Dalga Televiziyasi İqtisadiyyat
Get Adobe Flash player

Socar Georgia Gas

 

BAKI - TBİLİSİ

Multikulturalizm

Tərəfdaşlar

Ziyarətçi sayğacı

Bu günBu gün123
DünənDünən635
Bu həftəBu həftə2919
Bu ayBu ay23071
Bu günə qədərBu günə qədər2779013

Bizi Paylaşın

Video Xəbərlər

 

Təqvim


İqtisadiyyat

Millət vəkili: “Azərbaycan Gürcüstan iqtisadiyyatının inkişafına böyük təkan verir”

“Ötən il Azərbaycan Gürcüstan iqtisadiyyatına 558 mln dollar yatırıb ki, bu da Ermənistanda bu il gözlənilən birbaşa xarici sərmayələrin həcmindən 3 dəfə çoxdur”.

Bunu APA-nın Gürcüstan bürosuna açıqlamasında Milli Məclisin deputatı, iqtisadçı ekspert Əli Məsimli deyib.

O bildirib ki, Azərbaycan həm investisiyalarla, həm də regionda həyata keçirilən layihələrlə Gürcüstan iqtisadiyyatının inkişafına böyük təkan verir. 

Gürcüstanda Azərbaycan Ticarət Evinin açılması təklifini şərh edən millət vəkili deyib ki, bu təklifi mütləq reallaşdırmaq lazımdır. “Gürcüstanda  Azərbaycan Ticarət Evinin olmasını çox vacib hesab edirəm. Bu, həm azərbaycanlılar və gürcülərin bir-birinə daha da yaxınlaşması, həm də iki ölkə arasında ticarət əlaqələrinin yeni mərhələyə keçməsinə təkan verəcək. Ticarət evi həmçinin Azərbaycandan Gürcüstana qeyri-neft məhsulları, xüsusən də aqrar sənaye məhsullarının ixracının artırılmasına töhfə verəcək”.

Gürcüstanda orta aylıq əməkhaqqı artıb

Cari ilin üçüncü rübündə Gürcüstanda orta aylıq nominal əməkhaqqı 1069,1 lari təşkil edib.


APA-nın yerli bürosu Gürcüstanın Milli Statistika İdarəsinə istinadla xəbər verir ki, bu, ötən ilin analoji göstəricisindən 9% çoxdur.


Qonşu ölkədə ən yüksək maaş tikinti sektorundadır. Bu sahədə çalışanların əməkhaqqı 1999,5 lari təşkil edir. Tikinti sektoru ilə yanaşı maliyyə (1861,3 lari) və hasilat (1337,7 lari) sahələrində də əməkhaqqı yüksəkdir.


Gürcüstanda ən aşağı əməkhaqqı isə təhsil sahəsindədir. Təhsil işçiləri 565,7 lari maaş alır.

Azərbaycan Gürcüstanın ən iri investoru olaraq qalır

Azərbaycan Gürcüstanın bir nömrəli investoru olaraq qalır.


APA-nın yerli bürosunun Gürcüstanın Milli Statistika İdarəsinə istinadən verdiyi xəbərə əsasən, cari ilin 9 ayında Azərbaycan Gürcüstana 378,3 mln. dollar investisiya yatırmaqla bu adı qoruyub.


2017-ci ilin təkcə üçüncü rübündə Azərbaycan Gürcüstana 154,1 mln. dollar investisiya yatırıb. Azərbaycandan olan investisiyaların payı Gürcüstana yatırılmış birbaşa xarici investisiyaların ümumi həcmində 25,9% təşkil edib.


Cari ilin üçüncü rübündə Gürcüstana yatırılmış birbaşa xarici investisiyaların ümumi həcmi 594,5 mln. dollar təşkil edib ki, bu da ötən ilin eyni dövrü ilə müqayisədə 17,6% çoxdur. Cari ilin üç rübündə qonşu ölkənin iqtisadiyyatına ümumilikdə 1 mlrd. 346,5 mln. dollar xarici investisiya qoyulub.
 

Bu il Azərbaycandan sonra Gürcüstana ən çox investisiya yatırmış ölkələr Türkiyə (259,2 mln. dollar) və Böyük Britaniyadır (175 mln. dollar).

Cari ilin üçüncü rübündə qonşu ölkədə ən çox investisiya nəqliyyat və rabitə, tikinti, energetika, maliyyə və istehsal sahələrinə yönəldilib.

Azərbaycanla Gürcüstan arasında ticarət dövriyyəsi 650 mln. dolları ötüb

2017-ci ilin yanvar-oktyabr aylarında Azərbaycan Gürcüstandan ən çox minik avtomobilləri idxal edib.

Gürcüstanın Milli Statistika İdarəsindən APA-nın yerli bürosuna verilən məlumata əsasən, idxal olunmuş minik avtomobillərinin dəyəri 54 mln. 51,7 min dollar təşkil edib.

Azərbaycanın qonşu ölkədən idxal etdiyi məhsulların ilk üçlüyünə medikamentlər və tütün məmulatları da daxildir. Cari ilin 10 ayı ərzində Azərbaycan Gürcüstandan 19 mln. 115,9 min dollar məbləğində medikament və 10 mln. 219,7 min dollar məbləğində isə tütün məmulatları idxal edib.

Hesabat dövründə Azərbaycan Gürcüstana ən çox qaz və digər qaz halında karbohidrogenlər (226 mln. 417,3 min dollar), neft və neft məhsulları (80 mln. 772,9 min dollar) və elektrik enerjisi (43 mln. 339,3 min dollar) ixrac edib.

Qeyd edək ki, cari ilin ilk 10 ayı ərzində iki ölkə arasında ticarət dövriyyəsinin həcmi 650,4 mln. dollar təşkil edib.

Bakı-Tbilisi-Qars xətti ilə Türkiyədən Azərbaycana ilk qatar yola düşür

Bakı-Tblisi-Qars dəmir yolu xətti ilə Türkiyədən Azərbaycana ilk qatar yola düşəcək.


"APA-Economics" "Milliyet" qəzetinə istinadən xəbər verir ki, Türkiyənin Mərsin şəhərindən yola düşən qatar 32 konteynerli 16 vaqondan ibarətdir. Yükü 650 ton soya jmıxı və keramik yapışqan olan qatar Bakıyadək 2100 km məsafəni 4 günə qət edəcək.


Bakı-Tblisi-Qars dəmir yolu xəttinin rəsmi açılış oktyabr ayının 30-da baş tutub.

Anaklia limanının rəhbəri: “Gürcüstan və Azərbaycan nəqliyyat sahəsində əməkdaşlığın effektivliyini artırmağa çalışır”

“Anaklia və Bakı Beynəlxalq Dəniz Ticarət Limanı arasında imzalanmış memorandum tərəflər arasında əməkdaşlıq istiqamətində ilk addımdır”.

Bu barədə APA-nın Gürcüstan bürosuna Anaklia İnkişaf Konsorsiumunun direktoru Levan Axvlediani deyib.

Onun sözlərinə görə, bu memorandum çox vacibdir: “Hesab edirəm ki, regionun əsas nəqliyyat oyunçularının dəhlizin inkişafı ilə bağlı ümumi baxışlar hazırlamaları çox önəmlidir”.

L. Axvlediani deyib ki, Gürcüstan və Azərbaycan nəqliyyat sahəsində əməkdaşlığın effektivliyini artırmağa çalışır.

“Memorandumun əsas məqsədi əməkdaşlığa başlamaq, işçi qruplarının yaradılması və onların layihə və ideyalar üzərində işləməsidir. Anaklia dərin dəniz limanının tikintisinə dekabrın 20-də start veriləcək. Üç ildən sonra tikintinin başa çatdırılması nəzərdə tutulur. Liman tikinti işləri tam başa çatmadan, yəni iki ildən sonra ilk gəmiləri qəbul edə biləcək”.

İmzalanmış memorandumu şərh edən Bakı Beynəlxalq Dəniz Ticarət Limanı QSC-nin baş direktoru Taleh Ziyadov isə deyib ki, sənəd iki limanın inkişaf strategiyalarının sinxronlaşdırılmasına yönəlib. “Anaklia limanının tikintisi başa çatandan sonra daha böyük gəmilər Gürcüstan sahilinə yan ala biləcək. Böyük gəmilər isə böyük yüklərin daşınması deməkdir. Hər iki liman bir tunelin iki çıxışıdır. Bir-birimizə kömək edərək bu limanları inkişaf etdirəcəyik”.

SOCAR Gürcüstanın azərbaycanlı idmançılarını mükafatlandırıb

Tbilisidə Azərbaycan səfirliyində Gürcüstanın azərbaycanlı idmançıları ilə görüş keçirilib.

APA-nın yerli bürosunun məlumatına əsasən, görüşdə SOCAR prezidenti Rövnəq Abdullayev, şirkətin Gürcüstan Nümayəndəliyinin rəhbəri Mahir Məmmədov, Marneuli rayonunun icra başçısı Temur Abazov, parlamentin azərbaycanlı deputatları, digər rəsmi şəxslər və azərbaycanlı idmançılar və məşqçilər iştirak edib.

Tədbirdə çıxış edən Azərbaycanın Gürcüstandakı səfiri Dursun Həsənov Azərbaycanda idmanın inkişaf tarixindən, idmana dövlət qayğısından və əldə olunmuş uğurlardan danışıb.

Səfir Azərbaycanın olimpiya çempionları arasında Gürcüstan əsilli soydaşlarımızın da olmasını xüsusi olaraq vurğulayıb: “Soydaşlarımızın kompakt yaşadığı dağlıq Dmanisi rayonu yunan-Roma güləşi üzrə iki olimpiya çempionu yetişdirib – Kamandar Məcidov və Fərid Mansurov. Səhv etmirəmsə, Kamandar Məcidov Sovet İttifaqı üzrə olimpiya oyunlarının qızıl medalına sahib olmuş ilk azərbaycanlıdır”.

D. Həsənov SOCAR-ın Gürcüstanda idmanın inkişafına göstərdiyi dəstəkdən də söz açıb: “SOCAR Gürcüstanın bir neçə böyük idman federasiyalarına, idman klublarına sponsorluq edir, çox sayda idman obyektlərinin tikintisində və təmirində müstəsna rol oynayıb.”

Sonra çıxış edən SOCAR prezidenti R. Abdullayev idmançılarla görüşün xoş olduğunu deyib. Onun sözlərinə görə, Gürcüstan və Azərbaycan bir-birlərinin idman uğurlarına sevinir. SOCAR prezidenti idmançıları təbrik edərək onlara gələcəkdə daha böyük nailiyyətlər arzu edib.

SOCAR adından idmançı və məşqçilərə pul mükafatı və təşəkkürnamələr təqdim olunub.

Şirkət kyokuşin-karate üzrə Barselonada keçirilən Avropa çempionatının 55 kq çəki dərəcəsində qalibi olmuş Kəmalə Məmmədova və Antalyada keçirilən gənclər üzrə Avropa boks çempionatında 49 kq çəki dərəcəsində qızıl medal qazanmış Sahil Allahverdiyevə mobil telefonlar hədiyyə edib.

 

İdmançılar onlara göstərilən yüksək diqqət və qayğıya görə Azərbaycan dövlətinə öz minnətdarlıqlarını bildiriblər.

Gürcüstanda yanacaq bahalaşıb

Gürcüstanda yanacağın qiyməti artıb.

APA-nın Gürcüstan bürosunun məlumatına əsasən, yanacaqdoldurma məntəqələrinin (YDM) əksəriyyəti benzinin qiymətini 10 tetriyə qədər artırıb.

SOCAR da daxil olmaqla böyük xarici şirkətlərin YDM-lərində benzinlə yanaşı, dizel və maye qazın da qiyməti 2 tetriyə qədər bahalaşıb

SOCAR Acarıstanın qazla təminatını qismən bərpa edib

“SOCAR Georgia Gas” şirkəti Acarıstan Muxtar Respublikasının təbii qazla təminatını qismən bərpa edib.

APA-nın Gürcüstan bürosunun məlumatına görə, bölgənin Sarpi və Xelvaçauri rayonlarının 8 min abunəçisi mavi yanacaqla hələ də təmin olunmur.

Şirkətdən verilən məlumata əsasən günün sonuna qədər muxtar respublikanın təbii qazla təminatı tam bərpa ediləcək.

Qeyd edək ki, dünən Azərbaycandan mavi yanacağın tədarükündə yaranmış texniki problem və hava şəraitinin pisləşməsi ilə əlaqədar “SOCAR Georgia Gas” şirkəti Acarıstanda 32 min abunəçinin qazla təminatını dayandırmışdı. Şirkətin bölgədə aktiv və potensial abunəçilərinin sayı 66 821 nəfər təşkil edir.

SOCAR "Qazprom"dan qaz alınmasına aydınlıq gətirib

“SOCAR-ın və Azərbaycanın böyük qaz anbarı potensialı mövcuddur. Həmin potensialdan istifadə etmək məqsədilə xarici ölkələrdən, o cümlədən də Rusiyadan qaz alınır”.

Bunu "APA-Economics”ə açıqlamasında SOCAR-ın ictimaiyyətlə əlaqələr üzrə rəsmisi İbrahim Əhmədov SOCAR-ın Rusiyanın “Qazprom” şirkətindən 1,6 mlrd. kubmetr həcmində qaz alması ilə bağlı əldə olunmuş razılığa aydınlıq gətirərkən deyib.

Onun sözlərinə görə, bu anbarlar xaricdən müxtəlif həcmlərdə qaz almağa imkan verir: “Bu qaz həcmləri sonradan zəruriyyətə və ehtiyaca görə istifadə olunacaq”.

SOCAR rəsmisi bildirib ki, alınan qaz xarici bazara da ixrac edilə, daxili bazarda emal və sair məsələlər üçün də istifadə oluna bilər.

Xatırladaq ki, SOCAR və Rusiyanın “Qazprom” şirkəti Azərbaycana təbii qazın tədarükünün bərpa edilməsi ilə bağlı razılığa gəlib. Müqavilə noyabrın 21-də imzalanıb. Təbii qazın tədarükü artıq noyabrın 22-də başlayacaq.

Müqaviləyə əsasən, SOCAR 1,6 mlrd. kubmetr həcmində Rusiya qazı alacaq.

SOCAR hasil etdiyi qazın həcmi açıqlanıb

Bu ilin yanvar-oktyabr ayları ərzində Azərbaycan Dövlət Neft Şirkəti (SOCAR) 4,999 mlrd. kubmetr həcmində qaz hasil edib.

Dalga tv Oxu.Az-a istinadən xəbər verir ki, bu həcmin 541,2 mln. kubmetri oktyabr ayının hasilatının payına düşüb.

Hesabat dövründə Azərbaycan üzrə qaz hasilatının həcmi 23 667,4 mln. kubmetr təşkil edib. Bu həcmin isə 2 549,3 mln. kubmetri oktyabr ayında hasil edilib.

Gürcüstan hökumətində struktur və kadr islahatları gözlənir

Gürcüstanda hökumətin tərkibində struktur və kadr islahatlarının olacağı gözlənilir.

APA-nın Gürcüstan bürosunun məlumatına görə, dəyişikliklərə əsasən, bir neçə nazirliyin birləşdirilməsi nəzərdə tutulub.

Yenilənmiş hökumətdə 2 yeni nazirin yer alacağı da gözlənilir. Yayılan məlumatlara əsasən, Gürcüstanın Energetika Nazirliyi ləğv olunaraq İqtisadiyyat və Davamlı İnkişaf Nazirliyinə birləşdiriləcək  və yeni daxili işlər naziri təyin olunacaq. Mövcud 18  nazirlikdən 13-nün qalacağı gözlənilir.

Gürcüstanın baş naziri Giorgi Kvirikaşvili sabah hökumətdə dəyişikliklərlə bağlı bəyanatla çıxış edəcək. 

Saytda Axtarış

Son xəbərlər