Azərbaycanın gənclər və idman nazirinin müavini İntiqam Babayevin rəhbərliyi ilə bu qurumun və BMT-nin İnkişaf Proqramı (İP) əməkdaşlarından ibarət nümayəndə heyəti konfransa hazırlıq çərçivəsində avqustun 26-dan 30-dək BMT-nin Nyu-Yorkdakı baş qərargahında səfərdə olacaqdır.
BMT-nin İnkişaf Proqramının Azərbaycan nümayəndəliyinin mətbuat xidmətindən AzərTAc-a bildirmişlər ki, səfərin məqsədi BMT Modelinin idarə olunmasında beynəlxalq təcrübəni öyrənmək və ölkəmizdə keçiriləcək konfransa yüksək səviyyəli beynəlxalq məruzəçiləri cəlb etməkdir.
Səfər çərçivəsində nümayəndə heyəti Birləşmiş Millətlər Təşkilatı baş katibinin yeni təyin olunmuş gənclər üzrə elçisi Əhməd Əlhəndavi, ictimai əlaqələr və ictimai informasiya üzrə baş katibin müavini Launski Tieffensal, BMT İP-nin Avropa və MDB ölkələri üzrə regional bürosunun bölgə direktoru xanım Cihan Sultanoğlu və BMT-nin ictimai informasiya departamentinin (İİD) təşviqat bölməsinin direktoru Mahir Nasser ilə ikitərəfli görüşlər keçirəcəkdir.
Nümayəndə heyəti, həmçinin Nyu-York şəhərində BMT-nin İctimai İnformasiya Departamenti tərəfindən keçiriləcək illik BMT Model seminarında iştirak edəcəkdir.

Avqustun 23-də Cəbrayıl rayonunun erməni hərbi birləşmələri tərəfindən işğalının 20-ci ildönümünə həsr olunmuş anma tədbiri keçirilmişdir.
AzərTAc xəbər verir ki, Azərbaycan Dövlət Akademik Milli Dram Teatrında təşkil edilmiş tədbirin iştirakçıları əvvəlcə teatrın foyesində Cəbrayıl rayonunun işğaldan əvvəl və sonrakı dövrünü əks etdirən stendlərlə tanış olmuşlar.
Şəhidlərin xatirəsi bir dəqiqəlik sükutla yad olunmuş, “Erməni işğalında qalan Cəbrayıl” sənədli filmi nümayiş etdirilmişdir.
Tədbirdə çıxış edənlər işğalçı dövlətin hərbi təcavüzü ilə başlanmış Ermənistan-Azərbaycan, Dağlıq Qarabağ münaqişəsinin ağır nəticələrindən, müharibənin ölkəmizə vurduğu hədsiz ziyandan söz açmışlar. İşğalçılara qarşı döyüşlərdə Azərbaycanın digər bölgələrində olduğu kimi, Cəbrayıl rayonunun müdafiəçilərinin də böyük şücaət göstərdikləri vurğulanmışdır. Bildirilmişdir ki, bu ədalətsiz müharibədə 392 cəbrayıllı şəhid olmuşdur. Döyüşlərdə xüsusi fədakarlıq göstərənlərdən beşi Azərbaycanın Milli Qəhrəmanı adına layiq görülmüşdür.

“Moldovalı ombudsman xanım Aurelia Qriqoriunun Ermənistan tərəfindən təzyiqə məruz qalmasına heç bir beynəlxalq qurum laqeyd qalmamalıdır”.

APA-nın məlumatına görə, bu açıqlamanı jurnalistlərə ombudsman Elmira Süleymanova verib. O deyib ki, Aurelia Qriqorunun ermənilər tərəfindən terrorla hədələnməsi ilə bağlı Azərbaycan dünya birliyinə müraciət etməlidir: “Sentyabrın 2-də və 5-də Kiyev şəhərində Avropa Birliyinin təşkilatçılığı ilə “Şərq Tərəfdaşlığı” proqramı çərçivəsində tədbir keçiriləcək. Orada bu məsələni qaldıracağam. Tərəfdaşlıq ən əvvəl qarşılıqlı etibara, dəstəyə əsaslanmalıdır. Biz bunu praktik olaraq həyata keçirmiriksə, belə müzakirələrin nə mənası var?!”

E. Süleymanova qeyd edib ki, Ermənistan hökuməti və xalqı artıq öz yanaşmaq tərzini və əxlaqını dəyişməlidir: “Onlar dərk etməlidirlər ki, bu münaqişə uzansa belə, bunun sonu sülhdür, torpaqların qaytarılmasıdır və Azərbaycanın ərazi bütövlüyünün bərpa olunmasıdır. Bu isə təkcə Azərbaycana yox, Ermənistana da, regiona da, bütün dünyaya da xeyirdir. Dövlətlərin siyasətində belə bir dönüş əmələ gəlsə, bu bütövlükdə davamlı inkişaf üçün böyük dəstək olacaq”.