Avropa Komissiyasının sədri Joze Manuel Barrozu Rusiya prezidenti Vladimir Putinə xəbərdarlıq məktubu göndərib.

ANS PRESS-in məlumatına görə, məktubda Avropa Komissiyasının sədri bildirir ki, Avropa Birliyi ilə Ukrayna arasında ticarət sazişini yalnız Kiyev və Brüssel dəyişə bilər, Moskva yox.

Məktubun mətninin bu gün açıqlandığı bildirilir.

Ukrayna ilə Avropa Birliyi arasında həmin sazişi Ukrayna parlamenti keçən ay təsdiqləyib. Ancaq sazişin icrası 2016-cı ilin əvvəlinə qədər təxirə salınıb.

Barrozu məktubunda Rusiyaya xəbərdarlıq edir ki, Rusiya yeni ticarət addımları atsa, bu Rusiya ilə Avropa Birliyinin Ukrayna sazişini təxirə salmaq haqda razılaşmasını dəyişə bilər.

Sentyabrın 29-da Azərbaycan Prezidenti İlham Əliyevin və Qazaxıstan Respublikasının Prezidenti Nursultan Nazarbayevin Həştərxanda görüşü olub. Trend-in məlumatına görə, görüşdə Azərbaycan ilə Qazaxıstan arasında ənənəvi dostluq münasibətlərinin hazırkı vəziyyətindən məmnunluq ifadə edilib, əlaqələrin daha da inkişaf etdirilməsi üçün yaxşı potensialın mövcud olduğu vurğulanıb.

Ölkələrimizin müxtəlif sahələrdə əməkdaşlığının genişləndirilməsi məsələləri ilə bağlı fikir mübadiləsi aparılıb.

Rusiya prezidenti Vladimir Putin Xəzər dənizi ətrafında dəmir yolu dairəsi layihəsinin həyata keçirilməsini dəstəkləyib.

“APA-Economics” Rusiyanın “MİR” telekanalına istinadən verdiyi xəbərə görə, V. Putin bu layihənin perspektivli olacağını düşünür.

Qeyd edək ki, layihə Xəzər dənizinin əsas limanlarının birləşdirilməsini nəzərdə tutur. Bu isə öz növbəsində yüklərin daşınması zamanı vaxtı itkisinin və artıq məsrəflərin qarşısını alır.

Rusiya prezidenti hesab edir ki, sözügedən layihə Xəzəryanı ölkələrin iqtisadiyyatlarının rəqabətqabiliyyətliliyinə müsbət təsir göstərəcək.

Gürcüstanın Azərbaycan səfirliyi bu ölkənin tətbiq etdiyi yeni viza rejiminin detallarını açıqlayıb. Səfirlikdən verilən məlumata görə, Azərbaycan vətəndaşları Gürcüstana səfər etdikdə bu ölkədə 90 gündən çox olmamaqla vizasız qala biləcəklər.

Dalgatv APA-ya istinadən xəbər verir ki, Gürcüstanda 90 gündən artıq qalmaq istəyənlər “geoconsul.gov.ge” saytına daxil olmalı, ingilis dilində anket doldurmalı, tələb olunan sənədlərin “scan” olunmuş sürətini anketə əlavə etməli və anketdə Gürcüstanın Azərbaycandakı səfirliyini seçməlidirlər: “Anket Gürcüstanın Azərbaycandakı səfirliyinə çatacaq, səfirlik vətəndaşları dəvət edəcək və viza rüsumunu ödəmək üçün çek təqdim olunacaq”.

Biznes vizası (D1 kateqoriyası) üçün səyahət məqsədini sübut edən sənəd, sağlamlığın və bədbəx hadisənin sığortası haqqında sənəd, iş yerindən arayışı, müqavilə, Gürcüstanda yaşayış yerinin olması haqqında sənəd, bankda 5000 lari və ya 3000 dollar, yaxud da 2500 manat pul vəsaitinin olması haqqında sənəd, pasport surətini, ağ fonda 3x4 ölçülü fotoşəkili “scan” edib anketə əlavə etmək lazımdır.

Təhsil vizası (D3 kateqoriyası) üçün vətəndaşın həqiqətən qeyd etdiyi təhsil müəssisəsində təhsil aldığına dair arayış, sağlamlığın və bədbəxt hadisənin sığortası haqqında sənəd, Gürcüstanda yaşayış yerinin olması haqqında sənəd; bankda 5000 lari və ya 3000 dollar, yaxud da 2500 manat pul vəsaitinin olması haqqında sənəd, bu olmadığı təqdirdə isə atasının və ya digərinin sponsorluğu haqqında məktub və onun iş yerindən maaşı haqqında sənəd; pasport surəti və ağ fonda 3x4 ölçülü fotoşəkil “scan” olunaraq elektron anketə əlavə edilməlidir.

Gürcüstanda ailə üzvü olan Azərbaycan vətəndaşları üçün (D4 kateqoriyası) elektron viza anketini doldurduqdan sonra əlavə edəcəkləri sənədlərin siyahısı da qeyd olunub: “Sağlamlığın və bədbəxt hadisənin sığortası haqqında sənəd, Gürcüstanda yaşayış yerinin olması haqqında sənəd, bankda 5000 lari və ya 3000 dollar, yaxud da 2500 manat pul vəsaitinin olması haqqında sənəd, bu olmadığı təqdirdə isə ayda 1600 lari və 800 manat maaşının olması haqqında sənəd, Gürcüstanda olan ailə üzvünün sənədləri – həyat yoldaşının yanına gedirsə nikah haqqında arayış, övladlarının yanına gedirsə onların doğum haqqında şəhadətnaməsi, əcnəbinin doğum haqqında şəhadətnaməsi, Gürcüstanda yaşayan ailə üzvünün Gürcüstanda qanuni şəkildə yaşaması haqqında sənəd (əgər ailə üzvü Gürcüstanda viza əsasında qalmırsa) – yaşayış yerindən arayış, ağ fonda 3x4 ölçülü fotoşəkil və pasport”.

Qeyd olunub ki, viza aldıqdan sonra Gürcüstanda ədliyyə evlərində müddətli yaşayış icazəsi də almaq lazımdır.

Turistik viza (C1 kateqoriyası) üçün isə sağlamlıq və qəza sığortası sənədi; yaşayış yerini təsdiq edən sənəd; səyahət sənədləri üçün kifayət qədər vəsaitlərin olması haqqında sənəd, geri qayıdacağına zəmanət verən sənədin “scan” surətini elektron anketə əlavə etmək tələb olunur.

Bəşər Əsədin rəhbərliyi altında Suriyada sabitliyi təmin edə bilmərik. Suriyanın bütövlüyünü istəyiriksə, bu halda Əsəd hakimiyyətinin davam etməsi mümkün deyil.

Dalgatv APA-ya istinadən xəbər verir ki, bunu ABŞ prezidenti Barak Obama “CBS” telekanalında yayımlanan “60 minutes” proqramına müsahibəsində deyib.

Həm Əsəd rejiminə, həm də İŞİD-ə qarşı savaşın çətin olduğunu deyən B. Obama İŞİD-in Əsəddən daha təhlükəli olduğunu vurğulayıb: “ABŞ ordusu İraq və Əfqanıstanda olduğu kimi İŞİD-lə mübarizəyə qoşulmayacaq. Bu, Amerikanın İŞİD-ə qarşı savaşı deyil. Bu, Amerikanın təhlükəsizlik ortağımız olan bir ölkəyə kömək etmək üçün beynəlxalq ictimaiyyəti səfərbər etməsidir. Bölgədə siyasi sabitlik və əmin-amanlıq bir gecədə əldə oluna bilməz, bunun üçün xeyli vaxt lazımdır”.

B. Obama Qərbin İslamla mübarizə aparmadığını qeyd edib. “İslam sülh dinidir və müsəlmanların çoxu sülhsevər insanlardır. Ancaq indi müsəlman dünyasında fərqli bir tanrıya ibadət edən, günahsız insanların öldürülməsində qəbahət görməyən və uzun müddətdir böyüyən bir xərçəng var. Müsəlman ölkələri liderlərinin “bunlar bizi və İslam dinini təmsil etmir” bəyanatı vermələrini, habelə bu cür qruplaşmalara qarşı sərt mövqe sərgiləməsini təmin etməliyik”, - deyə o vurğulayıb.

B. Obama həmçinin ABŞ Milli Kəşfiyyat İdarəsinin direktoru Ceyms Klapperin “ABŞ kəşfiyyat orqanları İŞİD-dən gələn təhlükəni vaxtında düzgün dəyərləndirməyiblər və İraq ordusunun bu qruplaşmaya qarşı mübarizə imkanlarını yüksək qiymətləndiriblər” fikri ilə razı olduğunu bildirib.

Bu gün Avropa Şurası Parlament Assambleyasının (AŞPA) payız sessiyası çərçivəsində qurumun sədri Ann Brassör mətbuat konfransı keçirib.

Dalgatv APA-ya istinadən xəbər verir ki, mətbuat konfransında AŞPA sədri bir çox məsələlərlə yanaşı, Dağlıq Qarabağ münaqişəsinə də toxunub.

Ermənistanlı jurnalistin danışıqlarda Dağlıq Qarabağın da ayrıca tərəf kimi iştirakının mümkünlüyü ilə bağlı sualına A. Brassör belə cavab verib: “Ötən həftə mən Azərbaycanda səfərdə oldum və fürsətdən istifadə edərək parlamentlər səviyyəsində iki ölkənin nümayəndələri arasında təmasların keçirilməsinin vacibliyini bir daha qeyd etdim. Hazırda bu, olduqca mürəkkəb, hətta deyərdim ki, mümkünsüz bir məsələyə çevrilib. Lakin hər iki nümayəndə heyətini bir araya gətirə bilməyimiz çox vacib bir məsələdir. AŞPA-nın məndən öncəki sədri iki ölkə nümayəndə heyətləri arasında görüşlərin keçirilməsinə nail olmuşdu. Mən də ardıcıl olaraq bir neçə görüşlərin keçirilməsinə müvəffəq olmuşdum, lakin sonradan tərəflər bundan imtina etdilər. Biz məsələni parlamentarlar səviyyəsində irəli apara bilərik və mənim də istəyim odur ki, hər iki nümayəndə heyəti öz aralarında danışa bilsinlər. Lakin açıq deyim ki, bu gün bu məsələdə vəziyyət olduqca mürəkkəbdir və deyərdim ki, hətta mümkünsüzdür. Bizim işimizi davam etdirə bilməyimiz üçün hər iki tərəf öz aralarında danışmalıdır”.