Daxili işlər naziri, general-polkovnik Ramil Usubov Birləşmiş Ərəb Əmirliklərinin Azərbaycandakı səfiri Salem Xəlifə Məhəmməd Əl-Gaflini qəbul edib.

Dalgatv  APA-ya istinadən xəbər verir ki, nazir BƏƏ-nin Azərbaycanın müstəqilliyini tanıyan ilk dövlətlərdən biri olduğunu, beynəlxalq təşkilatlarda hər zaman Azərbaycanı dəstəklədiyini qeyd edərək iki ölkə arasındakı əlaqələrin uğurla inkişaf etdiyini bildirib.

2007-ci ilin sonlarında Birləşmiş Ərəb Əmirliklərinə səfərini xatırladan daxili işlər naziri Azərbaycan tərəfinin iki ölkənin müvafiq strukturları arasında əlaqələrin inkişafında hər zaman maraqlı olduğunu, bu görüşün əməkdaşlığın daha da genişlənməsinə xidmət edəcəyini vurğulayıb.

Səfir Salem Xəlifə Məhəmməd Əl-Gafli səmimi qəbula və ətraflı məlumata görə təşəkkür edib, paytaxt da daxil olmaqla Azərbaycanın bütün bölgələrində yaradılmış təhlükəsiz və əmin-amanlıq şəraitindən məmnunluq duyduğunu, bundan sonrakı fəaliyyəti dövründə də ikitərəfli əlaqələrin dərinləşməsinə öz töhfəsini verəcəyini bildirib.

Türkiyə prezidenti Rəcəb Tayyib Ərdoğan Suriyanın Kobani şəhəri uğrunda döyüşən 2 terrorçu təşkilat barədə maraqlı açıqlamalar verib.

ANS PRESS-in məlumatına görə, Ərdoğan Kobaniyə peşmərgələrin göndərilməsi təklifinin ona məxsus olduğunu bildirib:

"Barak Obama ilə telefon danışığımda bu təklifi mən etdim. Bildirdim ki, PYD və PKK qruplarına verəcəyiniz dəstəyi anlayışla qarşılayırıq. Ancaq bu bizim üçün qəbul edilə bilməz. Biz yalnız Azad Suriya Ordusu ilə əməkdaşlıq edə bilərik. Ancaq indi ABŞ rəsmiləri çıxıb başqa şeylər deyirlər. Media da bu xəbərləri fərqli şərh edir".

Daha sonra PKK üçün Kobaninin niyə belə əhəmiyyətli olduğunu sual edən Ərdoğan Şimali İraqdan gələn peşmərgələrin Türkiyə ərazisindən Kobaniyə keçməsinə qarşı olmadığını deyib:

"İki gün keçdi, üçüncü, dördüncü gündəyik. Kobani müdafiə olunur. Kobani özləri üçün niyə bu qədər strateji əhəmiyyət daşıyır, onu anlamaqda çətinlik çəkirəm. Çünki Kobanidə mülki adam qalmayıb. 200 min nəfər ölkəmizə keçib, onlara ev sahibliyi edirik. Kobanidə yalnız 2 min qədər döyüşçü var".

ABŞ-ın kürdlər üçün hava vasitəsi ilə göndərdiyi silahların İŞİD-in əlinə keçdiyini söyləyən Türkiyə prezidenti anti-İŞİD koalisiyassının Kobanini müdafiəsinə verdiyi dəstəyi tənqid edib.

Rusiya prezidenti Vladimir Putin Gürcüstanın dövlət başçısı Georgi Marqvelaşvili ilə görüşməyə hazırdır. Modern.az xarici KİV-ə istinadən bildirir ki, bunu Putinin mətbuat katibi Dmitri Peskov deyib. Onun fikrincə bunun üçün Gürcüstan tərəfinin siyasi iradə nümayiş etdirməsi lazımdır: “Prezident öz sözünü deməlidir. Putin aydın şəkildə bəyan edib ki, əgər Gürcüstandan siqnal alarsa, görüş baş tutacaq”.

Gürcüstan prezidenti də bir müddət əvvəl Rusiya ilə səmərəli dialoqa hazır olduğunu bəyan edib.

Azərbaycanın birinci xanımı Mehriban Əliyeva Bakıda keçirilən “İslam Əməkdaşlıq Təşkilatına üzv dövlətlərin inkişafında qadınların rolu” mövzusunda V Beynəlxalq konfransda iştirak edən İran İslam Respublikasının ailə və qadın məsələləri üzrə vitse-prezidenti Şahindoxt Movlaverdi ilə görüşüb.
Modern.az xəbər verir ki, Azərbaycanın birinci xanımı Mehriban Əliyeva qonağı salamlayaraq “İslam Əməkdaşlıq Təşkilatına üzv dövlətlərin inkişafında qadınların rolu” mövzusunda V Beynəlxalq konfransın uğurlu keçəcəyinə ümidvar olduğunu söyləyib. Mehriban Əliyeva tədbirdə iştirak etdiyinə görə Şaxindoxt Movlaverdiyə minnətdarlığını bildirib.
Hazırda Azərbaycan ilə İran arasındakı əməkdaşlığın müxtəlif sahələri əhatə etdiyini deyən Azərbaycanın birinci xanımı bu il ərzində hər iki ölkənin prezidentlərinin üç dəfə görüşdüyünü bildirdi, qarşılıqlı səfərlərin və görüşlərin əlaqələrin daha da möhkəmləndirilməsinə töhfə verdiyini vurğulayıb.

Mehriban Əliyeva Bakıda keçirilən beynəlxalq konfransın qadın məsələlərinin həllində mühüm rolunu oynayacağına əminliyini ifadə edib. Şahindoxt Movlaverdi konfransa dəvətə görə təşəkkürünü bildirib. Qonaq ilk dəfədir ki, Bakıya səfər etdiyini deyərək, ümidvar olduğunu vurğulayıb ki, bu konfrans İslam ölkələrində qadınların rolunun artmasına töhfə verəcək.

Oktyabrın 28-də icra başçılarının iştirakı ilə Bakıda böyük bir seminar-müşavirə keçiriləcək.

“Qafqazinfo” xəbər verir ki, seminara Prezident Administrasiyası rəhbəri, akademik Ramiz Mehdiyev rəhbərlik edəcək.

Müşavirədə icra başçıslarına ictimai-siyasi və humanitar sahədə fəaliyyətlə bağlı müəyyən tövsiyələr və təlimatlar veriləcək. Eyni zamanda dövlət və əhali ilə iş prinsipləri, icra hakimiyyətləri ilə digər dövlət qurumlarının koordinasiyalı fəaliyyəti müzakirə olunacaq.

Nazirlərin də həmin müşavirədə iştirakı nəzərdə tutulub. Mikayıl Cabbarov, Səlim Müslümov, Hüsenyqulu Bağırov və digər nazirlərin seminarda çıxışı gözlənilir.

Seminar 3 gün davam edəcək.

Gürcüstanın paytaxtı Tbilisidə Mirzə Fətəli Axundov adına Mədəniyyət Muzeyində Azərbaycanda fəaliyyət göstərən Beynəlxalq Heydər Əliyev Düşüncə Mərkəzinin (BHƏDM) təşəbbüsü və təşkilatçılığı ilə Azərbaycan dövlət müstəqilliyinin bərpasının 23 illiyi qeyd edilib. Tədbirdə Azərbaycanın Dövlət himni səsləndirilib. Sonra tədbirdə muzeyin direktoru Leyla Əliyeva və BHƏDM-nin sədri Vüsal Bayramov çıxış ediblər. Tədbirdə Gürcüstan Humanitar və İncəsənət Akademiyasının prezidenti, parlament üzvü Demuri Başeleişvili, Gürcüstan parlamentinin Diaspor və Qafqaz məsələləri üzrə komitə sədri, parlamentin deputatı Qubad Sanikidze, Gürcüstan Parlamentinin sabiq deputatı Ramiz Bəkirov,Gürcüstanda fəaliyyət göstərən Ağsaqqallar Şurasının sədri İshaq Novruzov, Gürcüstan parlamentinin deputatı Mahir Dərziyev, sabiq parlament üzvü, Heydər Əliyev adına Tbilisi Azərbaycan Dövlət Teatrının əməkdaşı Hidayət Hüseynov və başqaları çıxış edərək Azərbaycan-Gürcüstan ölkələrinin tarixi dostluğundan, ölkələrimizin bir-birinə arxa olmağından, irimiqyaslı layihələrin Gürcüstandan keçməsində Azərbaycan dövlətinin rolundan, iki dövlətin strateji əməkdaşlığından, Azərbaycan-Gürcüstan münasibətlərinin indi də geniş şəkildə inkişaf etdirilməsindən danışılıb. Müstəqilliyə həsr olunan tədbirdə Azərbaycan-Gürcüstan dostluğunun alternativi olmadığı bildirilib. Qeyd olunub ki, ölkələrimizin siyasi-iqtisadi əlaqələri daha da inkişaf edir.

Tədbirin sonunda Azərbaycan dövlət müstəqilliyinin bərpasının 23 illiyinə həsr olunan görüş iştirakçılarına BHƏDM-nin diplomları təqdim olunub.

Tədbirdə Gürcüstanın baş nazirinin köməkçisi Savalan Mirzəyev, Gürcüstanın barışıq və vətəndaş inteqrasiyası məsələləri üzrə dövlət nazirinin Kvemo-Kartli üzrə nümayəndəsi Zaur Darğallı və Gürcüstan parlamentinin üzvləri, Azərbaycanın Gürcüstanda fəaliyyət göstərən şirkət nümayəndələri, gürcü və ictimaiyyət nümayəndələri, QHT rəhbərləri, jurnalistlər iştirak edib.

Gürcüstan parlamentinin Diaspor və Qafqaz məsələləri üzrə komitə sədri, parlamentin deputatı, tarix elmləri doktoru Qubad Sanikidze  müsahibəsində Azərbaycanın müstəqillik gününü gürcülər də bayram kimi qeyd etdiyini bildirib.O qeyd edib ki,bu gün bizim üçün də bayramdır. Bu gün dünyada baş verən mənfi hadisələr bizə bildirir ki, biz strateji, siyasi-iqtisadi, həm də mədəni sahələrdə bir olmalıyıq. Biz emosiyalarımızdan yüksəkdə olmalıyıq. Biz bilmirik ki, sabah başımıza nələr gələcək. Gürcüstan və Azərbaycanın min illər davam edən dostluq əlaqələri nəsillər davam etdikcə inkişaf etməlidir. Çünki bizim qohumluq əlaqələrimiz də var. Tarixdən bəllidir ki, gürcü çarı ilə Şirvanşahlar hökmdarının əlaqəsi möhkəm olub və siyasi və mədəni əlaqələrimiz tarixən gücləndirilib. Bu gün qarşımızda bir məqsəd var - təhlükəsizliyimizi qoruyaraq bir olmaq. Bu, bizim alnımıza yazılıb.