Dünyanın ən varlı musiqiçisi “U2” rok qrupunun vokalisti Bono olub.

Trend-in “The Daily Mirror”-a istinadən verdiyi məlumata əsasən, onun sərvəti 1,5 milyard dollar məbləğində qiymətləndirilir.

İkinci yerdə 1,1 milyard dollarla Pol Makkartni qərarlaşıb.

Madonna 800 milyon dollarla ilk üçlüyü tamamlayıb.

Azərbaycanın İsveçrə Konfederasiyasındakı səfirliyinin təşkilati dəstəyi ilə İsveçrənin Bül (Bulle) şəhərində  Qlion Ali Təhsil İnstitutunda təhsil alan tələbələrimiz ənənəvi təşkil edilən “Mədəniyyət yarmarkası”nda iştirak edib.

Səfirlikdən APA-ya bildiriblər ki, çoxsaylı şəhər ictimaiyyətinin iştirak etdiyi yarmarkada 7 ölkənin, o cümlədən Azərbaycan mədəniyyətinin təqdimatı keçirilib.

Təqdimatda milli musiqimizin nümunələri səsləndirilib, maddi-mədəniyyət nümunələrimiz və Azərbaycanın turizm imkanları, o cümlədən adət-ənənələrimiz barədə qonaqlara ətraflı məlumatlar verilib. İştirakçılara həmçinin milli mətbəximizin təamlarından nümunələr də təqdim olunub, milli rəqslərimiz nümayiş olunub. “Mədəniyyət yarmarkası”nın iştirakçıları Azərbaycana aid stenddə nümayiş olunan eksponatlara və məlumatlara böyük maraq göstərib.

“Azərbaycan Parisin ürəyində” adlanan şəhərcik sentyabrın 9-dək fəaliyyət göstərəcək.

Heydər Əliyev Fondu tərəfindən bu gün Parisin Pale Royal meydanında “Azərbaycan şəhərciyi” təşkil olunacaq. “Azərbaycan Parisin ürəyində” adlanan şəhərcik sentyabrın 9-dək fəaliyyət göstərəcək.

Parisdə artıq ikinci dəfə təşkil olunan “Azərbaycan şəhərciyi”ndə ölkənin tarixi, mədəniyyəti, xalq sənətkarlığı, adət-ənənələri, milli mətbəxi təqdim olunacaq.

Milyonlarla ziyarətçisi olan Luvr Muzeyinin qarşısındakı məşhur Pale Royal meydanında yaradılan “Azərbaycan şəhərciyi”ndəki bölmələrin hər biri ölkəmizi hərtərəfli tanımağa, xalqların bir-birinə daha da yaxınlaşmasına geniş imkanlar yaradacaq.

Şəhərcikdə Azərbaycanın xalçaçılıq, dulusçuluq və digər sənətkarlıq məmulatlarının, milli geyim və musiqi alətlərimizin yer aldığı sərgi təşkil ediləcək. Qonaqlar bu sənət nümunələrinin yaradılma prosesini isə “Emalatxana” bölməsində yaxından izləyə biləcəklər. Ölkəmizi təmsil edən ustalar mis qab, şəbəkə, xalça və digər sənət nümunələri hazırlayaraq Azərbaycanın qədim və zəngin sənətkarlıq ənənələrini, onların incəliklərini qonaqlara təqdim edəcəklər.

Şəhərcikdə, həmçinin Fransada yaşayan məşhur azərbaycanlı və Azərbaycanda yaşayan fransızların əsərlərindən ibarət fotosərgi təşkil olunacaq. “Azərbaycanlılar və fransızlar: tanışlıq tarixi” adlı bu sərgi xalqlarımızın və ölkələrimizin həyatını tərənnüm edəcək.

“Azərbaycan şəhərciyi”ndə milli mətbəximizi nümayiş etdirən köşklər də qurulacaq. Eyni zamanda, Azərbaycanda fəaliyyət göstərən müxtəlif yerli şirkətlərə aid köşklərdə milli şirniyyatlar, içkilər təqdim olunacaq. Şəhərciyin qonaqları üçün, həmçinin milli mətbəximizin ləziz xörəkləri hazırlanacaq.

Şəhərcikdə Heydər Əliyev Fondunun müxtəlif sahələri əhatə edən nəşrləri də təqdim olunacaq.

“Azərbaycan şəhərciyi”ndə quraşdırılmış səhnədə, həmçinin konsert proqramları təşkil ediləcək. Konsertlərdə Azərbaycan musiqisi və rəqsləri təqdim olunacaq.

Xatırladaq ki, Heydər Əliyev Fondu tərəfindən “Azərbaycan şəhərciyi” Parisdə ilk dəfə 2014-cü il sentyabrın 19-dan 28-dək San Sülpis meydanında təşkil edilmişdi. İzləyicilərin maraqla qarşıladıqları bu layihə Azərbaycanla əlaqələrin genişlənməsinə böyük imkanlar yaratmışdı. Bu maraqdan irəli gələrək Heydər Əliyev Fondu Parisin daha bir məşhur məkanında - Pale Royal meydanında ölkəmizin tarixini, milli mənəvi dəyərlərini, turizm imkanlarını tərənnüm edən növbəti belə bir şəhərciyi təşkil edir.

Heydər Əliyev adına Tbilisi Dövlət Azərbaycan Dram Teatrının kollektivi Azərbaycan Respublikası millətlərarası, multikulturalizm və dini məsələlər üzrə Dövlət müşaviri, tanınmış yazıçı Kamal Abdullayevin “Hərdən mənə mələk də deyirlər” əsərinin tamaşasını hazırlayıb.

Tamaşanın süjet xəttinin xeyir və şərin mübarizəsi təşkil edir. Şeytanın müxtəlif rənglər, səslər, maddi vəsait hesabına gənc şairi dinindən, dilindən döndərməyə çalışır. Lakin xeyir mələyi gəncin dinindən dönməsinə imkan vermir. Hadisələr xeyir mələyinin qələbəsi ilə başa çatır.

Səhnə əsərində əsas rolları Heydər Əliyev adına Tbilisi Dövlət Azərbaycan Dram Teatrının aktyorları Şeyla Səfərova, Binəli İslamoğlu, Leyla Qasımova, Namiq Musayev və Vüqar Maşov ifa ediblər. Tamaşanın quruluşçu rejissoru və musiqi tərtibatçısı Azərbaycanın Əməkdar artisti Namiq Valehoğludur.

Premyerada Gürcüstanın dövlət və hökumət rəsmiləri, parlamentin deputatları, gürcü və Azərbaycan ictimaiyyətinin nümayəndələri iştirak ediblər.

May 23-də Avstriyanın paytaxtı Vyanada 60-cı “Eurovision 2015”” mahnı müsabiqəsinin final mərhələsi keçiriləcək.

 “Viener Şdathal” arenasında “Körpülər salaraq” (“Building Bridges”) şüarı altında baş tutacaq yarışmanda 27 ölkə təmsilçisi mübarizə aparacaq.

Azərbaycan təmsilçisi Elnur Hüseynov final gecəsində “Hour of the Wolf” mahnısını ikinci nömrə altında səhnəyə çıxacaq. Mahnının müəllifləri İsveç bəstəkarları Sandra Byurman, Nikolas Rebşer və Lina Hansondur. Finalda iştirak edəcək 27 ölkə bunlardır:

Azərbaycan, Avstriya, Avstraliya Almaniya, Albaniya, Estoniya, Ermənistan, Fransa, İtaliya, Böyük Britaniya, İspaniyadır, Rusiya, Rumıniya, Serbiya, Belarus, Yunanıstan, Macarıstan, İsrail, Gürcüstan, Latviya, Kipr, Monteneqro, Norveç, İsveç, Sloveniya, Polşa, Litva.

Mayın 3-də Tbilisidə Gürcüstan Müsəlmanları İdarəsinin (GMİ) dəstəyi ilə nəşr olunan "Haqqa sarı" kitabının təqdimatı keçirilib. APA-nın Gürcüstan bürosunun məlumatına görə, tədbirdə GMİ-nin şeyxi Hacı Ramin İgidov, müfti Hacı Yasin Əliyev, kitabın tərtibçisi, yazıçı Əli Abbas, Marneuli rayon bələdiyyəsinin sədri Nəbi Abdullayev, Beynəlxalq Əl-Mustafa Universitetinin Gürcüstan nümayəndəsi Hacı Davud Qəşəmli, Azərbaycanın Gürcüstandakı səfirliyinin birinci katibi İlyas Məmmədov, kitabın redaktoru Nizami Məmmədzadə, Axund Mirağa Mustafayev, "Ümid" qəzetinin redaktoru Əlixan Yəhyaoğlu, şairlərdən Fatma Aslan, Əflatun Keşəli, Qurban Əzizli və digər din xadimləri, ziyalılar çıxış edərək kitab haqqında fikirlərini bildiriblər.

Qeyd edək ki, 5 bölmədən ibarət kitabda dini şeir və qəzəllər, hekayələr və şəhidlərə həsr olunan "Şəhid qanı yerdə qalmaz" adlı dram əsəri çap olunub.

Kitabda həmçinin görkəmli aşıqların, o cümlədən Aşıq Ələsgərin, Aşıq Şenliyin, Axısqalı Xəstə Hasanın müxəmməsləri, qıfılbənd, deyişmə, gəraylı, təcnis və divaniləri, həmçinin Şəhriyarın və Zəlimxan Yaqubun dini şeirləri, İsgəndər Ağbabalının və Borçalı aşıqlarından Aşıq Nurəddin Qasımlının, Aşıq Məhəmməd Sadaxlının qoşmaları dərc olunub.

Kitabın "El şairləri" bölməsinə məşhur Borçalı şairi olan Nəbi Faxralının, Şair Ağacanın, Güllər Pərinin, Həsən Məcruhun, Əli Faxralının, Abbasquli Eləbağlının, Sədi bəy Arif Mustafazadənin, Təhləli Novruzun və başqa şairlərin şeirləri daxil edilib.

"Haqqa sarı" kitabı İslam dininə həsr edilib və Gürcüstan Müsəlmanları İdarəsinin nəşr etdiyi ilk kitabdır.

Tədbirdə İran, Türkiyə və Azərbaycan səfirliklərinin nümayəndələri, həmçinin Tiflis, Qardabani, Rustavi, Marneuli, Dmanisi və Bolnisidən gələn din xadimləri, şair və yazıçılar iştirak ediblər.

Tədbirin sonunda gənc Aşıq Məsim dini mahnılar səsləndirib.

GMİ-nin sədri Hacı Ramin İgidov APA-ya açıqlamasında belə məzmunlu dini kitabların nəşrinin davam etdiriləcəyini bildirib.