Türkiyənin Baş naziri Əhməd Davudoğlu Azərbaycan Prezidenti İlham Əliyevə təbrik məktubu ünvanlayıb.

ANS PRESS-in məlumatına görə, təbrikdə deyilir: "Sizi doğum gününüz münasibətilə millətim, hökumətim adından və şəxsən öz adımdan səmimi qəlbdən təbrik edirəm.

Əlaqələrimizin bugünkü strateji müttəfiqlik səviyyəsinə çatmasında Zati-alinizin dəyərli töhfələrinin oynadığı rolun əhəmiyyətini yüksək qiymətləndirdiyimizi ifadə etmək istəyirəm. Eyni zamanda, geniş dünyagörüşünüz və müdrik liderliyiniz sayəsində qardaş Azərbaycanın sürətlə inkişaf etdiyini, həm beynəlxalq aləmdə, həm də regionda getdikcə daha qüdrətli söz sahibinə çevrilməsini görməkdən çox məmnunuq.

Eyni zamanda, 2015-ci il yanvarın 15-də ölkəmizə edəcəyiniz səfər zamanı Zati-aliniz ilə görüşməkdən şad olacağam.

Zati-alinizə möhkəm cansağlığı və xoşbəxtlik diləyir, dost və qardaş Azərbaycan xalqının əmin-amanlığı və rifahı naminə ən səmimi arzularımı ifadə edirəm".

Rusiya prezidenti Vladimir Putinin Türkiyəyə səfəri Amerika Birləşmiş Ştatları və Avropa Birliyini narahat edib.

ANS TV-nin məlumatına görə, bunu Türkiyənin enerji və təbii sərvətlər naziri Taner Yıldız açıqlamasında bildirib.

Nazir bu fikirlərində əsasız deyil! Nazir deyib ki, səfərdən dərhal sonra Vaşinqton və Brüsseldən çox saylı zənglər olub. ABŞ və Avropa Birliyi Ankaradakı sövdələşmələrin mahiyyətini öyrənmək istəyiblər. Ankaranın cavabi isə belə olub:

“Türkiyə bir ay öncə ABŞ-la bir razılıq əldə etmişdir. Bu bizim başqa ölkələrlə iş əlaqələri qurmamaq anlamına gəlmir.Türkiyə AB ilə, Azərbaycan, Rusiya, Türkmənistanla, İranla və bütün ölkələrlə iş birliyi qurmaq iqtidarındadır“.

GUAM-ın baş katibi Valeri Çeçelaşvili Gürcüstana işgüzar səfəri zamanı bu ölkənin xarici işlər naziri, xanım Tamar Beruçaşvilli ilə görüşüb.

APA-nın GUAM-ın mətbuat xidmətinə istinadən verdiyi məlumata görə, görüş zamanı tərəflər təşkilatın 2015-vi ildəki fəaliyyətini, yeni layihələrin həyata keçirilməsini, eləcə də GÜAM ölkələri arasında siyası və GUAM tərəfdaşları arasında parlament əməkdaşlığının möhkəmləndirilməsi məsələlərini müzakirə ediblər.

Gürcüstan paytaxtındakı Mirzə Fətəli Axundov adına Mədəniyyət Muzeyində Borçalı İrəli İctimai Birliyinin (BİİB) və muzeyin təşkilatçılığı ilə ümummilli lider Heydər Əliyevin anım gününə həsr olunan tədbir keçirilib.

APA-nın Gürcüstan bürosunun məlumatına görə, tədbiri Borçalı İrəli İctimai Birliyinin sədri Məhəbbət İmanov açaraq Heydər Əliyevin Azərbaycan müstəqilliyi və azərbaycançılıq ideyaları uğrunda mübarizəsindən söhbət açıb.

Tədbirdə Tbilisi Texniki Universitetin professoru, akademik Quram Qvenadze, professorlar David Qununaşvili, İvane Ocaidze çıxış edərək Gürcüstan-Azərbaycan dostluğundan, Heydər Əliyevin Gürcüstan və Azərbaycan iqtisadiyyatının inkişaf etdirilməsində olan rolundan, onun müstəqil Azərbaycan siyasətindən, Gürcüstandan keçən beynəlxalq layihələrdən və Azərbaycanın siyasi, iqtisadi və hərbi cəhətdən güclü dövlətə çevrilməsindən danışıblar.Tədbirdə Heydər Əliyevin həyat və fəaliyyətindən bəhs edən idea və ssenari müəllifi Şahismayıl Şəmmədoğlunun “Heydər Əliyev və Gürcüstan” filmi , eləcə də “Heydər Əliyev və Gürcüstan”kitabı gürcü və Azərbaycan dillərində nümayiş olunub. Anım gününə həsr olunan tədbirdə Tbilisidə fəaliyyət göstərən müxtəlif universitetlərin gürcü və azərbaycanlı tələbələri, Azərbaycanın Gürcüstandakı səfirliyinin əməkdaşları, media nümayəndələri iştirak edib.

Azərbaycan, Gürcüstan və Türkiyənin xarici işlər nazirləri dekabrın 10-da keçirdikləri dördüncü üçtərəfli görüşlə bağlı Qars Bəyanatı imzalayıblar.

APA-nın xəbərinə görə, nazirlər bəyanatda ölkələr arasında ikitərəfli və üçtərəfli əməkdaşlığın inkişafının regionda sabitliyin güclənməsi, hər üç ölkənin rifahının yüksəlməsi, regional layihələr və investisiyalar üçün daha əlverişli mühitin yaradılması, xalqlararası münasibətlərin inkişafı kimi ümumi məqsədlərə xidmət etdiyini vurğulayıblar.

Sənəddə 8 iyun 2012-ci ildə imzalanmış Trabzon Deklarasiyası, 28 mart 2013-cü il tarixli Batumi birgə Kommunikesi, 19 fevral 2014-cü il tarixli Gəncə Bəyanatı ilə əsası qoyulmuş üçtərəfli regional əməkdaşlığın əhəmiyyəti vurğulanıb, eləcə də bu əməkdaşlıq mexanizmlərinin, siyasi dialoq və üçtərəfli səciyyəvi layihələrin icra edilməsində effektli vasitə kimi öz əksini tapdığı qeyd olunub.

Nazirlər ölkələr arasında iki və üçtərəfli əməkdaşlığın inkişafından məmnunluq ifadə ediblər. Onlar bir daha strateji tərəfdaşlığa, mehriban qonşuluq, qarşılıqlı hörmət və üç ölkə arasında inama söykənən əməkdaşlığın bundan sonra da inkişaf etdirilməsi istiqamətində qəti öhdəliklərini təsdiq ediblər.

Nazirlər həll edilməmiş münaqişələrin regionda sülhü, sabitliyi və iqtisadi inkişafı sarsıtdığını, buna görə də suverenliyə və beynəlxalq səviyyədə tanınan sərhədlər daxilində ərazi bütövlüyünə əsaslanan təcili həllə ehtiyac olduğunu vurğulayıblar.

Onlar regiondakı son vəziyyət haqqında fikir mübadiləsi aparıb, ölkələrin suverenliyini və ərazi bütövlüyünü dəstəklədiklərini təkrarlayıb və bu istiqamətdə Azərbaycanın Dağlıq Qarabağ regionunda və ətraf rayonlarında, Gürcüstanın Abxaziya və Tsxinvali/Cənubi Osetiya regionlarında münaqişələrin beynəlxalq hüququn fundamental norma və prinsiplərinə, xüsusilə də suverenlik, ərazi bütövlüyü və beynəlxalq səviyyədə tanınan sərhədlərin toxunulmazlığına əsaslanan təcili nizamlanması barədə çağırışlarını yeniləyiblər.

Nazirlər həmçinin əməkdaşlığın inkişafı və birgə fəaliyyətdə yeni imkanların qazanılması istiqamətində ortaq marağa uyğun regional və qlobal əhəmiyyətli üçtərəfli müntəzəm konsultasiyaların keçirilməsi barədə öhdəliklərini yenidən təsdiqləyiblər.

Nazirlər üçtərəfli görüşlərin çərçivəsinin genişlənməsindən məmnunluq ifadə edib, xüsusilə də üç tərəfli əməkdaşlığı ən yüksək siyasi səviyyəyə qaldıran və bundan sonrakı üçtərəfli görüşlərin inkişafı üçün güclü birgə öhdəliyi təsdiqləyən Azərbaycan, Gürcüstan və Türkiyə prezidentlərinin 6 may, 2014-cü il tarixli Tiflis görüşünü alqışlayıblar.

Onlar həmçinin üç ölkənin müdafiə nazirlərinin Azərbaycanın Naxçıvan şəhərində baş tutan görüşündən məmnunluq ifadə ediblər və iqtisadiyyat nazirlərinin dördüncü görüşünün və üçtərəfli Biznes Forumun keçirilməsinin əhəmiyyətini qeyd ediblər: “Ölkələr arasında yeni yüksək gərginlikli elektrik ötürücü xətlərinin tamamlanması ilə yeni impuls almış enerji sektorunda böyüyən üçtərəfli əməkdaşlığı alqışlayıblar və Cənub Qaz Dəhlizi üçün əsas magistral rolunu oynayan və cəlb olunmuş bütün ölkələr üçün enerji təhlükəsizliyinin zəmanəti olan TANAP layihəsinin reallaşmasına tam dəstəklərini ifadə ediblər”.

Nazirlər həmçinin Bakı-Tiflis-Qars dəmiryolu layihəsinin Asiya və Avropa arasında bağlantı yaradaraq ticarət dövriyyəsi və regionda iqtisadi inkişafa verəcəyi töhfənin əhəmiyyətini bildirib və aidiyyatı qurumları layihəni vaxtında tamamlamaq üçün əllərindən gələn səyi göstərməyə təşviq ediblər: “Azərbaycan, Gürcüstan və Türkiyənin şərq və qərb, eləcə də şimal və cənub arasında mərkəzi mövqeyini qeyd edib, Böyük İpək Yolunun yenidən həyata qaytarılmasına töhfə verəcək Ələt qəsəbəsindəki Bakı Beynəlxalq Dəniz Ticarəti Limanının, Anakliyadakı Qara Dəniz Limanının və Mərmərə Layihəsi çərçivəsində İstanbul boğazındakı sualtı tunel layihələrini alqışlayıb və bu kontekstdə ölkələr arasında gömrük proseduralarının asanlaşdırılması və infrastrukturun təkmilləşdirilməsi ilə multimodal nəqliyyatın təşkil edilməsində əməkdaşlığı artırmaq barədə razılığa gəliblər”.

Nazirlər müntəzəm olaraq üçtərəfli görüşlərin davam etdirilməsi, bu görüşləri digər sahələrdə də inkişaf etdirərək ölkələr, eləcə də beynəlxalq təşkilatlar arasında mövcud dialoqun və əməkdaşlığın şaxələndirilməsi və inkişaf etdirilməsinin əhəmiyyətini vurğulayıblar.

Onlar növbəti üçtərəfli görüşü 2015-ci ildə Gürcüstanda keçirməyə razılıq veriblər.

Qeyd edək ki, bu gün Azərbaycan, Türkiyə və Gürcüstanın xarici işlər nazirləri Elmar Məmmədyarov, Mövlud Çavuşoğlu və Tamar Beruçaşvilinin dördüncü üçtərəfli görüşü keçirilib. Görüş Türkiyənin Qars şəhərində olub.

"Fransa Dağlıq Qarabağ münaqişəsinin həllində üzərinə götürdüyü öhdəliklərə sadiq qalır."

ANS PRESS-in məlumatına görə, bunu Fransanın Ermənistana yeni təyin olunmuş səfiri Jan Fransua Şarponte bildirib.

O, Ermənistan Milli Məclisinin sədri Qalust Saakyan ilə görüşdə ermənilərə indidən xoş görünmək üçün deyib ki, Ermənistan-Azərbaycan qoşunlarının təmas xəttində baş verən son hadisələr Dağlıq Qarabağ münaqişəsinin sülh yolu ilə həlli üzrə aparılan danışıqlarda irəliləyişə imkan yaratmır.

Səfir vurğulayıb ki, Fransa öz öhdəliyinə uyğun olaraq, Dağlıq Qarabağ münaqişəsinin sülh yolu ilə nizamlanmasına tərəfdardır və bu prosesə əlindən gələn dəstəyi verməyə hazırdır.

Erməni parlamentinin sədri isə Dağlıq Qarabağ münaqişəsinin nizama salmasında ATƏT-in Minsk qrupunun həmsədri kimi Fransanın beynəlxalq arenadakı fəaliyyətini yüksək qiymətləndirib.