Avqustun 29-da «JTI» şirkətinin dəstəyi ilə Moskva şəhərinin Beynəlxalq Konsert Zalında muğam musiqisi konserti keçiriləcək. Bu barədə APA-ya şirkətin Azərbaycan nümayəndəliyindən məlumat verilib.

Qeyd edək ki, konsertdə tarzən Rövşən Qurbanovun rəhbərliyi altında «Buta» instrumental ansamblının müşayiəti ilə artıq tamaşaçılar tərəfindən sevilmiş gənc muğam ifaçıları Arzu Əliyeva və Elnur Zeynalov iştirak edəcəklər, muğam sənətinin parlaq nümunələri səslənəcək.

Konsert «JTI» şirkətinin Azərbaycan mədəniyyətinə, xüsusilə də muğam musiqisinə göstərdiyi dəstək çərçivəsində keçirilir.

Bu gün kənd təsərrüfatı naziri İsmət Abasov Macarıstanın Azərbaycandakı fövqəladə və səlahiyyətli səfiri Jolt Çutoranı qəbul edib. Kənd Təsərrüfatı Nazirliyinin mətbuat xidmətindən “APA-Economics”ə verilən məlumata görə, İ. Abasov dövlətin aqrar sahəyə göstərdiyi diqqət və qayğısı sayəsində kənd təsərrüfatının digər sahələri ilə yanaşı, heyvandarlıq sahəsinin də dinamik inkişaf etdiyini qeyd edib.

Azərbaycanla Macarıstan arasında bütün sahələrdə, o cümlədən kənd təsərrüfat sahəsində əməkdaşlıq əlaqələrinin yüksələn xətt üzrə inkişaf etdiyini vurğulayan nazir hər iki ölkənin aqrar sahədə böyük potensiala malik olduğunu və bu potensialın reallaşdırılması üçün tərəflərin aidiyyəti qurumları arasında birbaşa təmasların sayının artırılmasının vacibliyini qeyd edib.

Səfir Jolt Çutora cari ilin avqustun 30-u və sentyabrın 1-də Macarıstanın Kapoşvar şəhərində keçiriləcək “Kapoşvarın VII Damazlıq Günləri” sərgisinin keçiriləcəyini diqqətə çatdırıb və Azərbaycanın Kənd Təsərrüfatı Nazirliyinin bu tədbirdə təmsil olunmasını xahiş edib. İ. Abasov adıçəkilən tədbirdə kənd təsərrüfatı naziri, yaxud da nazir müavini səviyyəsində təmsil olunacağını vəd edib.

Daha sonra tərəflər arasında kənd təsərrüfatı sahəsində ikitərəfli əməkdaşlığın perspektivləri müzakirə olunub.

Avqustun 15-də Qəbələdəki Mədəniyyət sarayında Türkdilli Dövlətlərin Əməkdaşlıq Şurasının III Zirvə toplantısı çərçivəsində konsert təşkil edilmişdir.
Azərbaycan Respublikasının Prezidenti İlham Əliyev, Türkiyə Respublikasının Prezidenti Abdullah Gül və Qırğız Respublikasının Prezidenti Almazbek Atambayev konsertdə olmuşlar.
Konsertdən əvvəl Azərbaycan Prezidenti İlham Əliyevə, Türkiyə Prezidenti Abdullah Gülə və Qırğızıstan Prezidenti Almazbek Atambayevə Beynəlxalq Türk Mədəniyyəti Təşkilatı - TÜRKSOY-un yaradılmasının 20-ci ildönümü münasibətilə xatirə hədiyyələri təqdim olundu.
Sonra Azərbaycan, Türkiyə və Qırğızıstan prezidentləri qısa söhbət etdilər.
Salona toplaşanlar dövlət başçıları İlham Əliyevi, Abdullah Gülü və Almazbek Atambayevi hərarətlə qarşıladılar.
Konsertdə Xalq Artisti Teymur Göyçayevin dirijorluğu ilə Qara Qarayev adına Dövlət kamera orkestrinin ifasında türkdilli xalqların musiqiləri səsləndi.
Hazırda türkdilli ölkələr arasında mədəniyyət məsələlərinə böyük diqqət göstərilir. Bu sahədə əməkdaşlıq bütün türkdilli dövlətlər arasında prioritet elan edilmişdir. Təsadüfi deyildir ki, türkdilli ölkələrin dövlət başçılarının zirvə toplantılarında mədəniyyət sahəsində əməkdaşlığın perspektivləri mütəmadi olaraq vurğulanır. Bu prosesə türkdilli dövlətlərin ortaq təşkilatı olan TÜRKSOY da öz töhfəsini verir. Təşkilatın xətti ilə hər il türkdilli ölkələrin müxtəlif şəhərlərində reallaşan tədbirlər xalqlarımız arasında mədəni telləri daha da möhkəmləndirir. Türkdilli Dövlətlərin Əməkdaşlıq Şurası da türkdilli ölkələr arasında əlaqələrin daha da genişləndirilməsi işinə layiqli töhfələr verir.