Bu gün Azərbaycan Avtomobil Federasiyasının təşkilatçılığı ilə Bakı Kristal Zalında ilk dəfə olaraq “V1 Challenge Azerbaijan” yarışı start götürüb.
Yarışın açılış mərasimində Azərbaycanın birinci xanımı, Heydər Əliyev Fondunun prezidenti Mehriban Əliyeva, Heydər Əliyev Fondunun vitse-prezidenti Leyla Əliyeva və Arzu Əliyeva iştirak ediblər.
Əvvəlcə "V1 Challenge Azerbaijan" yarışının təqdimat şousu keçirilib.

Şouda İsraildən olan dünya şöhrətli “Voca People” qrupu konsert proqramı ilə çıxış edib. Tamaşaçılara incə yumor, gözəl səslər və maraqlı repertuarları özündə cəmləşdirən proqram təqdim olunub. Canlı vokal səslənmə ilə yüksəksəviyyəli bitboksu özündə birləşdirən akapella-şou zövqləri oxşayıb.

Sonra şounun aparıcısı Murad Dadaşov səhnəyə çıxıb. O qonaqları salamlayaraq qeyd edib ki, Azərbaycanda ilk dəfə olaraq belə bir möhtəşəm yarış keçirilir.

Sonra Azərbaycanın üçrəngli bayrağı ilə bəzədilmiş maşınların nümayişi olub. Bundan əlavə, "V1 Challenge Azerbaijan" yarışmasına hazırlığı əks etdirən videoçarx nümayiş etdirilib.

Daha sonra isə Azərbaycan Avtomobil Federasiyasının prezidenti Anar Ələkbərov yarışmanı rəsmi olaraq açıq elan edib. Tamaşaçıları salamlayan A.Ələkbərov qeyd edib ki, Azərbaycanın bir-birindən maraqlı və əhəmiyyətli tədbirlərə, beynəlxalq konfranslara, forumlara, sərgilərə və idman yarışlarına ev sahibliyi etməsinin şahidi oluruq:

“Fərəhləndirici haldır ki, bu gün Azərbaycanın müxtəlif sahələrdə əldə etdiyi təcrübə və nailiyyətlər, bir çox istiqamətlərdə həyata keçirdiyi layihələr beynəlxalq qurumlar tərəfindən örnək kimi qəbul edilir.

Ölkəmizin coğrafi mövqeyi və tarixi, xalqımızın mədəniyyətlər və sivilizasiyalararası dialoqa verdiyi önəm Azərbaycanı yüksək tolerantlıq ənənələrinin və multikulturalizm dəyərlərinin mövcud olduğu məkan kimi tanıdıb. Dövlət siyasətinin nəticəsi olaraq, bu gün biz Azərbaycanı dünya birliyində idman ölkəsi kimi də təqdim edə bilərik”.

A.Ələkbərov vurğulayıb ki, son 10 ildə Azərbaycanda 40-dan çox Olimpiya mərkəzi istifadəyə verilib, gənc idmançılarımız qarşısında yeni perspektivlər və imkanlar açılıb: “Biz dəfələrlə ayrı-ayrı idman növləri üzrə dünya və Avropa çempionatlarına ev sahibliyi etmişik. Bu gün isə paytaxtımız 2015-ci ildə idman tarixində ilk dəfə keçiriləcək birinci Avropa Oyunlarına hazırlaşır. Ölkəmizin beynəlxalq tədbirlərin keçirilməsi sahəsində əldə etdiyi təcrübə, təşkilat komitəsinin səyləri, Azərbaycan Respublikasının Prezidenti İlham Əliyevin yüksək templə görülən hazırlıq işlərinə birbaşa nəzarət etməsi deməyə əsas verir ki, Azərbaycan birinci Avropa Oyunlarını layiqincə keçirəcək”.

Federasiya prezidenti bildirib ki, idmanın təbliği, idman infrastrukturunun yaradılması və yenilənməsi, əhalinin maarifləndirilməsi kimi mühüm sahələri əhatə edən dövlət siyasəti ayrı-ayrı qurumları, o cümlədən Azərbaycan Avtomobil Federasiyasını bu sahələrdə daha aktiv fəaliyyətə sövq edir: “Azərbaycan Avtomobil Federasiyası avtomobil idmanı, yol hərəkəti təhlükəsizliyi və yol hərəkəti iştirakçılarının hüquqlarının müdafiəsi, avtomobil sənayesi və nəqliyyat infrastrukturu, avtomobil yarışları üzrə mütəxəssislərin, peşəkar pilotların hazırlanması sahəsində yeni layihələrin həyata keçirilməsinə başlayıb. Bizim əsas məqsədimiz ölkə ərazisində yol hərəkəti təhlükəsizliyi və mədəniyyətinin təbliğ olunmasına, vətəndaşların, xüsusilə də yaşlıların və gənclərin yol hərəkəti təhlükəsizliyi mövzusunda maarifləndirilməsinə, nəqliyyat vasitələrinin istismarı sahəsində ətraf mühitin mühafizəsinə yönəlmiş layihələri reallaşdırmaqdır”.

A.Ələkbərov əlavə edib ki, siması gündən-günə dəyişən Bakıda aparılan quruculuq işləri, salınan yeni yollar və körpülər idman turnirləri həvəskarlarına avtomobil yarışlarını paytaxtımızda canlı izləmək şansı da verir: “2016-cı ildə ölkəmizdə ilk dəfə olaraq “Formula-1” üzrə Avropa Qran-Pri yarışları keçiriləcək və Azərbaycan Avtomobil Federasiyası yarışların rəsmi tərəfdaşı kimi tədbirin təşkilində yaxından köməklik göstərəcək”.

Federiya prezidenti vurğulayıb ki, bu gün keçirilən "V1 Challenge Azerbaijan" yarışımasında 12 ölkədən, o cümlədən Almaniya, Belçika, Bolqarıstan, Fransa, Xorvatiya, İtaliya, Livan, Moldova, Portuqaliya, Türkiyə və Türkmənistandan peşəkar pilotlar yarışacaqlar.

Çıxışdan sonra Azərbaycan Respublikasının dövlət himni səsləndirilib. Bundan sonra isə tryuklar nümayiş etdirilib.

“2015-ci ilin yanvarın 1-dən fəaliyyətə başlayacaq Avrasiya İqtisadi İttifaqı üzv ölkələrin daxili bazarlarının inkişafına imkan yaradacaq”. Modern.az saytı rus KİV-nə istinadla xəbər verir ki, bunu Rusiya Federasiya Şurasının Beynəlxalq Əlaqələr Komitəsinin sədr müavini, Vladimir Cabarov deyib.

O, yeni ölkələrin Avrasiya Birliyinə qoşulması perspektivindən danışarkən Azərbaycan amilindən də söz açıb. Vladimir Cabarovun sözlərinə görə Rusiya Azərbaycanla konstruktiv əməkdaşlığa bel bağlayır. Komitə rəsmisi bildirib ki, Azərbaycan sözügedən ittifaqa üzv olacağı təqdirdə Dağlıq Qarabağ münaqişəsinin həllinə nail oluna bilər:

“Qırğızıstan il ərzində Avrasiya İqtisadi İttifaqına üzv olmaq haqqında qərar qəbul edəcək. Tacikistan Avrasiya İqtisadi cəmiyyətinin banilərindən biri olub. Bakı isə “Şərq tərəfdaşlığı” proqramında fəaliyyətini dayandırdı və Avropa Birliyi ilə assosiasiya sazişini imzalamadı. Əgər Azərbaycan Avrasiya İqtisadi İttifaqına girmək haqqında qərar qəbul etsə, Dağlıq Qarabağ münaqişəsinin həlli üçün yol açılacaq. Hər iki ölkə birlikdə eyni iqtisadi ittifaqda olacaqsa, problemin həllinə yol açılacaq ”.
Qeyd edək ki, Avrasiya Birliyi bu ilin may ayının 29-da Astanada Rusiya, Qazaxıstan, Belarus prezidentlərinin imzaladığı sənədlə təsis olunub. Oktaybrın 10-da isə ittifaqın Minsk sammitində Ermənistanın quruma üzvlüyü haqqında sənəd imzalandı.

Rusiya Prezidenti Vladimir Putin MDB ölkələrinin liderlərini Böyük Vətən müharibəsində Qələbənin 70 illiyi münasibətilə keçiriləcək təntənəli bayram tədbirlərinə dəvət edib.

Dalgatv Trend-ə istinadən xəbər verir ki, V.Putin bu gün Minskdə keçirilən MDB Dövlət Başçıları Şurasının iclasında deyib: "Ümumi borcumuz bu əlamətdar yubileyi birlikdə layiqli şəkildə qeyd etməkdir. Fürsətdən istifadə edib, Sizi, hörmətli həmkarlarımı 2015-ci ilin mayında təntənəli tədbirlərdə iştirak etmək üçün Moskvaya səfərə dəvət edirəm”.

“MDB-nin potensialı tükənməyib. Bu, əməkdaşlıq, qarşılıqlı fəaliyyət, regional və beynəlxalq həyatın aktual məsələlərinin müzakirə olunduğu məkandır”.
AzNews.az trend-ə istinadən xəbər verir ki, bunu cümə günü Azərbaycan Prezidenti İlham Əliyev Minskdə MDB Dövlət Başçıları Şurasının iclasında çıxış edərkən deyib.
İlham Əliyev bildirib: "Biz uzun müddətdir birgə ünsiyyət saxlayan və vacib məsələləri həll edən həmkarlar kimi belə açıq və səmimi ab-havada bizi narahat edən bütün məsələləri müzakirə etməliyik".

Dövlət başçısının sözlərinə görə, Azərbaycan MDB-də iştirakına böyük önəm verir: "Biz hesab edirik ki, təşkilatımız çərçivəsində qarşılıqlı fəaliyyət, əlaqələndirmə, bir-birinin problemini daha yaxşı başa düşmə, həmçinin digər vacib məsələlərin həlli işində bir çox şeylərə nail olunub. Eləcə də MDB üzvü olan ölkələrin çoxu ilə ikitərəfli formatda aktiv qarşılıqlı fəaliyyət göstəririk. Hesab edirəm ki, ikitərəfli əlaqələr təşkilatımız çərçivəsində münasibətlərimizi möhkəmləndirir və biz bundan sonra da ikitərəfli əməkdaşlığın potensialını genişləndirməyə çalışacağıq".

Prezidentin sözlərinə görə, iqtisadiyyat və investisiyalar sahəsində yaxşı təcrübə var: "Bu gün, əlbəttə ki, narahatlıq doğuran məsələlərə diqqət ayrılır. Bunlar regional, beynəlxalq təhlükəsizliklə bağlı məsələlərdir".

“Ermənistan və Ukrayna MDB-nin Bakıda keçiriləcək turizm və mədəniyyətlə bağlı sammitinə qatılmayacaq”.

AzNews.az xəbər verir ki, bu barədə xəbəri qurumun katibi Konstantin Pşenko deyib. Katibin sözlərinə görə, Ukrayna 26 oktyabr parlament seçkiləri ilə əlaqədar olaraq Bakıdakı tədbirdə iştirak etməyəcəyini bildirib. Katib daha sonra ermənilərin də Bakıdakı tədbirə qatılmayacağını bildirib:

“Ermənistan tərəfi Bakıda keçiriləcək tədbirdə iştirak etməyəcəyini deyib. Onlar bunun üçün heç bir səbəb göstərməyib. Azərbaycan tərəfi erməni nümayəndələrinin Bakıya edəcəyi səfəri zamanı onların təhlükəsizliyinə təminat verə biləcəyini açqıqlamışdı”.

Azərbaycan Prezidenti İlham Əliyev 2014-cü ilin 9 ayının sosial-iqtisadi inkişafının yekunlarına və qarşıda duran vəzifələrə həsr olunmuş iclası müsbət dəyərləndirib.

AzNews.az xəbər verir ki, ölkə başçısı bu barədə özünün tvitter hesabında yazıb.

“Son illər ərzində aparılan islahatlar, irəli sürülmüş təşəbbüslər ölkəmizin dinamik inkişafını təmin etmişdir. Doqquz ayda ümumi daxili məhsul 2,5 faiz, qeyri-neft sektoru isə 6 faiz artmışdır. İnflyasiya 1,5 faiz olmuş, əhalinin pul gəlirləri isə 5,4 faiz artmışdır. İlin əvvəlindən Azərbaycan iqtisadiyyatına 19 milyard dollar sərmayə qoyulmuşdur. İlin əvvəlindən maliyyə resurslarımız 3 milyard 600 milyon dollar artıb və 53 milyard dollardan çoxdur. Bizim əsas məqsədimiz neft amilindən asılılığımızı maksimum dərəcədə azaltmaq və qeyri-neft sektoru hesabına gələcəkdə Azərbaycanı inkişaf etdirməkdir”-deyə İlham Əliyev qeyd edib.

Prezident həmçinin Azərbaycanın gələcək inkişafının sənayenin inkişafı ilə bağlı olmasını də bildirib.

“Azərbaycanda müasir emal müəssisələri yaradılır. Hazırda ixrac potensialımızın artırılması üçün çox gözəl imkanlar var. Turizmin inkişafı sürətlə gedir. Bizim gözəl təbiətimiz var, istənilən turizm növü Azərbaycanda mövcuddur.Artıq infrastruktur da var. Aeroportlar, magistral yollar və bütün bölgələrdə beşulduzlu, dördulduzlu, üçulduzlu gözəl otellər yaradılır. Azərbaycanın gələcək inkişafı sənayenin inkişafı ilə bağlı olmalıdır. Sənaye klasterlərinin yaradılması prosesi gələcəkdə də davam etdirilməlidir”.