Dalga Televiziyasi İqtisadiyyat
Get Adobe Flash player

Socar Georgia Gas

 

BAKI - TBİLİSİ

Multikulturalizm

Tərəfdaşlar

Ziyarətçi sayğacı

Bu günBu gün1911
DünənDünən3396
Bu həftəBu həftə1911
Bu ayBu ay51179
Bu günə qədərBu günə qədər2899620

Bizi Paylaşın

Video Xəbərlər

 

Təqvim


İqtisadiyyat

Tbilisidə 5 azərbaycanlı ailənin evi əlindən alınır

Gürcüstanın paytaxtı Tbilisi şəhərində, Petriaşvili küçəsi-48 ünvanında yaşayan 7 ailə evsiz qalmaq təhlükəsi ilə üz-üzədir.

APA-nın Gürcüstan bürosunun məlumatına görə, həmin ailələrin 5-i azərbaycanlı ailəsidir.

Ailələrin evlərindən çıxarılmasına səbəb kimi onların dədə-babadan, bir əsrə yaxın yaşadıqları evlərlə bağlı müvafiq sənədlərinin olmaması göstərilir.

7 ailənin taleyi Gürcüstanda sosial şəbəkələrdə aktiv müzakirə olunan mövzulardan birinə çevrilib. Ötən həftə 3 ailənin evlərindən əşyaları ilə birgə zorla çıxarılmasının əks olunduğu videogörüntülər internet istifadəçilərinin hiddətinə səbəb olub. Həmin gün məhkəmə icraçıları ərazidə olub və sakinlərlə şifahi qarşıdurma yaşanıb. Hadisə yerinə patrul polisi və təcili tibbi yardım çağırılıb.

Ailələrin şəraitsiz, köhnə ev əşyalı və rütubətli evləri 156 kv. m. sahədə yerləşir. Ailələrin xəbəri olmadan şəhərin mərkəzi Vera rayonunda yerləşən bu sahə bir qadın tərəfindən satın alınıb. İş adamı olan həmin qadının Petriaşvili küçəsinin yaxınlığında bir neçə ticarət və digər obyektlərin olduğu bildirilir. Neçə nəsil həmin evlərdə yaşamış 5 azərbaycanlı və 2 gürcü ailənin maddi vəziyyəti çox ağırdır. Onların arasında 3 əlil, yaşlı xəstələr və uşaqlar var. Ümumilikdə 35 nəfər hər günü evsiz qalacağı qorxusu və təlaşı ilə yaşayır.

Evini itirmək təhlükəsi ilə üzləşmiş ailələrdən biri Məmmədovlar ailəsidir. Ailənin üzvü, II qrup əlil Pərviz Məmmədov bildirib ki, atası 80 ildən çoxdur bu evdə yaşayır: “Martın 9-da məhkəmə icraçıları evimizin otaqlarını boşaltdılar. Şəkər xəstəsi olan atam və həyat yoldaşımla mətbəxə sığınmışıq. Sonradan tikildiyinə görə, mətbəx satılıb-alınmış yaşayış sahəsinə daxil olmayıb. İki uşağımı isə tanışların evinə yerləşdirmişik. Yaşamağa digər yer versələr, evimizdən çıxmağa razıyıq. Amma nə yaşayış yeri, nə də kompensasiya vermək istəyirlər. Getməyə başqa yerimiz yoxdur. Şikayətlərimizə baxan da yoxdur”.

Məmmədovların boşaldılmış evinin qapısının qulpu çıxarılıb. Ailənin ev əşyaları qonşu evlərin həyətində açıq havada qalıb, evin qazla təchizatı da dayandırılıb.

Ailənin digər nümayəndəsi Fatma Məmmədova deyib ki, 7 ailə qanunsuz olaraq küçəyə atılır: "Ailələrin durumu çox ağırdır. Kasıbçılıqla, xəstəliklə çarpışan ailələrin evlərini əllərindən necə almaq olar? Vəziyyətimiz çox ağırdır. Martın 25-də məhkəmə icraçıları yenə gələcək və növbəti evi boşaldacaqlar".

Evindən çıxarılma qorxusu ilə yaşayan Maisuradze ailəsinin yaşayış sahəsi ilə bağlı sənədləri qaydasındadır. Lakin buna baxmayaraq, onların 1969-cu ildən yaşadığı sahə ailənin xəbəri olmadan satılıb. Ailənin yaşlı qadın üzvü evsiz qalmaq qorxusunun stressinə dözməyərək bu günlərdə vəfat edib. Ailənin ahıl başçısı gözdən əlildir və bu yaşda evsiz qalmaq qorxusu onun sağlamlıq durumunu daha da ağırlaşdırıb.

Yeddi ailənin hüquqlarını müdafiə edən vəkil Klara Şukvani ailələrin evlərindən çıxarılmasını qanunsuz olduğunu deyib: "Məhkəmə prosesi 2010-cu ildən davam edir. Sahəni satın almış tərəf müəyyən hissəni qanunsuz əldə edib və bununla bağlı cinayət işi üzrə araşdırma aparılır. Məhkəmənin son qərarı olmadan ailələrin evlərindən zorla çıxarılması yolverilməzdir. Həmin ailələrə xüsusi statusun verilməsini tələb edirik".

İş üzrə növbəti məhkəmə iclasının aprelin 2-də keçiriləcəyi gözlənilir. 

Ailələrin problemi ilə bağlı Gürcüstan Azərbaycanlılarının Milli Konqresi (GAMK) artıq müvafiq dövlət qurumlarını məlumatlandırıb. GAMK sədri Əli Babayev bildirib ki, ailələr illərdir həmin ərazidə yaşayır, kommunal xərclər və digər vergiləri ödəyir:  "Onların evlərinin olduğu sahə dələduzluq sxemi üzrə mənimsənilib. Biz tələb edirik ki, istintaq hərtərəfli aparılsın və günahkarlar müəyyən olunsun". 

Ə. Babayev məsələ ilə bağlı Gürcüstanın baş naziri, Baş Prokurorluğu, Ədliyyə Nazirliyi, Ombudsman Aparatına müraciətin hazırlandığını və bu günlərdə təqdim olunacağını söyləyib.

Çarəsiz qalmış azərbaycanlı ailələr son ümidlərini Azərbaycan dövlətinə bağlayıb. Onlar Azərbaycanın Gürcüstandakı səfirliyini məsələ ilə maraqlanmağa çağırıblar. Azərbaycan səfirliyindən isə bildirilib ki, azərbaycanlı ailələrin problemi nəzarətə götürüləcək və diqqətdə saxlanılacaq.

Gürcüstan prezidenti Aİ komissarı ilə BTQ layihəsini müzakirə edib

Gürcüstan prezidenti Giorgi Marqvelaşvili Brüsseldə Avropa İttifaqının (Aİ) nəqliyyat məsələləri üzrə komissarı Violetta Bultsla görüşüb.
 

APA-nın yerli bürosunun Gürcüstan prezident administrasiyasının mətbuat xidmətinə istinadən verdiyi xəbərə görə, görüşdə Bakı-Tbilisi-Qars (BTQ) dəmir yolu layihəsinin əhəmiyyəti müzakirə olunub. Qeyd edilib ki, BTQ Gürcüstanın tranzit potensialını artıracaq. Tərəflər Aİ və Gürcüstan arasında nəqliyyat sahəsində əməkdaşlığın müsbət dinamikasını vurğulayıblar.


G. Marqvelaşvili Aİ komissarını Anaklia dərin dəniz limanının inşası ilə bağlı məlumatlandıraraq qeyd edib ki, liman böyük həcmli yük gəmilərini qəbul etmək imkanına malik olacaq və bu da ticarət üçün yeni imkanlar yaradacaq.


Görüşdə həmçinin Gürcüstanda dəmir yollarının modernləşdirilməsi və Şərq-Qərb avtomagistralının tikintisi məsələlərinə də toxunulub.

SOCAR: “Cənub Qaz Dəhlizi”nin maliyyələşməsi ilə bağlı Almaniya şirkəti və bankları ilə danışıqlara başlanıb

"Hazırda Cənub Qaz Dəhlizinin maliyyələşməsinin qalan hissənin təmin olunması ilə bağlı beynəlxalq maliyyə institutları ilə danışıqlar davam edir.

Bunu "APA-Economics"in sorğusuna cavab olaraq SOCAR-ın ictimaiyyətlə əlaqələr üzrə rəsmisi İbrahim Əhmədov məlumat verilib.

Onun sözlərinə görə, Cənubi Qaz Dəhlizinin tərkib hissələri olan "Şahdəniz-2" və TANAP layihələrinin maliyyələşdirilməsi ilə bağlı Almaniya Federativ Respublikası ilə danışıqlar aparılıb, 1.5 mlrd. ABŞ dollaradək vəsaitin cəlb edilməsi üçün zəmanətin verilməsi ilə bağlı bu yaxınlarda Nazirliklərarası Komitənin İclasında razılıq əldə edilib.

O bildirib ki, zəmanətin verilməsində əsas məqsəd Almaniya şirkətlərinin iştirak etdiyi layihələrə maliyyə dəstəyinin verilməsidir: “Bildiyiniz kimi, 2013-cü ildə 9 Avropa şirkəti, o cümlədən Almaniyanın EON ("Uniper") şirkəti ilə təbii qazın nəqli və satışı ilə əlaqədar uzunmüddətli müqavilələr imzalanıb. Maliyyələşmənin şərtləri ilə bağlı “Cənub Qaz Dəhlizi” QSC ilə Almaniyanın "Hermes” şirkəti və aidiyyəti banklar arasında danışıqlara başlanıb. Yekun şərtlər tam razılıq əldə edildikdən sonra müəyyənləşəcək".

Qeyd edək ki, Cənub Qaz Dəhlizinə daxil olan layihələri payçı şirkətlər ortaq şəkildə maliyyələşdirir. Azərbaycan tərəfi Cənub Qaz Dəhlizinin bütün seqmentlərində iştirak edir və buna görə, Hasilatın Pay Bölgüsü Sazişində dövlətin nəzərdə tutulan mənfəət payından başqa, hasilat və nəqldən əlavə gəlir əldə edəcək. Azərbaycan tərəfinin bütün layihə seqmentləri üzrə ümumi öhdəlikləri isə toplam sərmayə həcminin ¼ civarındadır.

İ. Əhmədov deyib ki, Cənub Qaz Dəhlizi beynəlxalq miqyaslı meqalayihədir: "Layihədə, Azərbaycan tərəfi ilə yanaşı, digər ölkələrin şirkətləri də iştirak edir. Cənub Qaz Dəhlizi həm Azərbaycan, həm də Avropa üçün iqtisadi baxımdan mühüm əhəmiyyət kəsb etdiyinə görə, Avropa Birliyi ölkələri də layihənin gerçəkləşməsini dəstəkləyirlər. Layihənin maliyyələşdirilməsi ilə bağlı daha əvvəl maraqlı tərəflərlə danışıqlar aparılmış, müvafiq maliyyə vəsaitləri təmin edilmişdir. Azərbaycan tərəfi CQD-nin seqmentləri üzrə öz maliyyə öhdəliklərinin ¾-dən çox hissəsini artıq yerinə yetirib".

Xatırladaq ki, bu günlərdə Azərbaycandan qaz nəqlini təmin etmək məqsədi ilə Almaniya hökuməti SOCAR-a böyük həcmdə kreditin ayrılması üçün Almaniya bankına zəmanət vermək niyyətində olması ilə bağlı məlumat yayılıb.

Almaniyanın DPA agentliyinin məlumatına görə, kreditin həcmi 1,5 mlrd. dollar (1,2 mlrd. avro) təşkil edir. "Bu qaz nəqli Avropa və Almaniyanın qaz təchizatının təminatına mühüm töhfə olmalıdır", - deyə Almaniya Maliyyə Nazirliyi yanında parlament dövlət katibi Yens Şpanın Bundestaqın Büdcə komitəsinin sədri Peter Böringerə ünvanladığı məktubda qeyd olinub.

Qeyd edək ki, 2013-cü ildə Almaniyanın E.on energetika konserni Azərbaycan ilə Xəzər dənizində yataqdan təbii qazın nəqlinə dair uzunmüddətli müqavilə imzalayıb. Saziş 2020-ci ildən 2044-cü ilədək olan dövrdə hər il Almaniya şirkətinin 1,45 mlrd. kubmetr "mavi yanacaq" almasını nəzərdə tutur.

Tbilisidə BTQ layihəsi üzrə Koordinasiya Şurasının növbəti iclası keçirilib

Gürcüstanın paytaxtı Tbilisidə (Gürcüstan) Bakı-Tbilisi-Qars(BTQ) dəmir yolu layihəsi üzrə Koordinasiya Şurasının növbəti iclası keçirilib.

"Azərbaycan Dəmir Yolları” QSC-dən "APA-Economics"ə verilən məlumata görə, iclasda Gürcüstan baş nazirinin I müavini, iqtisadiyyat və davamlı inkişaf naziri Dmitri Kumsişvili Azərbaycanla Gürcüstan arasında iqtisadi, siyasi və mədəni əlaqələrdən danışıb, BTQ dəmir yolunun və digər regional layihələrin ikitərəfli münasibətlərin inkişafında mühüm rol oynadığını bildirib. O, Azərbaycan prezidenti İlham Əliyevlə son görüşünü xatırladıb, dövlət başçısının BTQ layihəsinə göstərdiyi diqqəti yüksək qiymətləndirib.

İclasda iştirak edən Azərbaycanın iqtisadiyyat naziri, Tranzit və Yükdaşımalar üzrə Koordinasiya Şurasının sədri Şahin Mustafayev isə bildirib ki, bu gün Azərbaycan və Gürcüstanın birgə reallaşdırdığı BTQ və digər layihələr iki xalqın rifahının yaxşılaşmasına xidmət edir: "İnanırıq ki, BTQ, eləcə də digər layihələr təkcə Cənubi Qafqazın deyil, bütövlükdə Avropanın inkişafında, onun Asiya ilə birləşməsində mühüm rol oynayacaq".

Sonra iclasda BTQ-nin Marabdadan Türkiyə sərhədinə qədər olan hissəsində gedən reabilitasiya, yenidənqurma işləri və yolun tikintisi, "Marabda-Kartsaxi" dəmir yolunun 2018-ci il üçün büdcəsi, Marabda-Turkiyə dəmir yolunun yeni bərpa və yenidənqurma işləri, Axalkaliki-Kartsaxi yolunda yeni infrastrukturun tikintisi və s. məsələlər müzakirə olunub. Həmçinin, Koordinasiya Şurasının qərarlarının icrası və digər məsələlərə də baxılıb.

İclasda Azərbaycan tərəfdən "Azərbaycan Dəmir Yolları" QSC-nin sədri Cavid Qurbanov, Azərbaycan Dövlət Neft Fondunun (ARDNF) icraçı direktoru Şahmar Mövsümov, Xarici İşlər, Maliyyə Nazirliklərinin məsul əməkdaşları, Azərbaycanın Gürcüstandakı səfiri Dursun Həsənov və digər rəsmi şəxslər iştirak ediblər.

Gürcüstana avtomobillə daxil olan əcnəbilərdən sığorta tələb olunacaq

Mart ayının 1-dən etibarən Gürcüstana 15 gündən az olmayan müddətə avtonəqliyyat vasitəsi ilə daxil olan xarici vətəndaşlardan avtomobil sığortası tələb olunacaq. 

APA-nın Gürcüstan bürosunun məlumatına əsasən, qüvvəyə minəcək yeni qaydalara əsasən, sığortanı nəzarət-buraxılış məntəqələrində əldə etmək mümkündür.
 

Sığorta paketinin qiyməti isə nəqliyyat vasitəsinin növündən və sığorta müddətindən asılıdır. Nəqliyyat vasitəsini 15, 30, 90 gün və 1 il müddətinə sığortalamaq mümkündür. 15 günlük sığorta paketinin qiyməti 3,5 tona qədər çəkisi olan minik avtomobili üçün 30 lari (12 dollar), yük maşını üçün isə 60 lari (24 dollar) təşkil edir.  
 

Xarici vətəndaş Gürcüstan ərazisində nəqliyyat vasitəsini sığortasız idarə edərsə, motosikl, minik avtomobili, kənd təsərrüfatı texnikası üçün 100 lari, avtobus və yük maşınları üçün isə 200 lari məbləğində cərimələnəcək. 

“SOCAR Polymer” zavodunda ilk dəfə sınaq məqsədi ilə polipropilen məhsulu istehsal olunub

SOCAR-ın prezidenti Rövnəq Abdullayev və şirkətin vitse-prezidentlərinin iştirakı ilə "SOCAR Polymer" zavodunda nümayiş və sınaq məqsədi ilə ilk dəfə polipropilen məhsulunun istehsalı həyata keçirilib.

SOCAR-dan "APA-Economics"ə verilən məlumata görə, Sumqayıta işgüzar səfəri çərçivəsində, SOCAR-ın prezidenti "Azərikimya" İB, "SOCAR Karbamid" və "SOCAR Polymer"müəssisələrində baxışlar keçirib, yeni zavodlarda istismarın başlanması ərəfəsində hazırlıq işlərinə dair təlimatlar verib.

SOCAR-ın “Azərikimya” İB-də hazırda texnoloji qurğuların yenilənməsi üzrə işlər davam edir. Bununla yanaşı müəssisədə yeni qurğuların və yardımçı sahələrinin inşası işləri aparılır. Azərkimya İB üzrə yenidənqurma işlərin tamamlanması 2019-cu ildə nəzərdə tutulur.

“SOCAR Karbamid” zavodunda tikinti işləri sona çatmaq üzrədir və bir aydan sonra artıq sınaq-sazlama işlərinə başlanılacaq. Zavodda ilk məhsul - ammonyakın istehsalı bu ilin avqust ayında planlaşdırılır. Cari ilin oktyabr ayında isə zavodun yekun məhsulu - azot gübrəsi (karbamid) istehsal olunacaq. İstehsal ediləcək karbamidin təxminən 150 min tonu daxili tələbatı tam təmin edəcək və nəticədə Azərbaycanda gübrənin idxalına illik sərf olunan 55 milyon dollar vəsait ölkə daxilində qalacaq. Məhsulun qalan 450-500 min tonluq həcmi isə ixrac üçün nəzərdə tutulur, bu da ölkəyə əlavə valyuta vəsaitinin gətirilməsi baxımından mühüm əhəmiyyət kəsb edir.

“SOCAR Polymer” müəssisəsi polipropilen və yüksəksıxlıqlı polietilen istehsal edən iki zavoddan ibarətdir. Bu zavodların istismara verilməsi cari ilin 2-ci və 4-cü rüblərində planlaşdırılır. Zavodların işçi heyəti artıq tam formalaşıb, müvafiq təlimlərdən keçərək yüksək peşəkarlıq səviyyəsinə çatdırılıb. Sənaye səmərəliliyinin artırılması məqsədi ilə “SOCAR Polymer” zavodlarının rəqəmsallaşması “SAP” (Sistem Analizi və Proqramlaşdırma) modullarının vasitəsi ilə təmin olunacaq.

Zavodun ekstruziya zonasında quraşdırılmış avadanlıqların baxışı zamanı polipropilen qranullarının kəsilməsi prosesinə start verilmiş və ilk dəfə sınaq məqsədi ilə yekun polipropilen məhsulu istehsal olunub.

R. Abdullayev bildirib ki, Sumqayıtda kimya sənayesinin dirçəlişi ölkəmiz üçün yeni və dayanıqlı gəlir mənbəyi deməkdir: "Bu il emal və kimya sənayesində SOCAR-ın 3 böyük layihəsi tamamlanmaq üzrədir. "SOCAR Karbamid", "SOCAR Polymer", Türkiyədə STAR Neft Emalı Zavodunun bu il ərzində istismara verilməsi ilə milli sərvətimizə əlavə dəyər qatan böyük missiyanın növbəti mərhələsinə qədəm qoyulacaq."

Son illərdə regionda tikilən ən böyük kimya müəssisələri "SOCAR Polymer" və "SOCAR Karbamid" artıq cari ildə istismara veriləcək. SOCAR-ın kimya sənayesində həyata keçirdiyi layihələrin bir xüsusiyyəti də bundan ibarətdir ki, bu müəssisələr SOCAR-ın digər müəssisələri ilə dəyər zəncirində birlik təşkil edəcək. Heydər Əliyev adına Bakı Neft Emalı Zavodu “Azərikimya” İB-nin Sumqayıtdakı Etilen-polietilen zavodu və "SOCAR-Polymer"in iki qurğusu ilə dəyər zənciri üzrə calaşdırılacaq, bu da istehsalatın daha da səmərəli təşkil olunması üçün zəmin yaradacaq. Həmçinin Türkiyədəki STAR Neft Emalı Zavodu SOCAR-ın digər strateji aktivi olan Petkim kompleksinin xammal təchizatına töhfə verməklə hər iki müəssisəni vahid dəyər zəncirində

birləşdirəcək.

Azərbaycan Gürcüstanın qida təhlükəsizliyi sahəsindəki təcrübəsini öyrənir

Azərbaycanın Qida Təhlükəsizliyi Agentliyinin nümayəndə heyəti Gürcüstanda səfərdədir.

APA-nın yerli bürosunun məlumatına əsasən, Gürcüstanın Milli Qida Agentliyində Azərbaycan nümayəndə heyəti ilə görüş keçirilib.

Görüşdə agentliyin nümayəndələri azərbaycanlı həmkarlarını qurumun əsas fəaliyyət istiqamətləri və bu sahədə mövcud qanunvericiliklə tanış ediblər. Qeyd olunub ki, Azərbaycanın Qida Təhlükəsizliyi Agentliyi yeni yaradılıb və Gürcüstanın bu sahədəki təcrübəsi Azərbaycan üçün maraqlıdır.

Azərbaycanın Qida Təhlükəsizliyi Agentliyinin nümayəndə heyəti Gürcüstana üç günlük səfər çərçivəsində Avropa İttifaqının dəstəyi ilə həyata keçirilən layihələr, Ətraf Mühitin Mühafizəsi və Kənd Təsərrüfatı Nazirliyinin laboratoriyası və Milli Şərab Agentliyi ilə tanış olacaq.

Nümayəndə heyətinin Gürcüstanın regionlarına səfərləri də planlaşdırılıb.

Dmitri Kumsişvili: “Gürcüstan Transxəzər nəqliyyat dəhlizinin inkişaf etdirilməsini dəstəkləyir”

"Gürcüstan Transxəzər nəqliyyat dəhlizinin inkişaf etdirilməsini dəstəkləyir".

APA-nın yerli bürosunun məlumatına əsasən, bunu Gürcüstan baş nazirinin birinci müavini, iqtisadiyyat və davamlı inkişaf naziri Dmitri Kumsişvili Türkiyənin nəqliyyat, dənizçilik və kommunikasiya naziri Əhməd Arslanla görüşdə bildirib.

D.Kumsişvilinin Türkiyəyə işgüzar səfəri çərçivəsində baş tutmuş görüşdə qeyd olunub ki, Transxəzər nəqliyyat dəhlizinin inkişafı üçün birgə səylərin davam etdirilməsi çox vacibdir.

Gürcüstanlı nazir qeyd edib ki, orta dəhlizin inkişafı yalnız ölkələr üçün deyil, bütün region üçün önəmlidir. 

O, orta dəhlizə daha çox yükləri cəlb edəcək layihələri vurğulayıb. Nazir bu layihələrə Bakı-Tbilisi-Qars dəmir yolu, Gürcüstan dəmir yollarının modernləşdirilməsi, Şərq-Qərb avtomagistralının tikintisi, Tbilisi və Kutaisidə loqistik mərkəzlərin inşası və Anaklia dərin dəniz limanının tikintisinin daxil olduğunu bildirib.

Gürcüstandan Azərbaycana avtomobil idxalı 6 dəfədən çox artıb

Bu ilin yanvar ayında Gürcüstandan Azərbaycana 7 mln. 399.4 min dollar dəyərində 402 ədəd avtomobil idxal edilib.

 

"APA-Economics" xəbər verir ki, bu barədə Gürcüstanın Milli Statistika İdarəsinin məlumatında deyilir.

Məlumata görə, bu, həcm baxımından 2017-ci ilin yanvar ayı ilə müqayisədə 337 ədəd və ya 6,18 dəfə çoxdur. Məbləğ baxımından isə 5 mln. 389,8 min dollar və ya 3,68 dəfə çoxdur.

Qeyd edək ki, 2017-ci ilin yanvar ayı ərzində Gürcüstandan xarici ölkələrə 2 mln. 9,6 min dollar dəyərində 65 ədəd avtomobil göndərilib.

Ümumilikdə isə ötən ay Gürcüstandan xarici ölkələrə 15 mln. 689.5 min dollar dəyərində avtomobil ixrac edilib. Bu isə Gürcüstanın ümumi ixracının 7%-nə bərabərdir. 2017-ci ilin yanvar ayında bu rəqəm 10 mln. 814.9 min dollar dəyərində olub. 

Azərbaycan, Türkiyə və Gürcüstan Bakıda "Cənub Qaz Dəhlizi"ni müzakirə etdi

Azərbaycan, Türkiyə və Gürcüstan "Cənub Qaz Dəhlizi" layihəsinin reallaşdırılması üçün işə davam edəcək.

müvafiq sənəd Bakıda keçirilən nazirlərin  iclasında imzalanıb.

Deklarasiyada imza atan tərəflərin  ətraf mühitin qorunması istixana qazlarının azaldılması, enerji mənbələrinin diversifikasiyası, Avropa energetika təhlükəsizlik tədbirlərinin yerinə yetirilməsi kimi vacib aspektlərin reallaşdırılmasına hazır olduqları bildirilib.

Tərəflər eyni zamanda "Şahdəniz" qaz yatağının işlənməsi üçün ikinci mərhələyə siyasi dəstək verdiklərini bildiriblər. Gürcüstanın nümayəndəsi Kumsişvili qeyd edib ki, bu layihə Gürcüstanın iqtisadi inkişafı və enerji təhlükəsizliyi üçün vacib addımdır.

 

İclasda iştirak edən tərəflər strateji münasibətlərin dərinləşməsi və regional əməkdaşlığın vacibliyini də qeyd ediblər. Rəsmilər qeyd ediblər ki, layihə nəzərdə tutulmuş vaxtda başa çatacaq və Avropa 2020-ci ildə Azərbaycan qazını əldə edə biləcək.

Gürcüstanın iqtisadiyyat naziri Azərbaycan prezidenti İlham Əliyev, türkiyəli və azərbaycanlı həmkarları ilə də görüşlər keçirib.

"Cənub Qaz Dəhlizi" Bakı-Tiflis-Ərzurum qaz kəmərinin davamıdır.

İlkin mərhələdə "Şahdəniz" yatağından çıxarılan qaz emal ediləcək. Bu qaz, "Cənub Qaz Dəhlizi"nin əsas mənbəyi sayılacaq. Növbəti mərhələlərdə isə digər mənbələr də layihəyə qoşula bilər.

"Fitch": "2019-2020-ci illərədək SOCAR-ın kapital xərcləri 2 milyard manata yaxın azalacaq"

"İri layihələr və Türkiyədəki STAR neft emalı zavodunun inşası başa çatana qədər SOCAR-ın kapital xərcləri 2018-ci ilədək yüksək olaraq qalacaq".

"APA-Economics" xəbər verir ki, bu, beynəlxalq reytinq agentliyi "Fitch"in SOCAR-a verdiyi reytinqi ilə bağlı yaydığı məlumatda yer alıb. Agentliyin mütəxəssisləri hesab edir ki, yüksək neft qiymətləri və dövlət tərəfindən bu il üçün 1,9 mlrd. dollar subsidiyanın verilməsi gələcəkdə SOCAR-ın ümumi borcunun artmasını məhdudlaşdıracaq. 

"İri layihələr və Türkiyədəki STAR neft emalı zavodunun inşası başa çatması 2019-2020-ci illərədək SOCAR-ın kapital xərclərini 2 milyard manatadək azaldacaq", - deyə məlumatda vurğulanıb.

Qeyd edək ki, 2017-ci ildə SOCAR-ın xərcləri 4,3 mlrd. manat təşkil edib.

"Stadler” şirkəti Gürcüstanda zavod inşa edəcək

İsveçrənin "Stadler Rail AG" şirkəti Gürcüstanda vaqon istehsalı və təmiri zavodu inşa edəcək.

APA-nın yerli bürosunun məlumatına əsasən, bu barədə şirkətin prezidenti Peter Şpulerlə Gürcüstan baş naziri Giorgi Kvirikaşvili arasında keçirilmiş görüşdə bildirilib.

Görüşdə qeyd olunub ki, zavod "Gürcüstan Dəmir Yolları" şirkətini və Tbilisi metrosunu vaqonlarla təmin edəcək. Müəssisə ixrac sifarişləri də qəbul edəcək.

Zavodun inşası üçün Tbilisi ətrafında yerləşən torpaq sahələri nəzərdən keçirilir.

Qeyd edək ki, ötən il "Stadler Rail AG" şirkəti Gürcüstana investisiya yatırmağa maraq göstərib. Bununla bağlı şirkətlə Gürcüstanın İqtisadiyyat və Davamlı İnkişaf Nazirliyi arasında memorandum imzalanıb.

Saytda Axtarış

Son xəbərlər