kimi məqamları diqqətə çatdırmışdır. O demişdir ki, Heydər Əliyev həyatını xalqa sədaqətlə xidmət işinə həsr etmiş, daim xalqa arxalanmışdır.
Azərbaycanın bölgədə və dünyada çiçəklənən bir dövlətə çevrilməsində Ümummilli Liderin müəyyənləşdirdiyi inkişaf strategiyasının mühüm rol oynadığı və Prezident İlham Əliyevin yorulmaz fəaliyyəti nəticəsində uğurların daha da artdığı qeyd edilmişdir.
Gürcüstan parlamentinin deputatları Demur Başaleişvili, Mahir Dərziyev, Azər Süleymanov, yazıçı Quri Otibaia və başqaları ötən əsrin sonlarında Azərbaycanın müstəqilliyini bərpa etdiyini və Heydər Əliyevin yenidən hakimiyyətə qayıdışı ilə bu müstəqilliyin əbədi və dönməz olmasının tam əsasının qoyulduğunu vurğulamışlar.
“Qruziya onlayn” informasiya agentliyinin baş redaktoru, müstəqil ekspert Qoça Qvaramia AzərTAc-ın xüsusi müxbirinə müsahibəsində demişdir ki, öz xalqına, Vətəninə misilsiz xidməti sədaqət nümunəsinə çevrilmiş Heydər Əliyev kimi müdrik insanın yubiley tədbirlərində iştirak etməkdən qürur hissi keçirirəm. Məhz o böyük şəxsiyyətin bu keyfiyyətləri onu Ümummilli Lider zirvəsinə yüksəltmişdir. O bildirmişdir ki, Heydər Əliyevin müəyyənləşdirdiyi inkişaf strategiyasının uğurla davam etdirilməsi nəticəsində Azərbaycan bölgənin lider dövlətinə çevrilmiş transmilli layihələri reallaşdırmışdır.
Sonda “Dostluğa çağırış” filmi nümayiş etdirilmişdir.

Gürcüstanın daxili işlər naziri Aleksandr Çikaidze bu gün Azərbaycana rəsmi səfərə yola düşüb.

Dalgatv-nin Trend-ə istinadən verdiyi xəbərə görə, nazir səfər zamanı ölkə rəhbərliyi, o cümlədən azərbaycanlı həmkarı, fövqəladə hallar naziri və Dövlət Sərhəd Xidmətinin rəhbəri ilə görüşlər keçirəcək.

Görüşlər zamanı qurumlar arasında əməkdaşlıq məsələləri müzakirə olunacaq, Gürcüstanda son zamanlar DİN-də aparılmış islahatlara toxunulacaq.

DİN rəhbərinin Azərbaycana səfəri mayın 16-da başa çatacaq.