Rusiyanın XİN başçısı Sergey Lavrov sentyabrın 1-də Azərbaycana işgüzar səfər edəcək.

"DalğaTV" xəbər verir ki, bu barədə Rusiya XİN məlumat yayıb.

“Nazirin Azərbaycanın xarici işlər naziri Elmar Məmmədyarovla danışıqları baş tutacaq. Danışıqlar zamanı qarşılıqlı maraq doğuran ikitərəfli və çoxtərəfli əməkdaşlıq məsələləri, həmçinin regiondakı vəziyyət müzakirə olunacaq”, - XİN-nin məlumatında deyilir.

Azəbaycan Prezidenti İlham Əliyev Milli Məclisə seçkilərin təyin edilməsi haqqında sərəncam imzalayıb

Sərəncamda qeyd edilib ki, Azərbaycan Respublikasının Milli Məclisinə seçkilər 2015-ci il noyabrın 1-nə təyin edilsin.

Bu gün qardaş ölkələr olan Azərbaycan-Türkiyə- Türkmənistan xarici işlər nazirlərinin Türkiyədə keçirilən növbəti üçtərəfli görüşündə çıxış edən Azərbaycanın xarici işlər naziri Elmar Məmmədyarov terror və ekstremizmi kəskin pisləyərək Azərbaycan dövlətinin hazırda belə hücumlara məruz qalan qardaş Türkiyənin yanında olduğunu bildirib.

Nazir qeyd edib ki, terror, ekstremizm və aqressiv separatçılıqla müşayiət olunan mövcud təhlükəli çağırışların qarşısının alınması və regionda dinamik inkişaf üçün münbit şəraitin təmini naminə təhlükəsizlik sahəsində əməkdaşlığın davam etdirilməsi zəruridir.

Görüşə ev sahibliyi etdiyi üçün Türkiyə dövlətinə təşəkkürünü bildirən nazir E.Məmmədyarov qeyd edib ki, fürsətdən istifadə edərək bir daha vurğulamaq istəyirəm ki, biz Türkiyədə törədilən terror aktlarını qətiyyətlə pisləyir və ona qarşı mübarizədə qardaş Türk dövlətinin yanındayıq: "Şəhid olmuş qardaş və bacılarımıza Allahdan rəhmət, yaxınlarına baş sağlığı diləyirəm. Xüsusilə qeyd etmək istərdim ki, terror, ekstremizm və aqressiv separatçılıqla müşayiət olunan mövcud təhlükəli çağırışların qarşısının alınması, dövlətlərimizin müstəqilliyinin möhkəmləndirilməsi və regionda dinamik inkişaf üçün münbit şəraitin təmini naminə təhlükəsizlik sahəsində əməkdaşlığın davam etdirilməsi zəruridir. Azərbaycan üçün regional təhlükəsizlik, terrorçuluqla mübarizə və enerji təhlükəsizliyinin təmin olunması xarici siyasətin prioritet sahələri sırasındadır".

Nazir sonra qeyd edib ki, regionda sülh və sabitliyin qorunması üçün dövlətlərin bir-birinin suverenliyinə, ərazi bütövlüyünə və beynəlxalq səviyyədə tanınmış sərhədlərinin toxunulmazlığına hörmət etməsi, o cümlədən təcavüz siyasətindən çəkinməsi əsas amildir: "Bununla belə, regiondakı sülhə və inkişafa ciddi maneələr də mövcuddur. Ermənistan-Azərbaycan münaqişəsinin həll olunmaması regionda sülhə, əmin-amanlığa ən böyük təhdid, o cümlədən, regional əməkdaşlığın inkişafına da ciddi maneədir. 20 ildən artıqdır Azərbaycanın beynəlxalq birlik tərəfindən tanınan əraziləri Ermənistanın işğal altındadır. Bir milyondan artıq azərbaycanlı öz doğma yurd-yuvalarından qaçqın və məcburi köçkün vəziyyətinə düşüb. Beynəlxalq təşkilatlar, ilk növbədə, BMT Təhlükəsizlik Şurası münaqişənin həlli ilə bağlı dörd qətnamə qəbul edib. Bu qətnamələrdə işğalçı silahlı qüvvələrinin işğal edilmiş torpaqlardan dərhal, qeyd-şərtsiz və tam şəkildə çıxarılması tələb olunsa da, Ermənistan buna məhəl qoymur. Ermənistanın həyata keçirdiyi etnik təmizləmə və soyqırım kimi insanlıq əleyhinə ağır cinayətlərlə müşayiət olunmuş işğalçılıq siyasəti onu bütün regional inkişaf proseslərindən kənarda qoyub".

E.Məmmədyarov sonra bildirib ki, Azərbaycan-Türkiyə-Türkmənistan arasında mövcud olan dostluq və qardaşlıq münasibətləri təhlükəsizlik, iqtisadi və humanitar sahələrdə əlaqələrin daha da genişləndirilməsi üçün əlverişli zəmin yaradıb: "Bundan irəli gələrək ölkərimizin iştirakı ilə regionda bir sıra əhəmiyyətli layihələrin həyata keçirilməsi istiqamətində işlər davam etdirilir. Son illərdə Azərbaycan və Türkiyə silahlı qüvvələrinin döyüş hazırlığının və bacarığının artırılması, o cümlədən qarşılıqlı fəaliyyətin təşkilini nəzərdə tutan birgə hərbi təlimləri intensiv hal almışdır. Azərbaycan geostrateji mövqeyə malik olmaqla, regional və qlobal əhəmiyyətli enerji və nəqliyyat dəhlizlərinin üzərində yerləşir. Bu da qarşılıqlı səmərəli əməkdaşlıq qurmaq üçün geniş imkanlar yaradır. Bundan irəli gələrək bu gün uğurla həyata keçirilən Bakı-Tbilisi-Ceyhan neft kəməri layihəsi ilə başlayaraq Azərbaycan regionda bir sıra əhəmiyyətli layihələrin təşəbbüskarı olmuş, “TANAP” və “TAP” layihələrini ana xəttləri olduğu “Cənub Qaz Dəhlizi”, habelə Bakı-Tbilisi-Qars dəmir yolu və Yeni Bakı Beynəlxalq Dəniz Ticarət Limanı kimi layihələrin həyata keçirilməsi ilə Avrasiya qitəsinin mühüm regionları arasında əlaqə yaradır".

E.Məmmədyarov qeyd edib ki, “Cənub Qaz Dəhlizi” layihəsi Avropanın ən böyük infrastruktur layihəsidir: "Bu layihəyə qoyulacaq vəsaitin həcmi ən azı 45 milyard dollardır. "Cənub Qaz Dəhlizinin” vacibliyi, ondan ibarətdir ki, Avropa yeni alternativ mənbədən davamlı şəkildə əhəmiyyətli qaz həcmləri ilə təchiz olunacaq. Məlum olduğu kimi, dünya iqtisadiyyatının qloballaşması dövründə nəqliyyat sahəsinin rolu artmaqdadır. Müxtəlif mənbələrə istinadən il ərzində Çindən Avropaya daşınan məhsulların ümumi həcmi 180 milyon tondan artıqdır və 2020-ci ilə bu rəqəmin 240 milyona çatacağı proqnozlaşdırılır. Asiyadan Avropaya daşınan yüklərin həcminin artım templərini nəzərə alaraq, həmin yüklərin qısa vaxt müddətində çatdırılması məsələsi gündəmə çıxır. Bu baxımdan Şərq-Qərb nəqliyyat dəhlizi coğrafi yerləşməsi, multimodal nəqliyyat infrastrukturunun mövcudluğu və iqtisadi səmərəliliyi baxımından digər dəhlizlərlə müqayisədə cəlb edicidir. İstifadəyə veriləcək Bakı-Tbilisi-Qars dəmir yolu və Yeni Bakı Beynəlxalq Dəniz Ticarət Limanı layihələri Şərq-Qərb nəqliyyat dəhlizinin əsas seqmentlərin birinə çevrilərək layihədə iştirak edən ölkələrin inkişafına müsbət töhfə verəcək".

E.Məmmədyarov vurğulayıb ki, regional formatda qeyri-neft sektorunda əməkdaşlığın gücləndirilməsi vacibdir: "Burada informasiya-kommunikasiyaları texnologiyaları, bərpa olunan enerji, orta və kiçik sahibkarlıq kimi sahələri qeyd etmək olar. Ölkələrimiz arasında humanitar sahədə üçtərəfli əməkdaşlıq imkanları da əsas müzakirə obyektidir. Belə ki, ortaq dəyərlərimiz və maraqlarımız bu istiqamətdə əməkdaşlığı qaçılmaz edir. Bu sahədə də imzalanmış Çərçivə Proqramından yol alaraq əməkdaşlığı inkişaf etdirmək gündəlikdə duran məsələlərdəndir. Hər üç ölkənin mədəniyyət və incəsənət xadimlərinin iştirakı ilə ortaq mədəniyyət günlərinin təşkili, ali təhsil müəssisələri, gənclər və idman təşkilatları arasında birbaşa əlaqələrin yaradılması və birgə fəaliyyət istiqamətlərinin müəyyən edilməsi humanitar sahədə əməkdaşlığın inkişafı üçün stimul yaradır. Turizm sahəsində müştərək fəaliyyətin və əməkdaşlığın gücləndirilməsi, xüsusilə investisiya imkanlarının öyrənilməsi və təcrübə mübadiləsi məqsədilə dövlət qurumlarının və turizm şirkətlərinin nümayəndələrinin qarşılıqlı səfərlərinin həyata keçirilməsi, birgə seminar, tur və tədris kurslarının təşkilinin də faydalı olacağına inanıram".

Nazir qeyd edib ki, bu sahələr üzrə əməkdaşlığın dərinləşdirilməsində müxtəlif səviyyələrdə mütəmadi təmasların davam etdirilməsinin faydalı olduğunu düşünürəm: "Bu görüşlərə həmçinin iş və elm adamlarının da dəvət edilməsi mümkündür. 29 yanvar 2015-ci il tarixində Aşqabad şəhərində imzalanmış “2015-2017-ci illər üçün Azərbaycan-Türkmənistan-Türkiyə əməkdaşlığının Çərçivə Proqramı”nın icrası ilə bağlı görülmüş işləri qiymətləndirmək məqsədilə birgə işçi qrupunun yaradılmasını və ya milli koordinatorların təyin edilməsini təklif edirəm. Əminəm ki, bu formatda görüşlərimiz dövlətlərimiz arasında mövcud olan dostluq və qardaşlıq münasibətlərinin daha da möhkəmləndirilməsi ilə yanaşı, regionumuzda sülh, əmin-amanlıq və davamlı inkişafın təmin olunmasına da öz töhfəsini verəcək. Fürsətdən istifadə edərək əziz həmkarlarımı Azərbaycan Respublikası, Türkiyə Respublikası və Türkmənistanın xarici işlər nazirlərinin növbəti üçtərəfli görüşündə iştirak etmək üçün Azərbaycana dəvət edirəm".

Azərbaycan, Türkiyə və Türkmənistan xarici işlər nazirlərinin Antalyada keçirilən üçüncü üçtərəfli görüşün nəticələrinə dair bəyanat imzalanıb.

Bu barədə Azərbaycan Xarici İşlər Nazirliyindən AzNews.az-a verilən məlumatda bildirilir.

Tərəflər görüşdə ortaq tarix və mədəni birlikdən öz qüvvəsini əldə edən dostluq, qardaşlıq, mehriban qonşuluq və qarşılıqlı fayda əsasında davam etdirilən əlaqələrin daha da inkişafı istiqamətindəki iradələrini bir daha təsdiqləyiblər.

Xarici İşlər Nazirləri səviyyəsində keçirilən sayca üçüncü görüşün üç ölkə arasındakı əlaqələrin və əməkdaşlığın inkişafına verdiyi töhfədən duyulan məmnuniyyət ifadə edilib və əməkdaşlığın konkret layihələr əsasında daha da inkişaf etdirilməsi üzrə iradələrin olduğu xüsusilə vurğulanıb.

Nazirlər 26 may 2014-cü il tarixli "Bakı Bəyanatı" və 29 yanvar 2015-ci il tarixli "Aşqabad Bəyanatı"na sadiqlik təsdiqlənərək "Aşqabad Bəyanatı"nın əlavəsini təşkil edən "2015-2017-ci illər üçün Azərbaycan-Türkmənistan-Türkiyə əməkdaşlığının Çərçivə Proqramı" kontekstində görülən işlərlə bağlı fikirlərini bildiriblər.

Azərbaycan, Türkiyə və Türkmənistan Prezidentləri arasında 2015-ci ilin oktyabr ayında Türkmənistanda keçiriləcək Zirvə Toplantısına hazırlıq işləri müzakirə edilib.

Azərbaycan, Türkiyə və Türkmənistan arasında nəqliyyat sahəsində əməkdaşlığın inkişafına dair Anlaşma Memorandumunun və Azərbaycan, Türkiyə və Türkmənistan arasında enerji sahəsində əməkdaşlığın inkişafına dair Anlaşma Memorandumunun Yüksək Səviyyədə keçiriləcək görüş zamanı imzalanması məqsədilə sözügedən layihələrin razılaşdırılması üzrə tamamlanma işlərin aparılmasının önəmi qeyd edilib.

Regionda sülh və sabitliyin təmin olunması ilə bağlı üzərlərinə yeni məsuliyyətlərin düşdüyünü qəbul edərək, mövcud əməkdaşlığın dərinləşdirilməsi istiqamətində səylərin artırılmasının davam etdiriləcəyi bəyan edilib.

Dövlətlərin müstəqilliyi, suverenliyi və ərazi bütövlüyünə hörmət və dəstək bir daha təsdiq edilib. Tərəflər qlobal və regional sülh, təhlükəsizlik və sabitliyin möhkəmləndirilməsi məqsədi ilə Birləşmiş Millətlər Təşkilatı başda olmaqla, beynəlxalq və regional təşkilatlarda mövcud olan yaxın və faydalı əməkdaşlığın daha da inkişaf etdirilməsi və bu təşkilatlarda namizədliklərinin qarşılıqlı şəkildə dəstəklənməsi üzrə mövqelərini davam etdirməyə dair iradələrini bəyan ediblər.

BMT çərçivəsində mühüm təşəbbüslərdən biri olan Sivilizasiyalar Alyansı daxilində sivilizasiyalararası dialoqun gücləndirilməsi və qarşılıqlı hörmət mühitinin yaradılması məqsədilə əlaqələndirilmiş fəaliyyətlər təkmilləşdirilməklə davam etdiriləcəyini və Alyansın 2016-cı ildə Bakıda keçiriləcək VII Qlobal Forumunun uğurlu alınması üçün əməkdaşlıq ediləcəyi bildirilib.

“Asiyanın ürəyi” bölgəsində sülh və sabitliyin möhkəmləndirilməsi məqsədi ilə təsis olunan İstanbul Prosesi çərçivəsində fəal əməkdaşlığın davam etdirilməsində tərəfdar olduqları təsdiqlənib.

Terrorizmin bütün forma və təzahürləri ilə mübarizə sahəsində beynəlxalq əməkdaşlığın ilk sıralarında yer aldıqlarını, xoş mərama əsaslanan və multikultural tarixi irsi ilə sivilizasiyalararası dialoq səylərini fəal şəkildə dəstəklədiklərini, həmçinin İslamofobiya, irqçilik və ayrı-seçkiliyin digər bütün təzahürləri ilə mübarizənin davam etdirilməsi məsələsində qətiyyətli olduqları təsdiqlənib.

İqtisadi və ticarət sahəsindəki əlaqələrin genişdirilməsi məqsədilə dərin və geniş əhatəli əməkdaşlığın təşviqi üzrə birgə səylərin gücləndirilməsinin vacibliyi qeyd edilib. Tərəflər bu kontekstdə qarşılıqlı investisiyaların həcminin artırılması istiqamətində üç ölkənin dövlət və özəl sektoru arasındakı əməkdaşlığı inkişaf etdirməyə və qarşılıqlı məlumat mübadiləsinin davam etdirilməsinə hazır olduqlarını bildiriblər.

Turizm, səhiyyə, kənd təsərrüfatı, qabaqcıl texnologiya, sənaye, informasiya və kommunikasiya texnologiyaları, neft-kimya, qida sənayesi, nəqliyyat infrastrukturu, aqrar tədqiqat və davamlı inkişaf sahələrində əməkdaşlığı möhkəmləndirmək məqsədi ilə bilik və təcrübə mübadiləsini, tədqiqat və istehsal ilə bağlı birgə təşəbbüsləri, aqrar ticarəti və investisiyaların artırılmasının dəstəklənməsi məsələsində razılığa gəlindiyi bildirilib. Üç ölkənin kiçik və ortahəcmli müəssisələri arasında konstruktiv əməkdaşlığın davamlı şəkildə və qətiyyətlə aparılması ilə bağlı ümumi mövqenin olduğu ifadə edilib.

Enerji sahəsində nail olunacaq birgə əməkdaşlığın qlobal və regional sülh və sabitliyə töhfə verəcəyini qeyd etməklə, Türkmən və Azərbaycan təbii qazının Türkiyə üzərindən keçməklə Avropaya və beynəlxalq bazarlara nəqlinin əhəmiyyəti vurğulanıb.

Türkmənistan qazının Azərbaycan və Türkiyə ərazilərindən keçməklə Avropaya nəqli layihəsində üçtərəfli formatda işçi qrupun yaradılmasının xüsusi əhəmiyyət kəsb etdiyi bir daha qeyd edilib.

Üç ölkənin enerji şirkətləri arasında əməkdaşlığın inkişaf etdirilməsinin vacibliyi qeyd edilməklə bu konteksdə üçtərəfli formatda görüşlərin keçirilməsinin mühüm əhəmiyyətə malik olduğu vurğulanıb.

Üç ölkənin potensialından maksimum səviyyədə istifadə edilməsi məqsədi ilə Türkmənistan, Azərbaycan və Türkiyə üzərindən keçən nəqliyyat dəhlizlərinin əsas ticarət marşrutuna çevrilməsi üçün əməkdaşlığın inkişaf etdirilməsinin əhəmiyyəti vurğulanıb.

Xəzər dənizində nəqliyyat daşımalarının sadələşdirilməsi və xərclərinin azaldılmasına nail olmaq üçün limanların gücü, infrastrukturu və logistika imkanlarının inkişaf etdirilməsi ilə multimodal daşımaları əlverişli edəcək şərtlərin qarşılıqlı təmin olunmaqla yaradılması və dəstəklənməsi məqsədi ilə dövlət və özəl sektorun əlaqədar idarə və təşkilatlarının mütəmadi görüşlər keçirməsinə ehtiyac olduğunu qeyd edərək, bu çərçivədə Azərbaycan, Türkiyə və Türkmənistanın bütün əlaqədar idarə və təşkilatlarının iştirakı ilə üçlü formatda iclasınmümkün olan ən qısa zamanda keçirilməsinin faydalı olacağı bildirilib.

İstanbul Boğazının altından keçən Marmaray layihəsinin, Bakı-Tbilisi-Qars (BTQ) dəmir yolu xəttinin, Xəzər dənizində Azərbaycanın Ələt və Türkmənistanın Türkmənbaşı limanlarının region iqtisadiyyatının inkişafına mühüm töhfə verəcəyi qeyd edilib.

Nəqliyyat sahəsindəki əməkdaşlığın inkişaf etdirilməsi və üç ölkənin bu sahədə malik olduğu potensialdan tam şəkildə istifadə edilməsi məqsədi ilə Əfqanıstan - Türkmənistan -Azərbaycan Respublikası – Gürcüstan - Türkiyə Respublikası" nəqliyyat dəhlizinin yaradılması məsələsi nəzərdən keçirilib.

Xarici İşlər Nazirlərinin növbəti üçtərəfli görüşünün Azərbaycanda keçirilməsi qərara alınıb.

Belçikanın “EurActiv” adlı nüfuzlu nəşrində İlinsk Dövlət Universitetinin Konstitusiya Tədqiqatları Mərkəzinin direktoru, professor Giorgi Meladzenin Gürcüstana və Azərbaycana turist axınının artması barədə məqaləsi dərc olunub (http://www.euractiv.com/sections/baku-2015-european-games/tourist-boom-georgia-and-azerbaijan-helps-mitigate-low-oil-prices). Müəllif qeyd edir ki, bu iki dövlət xarici turistlərə əsrarəngiz təbiət, memarlıq inciləri və qədim tarixi abidələr təqdim edir.

G.Meladze turizm sektorunun dünya bazarında neftin qiymətdən düşməsinin öhdəsindən gəlməkdə Bakıya çox kömək etdiyini qeyd edərək yazır ki, göstərilən iki dövlət iqtisadiyyatın bu sektoruna böyük sərmayələr yatırır. Müəllif xatırladır ki, “Lonely Planet” adlı populyar turizm nəşri Gürcüstanı “dünyanin ən gözəl ölkələrindən biri” adlandırır, bir çox başqa nəşrlər isə Azərbaycan haqqında belə yazır.

G.Meladze iki qardaş dövlətin Qara dəniz və Xəzər dənizi sahillərinə ayrıca diqqət yetirir. O, belə bir fakta da diqqəti cəlb edir ki, Bakı birinci Avropa Oyunlarında minlərlə turist və təqribən 6000 idmançı qəbul etməyə hazırlaşır, Gürcüstanda isə Avropanın müxtəlif ölkələrindən olan təqribən 4000 atletin iştirak edəcəyi gənclər arasında Avropa Olimpiya Festivalı keçiriləcək.

Səfirlikdən AzNews.az-a daxil olan məlumatnin APA xəbər agentlyində dərc olunan məqalə ilə bağlı mövqeyi

AzNews.az xəbər verir ki, APA-nın diplomatik mənbələrdən əldə etdiyi məlumata əsasən, Yunanıstan prezidenti Prokopis Pavlopulos Bakıda keçiriləcək l Avropa Oyunlarında iştirak etmək qərarından daşınıb. Buna səbəb isə Yunanıstanın Azərbaycandakı səfiri Dimitris Sunqasın bu ölkənin Xarici İşlər Nazirliyinə ötürdüyü dezinformasiya xarakterli məlumatlar olub.

Belə ki, səfir mayın 21-də Yunanıstan XİN-ə göndərdiyi məlumatda iddia edib ki, l Avropa Oyunlarının açılışında heç bir dövlət və hökumət başçısı iştirak etməyəcək.

Səfir öz iddiasını həm də Avropa İttifaqının Bakı ofisindən səfirliyə daxil olan və guya l Avropa Oyunlarının dünya liderləri tərəfindən “boykot” ediləcəyi haqqında məlumat ilə əsaslandırıb.

Səfir məktubunda hətta iddia edib ki, Rusiya və Türkiyə prezidentləri də açılışda iştirak etməyəcəklər. Məhz bundan sonra Yunanıstan hökuməti səfirin yanlış iddiasını əsas tutaraq, açılış mərasimində idman nazirinin müavini Stavros Kontonis səviyyəsində təmsil olunmaq barədə qərar qəbul edib.

Diplomatik mənbə onu da bildirib ki, Yunanıstan XİN-i formal olaraq bu qərarını Prezident Prokopis Pavlopulosun mayın 9-da Qələbə günü münasibətilə Moskvada keçirilən hərbi paradda iştirak etməməsi və buna görə də balans saxlamaq zərurəti ilə əsaslandırıb.

O da məlum olub ki, son günlər Avropa İttifaqı və onun Bakıdakı ofisi ayrı-ayrı ölkələrin rəhbərliyinə və Azərbaycandakı səfirliklərinə müraciətlər edərək, onları l Avropa Oyunlarının açılış mərasimində iştirakdan çəkindirməyə çalışır.

***

Bu iddiaları Yunanıstan Respublikasının Bakıdakı Səfirliyi təkzib edibı. Məsələ ilə bağlı daxil olan məlumatda deyilir: "Yunanıstan Respublikasının Bakıdakı Səfiri APA- xəbər agentliyində "Avropa İttifaqının Bakı ofisinin və Yunanıstanın Azərbaycandakı səfirinin təxribatçı işbirliyi ortaya çıxıb" adı altında dərc olunan məqalənin bütün məzmununu qəti şəkildə təkzib edir. Yunanıstan tərəfi rəsmi mövqeyini bildirəcəkdir".