Ermənistanın baş naziri Tiqran Sərkisyan Azərbaycanın işğal altındakı Dağlıq Qarabağ bölgəsinə gəlib.

Modern.az erməni mətbuatına istinadən bildirir ki, Tiqran Sərkisyan qondarma qurumun öz “müstəqilliyini” elan etməsinin 22-ci ildönümü ilə bağlı keçiriləcək tədbirlərə qatılacaq.

Erməni baş nazir səfəri zamanı separatçı rejimin başçısı Bako Saakyanla görüşüb.

Azərbaycan prezidenti İlham Əliyev Özbəkistan prezidenti İslam Kərimovu bu ölkənin milli bayram – Müstəqillik Günü münasibətilə təbrik edib.

APA-nın xəbərinə görə, təbrik məktubunda Azərbaycan-Özbəkistan dövlətlərarası münasibətlərinin yüksək səviyyədə olduğu, bunun xüsusi məmnunluq doğurduğu vurğulanıb: “Ölkələrimiz arasında hərtərəfli əməkdaşlıq durmadan genişlənir, ənənəvi dostluq əlaqələri möhkəmlənir. Əminəm ki, Azərbaycan ilə Özbəkistan arasında qarşılıqlı əlaqələrin və əməkdaşlığın daha da inkişaf etdirilməsinə yönəlmiş birgə səylərimiz bundan sonra da xalqlarımızın mənafelərinə xidmət edəcvək”.

Mərkəzi Seçki Komissiyasının (MSK) bugünkü iclasında daha 3 nəfərin prezidentliyə namizədliyinin irəli sürülməsi ilə bağlı müraciətlər müzakirə olunub.

APA-nın məlumatına görə, MSK sədri Məzahir Pənahovun sədrliyi ilə keçirilən iclasda 29 avqust tarixli iclasının protokolu təsdiqlənib.

Sonra Rauf Zakir oğlu Quliyevin prezidentliyə öz təşəbbüsü ilə irəli sürülmüş namizədliyinin təsdiq olunmasına baxılıb. MSK katibi Arifə Muxtarova məlumat verib ki, R. Quliyevin namizədliyinin irəli sürülməsi məsələsi araşdırılıb və bu məsələnin hüquqi əsasların olması müəyyən edilib. MSK açıq səsvermə yolu ilə sözügedən şəxsin namizədliyinin irəli sürülməsini təsdiqləyib. Daha sonra R. Quliyevin səlahiyyətli nümayəndələri də qeydə alınıb.

Gürcüstanın bölgələrin inkişafı və infrastruktur naziri David Narmania azərbaycanlıların yığcam yaşadıqları Kvemo Kartli-Borçalı bölgəsinin Marneuli rayonunda həyata keçirilən infrastruktur layihələri ilə tanış olmuşdur.
Rayonun Qullar kəndində bərpa olunmuş yolun açılış mərasimində iştirak edən nazir yerli sakinlərlə görüşmüşdür. Bildirilmişdir ki, yolun bərpasına 1.397.600 lari (1 dollar 1,65 laridir) xərclənmişdir.
David Narmania qeyd etmişdir ki, bölgədə infrastrukturun yaxşılaşdırılması istiqamətində işlər davam etdiriləcək, Qullar kəndi sakinlərinin istəyi nəzərə alınaraq yolun mərkəzi avtomagistraladək olan hissəsinin də təmiri üçün tədbirlər görüləcəkdir.
Rayon icra hakimiyyətinin Qullar kəndi üzrə nümayəndəsi Qəşəm Qarayev kənd yolunun son 30 ildə ilk dəfə əsaslı təmir olunduğunu qeyd etmiş, kənd sakinləri adından nazirə təşəkkürünü bildirmişdir.
Nazir rayonun digər kəndlərində də həyata keçirilən infrastruktur layihələrinin icrası ilə də tanış olmuşdur.