Azərbaycanda siyasi partiyalardan baş qərargahları ilə bağlı sənəd tələb olunacaq, əks halda həmin partiyalar qeydiyyata alınmayacaq, yaxud fəaliyyəti ləğv olunacaq.

Milli Məclisdən APA-ya verilən məlumata görə, bununla bağlı “Hüquqi şəxslərin dövlət qeydiyyatı və dövlət reyestri haqqında” qanunun 5-ci maddəsinə əlavələr təklif olunur.

Təklifə əsasən, Azərbaycandakı siyasi partiyalar hüquqi şəxs statusu almaq istəyərkən dövlət qurumlarına partiyanın rəhbər orqanlarının qərargahının yerləşdiyi yerə dair sənəd də təqdim etməli olacaq. Qərargahın yerləşdiyi yerə dair sənədin (qurumun hüquqi ünvanını təsdiq edən sənəd) təqdim olunması məcburiləşdiriləcək.

Layihə Milli Məclisin plenar iclasına tövsiyə olunub.

Bu gün Brüsseldə Avropa Birliyi-Azərbaycan Əməkdaşlıq Şurasının 14-cü iclası keçirilib. APA-nın xəbərinə görə, iclasda əməkdaşlığın cari vəziyyəti və perspektivləri müzakirə olunub.

Toplantının yekunları əsasında keçirilən mətbuat konfransında AB-yə sədrlik edən ölkə olan Litvanın xarici işlər naziri Linas Linkyaviçyus bildirib ki, AB ilə Azərbaycan arasında münasibətlər dinamik inkişaf edir: “Biz Azərbaycanla AB arasında yaxınlaşmanı görməkdən məmnunuq”.

L. Linkyaviçyus Azərbaycan və Ermənistan prezidentlərinin bu yaxınlarda keçirilmiş görüşünü alqışlayıb və qeyd edib ki, Dağlıq Qarabağ münaqişəsinin həlli AB-nin xarici siyasət prioritetlərindən biridir və Brüssel ATƏT-in Minsk Qrupunun dəstəklənməsi üçün daha çox iş görməyə hazırdır. O, Azərbaycan və AB-nin enerji əməkdaşlığını fəal inkişaf etdirdiyini söyləyib və “Şahdəniz” konsorsiumunun yekun investisiya qərarının dekabrın 17-də açıqlanmasını səbirsizliklə gözlədiklərini vurğulayıb. Tərəflər Transxəzər qaz xətti layihəsi üzrə müzakirələri davam etdirməyə qərar veriblər.

Qeyd edək ki, AB-Azərbaycan Əməkdaşlıq Şurasının iclasları ildə bir dəfə nazirlər səviyyəsində keçirilir və tərəflər arasında siyasi dialoqun tərkib hissəsidir. Əməkdaşlıq Şurası AB ilə tərəfdaş ölkələr arasında əməkdaşlıq və tərəfdaşlıq barədə sazişin yerinə yetirilməsi işini əlaqələndirir. Azərbaycan və AB arasında bu saziş 1999-cu ildən qüvvədədir.

Əmək və Əhalinin Sosial Müdafiəsi Nazirliyinin rəsmi internet səhifəsində Nazirliyin xəttilə mənzil alanların və növbədə duranların SİYAHISI açıqlanıb.

Samux, Beyləqan, Zaqatala, Ağdam və Bakının Nizami rayonunda yaşayan, həmin rayonların icra hakimiyyətlərində ev növbəsində dayanan əlil və şəhid ailələrinin siyahısı verilib.

Fərdi ev və torpaq növbəsində dayanan Qarabağ müharibəsi əlillərinin siyahısı da öz əksini tapıb.

Qeyd edək ki, avtomobil alanların və bunun üçün növbədə duranların da SİYAHISI açıqlanıb.

Bu gün Müsavat Partiyasının Divanının növbəti iclası keçirilib.

Müsavat Partiyasının başqan müavini Gülağa Aslanlının AzNews.az-a verdiyi məlumata görə, Divanda ölkədəki ictimai-siyasi vəziyyət, yanacaq məhsullarının qiymətinin artırılması və digər məsələlərlə yanaşı, əsas müzakirə mövzularından biri də partiyanın Milli Şura ilə bağlı mövqeyinin müəyyənləşdirilməsi olub.

Divanda partiyanın Milli Şuradan çıxması ilə bağlı birmənalı razılıq əldə edilməsə də, qərara gəlinib ki, Müsavat Milli Şurada təmsil olunan AXCP, KXCP, “El” hərəkatı, “Nida” Gənclər Təşkilatı, Ziyalılar Forumu və digər qurumlarla ikitərəfli, o cümlədən çoxtərəfli danışıqlara start versin.

Bu danışıqlarda Müsavatın adıçəkilən qurumlarla ikitərəfli əməkdaşlıq perspektivləri müzakirə olunsun.