ATƏT-in Minsk Qrupunun yeni təyin olunmuş amerikalı həmsədri Ceyms Uorlik gələn həftə Azərbaycana gələcək.

Bu barədə APA-ya ABŞ-ın Azərbaycandakı səfirliyindən məlumat verilib.

Qeyd edək ki, C.Uorlik bundan əvvəl özünün Tvitter səhifəsində tezliklə Ermənistana, Azərbaycana və Dağlıq Qarabağa səfər edəcəyini bildirib. Bu, C.Uorlikin ATƏT-in Minsk Qrupunun həmsədri qismində regiona ilk səfəri olacaq.

Almaniya Suriyanın kimyəvi silah işlətməsinə qarşı sərt reaksiya tələb edən bəyanata imza atmış on ikinci ölkə olub.

Bu barədə bu gün Almaniya xarici işlər naziri Qido Vestervelle bildirib.

Daha öncə Avstraliya, Kanada, Fransa, İtaliya, Yaponiya, Cənubi Koreya, Səudiyyə Ərəbistanı, İspaniya, Türkiyə, Böyük Britaniya və ABŞ tərəfindən imzalanmış bəyanatın mətnini dünən Ağ ev yayıb. Beləliklə, Almaniya

BMT Təhlükəsizlik Şurasının qərarı olmadan ABŞ-ın Suriyaya qarşı hərbi əməliyyatlarına dəstək verən sənədə imza atmış beşinci Avropa Birliyi ölkəsi olub.

"Almaniya kansleri Anqela Merkel və mən birgə bəyanatı gəstəkləmək barədə qərar qəbul etdik", - deyə Vestervelle bildirib.

Azərbaycan Prezidenti İlham Əliyev Tacikistan Prezidenti Emoməli Rəhmona təbrik məktubu göndərib.

Məktubda deyilir:

"Hörmətli Emoməli Şərifoviç, Sizi və Sizin şəxsinizdə bütün Tacikistan xalqını milli bayram - Müstəqillik Günü münasibətilə ürəkdən təbrik edirəm.

Bu gün Tacikistan dövlət müstəqilliyinin möhkəmlənməsi, iqtisadi mexanizmlərin təkmilləşdirilməsi, xalqın rifahının yüksəldilməsi yolu ilə inamla irəliləyir.

Əminəm ki, xalqlarımız və ölkələrimiz arasında ənənəvi dostluq münasibətləri bundan sonra da Azərbaycan-Tacikistan əməkdaşlığının genişlənməsinə şərait yaradacaqdır.

Hörmətli Emoməli Şərifoviç, Sizə möhkəm cansağlığı, xoşbəxtlik və uğurlar, Tacikistan xalqına isə sülh və firavanlıq arzu edirəm".

Gürcüstanın baş naziri Bidzina İvanişvili ABŞ-ın Suriyaya qarşı hərbi müdaxiləsinə münasibət bildirib.

Baş verənlərdən çox narahat olduğunu söyləyən B.İvanişvili bildirib:

“Mən Suriyada baş verənlərdən çox narahatam. Çox təəssüf ki ABŞ Suriyada dinc əhaliyə qarşı kimyəvi silahdan istifadə edilməsi ilə bağlı tutarlı faktlara malikdir. Mən starateji tərəfdaş kimi ABŞ-a inanıram.”

Gürcüstan hökuməti Abxaziya dəmir yolunun açılması barədə heç bir qərar qəbul etməmişdir.
Bu barədə Gürcüstan hökuməti rəsmi bəyanat yaymışdır.
Bu bəyanat Ermənistan milli təhlükəsizlik şurasının katibi Artur Bağdasaryanın Rusiya, Gürcüstan və Abxaziyanı birləşdirən dəmir yolunun Abxaziya sahəsinin açılması ilə bağlı guya üçtərəfli razılığın əldə olunmasına dair məlumatına cavab olaraq yayılmışdır.
Gürcüstan hökumətinin bəyanatı Bağdasaryanın dediklərinin həqiqətə uyğun olmadığını təsdiq edir.
Gürcüstan milli təhlükəsizlik şurasının katibi Qiqi Bokeria demişdir ki, dəmir yolunun bərpası yalnız Gürcüstan torpaqları işğaldan azad olunduqdan sonra mümkündür.
Q. Bokeria Gürcüstan hökumətinin xalqının milli mənafeyinə zidd olacaq qərar qəbul etməyəcəyinə ümidvar olduğunu bildirmiş, Qars-Axalkalaki layihəsinin həyata keçirilməsinin Gürcüstanın strateji mənafelərinə daxil olduğunu qeyd etmişdir. O demişdir ki, Azərbaycan, Gürcüstan, Türkiyə və Avropanı birləşdirən bu layihə Gürcüstan üçün həm iqtisadi, həm də strateji baxımdan mühüm əhəmiyyət kəsb edir.
Gürcüstanın xarici işlər naziri Maya Pancikidze də dəmir yolunun açılması ilə bağlı məlumatın heç bir əsası olmadığını qeyd etmişdir.

Sentyabrın 4-də Azərbaycan Respublikasının Prezidenti İlham Əliyev Yardımlı şəhərinə çəkilmiş yeni içməli su xəttinin açılışı münasibətilə Gənclər Parkında təşkil olunan mərasimdə iştirak etmişdir.

Əvvəlcə dövlətimizin başçısına parkda görülən işlərlə bağlı məlumat verildi. Qeyd olundu ki, bu ilin avqustunda parkda başlanmış tikinti işləri hazırda davam etdirilir. Parkın ümumi ərazisi yarım hektardır. Burada istirahət köşkləri tikilmiş, geniş yaşıllıq sahəsi yaradılmış, müasir fəvvarə tikilmişdir.

Prezident İlham Əliyev rayon ictimaiyyətinin nümayəndələri ilə görüşdü.

Mərasim iştirakçılarını salamlayan Prezident İlham Əliyev deyib: "Yenidən Yardımlıda olmağımdan çox şadam. Bu, Yardımlıya mənim prezident kimi artıq üçüncü səfərimdir. Buraya gələrkən birinci səfərimi xatırlayırdım. O vaxt - 2005-ci ildə biz Masallı-Yardımlı yolunun yenidən qurulmasını qeyd edirdik. O vaxt bu, böyük layihə idi. Çünki yol o qədər də yaxşı vəziyyətdə deyildi. Yeni yol çəkildi. Ondan sonra 2006-cı ildə Yardımlıya təbii qazın verilməsini qeyd etmişik. O da tarixi bir gün idi. Çünki heç sovet dövründə də buraya təbii qaz verilməmişdi. O vaxt xətlər çəkildi. Bu gün məndə olan məlumata görə, Yardımlı şəhərinin böyük hissəsi qazlaşdırılıbdır. Bir neçə kənddə də qaz xətləri çəkilibdir. Gələcəkdə əlbəttə ki, tam şəkildə qazlaşdırma aparılacaqdır. Bu gün isə biz növbəti vacib layihənin icrasını - Yardımlıya içməli suyun verilməsini qeyd edirik. Yəni, baxın bu tarix özlüyündə bir göstəricidir. Yol, qaz və içməli su həyatdır. Təmiz içməli su isə sağlam həyat deməkdir. İndi verilən məlumata görə, bütün xətlər artıq bu ilin sonuna qədər qurulacaqdır. Gələn ildən başlayaraq Yardımlı şəhərinin içməli su problemi tam şəkildə öz həllini tapacaqdır. Bununla bərabər, yerli icra orqanları kənd yerlərində su xətlərinin çəkilişi ilə məşğuldurlar. Bu da çox gözəl bir təşəbbüsdür. Mən bunu dəstəkləyirəm, alqışlayıram. Elə etməliyik ki, əsas infrastruktur layihələri icra edilsin. Eyni zamanda, bu gün biz kənd yolunun açılışını qeyd edəcəyik. Yeni elektrik xətlərinin çəkilişi də başlamışdır. Çünki Yardımlıda bərk külək əsəndə köhnə dirəklər yıxılır, elektrik kəsilir. İndi yeni, möhkəm dayaqlar tikilir ki, artıq bu problem də olmayacaqdır".