“Türkiyə-Azərbaycan əlaqələri ən yüksək səviyyədədir. Bu, belə də olmalıdır. Çünki bizim xalqlar qardaş xalqlardır, biz əsrlər boyu bir-birimizin yanında olmuşuq. Bu gün biz iki müstəqil dövlət kimi gələcəyimizi birgə qururuq". APA-nın məlumatına görə, bunu Azərbaycan prezidenti İlham Əliyev Türkiyənin baş naziri Əhməd Davudoğlu ilə görüşdən sonra mətbuata verdiyi bəyanatında deyib.

Dövlət başçısı bildirib ki, iki ölkə arasında siyasi əlaqələr gündən-günə inkişaf edir. O xatırladıb ki, bu ayın əvvəlində Türkiyə prezidenti Rəcəb Tayyib Ərdoğan Azərbaycanda rəsmi səfərdə olub, hazırda da Türkiyənin baş naziri Azərbaycanda rəsmi səfərdədir: "Mənim də prezident seçkilərindən sonra ilk rəsmi səfərim Türkiyə olub. Bu, əslində əlaqələrimizin səviyyəsini rəsmi şəkildə göstərir. Bu gün ölkələrimiz eyni zamanda iqtisadi sahədə uğurla əməkdaşlıq edir. Türkiyə və Azərbaycan qarşılıqlı sərmayə qoymaqla həm öz maraqlarını təmin edir, həm də bir-birini daha da gücləndirir. Azərbaycandan Türkiyəyə qoyulacaq sərmayələrin miqdarı 20 milyard dollara yaxındır. Eyni zamanda Türkiyədən Azərbaycana sərmayələr qoyulur. Biz Türkiyənin "Şahdəniz" qaz yatağındakı və TANAP-dakı payının artırılmasını böyük məmnuniyyət hissi ilə qəbul edirik. Çünki Türkiyə şirkətləri daha çox böyük paya malik olacaqlar. TANAP Türkiyə-Azərbaycan layihəsidir, cəmi 2 il əvvəl bu layihəyə start verilib. Bu gün artıq bu layihə reallaşır".

Prezident qeyd edib ki, enerji sahəsində əlaqələr nəinki iki ölkə üçün, bölgə və dünya üçün də böyük önəm daşıyır: “Sabah Azərbaycanda böyük bir mərasim keçiriləcək. Sabah Cənub Qaz Dəhlizinin tikintisi başlayır. 20 sentyabr bizim üçün tarixi bir gündür, çünki 20 il əvvəl məhz sentyabrın 20-də “Əsrin müqaviləsi” imzalanıb. 20 il sonra biz artıq 21-ci əsrin layihəsinə start veririk. Bu layihənin uğurla həyata keçirilməsində Türkiyə və Azərbaycanın rolu xüsusi əhəmiyyət daşıyır”.

Dövlət başçısı deyib ki, enerji sahəsində “Trans Anadolu”, “Şahdəniz-2” və digər layihələrin uğurla icrası nəticəsində bölgədə yeni şərait yaranacaq: “Bu layihələr həm siyasi, həm də iqtisadi maraqlarımızı təmin edəcək. Bu layihələrdə iştirak edəcək ölkələrin sayı kifayət qədər çoxdur. Beləliklə, Türkiyə və Azərbaycan bu layihələrin təşəbbüskarları kimi geniş beynəlxalq əməkdaşlığa da öz töhfəsini verəcək".

Sentyabrın 11-də Azərbaycan Respublikasının Prezidenti İlham Əliyevin və Gürcüstanın Baş naziri İrakli Qaribaşvilinin təkbətək görüşü olub.

Modern.az saytının məlumatına görə görüşdə ölkələrimiz arasında ikitərəfli münasibətlərin müxtəlif sahələrdə, o cümlədən siyasi, iqtisadi, energetika və digər sahələrdə uğurlu inkişafından məmnunluq ifadə edildi.

Gürcüstanın Baş nazirinin bu səfərinin ölkələrimiz arasında əlaqələrin daha da genişlənəcəyinə töhfə verəcəyi qeyd edildi. Əlaqələrimizin bundan sonra da inkişaf edəcəyinə əminlik ifadə olundu.

Azərbaycan Respublikasının Prezidenti İlham Əliyev sentyabrın 11-də Türkiyə Respublikasının müdafiə naziri İsmet Yılmazın başçılıq etdiyi nümayəndə heyətini qəbul edib.

Görüşdə Azərbaycan ilə Türkiyə arasında dostluq və qardaşlıq münasibətlərinin müxtəlif istiqamətlərdə, o cümlədən hərbi və hərbi-texniki əməkdaşlıq sahəsində uğurla inkişaf etdiyi bildirildi, keçirilməsi nəzərdə tutulan birgə hərbi təlimlərin Azərbaycan və Türkiyə Silahlı Qüvvələri arasında əlaqələrin genişləndirilməsi baxımından önəmi qeyd olunub.

Türkiyə Respublikasının müdafiə naziri İsmet Yılmazın ölkəmizə səfərinin bu sahədə əməkdaşlığımızın daha da möhkəmləndirilməsi işinə xidmət edəcəyinə əminlik vurğulanıb.

Gürcüstan prezidenti Georgi Marqvelaşvili BMT-nin Baş Assambleyasının 69-cu sessiyasında iştirak etməyəcəyini bəyan edib.

Modern.az saytı gürcü mətbuatına istinadən xəbər verir ki, prezident bu barədə Gürcüstan Xarici İşlər Nazirliyi ilə məsləhətləşmələr aparıldığını deyib.

G. Marqvelaşvilinin sözlərinə görə Gürcüstan XİN onun Nyu-Yorka getməməsi üçün təkid edib.

“Onlar təkid edirdi ki, nümyəndə heyətinə baş nazir İrakli Qaribaşvili rəhbərlik etməlidir. Onlar qeyd edir ki, iki nümayəndə heyətinin iştirakı Gürcüstanın imicinə zərər verəcək. Mənə bu səhər məlum oldu ki, səfərimə mane olmaq üçün ciddi işlər görülüb”.

Azərbaycan Prezidenti İlham Əliyev Məharət Mustafa oğlu Mustafayevin Nizami rayonu İcra hakimiyyətinin başçısı vəzifəsindən azad edilməsi haqqında sərəncam imzalayıb.

Modern.az-ın xəbərinə görə, bu haqda sentyabrın 10-da Prezidentin mətbuat xidməti məlumat yayıb.

Məharət Mustafayev 2011-ci ilin iyun ayında bu vəzifəyə təyin olunmuşdu. Nizami rayonunun icra başçısı vəzifəsinə hələlik yeni təyinat olmayıb

Yunanıstan parlamenti “Ksenofobiya əleyhinə mübarizə” adlı qanun qəbul edilib.

APA-nın Yunanıstan KİV-nə istinadən verdiyi xəbərə görə, layihənin qəbulunda iştirak edən 99 millət vəkilindən 3-ü bitərəf qalıb, 42-si layihənin əleyhinə, 54-ü isə lehinə səsə verib.

Qəbul olunmuş qanunda göstərilib ki, beynəlxalq məhkəmələr və Yunanıstan parlamentində tanınan soyqırımları mediada aşağılayanlar, inkar edənlər, Xolokost kimi cinayətləri rədd edənlər və bu məsələ ilə bağlı aksiyalara imkan verənlər dil, din, irq, rəng və cinsiyyət ayrı-seçkiliyi edənlərə pul və həbs cəzası veriləcək. Bu məsələ ilə bağlı pul cəzası 5-20 min avro, həbs cəzası isə 5-10 ay arasında olacaq.

Qeyd edək ki, bu qanun layihəsi 3 ilə yaxın müzakirə olunub. Layihənin son vəziyyətində Yunanıstan parlamentinin tanıdığı "Pontuslu yunan və Anadolu yunan soyqırımı" və "erməni soyqırımı" ifadələri çıxarılıb. 

Bunun əvəzinə isə sadəcə "Yunanıstan parlamentinin tanıdığı soyqırımlar" ifadəsi işlədilib. Həmçinin "bu məsələlərə tarixi prizmadan yanaşanlar və elmi araşdırma ilə məşğul olanlara bu qanun şamil olunmayacaq" maddəsi əlavə olunub.

Xatırladaq ki, Yunanıstan parlamenti qondarma "erməni soyqırımı"nı tanımayıb.