Baş nazir Artur Rasi-zadə Azərbaycanda rəsmi səfərdə olan Gürcüstanın baş nazirinin müavini, xarici işlər naziri Giorgi Kvirikaşvili ilə görüşüb.

"Dalğa TV" xəbər verir ki, görüşdə Azərbaycan-Gürcüstan əlaqələrinin sürətlə inkişaf etdiyini vurğulayan baş nazir Artur Rasi-zadə bu səfərin də qarşılıqlı faydalı əməkdaşlığın genişlənməsinə təkan verəcəyinə əmin olduğunu bildirib. Baş nazir iki dost ölkə arasında sabit qarşılıqlı faydalı əməkdaşlığın qurulduğunu söyləyib, bu əlaqələrin daha da möhkəmləndirilməsi üçün bütün lazımi addımların atılacağına əminliyini ifadə edib.

Ermənistan-Azərbaycan,"Dağlıq Qarabağ" münaqişəsinə toxunan A.Rasi-zadə problemin beynəlxalq hüquq normaları çərçivəsində, Azərbaycanın ərazi bütövlüyü və sərhədlərinin toxunulmazlığı prinsipləri əsasında həllinin vacibliyini diqqətə çatdırıb.

İki ölkə arasında strateji tərəfdaşlığın önəmini vurğulayan Giorgi Kvirikaşvili Gürcüstanın hər zaman Azərbaycan ilə əməkdaşlıqda maraqlı olduğunu deyib. Regiondakı mövcud problemlərdən bəhs edən Gürcüstanın baş nazirinin müavini bildirib ki, bölgədə sabitliyin bərqərar olması iki ölkənin inkişafı üçün vacib şərtlərdəndir. Qonaq, həmçinin yüksək səviyyəli qarşılıqlı səfərlərin Azərbaycanla Gürcüstan arasında münasibətlərin daha da inkişafına təkan verəcəyini qeyd edib.

Görüşdə qarşılıqlı maraq doğuran məsələlər ətrafında fikir mübadiləsi aparılıb.

Azərbaycan Prezidenti İlham Əliyev oktyabrın 19-da Gürcüstanın Baş nazirinin müavini, xarici işlər naziri Giorgi Kvirikaşvilini qəbul edib.

"Dalğa TV" xəbər verir ki,Gürcüstanın Baş nazirinin müavini, xarici işlər naziri Giorgi Kvirikaşvili ilk rəsmi səfərini məhz Azərbaycana etməsindən məmnunluğunu bildirib. İkitərəfli münasibətlərin yüksək səviyyədə olduğunu deyən Giorgi Kvirikaşvili iki ölkə arasında əməkdaşlığın müxtəlif sahələrdə inkişaf etdirilməsinin əhəmiyyətini vurğulayıb.

Prezident İlham Əliyev Gürcüstanın xarici işlər naziri vəzifəsində Giorgi Kvirikaşvilinin ilk xarici səfərini Azərbaycana etməsini iki ;ölkə arasında dostluq və qardaşlıq münasibətlərinin yaxşı göstəricisi kimi dəyərləndirib. Azərbaycan-Gürcüstan əməkdaşlığının siyasi, iqtisadi, humanitar və digər istiqamətlərdə fəal şəkildə davam etdirilməsinin zəruriliyini vurğulayan Prezident İlham Əliyev bu əməkdaşlığın iki ölkəni birləşdirən irimiqyaslı nəqliyyat, energetika və iqtisadi layihələrin həyata keçirilməsi baxımından əhəmiyyətini qeyd edib.

Görüşdə birgə regional layihələrin, o cümlədən "Cənub" qaz dəhlizi və Bakı-Tbilisi-Qars dəmir yolu layihələrinin beynəlxalq əhəmiyyətindən danışıldı, bu layihələrin icrası ilə bağlı koordinasiya məsələləri ətrafında fikir mübadiləsi aparılıb.

Türkiyədə səfərdə olan Almaniya kansleri Angela Merkel bu ölkənin prezidenti Rəcəb Tayyip Ərdoğan və baş nazir Əhməd Davudoğlu ilə görüşüb.

"Dalğa TV"nin Türkiyənin Anadolu Agentliyinə istinadən verdiyi xəbərə görə, görüşdən sonra keçirilən mətbuat konfransında Türkiyə prezidenti qeyd edib ki, əsas müzakirə mövzusu terrora qarşı mübarizə olub: "Önəmli müzakirələrdən biri də qaçqınların Türkiyədəki durumu və Qərbə axını ilə bağlı oldu".

Ərdoğan görüşdə "terror təşkilatlarına qarşı birgə hərəkət etməyin lazımlılığı" barədə də danışdıqlarını qeyd edib.

Merkel də öz növbəsində Türkiyənin bu günə qədər 2 milyondan artıq qaçqın qəbul etdiyini xatırladıb. O deyib ki, qaçqın axınının artacağını, bu axının Türkiyə üzərindən Avropa Birliyinə də yönələcəyini görmək mümkündü: ";Bu məsələdə Türkiyənin yükünü mütləq birlikdə üstlənməyin lazım olduğunu qeyd edirik".

Angela Merkel baş nazir Əhməd Davudoğlu ilə də bir saat 15 dəqiqə sürən təkbətək görüş keçirib.

Bu gün Azərbaycan prezidenti İlham Əliyev hüquq-mühafizə orqanlarının rəhbərləri ilə fövqəladə toplantı keçirib.

"Dalğa TV" xəbər verir ki, "Qafqazinfo"ya daxil olan məlumata görə, bu gün bazar günü olmasına baxmayaraq dövlət başçısı işə çıxıb.

Məlumatlara görə, toplantı Prezident Adminstrasiyasında Dövlət Təhlükəsizlik Şurasının üzvlərinin iştirakı ilə baş tutub.

Toplantıda sabiq milli təhlükəsizlik naziri Eldar Mahmudovun vəzifədən azad edilməsinin səbəbləri, Azərbaycan dövlətinin təhlükəsizliyi ilə bağlı məsələlər müzakirə olunub.

Digər məlumatlara görə, dünən prezident Eldar Mahmudovu vəzifədən azad etməzdən əvvəl onu şəxsən qəbul edib və nazirin yarıtmaz fəaliyyəti faktlarla qarşısına qoyulub.

Məhz həmin ərəfədə də Xüsusi Dövlət Mühafizə Xidmətinin əməkdaşları tərəfindən MTN-də əməliyyat keçirildiyi qeyd edilir.

Onu da əlavə edək ki, bu hadisələr dövlət başçısının Qazaxıstan səfərindən geri qayıtmasından dərhal sonra baş verib.

Bütün bunlarla bağlı dövlət qurumları tərəfindən xüsusi açıqlamanın veriləcəyi gözlənilir. Azərbaycan ictimaiyyəti nazirin işdən çıxarılmasının təfərrüatları və baş verənlərlə bağlı məlumatlandırılacaq.

Gürcüstanın yeni təyin olunan xarici işlər naziri Georgi Kvirikaşvilinin sabahdan Azərbaycana rəsmi səfəri başlayır.

Xarici İşlər Naziriyindən mətbuat xidmətindən "Dalğa TV"ə verilən məlumata görə, səfər zamanı ikitərəfli əlaqələrin inkişafı barəsində danışıqlar aparılacaq.

Qeyd edək ki, Georgi Kvirikaşvili xarici işlər naziri təyin olunduqdan sonra ilk xarici səfərini Azərbaycana edir.

Azərbaycan prezidenti İlham Əliyevin 17 oktyabr sərəncamı ilə milli təhlükəsizlik naziri Eldar Mahmudovun qəflətən vəzifəsindən çıxarılması ölkədə sensasiya kimi qəbul edilib.

"Dalğa TV" xəbər verir ki, xəbər sürətlə tirajlandıqdan sonra məsələ ətrafında müxtəlif fərziyyələr yayılmağa başlayıb. Bir sıra xəbər saytları şəxsi mənbələrinə əsaslanaraq hətta sabiq nazirin və ətrafındakı bir neçə generalın həbs edildiyini, digər qrupu isə eks-MTN şefinin daha yüksək posta-baş nazir postuna gətiriləcəyini yazırlar.

Strateq.az saxlanıldığı iddia edilən şəxslərin adlarını da açıqlayıb. Saytın yaydığı məlumata görə, nazir vəzifəsindən çıxarıldığı saatlarda Xüsusi Dövlət Mühafizə Xidmətinin, Daxili İşlər Nazirliyinin və Baş Prokurorluğun birgə əməliyyat qrupu MTN-in Monitorinq Xidmətinin rəisi general Teymur Quliyevi və Antiterror Mərkəzinin rəis müavini İlqar Əliyevi, eləcə də daha bir neçə yüksək rütbəli əməkdaşını həbs ediblər.

***

Məsələdə digər bir nüans da diqqəti çəkir. Qaynar.info Eldar Mahmudovun vəzifədən azad edilməsindən sonra eks-nazirin qudası Azərbaycan Beynəlxalq Bankının idarə heyətinin keçmiş sədri Cahangir Hacıyevın həbs edilməsi xəbərini yayıb.

Sayt iddia edir ki, Cahangir Hacıyevin indiyə kimi həbs olunmamasına səbəb Eldar Mahmudov olub. Belə ki, Eldar Mahmudov şəxsi nüfuzundan istifadə edərək, qudasını həbsdən yayındıra bilib.

Mənbə son olaraq bildirir ki, yaxın saatlarda məlumat rəsmi təsdiqini tapacaq.

Qeyd: Eldar Mahmudovun oğlu ilə Cahangir Hacıyevin qızının toyu 2012-ci ilin noyabrda baş tutub.

***

“Qafqazinfo”nun əldə etdiyi məlumatlara görə isə vəzifəsindən azad olunan Eldar Mahmudovun həbsi ilə bağlı xəbər həqiqətə uyğun olmasa da nazirikdə xüsusi əməliyyatın keçirildiyi dəqiqdir.

Belə ki, dünən Xüsusi Dövlət Mühafizə Xidmətinin əməkdaşları MTN-də əməliyyat keçiriblər. Və hal-hazırda da nazirlik sözügedən qurumun əməkdaşlarının nəzarəti altında saxlanılır. Lakin bu əməliyyatlar nəticəsində kimlərin saxlanıldığı və əməliyyatın məhz hansı səbəbdən həyata keçirildiyi haqda ictimaiyyətə rəsmi və qeyri-rəsmi heç bir bilgi sızdırılmayıb.

MTN-də baş verənlərlə bağlı cinayət işinin açıldığı da artıq dəqiqləşib. Dünən və bu gün yaşananlarla bağlı Respublika Prokurorluğunun xüsusi bəyanatla çıxış edəcəyi gözlənilir. İctimaiyyət MTN-də nə baş verənlərlə bağlı rəsmi qurumlar vasitəsilə məlumatlandırılacaq.

“Qafqazinfo son olaraq onu da öyrənə bilib ki, artıq dünəndən telefon danışıqlarının dinlənilməsi ilə bağlı müstəsna səlahiyyət MTN-dən alınıb. Amma bu səlahiyyətin MTN-dən bir günlük-sözügedən əməliyyata görə və ya bir dəfəlik alınması isə hələlik məlum deyil.