Bu sözləri Avropa Birliyinin “Şərq tərəfdaşlığı” sammiti ərəfəsində Gürcüstanın baş naziri İrakli Qaribaşvili deyib.

İ. Qaribaşvili Vilnüs sammitinin Gürcüstanın gələcəyi üçün böyük əhəmiyyət daşıdığını bildirib: “Bizim seçimimiz Avropa ailəsi, Avropa yoludur. Bu proses dönməz xarakter alacaq. Assosiasiya sazişi Gürcüstanın qarşısında çoxlu yollar açacaq – biznes, ticarət və digər sahələrdə”.

Baş nazir Ukraynanın qərarının Gürcüstana neqativ təsir göstərəcəyi ilə bağlı fikirlərlə razılaşmayıb. O qeyd edib ki, Gürcüstan Rusiyadan Ukrayna qədər asılı deyil.

Xarici işlər naziri Maya Pancikidze də Avropa Birliyi ilə assosiasiya sazişinin Gürcüstan üçün önəmindən danışıb: “Avropa Birliyi ilə assosiasiya sazişi yeni nəsil sazişdir. İndiyə qədər əldə olunan razılaşmalardan fərqli olaraq, bu saziş AB ilə yaxınlaşmanın real və ciddi mexanizmlərini nəzərdə tutur. Sənəd Gürcüstanla Avropa Birliyi arasında münasibətləri bütün prioritet istiqamətlər üzrə keyfiyyətcə yeni səviyyəyə çıxaracaq”.

Xatırladaq ki, Vilnüs sammitində Gürcüstan və Moldova ilə AB arasında assosiasiya sazişi paraflanacaq. 

Avropa Azərbaycan Cəmiyyətinin (AAC) Belçikadakı nümayəndəliyinin təşkilatçılığı ilə Avropa Parlamentindəki Azərbaycanın Dostları Qrupunun üzvlərinin iştirakı ilə seminar keçirilmişdir.
AAC-dan AzərTAc-a bildirilmişdir ki, seminarın məqsədi Azərbaycanın NATO qarşısındakı öhdəliyinə dair informasiya və fikir mübadiləsi aparmaq, əməkdaşlığın perspektivlərini müzakirə etmək olmuşdur.
Seminarda NATO-nun hazırkı fəaliyyəti və perspektivləri, Avropa İttifaqı-Azərbaycan əməkdaşlığında Alyansın rolu, Azərbaycan-NATO dialoqunda rəsmi Bakının mövqeyi kimi məsələlər müzakirə olunmuşdur.
Bildirilmişdir ki, Azərbaycan NATO-nun ən ümidverici və etibarlı tərəfdaşları arasındadır və hazırda Əfqanıstandakı Beynəlxalq Təhlükəsizliyə Yardım Qüvvələrinə töhfə verir.
Avropa Parlamentinin Slovakiyadan olan deputatı Katarina Nevedalova demişdir ki, qurumun üzvləri Cənubi Qafqazdakı, xüsusilə də Azərbaycandakı inkişafdan xəbərdardırlar. Avropa ilə Azərbaycan arasında informasiya mübadiləsini intensivləşdirmək və yeni müstəviyə çıxarmaq lazımdır.
Azərbaycanın NATO yanında daimi nümayəndəliyinin rəhbəri Xəzər İbrahim cari əlaqələrin icmalını vermiş, NATO-nun və Azərbaycanın demokratik, institusional və müdafiə islahatlarında fəal əməkdaşlıq etdiyini söyləmişdir. O qeyd etmişdir ki, ötən 10 ildə tərəflər arasında mülki müdafiənin planlaşdırılması, elmi mübadilə, ətraf mühitin mühafizəsi və ictimai informasiya kimi sahələrdə əməkdaşlıq həyata keçirilmişdir. Azərbaycan NATO-nun ən etibarlı tərəfdaşlarından biri kimi qəbul olunur. Azərbaycanın NATO ilə dialoqu sadəcə müxtəlif missiyalar zamanı insani və təchizat dəstəyini təmin etmək kimi siyasi öhdəlikdən ibarət deyildir. Azərbaycan mənəvi və hüquqi məsələləri əhatə edən planlarda da fəal iştirak edir.
Azərbaycanın Belçikadakı səfiri və Avropa İttifaqı yanında nümayəndəliyin başçısı Fuad İsgəndərov və Avropa Parlamentinin Latviyadan olan deputatı İnes Vayder çıxışlarında ölkəmizin NATO ilə əməkdaşlığından danışmışlar.
AAC-ın Belçikadakı nümayəndəliyinin rəhbəri Roman Huna bildirmişdir ki, NATO Azərbaycanın öz etibarlılığını və əməkdaşlıq sahəsində yaradıcı mövqeyini nümayiş etdirdiyi ən qabaqcıl beynəlxalq təşkilatlardan biridir. Azərbaycanın sülhməramlı əməliyyatlara verdiyi töhfələr beynəlxalq ictimaiyyət tərəfindən yüksək qiymətləndirilir.

Azərbaycanın daxili işlər naziri, general-polkovnik Ramil Usubov noyabrın 27-də Avropa Şurası Parlament Assambleyasının (AŞPA) Hüquq Məsələləri və İnsan Haqları Komitəsinin məruzəçisi xanım Maylis Repsi qəbul edib. DİN-in mətbuat xidmətindən APA-ya verilən məlumata görə, görüş zamanı R.Usubov bildirib ki, polis əməkdaşlarının peşəkarlığının, dünyagörüşünün artırılması, beynəlxalq təcrübədən bəhrələnməsi istiqamətində görülən işlər məqsədyönlü və sistemli şəkildə həyata keçirilir. O qeyd edib ki, yalnız insan hüquqları üzrə ölkəmizdə və xarici dövlətlərdə keçirilən seminar-treninqlərdə son 4 ildə DİN-in 1500-ə yaxın əməkdaşı iştirak edib.

Görüş zamanı bildirilib ki, vətəndaşların məruz qaldığı hüquqazidd əməllərə qarşı təxirəsalınmaz operativ tədbirlərin görülməsi baxımından yaradılmış 102 Xidməti, fövqəladə vəziyyətlərə çevik reaksiya verilməsi məqsədilə Təhlükəsiz Şəhər Avtomatik İdarəetmə Sistemi, «Qaynar xətt», elektron poçt ünvanı da ictimaiyyətlə əlaqələrin səmərəli təşkilində, daxil olan müraciətlərin nəzarətə götürülərək operativ həllində böyük rol oynayır.

Daxili işlər naziri ictimaiyyətlə əlaqələrin genişləndirilməsi işinin səmərəli təşkili, polis-cəmiyyət, polis-vətəndaş münasibətlərinin etibarlı qurulması və hüquq qaydasının təmin olunmasında vətəndaşların könüllü köməyindən istifadə edilməsi məqsədilə, ATƏT-in Bakı Ofisinin təşəbbüsü və dəstəyi ilə 2008-ci ilin yanvar ayından respublikanın bir sıra şəhər və rayon polis orqanlarında «Cəmiyyət dəstəkli polis» layihəsi həyata keçirildiyini, beynəlxalq təcrübəyə əsaslanaraq ölkə qanunvericiliyində müvafiq dəyişiklik edildiyini vurğulayıb.