Martın 6-da Gürcüstanın baş naziri Qərbi Gürcüstanda gürcü müsəlman icmasına hədiyyə edilən binaların açılışında iştirak edib.

Bu barədə APA-nın Gürcüstan bürosuna GMİ-nin şeyxi Ramin İgidov bildirib.

Məlumata görə, tikililərin açılış mərasimində baş nazir İrakli Qaribaşvili, Acarıstanın hökümət başçısı Arçil Xabadze, Ali Məclisin sədri Avtandil Beridze, Dini Məsələlər üzrə Dövlət Agentliyinin sədri Zaza Vaşakmadze, GMİ-nin müftiləri Hacı Beglar Kamaşidze və Hacı Yasin Əliyev, GMİ şeyxinin nümayəndəsi Hacı Qurban Murquzov, Qərbi Gürcüstan müftisinin yerli nümayəndələri, GMİ-nin administrasiya əməkdaşları iştrak ediblər.

Qeyd edək ki, baş nazirin iştirakı ilə GMİ nəzdinə verilən binalardan biri Acarıstandakı muftiliyin rəsmi idarəsi, ikinci bina isə Təhsil Mərkəzinin fəaliyyəti üçün nəzərdə tutulub.

Şəhid pilotların cənazə mərasimində danışan Türkiyə prezidenti Rəcəb Tayyib Ərdoğan sabiq dövlət başçısı Abdullah Gülün siyasətə dönməsi ilə əlaqədar danışıb.

Modern.az Türkiyə mediasına istinadən xəbər verir ki, Eskişehirdə şəhid pilotlar üçün təşkil edilən cənazə mərasimində mətbuat nümayəndələrinin suallarını cavablayan prezident Rəcəb Tayyib Ərdoğan, Abdullah Gülün siyasətə dönməsi ilə əlaqədar düşüncələri soruşulanda deyib: “Siyasətə dönməsi məqsədəuyğun olar, xeyirli olar”.

Bir jurnalistin “Abdullah Güllə bir görüşünüz olubmu, özü millət vəkili olacaqmı" sualına cavab verən Ərdoğan mövzuyla əlaqədar olaraq bunları söyləyib: “Namizədlik mövzusu Abdullah beyin öz seçimidir. Keçən həftə özü ilə bir telefon danışığım olub. Atasının narahatlığı səbəbi ilə axtarıb şəfa dilədim. Verəcəyi qərar gözəl də olar. Xeyirli olar. Məqsədəuyğun olar. Amma qərar Abdullah beyindir”.

Azərbaycanın Dini Qurumlarla İş üzrə Dövlət Komitəsinin sədri Mübariz Qurbanlı Gürcüstanın Azərbaycandakı səfiri Teymuraz Şaraşenidzeni qəbul edib.

Komitədən APA-ya verilən məlumata görə, görüş zamanı Azərbaycanla Gürcüstan arasında din sahəsində münasibətlərin bundan sonra da uğurla inkişaf etməsinin vacibliyi vurğulanıb.

Görüşün sonunda səfir səmimi qəbula görə Dövlət Komitəsinin sədrinə təşəkkürünü bildirib.

ABŞ-ın Dövlət katibi Con Kerri rusiyalı siyasətçi Boris Nemtsovun qətlə yetirilməsi ilə bağlı açıqlama yayıb.

AZNEWS.AZ xəbər verir ki, bu haqda məlumatı TASS agentliyi yayıb.

“Mən Nemtsovun öldürülməsi xəbərindən şoka düşmüşəm və Moskvanın mərkəzində Rusiya Baş nazirinin sabiq müavininin ölümünə görə çox pis olmuşam. ABŞ rəhbərliyi Rusiyadan Nemtsovun qatillərinin tez bir zamanda tutulmasını tələb edir. Biz Rusiya xalqı ilə birgəyik, mərhumun ailəsinə başsağlığı veririk”,- deyə Con Kerri bildirib.

Con Kerri açıqlamasını bu sözlərlə bitirib: “Öz həyatını Rusiyanın demokratikləşməsinə həsr edən siyasətçi həm də Rusiya ilə ABŞ arasındakı münasibətləri tənzimləmək istəyirdi”.

Qeyd edək ki, prezident Vladimir Putinə ən güclü rəqib hesab edilən Boris Nemtsov ötən gecə Moskvanın mərkəzində Vasilyevsk enişində qətlə yetirilib.

55 yaşlı siyasətçiyə 4 güllə vurulub. O, hadisə yerində keçinib. Hadisə zamanı onun yanında ukraynalı bir qız da olub.

Son anda verilən məlumata görə, Boris Nemtsovun yanında olan xanımın kimliyi bəlli olub. O, 23 yaşlı ukraynalı model Anna Duriskayadır.

Azərbaycan Respublikası Gənclər Təşkilatları Milli Şurası (ARGTMŞ) “Xocalıya ədalət” beynəlxalq kampaniyası çərçivəsində yeni aksiyaya başlayıb.

ARGTMŞ-dan verilən məlumata görə, aksiyanın məqsədi Xocalı soyqırımı ilə bağlı həqiqətləri dünya ictimaiyyətinə çatdırmaq və kampaniyaya dəstək verməkdir. Aksiya elektron poçt ünvanlarında istifadə olunan imzalarda “Xocalıya ədalət” kampaniyası ilə əlaqədar elektron bannerin yerləşdirilməsindən ibarətdir. Bu bannerləri yerləşdirməklə göndərilən hər bir elektron poçt “Xocalıya ədalət” kampaniyasına dəstəkdir. Aksiya çərçivəsində “Xocalıya ədalət” kampaniyası və soyqırımı qurbanlarına aid statistik göstəriciləri ehtiva edən elektron banner tədbir iştirakçılarının elektron poçt imzalarına əlavə olunacaq. Aksiya iştirakçılarının bütün ölkə daxili və beynəlxalq yazışmalarında bu elektron banner əks ediləcək.

ARGTMŞ-ın sədri Şahin Seyidzadə bildirib ki, son illərdə Heydər Əliyev Fondunun vitse–prezidenti Leyla Əliyevanın rəhbərliyi ilə aparılan “Xocalıya ədalət” kampaniyası vasitəsilə faciə barədə həqiqətlərin dünyaya çatdırılması istiqamətində mühüm nailiyyətlər əldə olunub. Tərəfimizdən “Xocalıya ədalət” kampaniyasına dəstək olaraq həyata keçirilən elektron poçt imzası aksiyası yalnız fevralın 26-sı ilə məhdudlaşmayacaq. Aksiyaya qoşulan vətəndaşlarımızın gündəlik yazışmalarında da əks olunacaq.

Aksiya barədə ətraflı məlumatı bu ünvandan əldə etmək mümkündür.

Azərbaycanın Rusiyadakı səfiri Polad Bülbüloğlu 70 illik yubileyinin keçirilməsi ilə əlaqədar Gürcüstanda səfərdədir. APA-nın Gürcüstan bürosunun məlumatına görə, P. Bülbüloğlu Gürcüstanın katalikos-patriarxı II İlya ilə görüşüb.

Yubilyarı səmimi şəkildə qəbul edən II İlya P. Bülbüloğlunun 70 illik yubileyinin Tiflisdə keçirilməsini alqışlayıb və bu tədbirin yaddaşlarda qalacağını bildirib. P. Bülbüloğlu görüş üçün patriarxa minnətdarlığını bildirib, Tiflis və Şuşa xatirələrindən danışıb.

Görüşdə Azərbaycanın Gürcüstandakı səfiri Azər Hüseyn və ARDNŞ-in Gürcüstan nümayəndəliyinin rəhbəri Mahir Məmmədov iştirak ediblər.