Bu gün - oktyabrın 18-i Azərbaycanın Dövlət Müstəqilliyi Günüdür.

"Dalğa TV" xəbər verir ki, XX yüzilliyin sonlarında SSRİ-nin süquta uğraması ilə yaranan əlverişli tarixi şərait və taleyin bəxş etdiyi imkan nəticəsində Azərbaycan xalqı XX yüzillikdə ikinci dəfə müstəqillik bayrağını qaldırıb. Bu, xalqımızın siyasi tarixində XX əsrdəki ikinci parlaq qələbəsi idi.

Rusiyadakı demokratik qüvvələrin fəaliyyəti nəticəsində SSRİ respublikalarında da mərkəzdən qaçma, öz suverenliyinə qovuşmaq istəkləri qarşısıalınmaz həddə çatmışdı. Belə şəraitdə Azərbaycan Respublikası Ali Sovetinin xalqın tələbi ilə çağırılmış növbədənkənar sessiyasında 1991-ci il avqustun 30-da "Azərbaycan Respublikasının Dövlət müstəqilliyini bərpa etmək haqqında" bəyannamə qəbul edilib.

Azərbaycan Respublikasının Ali Sovetinin həmin ilin 18 oktyabr tarixli sessiyasında "Azərbaycan Respublikasının Dövlət müstəqilliyi haqqında" Konstitusiya Aktı qəbul edilib.

Azərbaycan Respublikasında dekabrın 29-da ümumxalq səsverməsi keçirilib. Referendum bülleteninə bir sual yazılmışdı: "Siz "Azərbaycan Respublikasının dövlət müstəqilliyi haqqında" Azərbaycan Respublikası Ali Sovetinin qəbul etdiyi Konstitusiya Aktına tərəfdarsınızmı?"

Azərbaycan xalqı yekdilliklə respublikanın dövlət müstəqilliyinə tərəfdar çıxıb.

1992-ci ilin mayında Milli Məclis tərəfindən Azərbaycan Respublikasının Dövlət himni (musiqisi Üzeyir Hacıbəyovun, sözləri Əhməd Cavadın), az sonra üçrəngli bayraq, içində alov olan səkkizguşəli ulduz təsvirli dövlət gerbi təsdiq olunub.

1991-ci il oktyabrın 18-dən Azərbaycan müstəqil, suveren bir ölkədir və xalq bu tarixi bayram kimi qeyd edir.

"Ruslar bir neçə dəfə üzr istədilər və bildirdilər ki, istəmədən sizin hava sərhədlərinizi pozduq".

"Dalğa TV"nin məlumatına görə, bu sözləri Türkiyə xarici işlər naziri Feridun Sinirlioğlu jurnalistlərə açıqlaması zamanı deyib.

Sinirlioğlu bildirib ki, Rusiyanın göndərdiyi nümayəndə heyəti eyni halın təkrarlanmaması üçün işlərin getdiyini deyib. Rusiya hərbi hava qüvvələrinin nümayəndəsi general Sergey Dronovun başçılıq etdiyi hərbi nümayəndə heyəti sərhəd pozuntusunun səbəblərini də açıqlayıb. Rus hərbiçilər sərhəd pozuntusunun pis hava şəraiti və Suriya ərazisinə bələd olmamaqla izah ediblər.

Rusiya bir necə həftədir ki, Suriya ərazisini bombalamağa başlayıb. Hava hücumları zamanı Rusiya qırıcıları Türkiyənin hava sərəhədlərini pozmuşdu. Türkiyə buna görə Rusiya səfirini Xarici İşlər Nazirliyinə çağıraraq xəbərdarlıq edib. Amma bundan sonra da Rusiya eyni addımı təkrarlayıb. Bundan sonra NATO üzvləri də daxil olmaqla dünyanın bir çox dövlətləri Rusiyanın bu addımını tənqid edib.

NATO -nun baş katibi Yens Stoltenberq bildirmişdi ki, Türkiyənin hava sərhədini pozması heç də təsadüfə oxşamır.

"Rusiya hələ də Türkiyənin hava sərhədinin niyə pozduğu haqda heç bir izahat verməyib. Bizim üçün bu sərhəd pozuntusu heç də təsadüf kimi görünmür. Xəbərdarlıqlara baxmayaraq, Rusiyaya məxsus Su-30 və Su-24 təyyarələri Türkiyə hava məkanına daxili olub. Biz Avropadakı müşahidə mərkəzlərindən hava sərhədlərinin pozulduğunu dəfələrlə müşahidə etmişik. Bu, yolverilməz haldır."

Məsələyə münasibət bildirən Türkiyə prezidenti Rəcəb Tayyib Ərdoğan Rusiyanın bu addımları təkrar edəcəyi halda adekvat cavab veriləcəyini dedi.

Amma Rusiya nümayəndə heyətinin Türkiyə səfəri aradakı gərginliyin aradan qalxdığını ortaya çıxarır. Regionda bir-birinə ehtiyacı olan hər iki dövlətin arasında gərginliyin yaranmasına səbəb olan bəzi qüvvələr baş verən sərhəd pozuntusunu öz məqsədləri üçün istifadə etmək istəyiblər. Çünki Rusiya və Türkiyənin əlaqələrinin pozulması regionda maraqları olan qüvvələrin əl-qolunu açması ilə nəticələnərdi.

Rusiya və Türkiyə qaz alışı və nüvə enerjisi sahələrində əməkdaşlıq yüksək səviyyədə inkişaf edir. Rusiyanın ən böyük təbii qaz alıcılarından biri Türkiyədir. Ölkələr arasında “Türk Axın”ı qaz layihəsinin həyata keçirilməsi nəzərdə tutulur.

"Dalğa TV" xəbər verir ki, Azərbaycan prezidenti İlham Əliyev bu barədə müvafiq sərəncam imzalayıb.

"Azərbaycan Respublikası Konstitusiyasının 109-cu maddəsinin 5-ci bəndini rəhbər tutaraq qərara alıram:

Eldar Əhməd oğlu Mahmudov Azərbaycan Respublikasının milli təhlükəsizlik naziri vəzifəsindən azad edilsin", - deyə sərəncamda bildirilir.

Oktyabrın 16-da Gürcüstanda ənənəvi olaraq hər il keçirilən "Tbilisoba" bayramının rəsmi açılışı olub.

"Dalğa TV" xəbər verir ki, tədbirdə Azərbaycanın Rusiyadakı səfiri,  xalq artisti, tanınmış bəstəkar və müğənni Polad Bülbüloğluna "Tbilisi şəhərinin fəxri vətəndaşı" adı təqdim olunub.

Tbilisi şəhərinin meri David Narmaniya fəxri adın diplomunu və şəhərin rəmzi açarını Polad Bülbüloğluna təqdim edib.

Mer səfiri təbrik edib, ona diplomatik fəaliyyətində və yaradıcılığında uğurlar arzulayıb.

Polad Bülbüloğlu belə yüksək ada layiq görüldüyünə görə Gürcüstanın dövlət və hökumət rəhbərlərinə minnətdarlığını bildirib.

"Tbilisi şəhərinin fəxri vətəndaşı" adı hər il bu ölkənin ictimai-siyasi, mədəni həyatında fərqlənən vətəndaşlarına verilir. Bu il ilk dəfə bu fəxri ada başqa ölkənin Azərbaycan vətəndaşı Polad Bülbüloğlu layiq görülüb. Bu fəxri ad Polad Bülbüloğluna Azərbaycan-Gürcüstan dostluq əlaqələrinin inkişafındakı xidmətlərinə görə verilib.

Mərasimdə Gürcüstanın dövlət və hökumət üzvləri, Azərbaycanın Gürcüstandakı səfiri Azər Hüseyn, Bakı Musiqi Akademiyasının rektoru, xalq artisti, professor Fərhad Bədəlbəyli və digər şəxslər iştirak ediblər.

"Tbilisoba" bayramı ənənəvi olaraq Gürcüstanda hər il keçirilir. Gürcüstanın müxtəlif bölgələrindən elm, incəsənət, mədəniyyət, səhiyyə sahəsində çalışan şəxslər, kənd təsərrüfatının inkişafında fərqlənən fermer və fərdi torpaq mülkiyyətçiləri paytaxta dəvət olunurlar.

İki gün davam edəcək bayram tədbirləri çərçivəsində paytaxtda kənd təsərrüfatı məhsullarının satış yarmarkası, bayram şənlikləri, atəşfəşanlıq təşkil olunacaq.

İpək Yolu Beynəlxalq Forumunda iştirak etmək üçün Tbilisidə səfərdə olan Azərbaycan Respublikası Baş nazirinin müavini Abid Şərifov oktyabrın 15-də ölkəmizin Gürcüstandakı səfirliyində olub.

Diplomatlarla görüşdən və səfirliyin binası ilə tanışlıqdan sonra Abid Şərifov M.F.Axundzadə adına Azərbaycan Mədəniyyəti Muzeyinə gəlib. Muzeyin direktoru Leyla Əliyeva Baş nazirin müavininə buradakı mədəniyyət nümunələri barədə məlumat verib.

Sonra Abid Şərifov SOCAR-ın Gürcüstan nümayəndəliyində olub. Nümayəndəliyin rəhbəri Mahir Məmmədov Baş nazirin müavinini SOCAR-ın Gürcüstanda həyata keçirdiyi layihələr, əldə etdiyi nailiyyətlər barədə məlumatlandırıb.

"Dalğa TV" xəbər verir ki, Azərbaycan Respublikasının Prezidenti İlham Əliyev MDB Dövlət Başçıları Şurasının Qazaxıstan Respublikasının Akmola vilayətinin Burabay qəsəbəsində keçiriləcək iclasında iştirak etmək üçün oktyabrın 15-də bu ölkəyə işgüzar səfərə gəlib.

Azərbaycanın və Qazaxıstanın dövlət bayraqlarının dalğalandığı Kokşetau şəhərinin hava limanında Prezident İlham Əliyevin şərəfinə fəxri qarovul dəstəsi düzülmüşdü.

Dövlətimizin başçısını yüksək vəzifəli dövlət və hökumət nümayəndələri qarşıladılar.