Gürcüstanın xarici işlər naziri Mayya Pancikidze fevralın 19-da Bakıya səfər edəcək.

Dalgatv-nin Trend-ə istinadən verdiyi xəbərə görə, bu barədə Gürcüstanın Azərbaycandakı səfirliyindən bildirilib.

Səfər Azərbaycan, Türkiyə və Gürcüstanın xarici işlər nazirlərinin görüşü çərçivəsində baş tutacaq.

Qarşılıqlı əməkdaşlıq məsələlərinin müzakirə olunacağı iclas Gəncədə keçiriləcək.

Qeyd edək ki, bu, Azərbaycan, Türkiyə və Gürcüstanın XİN rəhbərlərinin üçüncü görüşü olacaq. Nazirlərin ikinci görüşü 2013-cü il martın 13-də Batumidə keçirilib.

Prezident İlham Əliyev "Polis haqqında" Azərbaycan Respublikasının Qanununda dəyişikliklər edilməsi barədə" 2013-cü il 27 dekabr tarixli qanunun tətbiqi haqqında sərəncam imzalayıb.

Dalgatv-nin APA-ya istinadən verdiyi xəbərə görə, Nazirlər Kabinetinə Azərbaycan Respublikası qanunlarının və Azərbaycan Prezidentinin aktlarının "Polis haqqında" qanunda dəyişikliklər edilməsi barədə" Azərbaycan Respublikasının Qanununa uyğunlaşdırılması ilə bağlı təkliflərini üç ay müddətində hazırlayıb Azərbaycan Prezidentinə təqdim etmək; Nazirlər Kabinetinin normativ hüquqi aktlarının həmin qanuna uyğunlaşdırılmasını üç ay müddətində təmin edib Azərbaycan Prezidentinə məlumat vermək; mərkəzi icra hakimiyyəti orqanlarının normativ hüquqi aktlarının həmin qanuna uyğunlaşdırılmasını nəzarətdə saxlamaq və bunun icrası barədə beş ay müddətində Azərbaycan Prezidentinə məlumat vermək; həmin qanundan irəli gələn digər məsələləri həll etmək tapşırılıb.

Ədliyyə Nazirliyi mərkəzi icra hakimiyyəti orqanlarının normativ hüquqi aktlarının və normativ xarakterli aktların "Polis haqqında" Azərbaycan Respublikasının Qanununda dəyişikliklər edilməsi barədə" qanuna uyğunlaşdırılmasını təmin edib Nazirlər Kabinetinə məlumat verməlidir.

Rusiya prezidenti Vladimir Putin Soçidə XXII Qış Olimpiada Oyunlarının açılışı çərçivəsində ukraynalı həmkarı Viktor Yanukoviçlə görüşüb.Dalğa TV-nin məlumatına görə, bu xəbəri V. Putinin mətbuat xidmətinin rəhbəri Dmitri Peskov verib.

Bundan əlavə Putin Çin, Tacikistan, Hollandiya və Türkiyənin prezidentləri ilə də görüşüb. Bu gün isə Putin Yaponiya və Qırğızıstan prezidentləri ilə görüşəcək.

Qeyd edək ki, rus lider daha əvvəl çıxışlarında görüşlər zamanı xarici həmkarları ilə dünyəvi problemləri müzakirə edəcəyini bildirmişdi.

Ukrayna parlamenti bu gün növbəti sessiyasına başlayıb. DalğaTV–in “İnterfaks” xəbər agentliyinə istinadən verdiyi məlumata görə, Ali Rada bu həftə ərzində Konstitusiya islahatlarının keçiriləcəyi referendumla bağlı qanun qəbul edə bilər.

Hakim Regionlar Partiyasından olan deputat Nikolay Rudkovski parlamentin bugünkü iclasında mart ayında referendum və növbədənkənar seçkilərin keçirilməsini təklif edib. O, qeyd edib ki, parlament müvafiq qanunu bu həftə qəbul etməlidir. “Bu həftədə referendum haqqında qanunu qəbul etmək və gələn ay bir neçə məsələ üzrə referendumu keçirmək lazımdır. Parlament və ya prezident respublikası, proporsional və ya majoritar seçki sistemi, Ukraynanın Avropa İttifaqı və ya Gömrük Şurasına üzvlüyü kimi suallara cavab tapılmalıdır”, - deputat bildirib.
Ukrayna prezidenti Viktor Yanukoviç isə bildirib ki, müxalifətlə razılaşmayacağı halda vaxtından əvvəl prezident və parlament seçkilərini, həmçinin Konstitusiya islahatları ilə bağlı referendum keçirməyə hazırdır.
Xatırladaq ki, 2004-cü il Konstitusiyasına qayıdış təklifi ilə UDAR Partiyasının lideri Vitali Kliçko çıxış edib. Onun fikrincə, bu ölkənin siyasi böhrandan çıxması üçün yollardan biri olacaq. “Batkivşina” parlament fraksiyasının lideri Arseni Yasenyuk da bildirib ki, “Ukrayna prezidentinin diktator səlahiyyətləri ləğv edilməlidir”.
Parlamentin sessiyası ilə birlikdə Kiyev Şəhər Şurasının iclası keçirilir. İclasda müxalifətin nümayəndələri rayon şuralarının yaradılması və onlara seçkilərin keçirilməsi təklifi ilə çıxış edib. Kiyev Şəhər Şurasının qarşısında isə bir neçə yüz nəfər mitinq keçirir.