Azərbaycanda keçiriləcək parlament seçkilərini müşahidə etmək üçün İsraildən gələn nümayəndə heyətinin tərkibində İsrailin keçmiş xarici işlər naziri, "Naş dom- İsrail" partiyasının lideri Aviqdor Liberman da var.

"Dalğa TV" "Seçki-2015"ə istinadən verdiyi məlumata görə, bu barədə "AZİZ" İsrail- Azərbaycan Beynəlxalq Assosiasiyasının baş direktoru Lev Spivak məlumat verib.

Onun sözlərinə görə, İsrail nümayəndə heyəti oktyabrın 30-da Bakıya gələcək.

Nümayəndə heyətinin tərkibinə 4 nəfər- İsrailin keçmiş xarici işlər naziri, "Naş dom- İsrail" partiyasının lideri Aviqdor Liberman, keçmiş nazir Sofa Landver, İsrail parlamentinin üzvü Konstantin Razbozov, İsrailin ABŞ-dakı keçmiş səfiri Maykl Oren daxildir.

Qeyd edək ki, noyabrın 2-də İsrail nümayəndə heyəti seçki müşahidələrinin nəticəsi ilə bağlı mətbuat konfransı keçirməyi də planlaşdırır.

Sabah Avstraliyadan başlayaraq Cənubi Sudana qədər dünyanın bir çox ölkələrində 250-dən çox teatr, muzey və digər memarlıq nümunələri BMT-nin rəsmi rəngi olan mavi rəngə boyanacaq.

APA-nın qurumun saytına istinadən verdiyi xəbərə görə, “dünyanı mavi rəngə boya” adlı kampaniya ilə BMT-nin 70 illik tədbirlərinə start veriləcək.

Kampaniyaya Yeni Zelandiyadan başlanılacaq.

BMT-nin Nyu-Yorkdakı iqamətgahı isə 23-24 oktyabrda mavi rəngə boyanacaq.

“BMT Nizamnaməsinin həmişəyaşar prinsipləri bizim bələdçimiz olacaq. Bizim ümumi vəzifəmiz xalqlarımıza xidmət etməkdir”, - deyə BMT baş katibi Pan Gi Mun bəyan edib.

Sidney Operası, Sankt-Peterburqdakı Ermitaj, Nyu-Yorkdakı Empire State Building, Böyük Çin Səddi, Gizadakı piramidalar və İordaniyadakı Petra şəhərinin də mavi rəngə boyanacağı gözlənilir.

BMT-nin 70 illiyi ilə bağlı “daha güclü BMT, daha güclü dünya” şüarı altında tədbirlər keçirilir.

Qeyd edək ki, Azərbaycanda da Heydər Əliyev Mərkəzinin binası oktyabrın 24-də - BMT günündə bu aksiya çərçivəsində mavi rəngə boyanacaq.

Bir neçə gün öncə həbs edilən Azərbaycan Milli Təhlükəsizlik Nazirliyinin (MTN) Antiterror Mərkəzinin sabiq rəis müavini İlqar Əliyevin yerinə təyinat olub.

Dalga TV-nin  Qafqazinfo-ya istinadən məlumatına görə, bu vəzifəyə nazirliyin Anti-Terror Mərkəzinin şöbə rəisi Rauf Xələfov gətirilib. Təyinatla bağlı əmr bu gün verilib.

Qeyd edək ki, həbsdə olan İlqar Əliyevin barəsində bu gün məhkəmə qərarından apelyasiya şikayəti verilib. Onun şikayətinə yaxın günlərdə baxılacaq.

Xatırladaq ki, Bir neçə gün əvvəl MTN Monitorinq Mərkəzinin rəisi Teymur Quliyev, Antiterror Mərkəzinin rəis müavini İlqar Əliyev, Transmilli Mütəşəkkil Cinayətkarlıqla Mübarizə Baş İdarəsinin rəis müavini Füzuli Əliyev, MTN Monitorinq Mərkəzinin əməkdaşları Fərhad Atayev, Anar Şirəliyev, Eşqin Əliyev və Elşad Əzizov saxlanılıblar. Səbail Rayon Məhkəməsinin qərarı ilə onların barəsində həbs qətimkan tədbiri seçilib.

Onlar Cinayət Məcəlləsinin 308.2, 309.1 və 302.2-ci maddələri ilə təqsirləndirilirlər. Hazırda iş üzrə istintaq-əməliyyat tədbirləri davam etdirilir.

MTN şefi Eldar Mahmudov isə oktyabrın 17-də, prezidentin sərəncamı ilə milli təhlükəsizlik naziri vəzifəsindən azad edilib.

Rusiya prezidenti Vladimir Putin bildirib ki, Rusiyanın Suriyada həyata keçirdiyi əməliyyatın yeganə məqsədi sülhün bərqərar olmasına dəstək verməkdir.

"Dalğa TV"nin Apa-ya istinadən məlumatına görə, V.Putin Rusiyanın Suriyada keçirdiyi əməliyyatın tam legitim olduğunu qeyd edib.

"Rəsmi Dəməşqin dəstək barədə müraciətindən sonra biz bu ölkədə hərbi əməliyyat keçirməyə qərar verdik. Bir daha qeyd edirəm ki, bu əməliyyat tam legitimdir. Onun yeganə məqsədi - sülhün bərqərar olmasına dəstək verməkdir , deyə Putin bildirib.

Rusiya prezidenti Rusiya aviasiyasının əməliyyatlarının rəsmi Dəməşqə siyasi nizamlanma sahəsində növbəti addımların atılması üçün zəmin yaradacağına ümidvar olduğunu bildirib.

Modern.az xəbər verir ki, Prezident İlham Əliyev Mədət Quliyevə general-leytenant ali hərbi rütbəsinin verilməsi haqqında sərəncam imzalayıb.

Sərəncamda deyilir: "Azərbaycan Respublikası milli təhlükəsizlik nazirinin birinci müavini Mədət Qəzənfər oğlu Quliyevə general-leytenant ali hərbi rütbəsi verilsin".

Mədət Quliyev oktyabrın 20-də Azərbaycan Respublikası milli təhlükəsizlik nazirinin birinci müavini təyin edilib.
Mədət Quliyev bu təyinatadək Azərbaycan Respublikası Ədliyyə Nazirinin müavini, Penitensiar xidmətin rəisi vəzifəsini tuturdu.

Milli təhlükəsizlik naziri Eldar Mahmudov deşifrə edilərək işdən qovulandan sonra onun komandasının çirkin əməlləri ilə bağlı məlumatlar yayılmaqdadır.

"Dalğa TV" "Qafqazinfo"ya istinadən xəbər verir ki, bir neçə gündür ki, mətbuatda E.Mahmudovun dəstəsinin sahibkarlara qarşı törətdikləri qanunsuz əməllər işıqlandırılır. Sahibkarlar bir-birinin ardınca mətbuata çıxaraq sözügedən dəstə tərəfindən məruz qaldıqları haqsızlıqları açıqlayırlar. Məlumatlara görə, artıq bununla bağlı xüsusi bir qrup da yaradılıb, şikayətçi iş adamları, zərəçəkənlərin ərizələri alınır və onlardan alınan rüşvətlər hesablanır.

Hətta "Qafqazinfo" həmin iş adamlarından bəzilərinin adlarını dəqiqləşdirə bilib. Məlumata görə, bir neçə il əvvəl məhz MTN tərəfindən həbs edilən, ciddi haqsızlıqlarla üzləşən, demək olar ki, bütün biznesinin yerlə-yeksan edildiyi iş adamlarından biri də "Texnika Bank"ın keçmiş rəhbəri Etibar Əliyevdir. Xatırladaq ki, o vaxt Azərbaycanın ən böyük banklarından biri olan "Texnika Bank" rəhbəri gözlənilmədən həbs edilmiş, təxminən 9 aylıq həbsdən sonra azadlığa buraxılsa da, bankı əlindən alınmışdı. Məhz o vaxt "Texnika Bank" Eldar Mahmudovun qudası Cahangir Hacıyevə peşkəş edilmiş, adı da dəyişdirilərək "Bank Technique" adlandırılmışdı.

E.Əliyevin dönəmində 1000 nəfərdən artıq işçisi, Azərbaycanın bütün bölgələrində filialları, bir neçə ölkədə isə nümayəndəlikləri olan "Bank Technique" cəmi iki il ərzində faktiki olara rəzil gününə salınıb və bu gün bank defolt vəziyyətindədir. İşçilərinin 80 faizindən çoxu ixtisar olunan bankın rəhbəri də bir neçə gün əvvəl istefa verib.

Müştərilər qarşısında öhdəliklərini yerinə yetirə bilməyən "Bank Technique" vətəndaşların əmanətlərini qaytarmaqda çətinlik çəkir. Bankın bu vəziyyətinin ölkə rəhbərliyini ciddi narahat etdiyi qeyd olunur. Bildirilir ki, artıq "Bank Technique"ın fəaliyyətinin bərpa olunması və əvvəlki sahibi - Etibar Əliyevə qaytarılması tapşırılıb.

E.Əliyev və onun çapında olan iş adamları ilə yeni yaradılan komissiya vasitəsilə əlaqə saxlanılır, onların hər biri administrasiyaya çağırılaraq problemləri öyrənilir. Normal fəaliyyət göstərmələri üçün bütün şəraitin yaradılacağına zəmanət verilir. İş adamlarına bütün bunların prezident İlham Əliyevin göstərişi əsasında həyata keçirildiyi bildirilir.

Eyni zamanda, son on ildə MTN sıralarından haqsız olaraq çıxarılan kadrlar da üzə çıxmaqdadır. Onların da şikayətlərinin dinləniləcəyi və obyektiv olaraq ölçü götürüləcəyi gözlənilir.

Bu arada, belə kadrlardan biri "Qafqazinfo"ya müraciət edib. Həmin şəxs hazırda saxlanılıb-saxlanılmadığı dəqiq bilinməyən, lakin E.Mahmudovun törətdiyi qanunazidd hərəkətlərin əsas iştirakçısı olan MTN generalı Akif Çovdarovun bu sistemdə işləyən qohumlarından şikayətlənib. Keçmiş MTN-çi bildirib ki, A.Çovdarovun bacısının kürəkəni 1972-ci il təvəllüdlü Rafiq Hümbətov gənc olmasına baxmayaraq, hələ 2010-cu ildə gözlənilmədən Astaraya MTN-nin rəisi təyin olunub:

"Həmin vaxt mən Astarada Rafiq Hümbətovla işləyirdim. Bu adamın ayıq günü olmurdu. Demək olar ki, hər gün içirdi. Astaranın Kələdəhnə kəndində "Ceyhun" restoranı vardı. Bura faktiki olaraq əxlaqsızlıq yuvası kimi fəaliyyət göstərirdi. Rafiqin günü işdə yox, burada keçirdi. Bir dəfə içkili şəkildə idarə etdiyi xidməti avtomobillə də inək vurmuşdu. Onun əməlləri o qədər narahatlıq yaratmışdı ki, həmin vaxt Astara icra başçısı olan Mahir Quliyev iclas keçirdi və bizim rəisə xəbərdarlıq etdi. Lakin heç nə onun vecinə deyildi. Həmin vaxt onun rütbəsi polkovnik-leytenant idi".

Şikayətçi bildirib ki, 2015-ci ilin fevralında R.Hümbətov Bakının Xətai rayon MTN-ə rəis gətirilib. Hazırda da fəaliyyətini orada davam etdirir.